Reykjanesbær í viðræðum vegna 800 milljóna króna fjármagnstekjuskatts

Reykjanesbær á í viðræðum við fjármálaráðuneytið vegna ógreidds fjármagnstekjuskatts vegna sölu á HS Orku. Árni Sigfússon, bæjarstjóri Reykjanesbæjar, segir í samtali við Viðskiptablaðið að viðræður standi nú yfir og snúist um hvernig hægt sé að fresta greiðslum af fjármagnstekjunum.

Upphæðin nemur um 800 milljónum króna.

Síðastliðinn þriðjudag barst tilkynning til Kauphallarinnar frá Reykjanesbæ þar sem sagði að bærinn eigi enn í viðræðum við kröfuhafa, svo sem DePfa og fjármálaráðuneytið, vegna dráttar á greiðslum. Bæjarfélagið hefur átt í fjárhagserfiðleikum en í september var skuldabréfaflokkur útgefinn af bænum settur á athugunarlista.