Rekstur Grindavíkurbæjar fer batnandi

Grindavíkurbær hefur svarað beiðni Eftirlitsnefndar um fjármál sveitarfélaga um greinargerð vegna hallareksturs ársins 2010.

Bæjarráð Grindavíkur vekur athygli á því í svari sínu að rekstur Grindavíkurbæjar hefur verið að batna og unnið hefur verið að umtalsverðri hagræðingu. Á árinu 2010 var halli á rekstri á rekstri Grindavíkurbæjar um 83,7 milljónir, en áætlað var að hallinn yrði 112 milljónir. Hallinn var fjármagnaður með eiginfjárframlagi.

Bæjarráð vísar til þess að bæjarstjórn hefur samþykkt skýr markmið í rekstri A-hluta Grindavíkurbæjar sem voru höfð að leiðarljósi við gerð fjárhagsáætlunar árið 2011 og þriggja ára áætlunar 2012-2014.

Gert er ráð fyrir um 8,5 milljóna afgangi í fjárhagsáætlun ársins 2011 og í þriggja ára áætlun er gert ráð fyrir áframhaldandi bættum rekstri. Á árinu 2011 hafa verið greidd upp lán að fjárhæð um 1.750 milljónir króna sem hafa breytt grunnforsendum rekstrar Grindavíkurbæjar.