Ólafur Thordersen annar tveggja aðaleigenda Íslenska gámafélagsins

Félag í eigu stofnenda Íslenska gámafélagsins, stjórnarformannsins Jóns Þóris Frantzsonar og Njarðvíkingsins Ólafs Thordersen, hefur fest kaup á meirihluta hlutafjár í félaginu og dótturfélagi þess, Vélamiðstöðvarinnar. Kaupverðið er trúnaðarmál.

Jón Þórir hefur í dag tekið aftur við sem forstjóri félagsins og Ólafur við stöðu aðstoðarforstjóra, en hann var áður framkvæmdastjóri þjónustusviðs Íslenska gámafélagsins. Eftir viðskiptin eru þeir Jón Þórir Frantzson og Ólafur Thordersen jafnframt stærstu einstöku hluthafar félagsins. Ólafur á sögu í fyrirtækjarekstri á Suðurnesjum en faðir hans og fjölskylda stofnuðu á sínum tíma Njarðtak sem sá um sorphirðu á Suðurnesjum í mörg ár.

Söluferli Íslenska gámafélagsins hófst í sumar þegar boðnir voru til sölu allir hlutir í félaginu í eigu eignarhaldsfélagsins Gufuness og framtakssjóðsins Auðar I slf. Fyrirtækjaráðgjöf Kviku hafði umsjón með söluferlinu.

„Þessi niðurstaða er mér mikið ánægjuefni og má kannski segja að fyrirtækið sé komið aftur heim, í hendur okkar sem stóðu að stofnun þess á sínum tíma. Ég hlakka til að halda áfram því góða og mikilvæga starfi sem unnið er hjá Íslenska gámafélaginu og vinna að frekari framgangi og uppbyggingu félagsins, með því góða fólki sem hér starfar,“ segir Jón Þórir Frantzson.

Hjá Íslenska gámafélaginu og dótturfélögum þess starfa um 300 manns, en aðalstarfsemi Íslenska gámafélagsins er almenn sorphirða og útleiga á gámum, bifreiðum og tækjum. Velta félagsins er tæpir 5 milljarðar króna, en heildareignir þess námu 5,5 milljörðum í lok árs 2017. Viðskiptavinir eru um 4.500 talsins og samanstanda af 2.800 fyrirtækjum og stofnunum, 1.700 einstaklingum og 23 sveitarfélögum.