Office1 opnar í Reykjanesbæ

Office1 opnar á mánudaginn verslun í verslunarmiðstöðinni Krossmóa í Reykjanesbæ. Office1 rekur fyrir sjö verslanir á landinu með skóla- og skrifstofuvöru. Þar af fjórar á höfuðborgarsvæðinu.
Verslun Office1 í Reykjanesbæ verður rekin í 2-3 mánuði til að byrja með. Ef undirtektir verða góðar kemur vel til greina að halda úti verslun á Suðurnesjum. Það velti allt á heimamönnum, segir Erling Ingason, verkefnastjóri hjá Office1
„Við hlökkum til að þjónusta þetta svæði og bjóða upp á betri verð en hafa þekkst. Við opnum mánudaginn 9. ágúst og það verða mjög góð opnunartilboð í gangi,“ sagði Erling ennfremur.

Ritfangaverslanir búa sig nú undir mesta annatíma ársins en grunnskólar verða settir eftir um það bil hálfan mánuð. Grunnskólar á Suðurnesjum hafa margir nú þegar birt innkaupalistana á heimasíðum sínum, s.s. Akurskóli og Holtaskóli.