Ódýrasta bensínið á Suðurnesjum

Olíuverslun Íslands flutti um síðustu mánaðarmót í nýtt húsnæði við Fitjabakka 2-4. Nýja húsnæðið breytir miklu fyrir starfsfólk verslunarinnar að sögn Steinars Sigtryggssonar, forstjóra Olís í Reykjanesbæ.
„Við vorum í mun minna húsnæði á Hafnarbraut 6. Núna er öll vinnuaðstaða mun betri og viðskipti hafa aukist mikið“, segir Steinar. Stöðin hefur fenið svo góðar viðtökur að nausynlegt er að fjölga starfsfólki í verslunina við Fitjabakka. Umsóknir liggja fyrir á staðnum. Starfsmenn verslunarinnar við Fitjabakka eru 4 en á Olísstöðinni í Keflavík vinna 17 manns. Rekstur Olís hefur aukist mjög að undanförnu en fyrir stuttu opnaði Olís ÓB-stöð við Fitjabakka. „Við vitum vel að bensín er ekki ódýrt en við erum ódýrastir á Suðurnesjum“, segir Steinar og bætir við að ÓB sé ekki í mikilli samkeppni við stöðvarnar sem eru fyrir en mikil samkeppni er hjá sjálfsafgreiðslustöðvum á höfuðborgarsvæðinu. „Það var greinilega löngu tímabært að koma upp svona stöð hér. ÓB býður sama verð og ódýru bensínstöðvarnar í Reykjavík.“
Framkvæmdum við húsnæðið er ekki að fullu lokið en stefnt er að því að vígja stöðina um næstu mánaðarmót. Vöruúrval hefur líka aukist en fyrir stuttu eignaðist Olíuverslun Íslands verslunina Ellingsen. Olís býður nú upp á vörur frá Ellingsen og Blindrfélaginu auk fjölda annarra. Olís eru umboðsaðilar Charbroil á Íslandi og segir Steinar að það hafi selst mikið af grillum í samvinnu við Hagkaup, Byko og Samkaup.