Nýr einstaklingssérfræðingur í Landsbankanum í Keflavík

Berglind Rut Hauksdóttir hefur nýlega tekið við starfi sérfræðings í einstaklingsviðskiptum í útibúi Landsbankans í Keflavík. Hún mun hafa umsjón með sölu-og markaðsstarfi bankans á starfssvæði útibúsins, sem nær til Reykjanesbæjar, Sandgerðis og Keflavíkurflugvallarsvæðisins.

Í því felst meðal annars að hún mun verða tengiliður útibúsins við sölu- og markaðssvið Landsbankans varðandi flest þau málefni sem snúa að þjónustu og sölu til einstaklinga. Sparnaður einstaklinga og lögaðila hefur verið mjög vaxandi liðin misseri og mun Berglind hafa yfirsjón með þætti lífeyrissparnaðar og verðbréfaviðskipta í útibúinu. Nýtur hún í þessum efnum bakstuðnings sérfræðinga í höfuðstöðvum bankans. Þá mun hún sjá um fræðslu til starfsmanna um vörur og þjónustu bankans svo og gerð markaðsáætlana fyrir þetta svæði.

Berglind segir mjög áhugavert að takast á við þessi verkefni hjá Landsbankanum og finni strax fyrir ánægju viðskiptavina með þessa auknu þjónustu bankans. Landsbankinn hefur verið í mikilli sókn, bæði á landsvísu en ekkert síður hér á Reykjanesi og hafa umsvif viðskipta aukist umtalsvert á liðnum misserum. Fjölgun framlínufólks í þjónustunni, s.s. þjónustufulltrúa og með nýrri stöðu sérfræðings í einstaklingsviðskiptum sé ánægjulegt svar bankans til að veita áfram framúrskarandi þjónustu til viðskiptavina sinna.