Ný BLUE LAGOON verslun og spa þjónusta í Flugstöð Leifs Eiríkssonar

Bláa Lónið hf og Flugstöð Leifs Eiríkssonar hf. hafa gert með sér samning um rekstur verslunar með BLUE LAGOON vörur og þjónustu í flugstöðinni. Grímur Sæmundsen forstjóri Bláa Lónsins og Höskuldur Ásgeirsson forstjóri Flugstöðvar Leifs Eiríkssonar hafa undirritað samning þess efnis.

Bláa Lónið hefur um skeið rekið eigin verslun “búð í búð”  innan svæðis Íslensks markaðar. Með stækkun og breytingum á flugstöðinni fær Bláa Lónið hf. til umráða rúmgott svæði undir verslunina næsta vor. Aukið framboð BLUE LAGOON vara og þjónustu verður í boði í nýrri verslun Bláa Lónsins hf., en nudd og léttar spa meðferðir er meðal þeirra nýjunga sem munu standa gestum flugstöðvarinnar til boða. Erlendis færist það í vöxt að spa þjónusta sé í boði í flugstöðvum.

BLUE LAGOON ICELAND er eitt þekktasta vörumerki Íslands og er verslunin í Flugstöðinni jákvætt skref fyrir Bláa Lónið og Flugstöðina. Samningurinn er einn þáttur í að auka fjölbreytni verslunar í flugstöðvarbyggingunni og veita fleiri einkaaðilum kost á að vera með eigin rekstur á svæðinu.  Auk þess sem hann er liður í að leggja rekstur Íslensks markaðar niður í núverandi mynd.

Auk verslunarinnar í Flugstöðinni rekur Bláa Lónið verslanir í Bláa Lóninu – heilsulind;  í Ingólfsnausti að Aðalstræti 2 í Reykjavík auk netverslunar á www.bluelagoon.is

Af heimasíðu flugstöðvarinnar. Á myndinni sjást þeir Höskuldur og Grímur handsala samninginn