Nettó opnar á Iðavöllum

Ný Nettó verslun á Iðavöllum í Reykjanesbæ verður opnuð næstkomandi föstudag, 13. maí klukkan 12:00.
Þar var áður rekin Kaskóverslun. Nettó verslunin verður byggð upp í sama stíl og aðrar Nettó verslanir þar sem áhersla er lögð á lágt verð og mikið vöruval auk þess sem meira verður um eigin innflutning á vegum Nettó.

Í nýju Nettó versluninni verður sett upp úðunarkerfi í grænmetistorgi sem viðheldur lengur ferskleika ávaxta og grænmetis auk þess sem boðið verður upp á „bakað á staðnum“ sem notið hefur mikilla vinsælda í Nettó verslunum, enda lagt upp með mikil gæði, lágt verð og regluleg tilboð.

Að sögn Gunnars Egils Sigurðssonar, forstöðumanns verslunarsviðs Samkaupa, verður með breytingunum á Iðavöllum komið til móts við þarfir viðskiptavina og aukinn fjölda ferðamann sem leggja leið sína í Reykjanesbæ.

Í tilefni dagsins munu forsvarsmenn Samkaupa undirrita styrktarsamning við meistaraflokk kvenna í knattspyrnu í Keflavík, Golfklúbb Suðurnesja og Púttklúbb Suðurnesja.

Bæjarstjóri Reykjanesbæjar, Kjartan Már Kjartansson, opnar búðina formlega klukkan 12:00 og verður boðið upp á kaffi og köku.