Mikilvægt að huga að öryggisreglum

-segir Magnús Haraldsson í Sparisjóðnum í Keflavík

Undanfarið hefur talsvert verið rætt um öryggismál í bankastofnunum. Magnús Haraldsson, skrifstofustjóri og staðgengill Sparisjóðsstjóra í Sparisjóðnum í Keflavík segir miklvægt að minna á öryggisreglur sem og leiðir sem viðskiptavinir geta farið til að lágmarka hættu á misnotkun fjármuna.
„Þegar beðið er um millifærslur í gegnum síma þarf viðskiptavinurinn að geta gert óyggjandi grein fyrir sér með því að gefa m.a. upp reikningsnúmer og leyniorð. Ef einhver vafi leikur á um viðkomandi þá er honum neitað um millifærslu. Viðskiptavinum er þá bent á aðrar millifærsluleiðir, eins og t.d. heimabankann, þjónustusímann, GSM bankann, eða að heimsækja afgreiðslur Sparisjóðsins“, segir Magnús.Passa upp á númerin
Hann segir að viðskiptavinum sé bent á að varðveita vel PIN númer greiðslukorta og leyninúmer heimabanka og þjónustusíma. Ekki skal undir nokkrum kringumstæðum gefa öðrum upp þessi númer því það býður uppá möguleika á misnotkun reikninga. Þess ber þó að geta að heimabankinn er starfræktur samkvæmt fullkomnustu öryggisstöðlum sem til eru. Við notkun heimabanka þarf að gefa upp aðgangsorð við hverja innskráningu og eins þarf að gefa upp sérstakt leyniorð við úttekt af hverjum reikningi. Má segja að öruggasta leiðin til útgreiðslu af reikningum er í gegnum heimabanka eða að heimsækja afgreiðslur Sparisjóðsins.
Kortamisferli hafa aukist í seinni tíð og er netið ekki eini sökudólgurinn. Óprúttnir aðilar geta komist yfir kortanúmer með öðrum hætti. Til að koma í veg fyrir að kortanúmer komist í hendur óviðkomandi mætti t.d. benda á að óvarlegt er að skilja eftir kvittanir í kringum hraðbanka eða láta kvittanir verslana með kortanúmeri liggja á glámbekk.

Fyllsta öryggis gætt
Hjá Sparisjóðnum í Keflavík er öryggis á afgreiðslustöðum gætt með fullkomnum öryggismyndavélum og mjög hæfu starfsfólki. Í málum sem upp hafa komið undanfarið hefur það sýnt sig að þessir þættir, athygli starfsfólks og myndir úr öryggismyndavélum hafa gegnt lykilhlutverki við lausn mála.
„Sparisjóðurinn þarf að gæta fyllsta öryggis í umgengni við þá fjármuni er stofnunin annast. Því eru viðskiptavinir beðnir að sýna því skilning ef ekki reynist mögulegt að millifæra upphæðir símleiðis eða ef starfsfólk þarf að beita öryggisreglum á annan hátt. Er þetta fyrst og fremst gert til að gæta hags viðskiptavina. Þá er að lokum rétt að benda á að ef grunur vaknar um misferli þá er er atvikið tilkynnt til viðeigandi yfirvalda“, sagði Magnús Haraldsson.