Methagnaður SpKef á fyrri helmingi árs – Stefnt að útrás á Höfuðborgarsvæðinu

Hagnaður Sparisjóðsins í Keflavík á fyrri helmingi árins margfaldaðist miðað við árangur síðasta árs, en hann nam nú um 5.644 milljónum króna fyrir skatta, samanborið við 1.244,6 m. kr. á sama tímabili 2006, og 4.637 milljónum eftir skatta. Það er aukning um 338,7% frá fyrstu sex mánuðunum árið 2006 og langmesti hagnaður sparisjóðsins á árshelmingi frá upphafi.

Arðsemi eiginfjár var 63,8% sem er ein sú mesta frá stofnun sjóðsins.

Hreinar rekstrartekjur jukust um 4.579,4 m. kr. og voru 6.456,2 m.kr. á tímabilinu. Munar þar mest um tekjur af veltufjáreignum og öðrum fjáreignum á gangvirði í gegnum rekstur. Þá er einnig mikil aukning á hlutdeild í afkomu hlutdeildarfélaga. Er þar að langmestu leyti um að ræða hækkun á hlut SpKef í Exista og félögum tengdum því fyrirtæki, en Geirmundur Kristinsson, sparisjóðsstjóri, sagði í samtali við Víkurfréttir að auk þess hefði eign þeirra í öðrum félögum aukist um 7-800 milljónir á milli ára.

Heildarinnlán í Sparisjóðnum ásamt lántöku námu í lok júní 33.903,5 m.kr. og er aukningin því 13,3% á tímabilinu.

Útlán ásamt kröfum námu 38.821,9 m.kr. í lok júní 2007 og höfðu aukist um 7.266,5 m.kr. eða um 23% á fyrstu 6 mánuðum ársins.

Í lok tímabilsins var niðurstöðutala efnahagsreiknings 55.898,5 m.kr. og hafði hún hækkað um 10.888,4 m.kr. eða 24,2% á tímabilinu.

Eigið fé Sparisjóðsins í lok júní nam 14.167,7 m.kr. og hefur eigið fé aukist um 5.449,9 m.kr. eða 62,52%. Inni í því er stofnfjáraukning upp á 700 m. kr. að nafnvirði.

Eiginfjárhlutfall Sparisjóðsins samkvæmt CAD-reglum er 17,3% en var 10,45% á sama tíma árið áður.

Í fréttatilkynningu segir að áætlanir bendi til að afkoman verði góð á árinu 2007.

700 milljóna króna stofnfjárútboð sem farið var í í apríl gekk afar vel og er stefnt af því að bjóða út nýtt stofnfé að nafnvirði 1.000 m. kr. og fer útboðið fram í september n.k.

Þá kemur einnig fram að á næstunni mun nýtt útibú opna í Reykjavík og sagði Geirmundur í samtali við Víkurfréttir að útibúið verði til húsa í Borgartúni og er gert ráð fyrir að það taki til starfa fyrir lok árs.