Kosmos & Kaos með besta vefmiðil landsins

Vefhönnunarfyrirtækið Kosmos & Kaos í Reykjanesbæ hreppti verðlaun fyrir besta vefmiðilinn á Íslensku vefverðlaununum sem voru afhent í gærkvöldi við hátíðlega athöfn í Gamla Bíó. Ragnheiður Elín Árnadóttir, iðnaðar- og viðskiptaráðherra, var heiðursgestur verðlaunahátíðarinnar.

Kosmos & Kaos hlutu samtals sjö tilnefningar fyrir fimm vefsíður að þessu sinni. Fyrirtækið hlaut verðlaun fyrir besta vefmiðil landsins en þar var um að ræða vefsíðuna Vísindavefur.is. Í umsögn um vefinn segir m.a.:

„Vefurinn er einn elsti vefmiðill landsins og nýtur gríðarlegra vinsælda hjá jafnt ungum sem öldnum, en dómnefnd sá ástæðu til að verðlauna vefinn fyrir virðingarverð markmið, einstakt efni og vel heppnaða endurhönnun og framsetningu sem enn frekar styrkir stöðu hans sem einskonar 'institution' sem fáir geta skákað. Vefurinn er hlaðinn spennandi og áhugaverðu efni um allt á milli himins og jarðar, hann er í senn áreiðanlegur, notendavænn og mikilvægur fyrir stóran hluta þjóðarinnar við lausn á fjölbreyttustu verkefnum og spurningum.“