Kjörbúðinni fagnað í Sandgerði
Fyrsta Kjörbúð Samkaupa opnaði í Sandgerði sl. föstudag og óhætt að segja að viðtökurnar hafi verið vonum framar og mættu fjölmargir viðskiptavinir við opnun hennar. Kjörbúðin er nýtt nafn á verslunum Samkaupa-Úrvals og Samkaupa Strax víða á landinu.
Ráðist var í þessa nýju keðja verslana í kjölfara umfangsmikilla viðhorfskannana meðal 4 þúsund viðskiptavina Samkaupa um allt land. Nýja keðjan er hönnuð út frá þörfum og óskum viðskiptavina. Kjörbúðinni er ætlað að þjónusta bæjarbúa með því að bjóða gott úrval, lágt verð og ferskar vörur úr nærumhverfinu á hverjum stað. Með því vill Samkaup gera viðskiptavinum sínum um allt land kleift að versla daglega allar helstu nauðsynjavörur á samkeppnishæfu verði.
Sigrún Árnadóttir, bæjarstjóri Sandgerðis hélt stutta ræðu áður á opnunardegi Kjörbúðarinnar sl. föstudag en viðskiptavinir tóku til við að versla og nýttu sér glæsileg opnunartilboð. Að sögn Gunnars Egils Sigurðssonar hjá Samkaupum var margföld sala í búðinni miðað við hefðbundinn föstudag. Meðal annars seldist hálft tonn af lambalærum en einnig gríðarmikið magn af tilboðsvörum dagsins.
Á föstudaginn verður Kjörbúðin opnuð í Garðinum en þar hefur Samkaup rekið verslun um áratugaskeið. Stefnt er að því að breytingum á verslununum verði lokið fyrir árslok 2017.
