KFC vill byggja stórt í Reykjanesbæ

Hugmyndir Kentucky Fried Chicken um byggingu veitingastaðar í Reykjanesbæ voru kynntar fyrir umhverfis- og skipulagssviði Reykjanesbæjar á fundi í kvöld. Erindi frá KFC Reykjanesbæ gerir ráð fyrir byggingu stærsta KFC staðar landsins á lóð gegnt Samkaup á horni Flugvallarvegar og Hafnargötu/Njarðarbraut. Að sögn Steinþórs Jónssonar, sem á sæti í umhverfis- og skipulagsnefnd, var tekið vel í erindið frá KFC Reykjanesbæ, sem nú mun fara sitt venjubundna ferli í gegnum bæjarkerfið.
Unnið er að skipulagi á þessu svæði. Hugmyndir KFC gera ráð fyrir stóru og myndarlegu húsi, sem er um 50 metra langt og mun snúa eins og Samkaup. Engin tímamörk hafa verið nefnd, en ljóst má vera að þessi vinsæla veitingastaðakeðja er á leiðinni til Suðurnesja.
Í dag rekur KFC veitingastaði í Hafnarfirði, Kópavogi, Reykjavík, Mosfellsbæ og á Selfossi. Staðurinn í Reykjanesbæ verður hins vegar flaggskip þeirra allra miðað við þær hugmyndir sem kynntar voru í kvöld.


UM KFC
KFC  er stærsta kjúklingabita veitingahúsakeðja í heiminum með meira en 10.000 veitingastaði í 76 löndum. Á hverjum degi eru bornar fram meira en 7 miljónir máltíða á KFC veitingahúsum um allan heim. Á öllum þessum stöðum er boðið upp á kjúklingabita sem gerðir eru eftir upprunalegu uppskrift Harland Sanders ofursta. Í mörgum löndum er eitthvað sérstakt í boði sem endurspeglar menningu þess lands. Í japan er til dæmis boðið upp á laxasamloku, í bandaríkjunum er það kjúklingabaka og á íslandi kokteilsósan. Fyrir 40 árum fann Sanders Ofursti upp það sem kallað er skyndibiti í dag. Fullkomnar máltíðir fyrir upptekið fólk sem ekki hefur tíma til að elda. Hann kallaði þetta "sunnudagsmáltíð, sjö daga vikunnar".