Keflavíkurverktakar hf.: Hluti starfseminnar flytur frá Suðurnesjum

Keflavíkurverktakar hf. héldu aðalfund sinn mánudaginn 3. mars s.l. Ársvelta félagsins 2002 var 1.790 milljónir. Hlutfall verka sem unnin voru fyrir Varnarliðið var 63% af heildarveltu. Sést af þessu að framkvæmdir fyrir Varnarliðið eru ekki lengur sá burðarás í rekstri Keflavíkurverktaka hf. sem þær framkvæmdir voru á árum áður.Af fréttum má draga þá ályktun, að verulegra breytinga megi vænta eftir mitt næsta ár í rekstri varnarstöðvarinnar á Keflavíkurflugvelli og væntanlega þýðir það samdrátt í öllum umsvifum Varnarliðsins með fyrirsjáanlegum áhrifum á atvinnulíf á Suðurnesjum. Varnarliðsverk verða því væntanlega áfram víkjandi þáttur í rekstri félagsins á næstu misserum enda er það nú meginmarkmið forsvarsmanna Keflavíkurverktaka hf. að gera félagið öflugt á verktakamarkaðnum utan Keflavíkurflugvallar.
Þá var í umræðum á aðalfundinum bent á að Varnarliðið gerir kröfur um verktryggingar og greiðslutryggingar sem eru langt umfram það sem venja er að krafist sé á íslenska framkvæmdamarkaðnum. Þetta ásamt gengisáhættu og kröfum Varnarliðsins um bindandi samkomulag við verktaka um langtíma launaþróun kallar á að Keflavíkurverktakar hf. grandskoði hvort Keflavíkurflugvöllur sé sá markaður sem félagið í framtíðinni vill eingöngu starfa á. Varnarliðið hefur átt sinn þátt í því að verð á tilboðsmarkaði hefur lækkað umtalsvert vegna harðnandi samkeppni á Keflavíkurflugvelli og stórlega hefur því dregið úr framlegð verka þar og getur ekkert íslenskt verktakafyrirtæki til lengdar unnið á slíkum markaði.
Starfsumhverfi félagsins á Keflavíkurflugvelli er því gjörbreytt. Öllum verktökum, sem uppfylla ákveðin skilyrði, er heimilt að bjóða í verkefni á vegum Varnarliðsins. Einkaréttur Keflavíkurverktaka hf. og annarra félaga til að vinna öll verk fyrir Varnarliðið hefur verið afnumin. Einkarétt þennan átti að afnema í áföngum en sú varð ekki raunin að mati Keflavíkurverktaka hf. Öll verk Varnarliðsins eru nú án undantekninga boðin út. Boðaðar breytingar íslenskra stjórnvalda á fyrirkomulagi verktöku fyrir Varnarliðið hafa tekið fullt gildi eins og áður segir og fyrr en tilefni var til að halda.
Árið 1998 byrjuðu Keflavíkurverktakar hf. að búa sig undir gjörbreytt starfsumhverfi á Keflavíkurflugvelli og sóttu af afli á árunum þar á eftir inn á verktakamarkaðinn utan flugvallarins. Skilaði sú sókn umtalsverðum árangri á árunum 2000 til 2002. Þótt félagið hafi á liðnum mánuðum hagrætt á ýmsum sviðum rekstrarins s.s. í innkaupum hefur hagræðing og aðlögun að samkeppni ekki fyrr en nú náð til launaliða en þar þarf einnig að koma til hagræðing til að tryggja afkomu verkefna í vaxandi samkeppni.
Undanfarið ár hefur félagið verið í mikilli endurskipulagningu og náð þar góðum árangri en samkeppnin kallar á lækkun allra kostnaðarliða hjá félaginu og verðar engir útgjaldaliðir undanskildir. Með öðrum hætti verður samkeppnisaðstaða félagsins ekki tryggð.Félagið ber saman kostnað sinn við kostnað samkeppnisaðila til þess að eiga möguleika á að ná til sín verkefnum. Markvist hefur verið dregið úr öllum kostnaðarliðum öðrum en launaliðum.
Vinnustaðasamningur var gerður við starfsmenn árið 2000 meðan enn var í gildi úthlutunarfyrirkomulagið á verkum og þá allt útlit fyrir, að það fyrirkomulag myndi gildi út fyrirhugaðan aðlögunartíma. Nú, þegar þetta fyrirkomulag er ekki lengur fyrir hendi, er fullkomlega réttmæt sú ósk félagsins, að rætt verði um lækkun launalið vinnustaðasamningsins enda taka ákvæði hans mið af kringumstæðum og fyrirkomulagi sem ekki er lengur til staðar á Keflavíkurflugvelli.
Starfsmenn félagsins verða nú að horfast í augu við þá staðreynd á lækka verður launakostnað- að öðrum kosti er félagið ekki samkeppnishæft á Keflavíkurflugvelli og mun þá hverfa af þessum markaði og gefa hann öðrum verktökum eftir. Þá leita Keflavíkurverktakar hf. út fyrir svæðið eftir verkefnum. Um annað er ekki að ræða.
Á næstu mánuðum verður haldið áfram að tryggja samkeppnishæfni félagsins. Mun félagið væntanlega fyrr en seinna flytja hluta starfsemi af Suðurnesjum þar sem þungamiðjan umsvifa félagsins á næstu misserum verður á Stór-Reykjavíkursvæðinu og á Austurlandi.

Frétt á vef Keflavíkurverktaka hf.