KB banki og Bláa Lónið hf undirrita lánssamning

Framkvæmdir eru nú hafnar í Svartsengi á vegum Bláa Lónsins hf við uppbyggingu alþjóðlegrar rannsókna- og húðlækningastöðvar og einnig við hráefnavinnslu og húsnæði fyrir framleiðslustarfsemi fyrirtækisins. Þessum framkvæmdum verður lokið snemma á næsta ári. Þá lauk viðbótarframkvæmdum við Bláa lónið – heilsulind á síðasta ári.

Vegna þessara framkvæmda hafa Bláa Lónið hf og KB banki undirritað 850 milljóna króna lánssamning. Um er að ræða endurfjármögnun á eldri fjárfestingalánum og lán vegna nýframkvæmda. Lánssamningurinn er til 10 ára.

Meginmarkmið Bláa Lónsins hf er uppbygging vörumerkisins BLUE LAGOON ICELAND með fjölþættri nýtingu einstakra eiginleika jarðsjávarins í Svartsengi segir í fréttatilkynningu frá félaginu.

Bláa Lónið hf gegnir forystuhlutverki við uppbyggingu og markaðssetningu heilsutengdrar ferðaþjónustu á Íslandi. Bláa Lónið hf. hlaut Útflutningsverðlaun forseta Íslands nú í vikunni en verðlaunin eru veitt fyrirtækjum eða einstaklingum fyrir árangursríkt starf að útlflutningi á íslenskum vörum eða þjónustu á erlendum markaði. Bláa Lónið er talið í fremstu röð heilsulinda í Evrópu, og er einn fjölsóttasti viðkomustaður erlendra ferðamanna sem koma hingað til lands.

Starfsemi félagsins er nú á þremur sviðum: rekstur Bláa lónsins – heilsulindar, þróun og markaðssetning á BLUE LAGOON húðvörum og rekstur rannsókna- og húðlækningastöðvar, sem byggir á einstökum lækningamætti jarðsjávarins í Svartsengi segir í tilkynningu fyrirtækisins.