Jón Gunnarsson lætur af störfum sem forstjóri Ice-Group og Þór Hauksson tekur við

Ice-Group tilkynnir að Jón Gunnarsson hefur látið af störfum sem forstjóri félagsins að eigin ósk vegna aldurs. Við starfi hans hefur tekið Þór Hauksson, sem býr yfir víðtækri reynslu í rekstri og stjórnun fyrirtækja, bæði á innlendum og erlendum vettvangi.

Guðmundur G. Gunnarsson, stjórnarformaður Ice-Group, þakkar Jóni fyrir hans öfluga og farsæla starf sem forstjóri félagsins sl. 5 ár.

„Samhentur hópur eigenda hefur leitt félagið af fagmennsku og skilur eftir sig traustan grunn fyrir framtíðina. Félagið hefur undanfarin ár náð sterkri stöðu á markaði erlendis, eflt innviði og styrkt tengsl við lykilviðskiptavini. Félagið er í dag eitt öflugasta félag á sínu sviði á Norðurlöndum. Jón mun nú taka sæti sem stjórnarformaður félagsins. Með ráðningu Þórs Haukssonar hefst nýr kafli en að auki kemur Þór inn í hluthafahóp félagsins. Framundan eru spennandi tímar hjá Ice-Group og Þór mun leiða félagið með krafti og nýrri sýn inn í næsta skeið í þróun þess,“ segir Guðmundur G. Gunnarsson í tilkynningu.

Ice-Group er öflugt íslenskt félag í sjávarútvegi sem var stofnað árið 1997 af Guðmundi G. Gunnarssyni sem stýrði því þar til Jón Gunnarsson tók við. Eigendur hafa alla tíð starfað hjá félaginu. Félagið hefur sérhæft sig í framleiðslu og sölu þurrkaðra fiskafurða og rekur meðal annars tvær þurrkverksmiðjur í Norður-Noregi, nánar tiltekið í Hammerfest og Bátsfirði. Velta félagsins undanfarin 5 ár hefur verið að meðaltali tæpir 3 ma.kr. og hagnaðurinn um 300 m.kr. Félagið styður ötullega við sjálfbærni í fiskveiðum og fiskvinnslu, ásamt því að vera í hópi framúrskarandi fyrirtækja hjá Creditinfo.