ÍÞRÓTTIR OG ERÓTÍSKUR DANS Á NÝJUM SKEMMTISTAÐ

Nýr óskírður skemmtistaður rís senn í Grófinni 8 í Keflavík og segja rekstraraðilarnir, sem flestir vilja vera ónafngreindir, að opnað verði með pompi og pragt föstudaginn 13. ágúst næstkomandi. „Staðurinn verður tvískiptur. Annars vegar verður íþróttabar, með sjónvarpsskjám, spilakössum og snókerborði og hins vegar verður stór danssalur þar sem boðið verður upp á erótískan dans. Að sjálfsögðu verður líka boðið upp á einkadansa í sérstöku herbergi sem innréttað verður nokkrum einkabásum“ sagði einn forráðamanna staðarins. „Það er kominn tími til að Suðurnesjamenn fái aðgang að því besta í sinni heimabyggð. Mikið verður lagt í Sportpöbbinn, þar verður breiðtjald, mörg sjónvörp og þægileg aðstaða til að hafa það gott yfir sportinu. Ekki verður dansinn og aðstaðan þar síðri.“