Iceland Express til Flórída

Iceland Express mun fljúga til Flórída í Bandaríkjunum allan næsta vetur. Flogið verður á laugardögum frá Keflavík til Flórída og á sunnudögum frá Flórída. Fyrsta flugið verður í byrjun október og verður flogið fram í miðjan apríl 2012 eða fram yfir páska.

Félagið var með áætlunarferðir til Flórída síðastliðið haust og vor og gengu þær afar vel, því hefur verið ákveðið að fjölga ferðum.

„Þetta er hluti af stækkun leiðakerfisins okkar á Norður-Atlantshafsleiðinni,“ segir Matthías Imsland, forstjóri Iceland Express, “enda lítum við svo á að þarna liggi frekari sóknarfæri.”