Flugstöðin og bílaleigur semja um bílaleiguþjónustu

Bílaleiga Flugleiða ehf. (Hertz), Alp ehf. og Höldur ehf. hafa gert samning við Flugstöð Leifs Eiríkssonar hf. um rekstur alhliða bílaleiguþjónustu á Keflavíkurflugvelli.

Greiður og öruggur aðgangur að bílaleiguþjónustu er mikilvægur þáttur innan flugstöðvarinnar, því efndi Flugstöð Leifs Eiríkssonar hf. til forvals um rekstur slíkrar þjónustu. Bílaleigurnar uppfylltu allar skilyrði forvals og var því gengið til samninga við þær um aðstöðu í flugstöðinni. Bílaleigurnar hafa veitt góða þjónustu í flugstöðinni um árabil, þær hafa afgreiðslustaði víða um land og fjölbreytt úrval bíla.

Nú þegar er unnið að uppsetningu afgreiðslubása fyrir bílaleiguþjónustu í komusal flugstöðvarinnar, en vænst er að nýir afgreiðslubásar muni bæta þjónustu við flugfarþega enn frekar.

Hjálmar Pétursson framkvæmdastjóri undirritaði samning fyrir hönd Alp bílaleigu, Sigurður Skagfjörð Sigurðsson framkvæmdastjóri undirritaði fyrir hönd Bílaleigu Flugleiða, Hertz og Steingrímur Birgisson forstjóri undirritaði samning fyrir hönd Höldur. Höskuldur Ásgeirsson undirritaði samningana fyrir hönd Flugstöðvar Leifs Eiríkssonar.