Fjórða besta flugvallarveitingahús heims
– samkvæmt tímaritinu Men's Journal
Tímaritið Men's Journal hefur valið NORD veitingahús í Flugstöð Leifs Eiríksonar fjórða besta veitingahús á flugvelli í heiminum og í fyrsta sæti í Evrópu.
Sæmundur Kristjánsson, framkvæmdastjóri NORD, segir þetta mikinn heiður og viðurkenningu á þeirri stefnu sem keyrð hefur verið undanfarin ár á veitingastaðnum.
„Fyrsta flokks hráefni, matgerð á staðnum, gott vöruúrval miðað við ferðatíma viðskiptavina fyrirtækisins og frábærir starfsmenn hafa skapað þessa viðurkenningu. Við eigum þegar stóran hóp fastra viðskiptavina, bæði innlendra og erlendra. Þeir hafa einnig með ábendingum og hrósi sínu hjálpað okkur í þessari vegferð,“ segir Sæmundur.
Fyrir Flugstöð Leifs Eiríkssonar (FLE) er þetta enn ein fjöður í hattinn, en sem kunnugt er hefur FLE unnið til margvíslegra verðlauna og viðurkenninga á undanförnum árum.