Fjör á bílasýningum í byrjun árs

Mjög góð aðsókn var að tveimur bílasýningum sem voru í Reykjanesbæ um síðustu helgi. Sýndir voru nýir bílar hjá Toyota og Bernhard.

„Það er búið að vera mikið fjör í allan dag og það hefur verið mjög mikil aukning í sölu hjá okkur að undanförnu,“ sagði Ævar Ingólfsson, bílasali og undir það tók Erlingur Hannesson hjá Bernhard en þessar bílasölur eru nánast á sama fermetranum á Fitjum í Njarðvík.

Ævar og félagar sýndu nýja Toyota RAV4 Hybrid og sagði hann að bílinn hafi vakið mikla athygli enda sé um byltingarkennda breytingu að ræða. Eins og alltaf á bílasýningum vöktu aðrar gerðir einnig athygli, m.a. hin sívinsæli Landcrusier jeppi sem er einn mest seldi bíll á Suðurnesjum á undanförnum árum. Þó var að heyra að hann væri kominn með verðugan keppinaut í RAF jepplingnum. Minni bílarnir hafa selst mikið og úrvalið er gott hjá Toyotu.

Erlingur í Bernhard hefur selt margar Hondu og Peugot bifreiðar á Suðurnesjum í gegnum tíðina. Á sýningunni mátti sjá nokkrar nýjar gerðir, m.a. nýja útfærslu af hinum vinsæla Honda CR-V en hann er nú fáanlegur með öflugri dísilvél og 9 gíra sjálfskiptingu. Minni bílarnir hjá Peougot hafa rokið út enda sparneytnir og á góðu verði. „Eftir nokkur mögur kreppuár er ljóst að það eru margir að hugsa sér til hreyfing í bílamálum. Það er búið að vera stígandi í bílasölu á síðustu 2-3 árum,“ sagði Erlingur.

Meðfylgjandi myndir voru teknar í Toyotu og Bernhard.

Ævær Ingólfsson var í essinu sínu á bílasýningunni.

Erlingur Hannesson sýnir Hermanni Jónassyni nýja CR-V bílinn.