Fatnaður frá Mýr á markað á Indlandi

Fatnaður frá Mýr design á Ásbrú fer brátt á markað á Indlandi. Fulltrúar Mýr design fara til Nýju Delí á Indlandi í lok þessa mánaðar og taka þátt í þriggja daga viðburði á vegum íslenska sendiráðsins á Indlandi og Midori, fyrirtækisins sem sér um innflutning á fatnaði Mýr á Indlandi. Að sögn Bjarkar Þorsteinsdóttur, hluthafa í Mýr design, verður skrifað undir samninga við Midori í ferðinni og verða það fyrstu samningarnir á milli Íslands og Indlands sem gerðir eru á vegum Indversk-íslenska verslunarráðsins sem nýlega var stofnað. Það er með aðsetur í íslenska sendiráðinu á Indlandi. Ráðinu stýrir Julie Deb sem einnig er eigandi Midori og fráfarandi formaður FICCI, félags kvenna í atvinnulífinu á Indlandi en þær taka einnig þátt í viðburðinum.

„Þetta er mjög spennandi verkefni og einstaklega ánægjulegt að taka þátt í því á tíu ára afmæli Mýr.  Mýr „kjóllinn" sem var fyrsta hönnun fyrirtækisins hefur ekkert breyst þessi tíu ár og er því tímalaus klassík er nú á leið til indverskra kvenna sem skipta milljónum,“ segir hún.

Hjá Mýr design er framleiddur fatnaður sem hannaður er af Helgu Björgu Steinþórsdóttur. Vinnastofa og verslun Mýr design er í frumkvöðlasetnrinu á Ásbrú.