Farþegar WOW air í desember 207% fleiri en í fyrra

WOW air flutti 173.371 farþega til og frá landinu í desember síðastliðnum eða um 207 prósent fleiri farþega en í desember árið 2015. Sætanýting WOW air í desember var 86 prósent samanborið við 85 prósent á sama tíma í fyrra.
 
WOW air flutti í fyrra um 1.668.773 farþega en það er 130 prósenta fjölgun farþega frá árinu áður. Sætanýting WOW air árið 2016 var 88 prósent en sætanýting árið 2015 var 86 prósent.
 
Í tilkynningu frá fyrirtækinu segir að flugflotinn telji 17 þotur næsta sumar; þrjár Airbus A330, ellefu Airbus A321 og þrjár Airbus A320. Félagið mun bæta við sig þremur Airbus A321ceo, einni Airbus A321neo og einni Airbus A320neo í flotann á þessu ári sem eru með um 35 til 45 prósent lægri eldsneytiskostnað á sæti miðað við algengustu flugvélar sem er notaðar eru í flugi til og frá landinu í dag. Þessar fimm vélar eru allar nýjar, módel 2017 og koma beint frá verksmiðjum Airbus í Evrópu.
 
Árið 2016 fjölgaði ferðum Íslendinga erlendis um 86.200 ferðir miðað við 2015 samkæmt tölum frá Ferðamálastofu. Á sama tíma fjölgaði íslendingum sem flugu með WOW air um 53.000 sem er um 60 prósent hlutdeild af aukningunni milli ára. Svipaða sögu má segja með fjölda ferðamanna til Íslands á árinu. Fjöldi ferðamanna jókst um 506.000 og er hlutdeild WOW air í aukningunni 38 prósent.
 
„WOW air á mikla hlutdeild í þeirri aukningu á ferðamönnum sem koma til landsins og sama má segja um þá Íslendinga sem ferðast út fyrir landsteinana. Ég vil þakka kærlega fyrir það traust sem farþegar hafa sýnt okkur á liðnu ári. Það verður ánægjulegt að taka á móti þessum fimm nýju vélum á árinu en þær eru mun sparneytari en áður hefur þekkst og þar með getum við haldið áfram að lækka verðið enn frekar,“ segir Skúli Mogensen stofnandi og forstjóri WOW air.