Farþegafjöldi WOW air eykst um 139% í október

WOW air flutti 175.222 farþega til og frá landinu í október eða um 139% fleiri farþega en í október árið 2015. Þá var sætanýting WOW air 86% en var 88% í október á síðasta ári. Sætanýting helst svipuð þrátt fyrir 151% aukningu á sætaframboði milli ára.

Aukning á framboðnum sætakílómetrum hjá WOW air til og frá Norður Ameríku var 354% á milli ára en á sama tíma jókst ferðamannastraumur þaðan til Íslands um 127%. Samkvæmt tölum Ferðamálastofu er aukning ferðamanna frá N-Ameríku milli ára umtalsvert meiri en frá öðrum skilgreindum markaðssvæðum.

„Við erum afar ánægð með að sjá að markaðsaðgerðir okkar í N-Ameríku skila sér í jafn beinum hætti og eru að birtast í þessum tölum. Með auknu framboði á ódýrum sætum til Íslands og áfram til Evrópu eru sífellt fleiri að sjá sér fært að heimsækja okkur. Þetta er ekki bara frábært fyrir WOW air heldur fyrir íslenskan efnahag í heild sinni,“ segir Skúli Mogensen forstjóri og stofnandi WOW air.

Sókn WOW air í Bandaríkjunum mun aukast næstu mánuði. Þann 23. nóvember mun félagið fljúga sitt fyrsta flug til New York en einnig voru nýlega tilkynntir tveir nýjir áfangastaðir í Bandaríkjunum, Miami og Pittsburgh, auk þess að flugum til og frá Los Angeles og San Francisco verður fjölgað frá og með næsta vori.