Exorka fær þrjú ný virkjanaleyfi í Þýskalandi

Exorka, dótturfélag Geysis Green Energy, hefur gengið frá kaupum á þremur leyfum fyrir jarðvarmavirkjanir í Bæjaralandi í Þýskalandi. Fyrir átti Exorka eitt virkjanaleyfi þar ytra. Þessar fyrirhuguðu virkjanir munu byggja á Kalina-tækninni þar sem lághita jarðvarmi (100-150 gráður) er nýttur til raforkuframleiðslu. Stefnt er að því að hefja boranir á þessu ári en bora þarf niður á 3 til 5 km dýpi eftir vatninu. Áætlað er að raforkuframleiðsla hefjist á árinu 2009, að því er segir í tilkynningu frá Geysir Green Energy.

Í tengslum við þessi leyfi getur Exorka byggt orkuver í Bæjaralandi sem samtals munu framleiða 15-25 MW af raforku á ári. Heildarfjárfesting í þessum virkjunum gæti numið allt að 20 milljörðum króna.

Fyrirtækið Exorka ehf. var stofnað árið 2001 af Orkuveitu Húsavíkur og þremur verkfræðistofum; VGK í Reykjavík, Útrás á Akureyri og Tækniþingi á Húsavík. Markmiðið var að hanna, framleiða og selja orkuver sem byggja á Kalina-tækninni.

Við stofnun Geysis Green Energy í upphafi þessa árs varð Exorka dótturfélag Geysis. Með þessu nýja verkefni stígur Geysir Green Energy enn eitt skrefið til útrásar en félagið vinnur nú að umtalsverðum fjárfestingum í verkefnum á sviði endurnýjanlegra orkugjafa víða um heim.