Concert hertekur Officera-klúbbinn á Vallarheiði
Umboðsfyrirtækið Concert hefur tekið hin fornfræga Officera klúbb á Vallarheiði hernnámi. Það er þróunarfélag Keflavíkurflugvallar, KADECO, fyrir hönd íslenska ríkisins, sem á húsið sem klúbburinn var starfræktur í og markmið félagsins er meðal annars að leiða þróun og umbreytingu á fyrrum varnarsvæðinu á Keflavíkurflugvelli til borgaralegra nota. Samningur þess efnis var undirritaður í vikunni á skrifstofu Kadeco á Vallarheiði.
„Við ætlum að gera tilraun með þetta til eins árs. Við erum í raun að reyna mæta ákveðinni þörf þar sem mikið hefur verið sóst eftir því að leiga húsið í stærri viðburði þar sem Stapinn er núna í yfirhalningu. Við teljum að Concert sé öflugur samstarfsaðili og bindum miklar vonir við krafta þeirra til endurreisnar Officeraklúbbsins,“ sagði Kjartan Þór Eiríksson við undirritunina.
„Ég lít á þetta sem mikið traust að Kadeco fái okkur til að sjá um Officera klúbbinn. Þetta er án efa sá dansstaður á landinu sem flestir þekkja en fæstir hafa fengið tækifæri til að komast inná. Þarna eru miklir salir og stórir barir og skemmtileg fundarherbergi þannig að okkur hlakkar til að slá aftur til veislu þarna,“ sagði Einar Bárðarson eigandi Concert.
Á Officera klúbbnum skemmtu fyrirmenn bandaríska hersins sér allt frá því að herinn tók sér stöðu á Vallarheiði. Fáir staðir á Íslandi hafa verið sérstaklega hannaði til skemmtanahalds en Officera klúbburinn er sá eini á Íslandi með sérstöku bílastæði sem er yfirbyggt fyrir gesti þegar þeir yfirgefa bifreiðina svo eitthvað sé nefnt. Íslensku hljómsveitirnar Lúdó & Stefán, Hljómsveit Guðmundar Ingólfssonar, Trúbrot, Júdas, Óðmenn og Hljómar léku fyrir Bandaríkjamennina á klúbbnum en gróskann í kringum starfsemina á Vellinum náði að sjálfsögðu líka til skemmtanabransans. Þeir örfáu íslendingar sem voru þeirra heiðurs aðnjótandi að komast inná Officera klúbbinn á gullöld hans voru nánast teknir í guðatölu .
Mannlífið blómstrar á Vallarheiði í Reykjanesbæ þessar vikurnar. Skólahús eru þéttsetin, íþróttahúsið á Vallarheiði er vel sótt og það sama má segja um margt annað í þessari fyrrum herstöð. Ýmis tómstundastarfsemi er rekin á Vallarheiði við miklar vinsældir og þá hefur Virkjun mannauðs á Reykjanesi fengið inni í um 1600 fermetra húsnæði á Vellinum þar sem er að verða til fjölbreytt starfsemi.
Allar upplýsingar um útleigu og annað er á skrifstofu Concert Brekkustíg 39 Reykjanesbæ og í síma 517 2727 eða á WWW.CONCERT.IS
Mynd: Kjartan Þór Eiríksson og Einar Bárðarson handsala samninginn. Víkurfréttamynd: Hilmar Bragi Bárðarson
