Breytingar hjá Keflavíkurverktökum hf.

Þann 14. mars s.l. urðu breytingar hjá Keflavíkurverktökum hf. Róbert Trausti Árnason forstjóri segir þær vera lið í aðlögun félagsins að gjörbreyttu umhverfi vegna harðnandi samkeppni. Róbert Trausti segir að verkum á vegum félagsins utan flugvallarins fjölgi stöðugt og að ljóst sé að þungamiðja starfsemi félagsins á komandi árum verði utan flugvallarins og Suðurnesja.Róbert Trausti segir að nýr kafli sé að hefjast í sögu Keflavíkurverktaka hf sem kalli á breytingar og aðlögun. „Því hefur tæknideild félagsins flutti sig um set og hefur nú aðsetur í Kópavogi í Hlíðarsmára 15. Nauðsynlegt er að starfsmenn tæknideildarinnar séu í sem næstu nágrenni við verk á stór-Reykjavíkursvæðinu og verk á suð-vestur horninu.“ Róbert ráðgerir að innan tíðir flytji starfsmanndeild og fjármáladeild félagsins í sama húsnæði.

Enn hefur félagið þó töluverð umsvif á Keflavíkurflugvelli og á Suðurnesjum og þar verða áfram verkstæði og vöruhús þess ásamt þjónustudeild og þessi starfsemi verður þar óbreytt um fyrirsjáanlega framtíð. Verkefnastjórar og verkstjórar , sem sinna verkum á flugvellinum og á Suðurnesjum hafa áfram skrifstofur í byggingu 551 á Keflavíkurflugvelli.

Róbert Trausti leggur á það áherslu að Keflavíkurverktakar hf. muni áfram bjóða í verk á vegum Varnarliðsins og verk á Suðurnesjum. „Félagið er nú komið í samkeppni utan flugvallar við verktakafyrirtæki, sem keppa við félagið um verk innan vallar. Keflavíkurverktakar hf. styrkja til muna samkeppnisstöðu sína á suð-vestur horninu með því að hafa aðstöðu á stór-Reykjavíkursvæðinu,“ sagði Róbert Traust í samtali við Víkurfréttir.