Bónus opnar í Félagsbíói í Keflavík
Biðröð fyrir framan verslunina við opnun.
Biðröð var fyrir utan Félagsbíó í morgun þegar Bónus opnaði nýja verslun í gamla bíóhúsinu í Keflavík. Guðmundur Marteinsson, framkvæmdastjóri fyrirtækisins sagði að það væri ánægjulegt að fá svona mótttökur.
Við opnunina færði Bónus Velferðarsjóði Suðurnesja 1 milljón krónu gjafakort í versluninni. Þórunn Þórisdóttir, framkvæmdastjóri Keflavíkurkirkju og sjóðsins sagði framlag Bónuss afar þakkarvert og kæmi sér vel.
Nýja Bónus verslunin er í 600 fermetra plássi og sagði Guðmundur að úrvalið væri um 60% af því sem er í stærri verslunum eins og í Njarðvík. Í boði væru allar söluhæstu vörur verslunarinnar. „Við vorum strax spennt fyrir því að opna hér þegar okkur stóð þetta húsnæði til boða. Hér er góður kjarni fólks í göngufæri og svo er aukning í ferðamönnum á Suðurnesjum. Við erum bjartsýn og hlökkum til,“ sagði Guðmundur.
