Besta ár SpKef frá upphafi
Árið 2005 var það besta í sögu Sparisjóðsins í Keflavík, en hagnaður sparisjóðsins á árinu nam 1.392,6 m.kr. króna fyrir skatta samanborið við 508,9 m. kr. árið áður. Hagnaður eftir skatta nam 1.150 m. kr. samanborið við 409 m. kr. árið áður. Arðsemi eigin fjár var 42,9%.
Áætlanir fyrir árið 2006 gera ráð fyrir áframhaldandi góðri afkomu.
Á heimasíðu SpKef segir Geirmundur Kristinsson, sparisjóðsstjóri að afkoma ársins 2005 sé sú besta í sögu sjóðsins.
„Markaðsaðstæður hafa verið sparisjóðnum afar hagstæðar á síðastliðnu ári sem sést best í aukningu gengishagnaðar upp á 735 m. kr. á milli ára. Mikil aukning var á umsvifum Viðskiptastofunnar bæði í eignastýringu og miðlun verðbréfa. Þá var mikil aukning í útlánum og hreinar vaxtatekjur jukust um tæp 18,1% á milli ára. Vanskilahlutfall er nú í sögulegu lágmarki og var mikil vinna lögð í þann málaflokk á árinu 2005 og er stefnan að gera enn betur árið 2006. Starfsemi Sparisjóðsins hefur styrkst mikið og tekjustoðum fjölgað. Viðskiptavinum fjölgar óðum og Sparisjóðurinn kappkostar að bjóða upp á fjölbreytt og gott vöruúrval fyrir viðskiptavini sína. Sem dæmi um það þá var stofnað til samstarfs við VÍS þar sem vildarviðskiptavinir Sparisjóðsins fá sérkjör á iðgjöldum VÍS og vildarviðskiptavinir VÍS fá bætt kjör í Sparisjóðnum í Keflavík.“
Geirmundur segist vera bjartsýnn á framtíð Sparisjóðsins í Keflavík og býst við góðri afkomu árið 2006.
Helstu niðurstöður úr rekstri og efnahag
• Hagnaður Sparisjóðsins í Keflavík árið 2005 nam 1.392,6 m.kr. króna fyrir skatta samanborið við 508,9 m. kr. árið 2004.
• Hagnaður eftir skatta nam 1.150,2 m. kr. samanborið við 408,6 m. kr. árið 2004.
• Arðsemi eigin fjár var 42,9%.
• Vaxtatekjur Sparisjóðsins námu 2.526,9 m.kr. en það er 32,7% hækkun frá árinu 2004.
• Vaxtagjöld hækkuðu einnig, eða um 42% og námu 1.651,1 m.kr. árið 2005
• Hreinar vaxtatekjur námu því 875,8 m.kr. samanborið við 741,8 m.kr. árið 2004 sem er hækkun um 18,1%.
• Vaxtamunur, þ.e. hreinar vaxtatekjur í hlutfalli af meðalstöðu fjármagns var 3,0% árið 2005 en 3,3% árið 2004.
• Aðrar rekstrartekjur hækkuðu um 857,6 m. kr. og voru 1.770,9 m.kr. árið 2005. Munar þar mest um hækkun á gengishagnaði upp á 735,2 m.kr. og tekjur af hlutabréfum og öðrum eignarhlutum upp á 102 m. kr.
• Önnur rekstrargjöld námu alls 924,7 m.kr. og jukust um 11,5% frá árinu áður. Laun og launatengd gjöld jukust um 9,5%. Annar almennur rekstrarkostnaður jókst um 13,6%. Rekstrarkostnaður sem hlutfall af niðurstöðu efnahagsreiknings var 2,9% en var 3,2% árið 2004.
• Kostnaðarhlutfall árið 2005 var 35% á móti 50% árið 2004.
• Framlag í afskriftareikning útlána var 329,4 m.kr. en var 316,4 m.kr. árið 2004. Sem hlutfall af niðurstöðu efnahagsreiknings var framlagið 1,04% en var 1,2% árið 2004.
• Afskriftareikningur útlána nam í árslok 1,8% af útlánum en var 2,19% árið áður.
• Heildarinnlán í Sparisjóðnum ásamt lántöku námu í lok árins 2005 24.923,6 m.kr. og er aukningin 32,4% á milli ára.
• Útlán Sparisjóðsins ásamt markaðsskuldabréfum námu 25.617 m.kr. í lok ársins 2005 og höfðu aukist um 4.534,7 m.kr. eða um 21,5%.
• Í lok ársins var niðurstöðutala efnahagsreiknings 31.777,3 m.kr. og hafði hún hækkað um 5.466,4 m.kr. eða 20,8%. Eigið fé Sparisjóðsins í lok ársins 2005 nam 3.763,7 m.kr. og hefur eigið fé aukist um 1.081,6 m.kr. eða 40,3%. Eiginfjárhlutfall Sparisjóðsins samkvæmt CAD-reglum er 12,42% en var 12,56% á sama tíma árið áður.
• Meðalfjöldi starfsmanna árið 2005 var 75,7 sem er aukning um 1,3 stöðugildi frá því árinu áður
• Í lok árins 2005 var stofnfé 600 milljónir og voru stofnfjáraðilar 558 talsins.
Aðalfundur Sparisjóðsins í Keflavík verður haldinn föstudaginn 10. mars n.k. Stjórn sjóðsins leggur til að greiddur verði 12,5% arður á uppreiknað stofnfé. Auk þess sem nýttar verði heimildir laga um endurmat og viðbótarendurmat þannig að nafnávöxtun stofnfjár verði um 22%.
Af www.spkef.is
