Best nýttu hótelherbergin á Suðurnesjum

Gistinætur á hótelum í ágúst voru 433.000 sem er 24% aukning miðað við ágúst 2015. Þetta kemur fram í nýjum upplýsingum frá Hagstofunni fyrir gistinætur hótela sem eru opin allt árið. Gistinætur erlendra gesta voru 93% af heildarfjölda gistinátta í mánuðinum en þeim fjölgaði um 25% frá sama tíma í fyrra á meðan gistinóttum Íslendinga fjölgaði um 15%.

 

Nýting herbergja var best á Suðurnesjum í ágúst eða um 96,3%. Einnig var yfir 90% nýting á höfuðborgarsvæðinu (93,6%) og á Austurlandi (93,3%).

 

Flestar gistinætur á hótelum í ágúst voru á höfuðborgarsvæðinu eða 232.800 sem er 22% aukning miðað við ágúst 2015. Um 54% allra gistinátta voru á höfuðborgarsvæðinu. 

 

Næstflestar voru gistinætur á Suðurlandi eða um 68.500. Erlendir gestir með flestar gistinætur í ágúst voru: Bandaríkjamenn með 96.000, Þjóðverjar með 79.600 og Bretar með 40.300 gistinætur.

 

Á tólf mánaða tímabili frá september 2015 til ágúst 2016 voru gistinætur á hótelum 3.389.000 sem er 29% aukning miðað við sama tímabil árið áður.

 

Athygli skal vakin á því að hér er eingöngu átt við gistinætur á hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann.