Aukin ferðatíðni og fjölbreytt þjónusta

Skipaagreiðsla Suðurnesja hefur fært vöruafgreiðslu sína um set en hún er nú staðsett við Iðjustíg 1 í Njarðvík. Vöruafgreiðslan er líka komin með nýtt símanúmer sem er 4 20 30 40.

Fulltrúar tollgæslunnar afhenta Jóni Norðfjörð framkv.stj. og Guðmundur R.J. aðst.frkv.stj. starfsleyfi fyrir tollvörugeymslu í húsinu við Iðjustíg 1.
„Nýja húsnæðið er 600 fermetrar að stærð auk útisvæðis og hentar starfseminni að mörgu leyti betur en gamla húsnæðið. Hér er einnig gott aðgengi fyrir viðskiptavini“, segir Jón Norðfjörð framkvæmdastjóri.
Skipaafgreiðslan er með tíu sendibíla af ýmsum stærðum, bæði vöru- og gámaflutningabíla. Hingað til hafa ferðirnar á milli Reykjavíkur og Keflavíkur verið tvær á dag en nú hefur þeim verið fjölgað í þrjár. „Við erum að bæta þjónustuna með aukinni ferðatíðni sem kemur viðskiptavinum okkar væntanlega vel“, segir Jón.
Starfsemi fyrirtækisins er fjölþætt. Eins og nafnið gefur til kynna fer þar fram afgreiðsla skipa í höfnum á Suðurnesjum en Skipaafgreiðsla Suðurnesja er líka með umboð fyrir Eimskip og afgreiðslu fyrir Atlantsskip. „Við sjáum um alla afgreiðslu á fiskisalti fyrir hafnarbakka á svæðinu og veitum sjávarútvegsfyrirtækjum ýmsa aðra þjónustu. Við höfum verið í náinni samvinnu við Álaborg Portland-Ísland, sem er sementsframleiðandi staðsettur í Helguvíkurhöfn. Húsasmiðjan á Suðurnesjum hefur einnig verið góður viðskiptavinur okkar en við sjáum um alla flutninga á milli Keflavíkur og Reykjavíkur fyrir þá“, segir Jón. Hjá Skipaafgreiðslunni er hægt að fá leigða lyftara og fá tilboð í stærri og minni verkefni.