Fimmtudagur 18. mars 1999 kl. 20:46
AÐALFUNDUR SPARISJÓÐSINS Í KEFLAVÍK
Tveimur stórum áföngum náð „Geirmundur Krstinsson, sparisjóðsstjóri sagði á aðalfundi Sparisjóðsins sl. föstudag að tveir stórir áfangar hefðu náðst að undanförnu; annars vegar góður rekstrar hagnaður á síðasta ári og hins vegar kaupin á Sparisjóðshúsinu. „Ég hefði ekki getað ímyndað mér fyrir örfáum árum að þetta tvennt næðist svona fljótt“, sagði Geirmundur en í ræðu sinni sagði hann einnig sína skoðun að það væri einungis tímaspursmál hvenær Íslendingar tækju evruna í notkun og gerðust þá sömuleiðis aðilar að Evrópusambandinu. 50% meiri hagnaður Það er óhætt að segja að mikil umskipti hafi verið á síðasta ári í Sparisjóðnum í Keflavík. Hagnaður á árinu 1998 fyrir óreglulega liði var 163 milljónir króna sem er hækkun um 50% og 46 millj. umfram rekstraráætlun ársins, en að teknu tilliti til framlags í afskriftareiknings upp á kr. 52 milljónir króna, og reiknaðra skatta er hagnaður ársins 80.3 millj.kr. Niðurstaða efnahagsreiknings í árslok var 9.330 og hækkaði um 10.66%. Eigið fé var 603.9 millj.kr. og hækkaði um 94 millj. CAD hlutfallið þ.e. eiginfjárhlutfallið sbr. 54.gr. laga um banka og sparisjóði var 9.71% en má lægst vera 8%. Breytingar til góðs „Afkoma sparisjóðsins á síðasta rekstrarári var mjög góð. Arðsemi eigin fjár varð 16% sem er gott í samanburði við aðra banka og sparisjóði. Sú aðgerð sem ákveðin var í tengslum við uppgjör fyrir árið 1997 var rétt, en þar á ég við aukaframlag í afskriftareikning sem leiddi af sér taprekstur það árið. Einnig hafa hinar ýmsu breytingar sem gerðar voru á skipulagi og starfsemi sjóðsins orðið til góðs. Vegna áðurnefnds taprekstrar 1997 greiðum við ekki tekjuskatt nú og er því raunverulegur hagnaður 109 millj. Í rekstraráætlun fyrir 1998 sem kynnt var á síðasta aðalfundi var gert ráð fyrir 70 millj. kr hagnaði“, segir Geirmundur. Verðbréfaþing Íslands En má vænta frekari breytinga í rekstrinum? „Það má nefna að nýverið fékk Sparisjóðurinn heimild til að versla á Verðbréfaþingi Íslands og ætti það að skapa okkur meiri tekjur í framtíðinni, auk þess fer nú fram uppgjör lífeyrismála eftir nýgerða lífeyrissamninga við bankamenn og gætu þeir valdið einhverjum viðbótar útgjöldum. Þá er það samkeppnin á peningamarkaðnum sem hefur aukist ótrúlega hratt, bankar sem veittu okkur mjög litla samkeppni fyrir ári síðan, eru komnir á fulla ferð inn á okkar markað, en þar á ég við viðskipti einstaklinga og smærri fyrirtækja. Þess má og geta, að Sparisjóðurinn fór í skuldabréfaútboð í beinu framhaldi af birtingu afkomunar fyrir 1998 og fékk hann mun betri kjör en áður og þakka ég það góðri afkomu og bjartari horfum í rekstri sparisjóðsins.“ Evran kemur Ekki verður vikið frá umfjöllun um efnahags og peningamál án þess að minnast á einn mikilvægasta atburð á sviði alþjóðafjármála, en það er stofnun efnahags og myntbandalags Evrópu sem nú er orðið að veruleika, og sameiginlegur gjaldmiðill evran tekið gildi. Aðildarríkin halda þó áfram sínum gjaldmiðlum þar til í byrjun árs 2002, en þá hverfa gjaldmiðlar þáttökuríkjanna, og seðlar og mynt í evrum líta dagsins ljós. Geirmundur segir að hér heima hafi nokkur umræða átt sér stað um áhrif þessa á okkar efnahagslíf, en þar sem aðild að Evrópusambandinu er forsenda til inngöngu í myntbandalagið hefur umræðan ekki verið markviss. „Eitt tel ég víst að þótt bæði kostir og gallar fylgi tilkomu hins nýja gjaldmiðils, er að mínu mati aðeins tímaspursmál hvenær við gerumst aðilar og þá að Evrópusambandinu líka“. Tryggja verður bankaleynd Geirmundi varð tíðrætt um bankaleynd og mikilvægi þess að upplýsingar úr bankakerfinu væru tryggilega varðveittar. „Fyrir skömmu var kveðinn upp dómur í héraðsdómi Reykjavíkur hvað þagnarskyldu snertir. Forsaga málsins er sú að ríkisskattstjóri óskaði eftir upplýsingum um innstæður, vaxtatekjur og fjármagnstekjuskatt tæplega fjórtán hundruð einstaklinga í bönkum og sparisjóðum víðs vegar um landið. Ríkisskattstjóri upplýsti jafnframt að viðkomandi aðilar væru ekki undir séstakri meðferð embættisins, en vegna laga um fjármagnstekuskatt væri skylt að veita þessar upplýsingar. Bankar og sparisjóðir töldu aftur á móti að í skjóli þagnarskyldu væri þeim óheimilt að veita umbeðnar upplýsingar og urðu ekki við beiðni skattstjóra. Ríkisskattstjóri höfðaði því mál gegn Landsbanka Íslands. Dómur var kveðinn upp 17.feb. s.l. þar sem á grundvelli skattalaga sé Landsbankanum skylt að veita umbeðnar upplýsingar. Bankar og sparisjóðir munu vafalaust í framhaldinu áfrýja dómnum til Hæstaréttar. Hér er um grundvallarmál að ræða í allri bankastarfsemi, því ef bankaleyndin verður afnumin og opinberir aðilar geta farið að valsa með upplýsingar úr bankakerfinu þá hættir fólk að treysta okkur fyrir eignum sínum, og fer eitthvað annað. Hér verður bankakerfið að bregðast hart við.“ Tjarnargötuhúsið keypt Eins grein hefur verið frá keypti Sparisjóðurinn nýlega fasteignina Tjarnargötu 12, sem hann hóf byggingu á 1981, og seldi með forkaupsrétti til Íslenskra Aðalverktaka h/f. árið 1989. Á móti kom leigusamningur til 20 ára við Sparisjóðinn á 56.66% eignarinnar og Reykjanesbæjar á 43.34%. Reykjanesbær framleigði Lífeyrissjóði Suðurnesja um það bil 5% af eigninni til sama tíma. Geirmundur segir að við hlutafjárvæðingu ÍAV í maí 1997 hafi húsið komist í eigu Regins h/f dótturfyrirtækis Landsbankans. „Strax var hafist handa um að fá húsið keypt til baka, enda forkaupréttur hjá Sparisjóðnum. Ekki tókust samningar þrátt fyrir ítrekaðar tilraunir. Eftir miklar breytingar í innanhúsmálum Landsbankans á síðasta ári hófust viðræður á ný við nýjan bankastjóra. Ekki skal fjölyrða um framhaldið að öðru leyti en því, að samningar tókust um að Sparisjóðurinn eða félag sem hann stofnaði keypti húsið á 367.500.000. Húsfélagið Tjarnargata 12 var stofnað 3.mars s.l. af leigjendunum og húsið keypt á framangreindu verði í eftirfarandi eignahlutföllum: Sparisjóðurinn 64,9%, Reykjanesbær 30,1% og Líeyrissjóður Suðurnesja 5%. Er því langþráðum áfanga náð“. Blikur á lofti Geirmundur sagði í ræðu sinni á aðalfundinum að blikur væru á lofti í efnahagsmálum þjóðarinnar. Vitnað hann m.a.til bankakreppunnar á Norðulöndum sem afleiðingu sambærilegs ástands og hér ríkir nú. „Ýmsir fremstu hagspekingar þjóðarinnar lýstu áhyggjum sínum yfir þenslunni og verðbólguhætunni nú fyrir skömmu og Seðlabankinn hefur þá þegar hafið aðgerðir gegn þenslu. Vonandi duga þessar aðgerðir og vonandi eru þetta óþarfa áhyggjur enda hefur ríkistjórnin ekki talið alvarlega hættu á ferðum ennþá og er ég bjartsýnn á yfirstandandi ár eins og rekstraráætun sparisjóðins fyrir árið 1999 ber með sér“, sagði Geirmundur Kristinsson, Sparisjóðsstjóri.
