Viljum leggja okkar af mörkum, segir Kristinn

„Fjármál og rekstur Reykjanesbæjar er ekki einkamál meirihlutans. Við erum tilbúin til að leggja okkar af mörkum til að laga til í rekstri bæjarins“ sagði Kristinn Þór Jakobsson, bæjarfulltrúi í Reykjanesbæ, eftir átakafund í bæjarstjórn  í gær.

Fylkingar í bæjarstjórn Reykjanesbæjar hafa tekist harkalega á í fjölmiðlum undanfarið vegna fjárhagsstöðu bæjarins og hvort hugmyndir um niðurskurð hafi verið ræddar í bæjarráði eða ekki. Á fundinum í gær var lögð fram sáttatillaga sem þeir bæjarfulltrúar er sæti eiga í bæjarráði slíðruðu sverðin. Í henni  eru fulltrúar sammála um að forðast upphrópanir í fjölmiðlum sem skaðað geti bæjarfélagið.