VefTV: Spekingurinn - Fyrri undanúrslit

Í síðustu viku mættust þeir Andri Steinn Harðarson og Garðar Örn Arnarson þar sem Garðar hafði betur en hann fékk seinasta sætið í undanúrslitum keppninnar. Fyrri keppnin í undanúrslitum hefst því í þessari viku þar sem Björgvin Sigmundsson og Ingimundur Guðjónsson mætast.

Ingimundur er 20 ára háskólanemi og sonur fótboltakappans Guðjóns Guðmundssonar en hann átti sín bestu ár í boltanum með Víði Garði. Ingimundur erfði hæfileikana að hans sögn en hætti í boltanum til að leyfa litla bróður að skína.
Björgvin er 24 ára Keflvíkingur og býr í Reykjavík þar sem hann vinnur hjá fyrirtækinu Marel ásamt því að læra stjórnmálafræði við Háskóla Íslands. Hann lauk B.S. í verkfræði og stefnir á mastersnám en ætlar að geyma það um óákveðinn tíma.

SPURNINGAR:
1. Hver er höfuðborg Kanada?
2. Hvaða liði mæta Grindvíkingar í úrslitakeppni karla í körfubolta?
3. Keflavíkurliðin í körfubolta og fótbolta héldu styrktarleik á föstudaginn síðastliðinn og söfnuðu um 680.000 kr. Mikið fjör var á leiknum og var Toyotahöllin troðfull af fólki. En við spyrjum, hvern voru Keflvíkingar að styrkja með þessum leik?
4. Í hversu mörg ár stóð 100 ára stríðið: 90, 100, 106 eða 116?
5. Eins og margir vita, þá er hún Ragnheiður Jónsdóttir framan á 5.000 króna seðlinum. Fleira fólk er framan á honum. Hversu margir til viðbótar eru framan á seðlinum?
6. Tvær sprengingar hafa verið í kjarnorkuveri í Japan nú á dögunum. Í hvaða borg er þetta kjarnorkuver staðsett?
7. Hver er nýjasti erlendi leikmaður Njarðvíkinga í karlaflokki í körfubolta?
8. Hvaða stjörnumerki gildir frá 20. janúar til 18. febrúar?
9. Hvaða lag situr í efsta sæti íslenska listans á FM957?
10. Hvaða heimsfræga hljómsveit mun halda risavaxna tónleika í Laugardalshöll þann 9. júní?
11. Hver verður tekinn í dýrlingatölu þann 1. maí næstkomandi við messu í Vatikaninu í Róm?
12. Forsíða vef Víkurfrétta er ríkjandi í ljósbláum lit. Hvaða litur er hins vegar ríkjandi þegar smellt er á dálkinn Mannlíf?
BRÁÐABANI
13. Í hvaða spili hylur einn leikmaður röð af mislitum pinnum og andstæðingurinn reynir að giska á rétta uppröðun þeirra og lit?