VEFTV: Fæddi barn í afgreiðslu HSS í nótt

Lítil Sandgerðismey var heldur betur að flýta sér í heiminn snemma í morgun. Móðirin, Ólöf Guðbjörg Jónasdóttir, var rétt komin inn um útidyrnar á Heilbrigisstofnun Suðurnesja þegar barnið kom í heiminn. Barnsfaðirinn, Helgi Ármannsson, hafði skutlað henni upp á dyrum við HSS og spurt hvort hann ætti að koma með henni inn. Ólöf sagði honum hins vegar að fara og leggja bílnum.

Matthildur Birgisdóttir, starfsmaður í afgreiðslu Heilbrigðisstofnunar Suðurnesja, stóð vaktina á símanum hjá HSS í nótt og sá um að opna útidyrnar fyrir Ólöfu en stofnunin er ávallt læst á nóttinni. Sem betur fer sá Matthildur þegar Ólöf kom og gat því opnað strax. Annars hefði barnið komið í heiminn úti á stétt.

Matthildur segir það sem gerðist í nótt vera sannkallað kraftaverk. Hún sé þó ennþá að átta sig á því sem gerðist, enda atburðarásin hröð. Hún hafi rétt náð að hringja upp á fæðingardeild eftir ljósmóður og þá hafi barnið verið komið í heiminn á gólfinu í afgreiðslu HSS. Ljósmóðirin hafi hins vegar verið snögg á staðinn og allt hafi farið á besta veg. Litla stúlkan hafi hins vegar verið fljótari í förum og hreinlega rann út áreynslulaust að sögn móðurinnar. Litla prinsessan sem fæddist í nótt er annað barn þeirra Ólafar og Helga en fyrir eiga þau tveggja ára stúlku sem er búin að koma í heimsókn tvisvar sinnum í dag að skoða litlu systur sína.

Matthildur heimsótti Ólöfu á fæðingardeildina í kvöld og fékk að halda á nýfæddu stúlkunni sem var 3970 grömm við fæðingu og 53 sentimetrar.

Faðirinn, Helgi Ármannsson, var pollrólegur í nótt og var að leggja bílnum á bílastæðinu við HSS á meðan Ólöf var að fæða barnið í afgreiðslunni. Honum var vitanlega brugðið þegar hann kom inn í afgreiðsluna og sá að barnið var komið í heiminn. Hann átti frekar von á því að Ólöf væri komin upp á fæðingardeild og meiri rólegheit yrðu yfir fæðingunni. „Þegar ég kom á staðinn var bara allt búið,“ sagði Helgi í samtali við Víkurfréttir í kvöld.

Í meðfylgjandi myndbandi eru viðtöl bæði við móður og föður litlu stúlkunnar sem lýsa atburðarás næturinnar.

Viðtöl og myndir: Hilmar Bragi Bárðarson

Litla prinsessan er 53 sentimetrar og 3790 grömm.

Hún var ekkert á því að opna augun fyrir forvitinn blaðamann Víkurfrétta.

Hér gerðust atburðir næturinnar og litla stúlkan kom í heiminn - í afgreiðslunni. Á efstu myndunum eru þær Ólöf Guðbjörg og Matthildur Birgisdóttir með litlu stúlkuna.