Steingrímur J: Endurreisn Spkef allt of dýr

„Það eru auðvitað vonbrigði að þessi endurreisnaráform gengu ekki eftir og sigldu í strand. Niðurstaðan var einfaldlega sú að þessi endurreisn hefði orðið ríkinu allt of dýr og áhættusöm. Þá væri hún of áhættusöm um að hún myndi skila tilætluðum árangri að öllu leyti, m.a. að gegna móðurhlutverki í sparisjóðafjölskyldunni. Það var margt sem lagðist á eitt í að þessi sund lokuðust. Lausafjárstaða Spkef hélt áfram að versna og ekki bætti úr skák erfið umræða um sjóðinn í fjölmiðlum,“ segir Steingrímur J. Sigfússon, fjármálaráðherra í viðtali við Víkurfréttir eftir fréttamannafund í Stapa í morgun.

Steingrímur telur það hafa verið lang heppilegasta kostinn að ganga til samstarfs við Landsbankann, stærsta og öflugasta banka landsins, um þessa sameiningu. Hann telur Landsbankann vel meðvitaðan um ábyrgð sína og skyldur sínar gagnvart svæðinu, viðskiptavinum og starfsfólki og reynt verði að greiða úr þessum málum sem bestan hátt.

Steingrímur segir að vantað hafi 11 milljarða til þess að eignir dygðu á móti skuldum og því til viðbótar hefði þurft að koma til viðbótar 8,2 milljarðar sem nýtt eigið fé eða stofnfé. Reikningurinn var því að nálgast 20 milljarða króna. Óvissa til viðbótar gerði það að verkum að þetta var orðinn mjög þungur róður.
Arfleið frá gamla Sparisjóðnum til þess nýja var miklu þyngri í skauti en menn höfðu áttað sig á, lausafjárstaðan erfið og fyrirgreiðsla frá Seðlabankanum var með bakábyrgð ríkisins þannig að það var heldur ekki þægilegt að halda þeirri stöðu áfram.

Aðspurður um aðferðafræðina hvernig staðið var að þessum gjörningi segir fjármálaráðherra að þetta hafi borið að skjótar en til hafi staðið. „Við héldum að við hefðum meiri tíma til að standa að þessu og til að hafa samband við aðila. Eftir leka í fjölmiðla á föstudag var ekki verið annað í stöðunni en að klára aðgerðina fljótt og vel sem hafi gengið eftir.“

Í þessari aðgerð segir fjármálaráðherra að samráð hafi verið við Skilanefnd Landsbanka Íslands og samkeppniseftirlit taki tillit til sérstakra aðstæðna hjá fjármálafyrirtækjum til þess að bjarga brýnum hagsmunum.

Steingrímur segir að nýji Spkef hafi fengið lausafjár fyrirgreiðslu á þessum tíu mánuðum eins og hafi þurft og þá hafi starfsfólk og stjórnendur hans staðið sig vel við erfiðar aðstæður. Ákaflega neikvæð umfjöllun um málefni gamla Sparisjóðsins, sem fjölmiðlar gerðu ekki nægilega mikinn greinarmun á gagnvart þeim nýja, hafi gert róðurinn mjög erfiðan. Því hafi svona farið.
„Ég lét þessa umræðu þó ekki hafa úrslitaáhrif á mína afstöðu. Ég horfði bara kalt og raunsætt á stöðuna og það vita flestir mína afstöðu. Ég hefði viljað sjá nýjan og endurreistan Sparsjóð hérna en aðstæður báru mig ofurliði og ég varð að játa mig sigraðan gagnvart staðreyndum málsins.“

Fjármálaráðherra segir stefnuna vera þá að þrátt fyrir að endurreisn Spkef hafi ekki gengið sé ætlunin að hjálpa öðrum sparisjóðum með endurskipulagningu til framtíðar, þannig að þeiri geti starfað áfram. Vinna með öðrum sparisjóðum hafi staðið yfir samtímis en einn stærsti þátturinn í þeirri endurskipulagningu hafi verið nauðsynlegar hagræðingar í hinni sameiginlegu þjónustu þeirra, eins og tölvukerfi, greiðslumiðlun, samstarfi sjóðanna, markaðsvinna og fleira. Þessi vinna öll átti að klárast samhliða endurfjármögnun sparisjóðanna og á næstu mánuðum verður þetta gert en því miður ekki með aðild Spkef.

Steinþór Pálsson, Landsbankastjóri, Einar Hannesson, fyrrv. Sparisjóðsstjóri, Steingrímur J. Sigfússon, fjármálaráðherra og Kristján Kristjánsson, upplýsingafulltrúi Landsbankans í Stapa í morgun. VF-mynd/hilmarbragi.