Sjónvarp: Áhugasamt flugfólk framtíðarinnar

„Þetta eru ungir krakkar en það er alveg ótrúlegt hvað þau vita mikið um flug,“ segir Heimir Snær Heimisson, þjálfunarstjóri hjá Keili og umsjónarmaður Flugbúða Keilis sem fóru fram í vikunni. Í búðunum gefst ungu fólki kostur á að kynna sér ýmsar hliðar náms sem tengist flugi. Heimir segir vikuna hafa verið virkilega skemmtilega. „Það er búið að vera algjörlega frábært hjá okkur í vikunni. Þau eru alltaf svo áhugasöm um flugið og spyrja margra spurninga sem maður er mjög hissa á,“ segir hann.

Flugbúðirnar í ár stóðu í fjóra daga, frá 13. til 16. júní. Á dagskránni var meðal annars heimsókn í flugskýli Icelandair, ferð á Sléttuna þar sem krakkarnir skoðuðu og fræddust um fisflugvélar, flugvirki, flugumferðarstjóri og flugmaður komu í heimsókn og sögðu frá störfum sínum, og haldnar voru kynningar á ýmsu tengdu flugi. Þá fengu allir nemendur að fara í flughermi hjá Keili. Nemendur komu víða að, til að mynda frá Egilsstöðum og Laugum. Flugbúðirnar hafa verið haldnar reglulega í nokkur ár og segir Heimir ekkert lát á áhuga unga fólksins á flugi.

Thelma Rakel Grétarsdóttir og Þorsteinn Karl Arnarsson voru meðal nemenda í flugbúðum Keilis í ár. Thelma segir það hafa verið mjög skemmtilegt að taka þátt í flugbúðunum og þá sérstaklega að skoða skýli Icelandair á Keflavíkurflugvelli. Það hefur lengi verið draumur hennar að verða flugmaður. Þorsteinn er 11 ára, alveg að verða 12, og var mættur í flugbúðirnar annað árið í röð. „Það var svo gaman í fyrra að ég varð að koma aftur. Það er svo margt skemmtilegt að gerast hérna,“ segir Þorsteinn sem er harðákveðinn í að verða flugmaður í framtíðinni.