Ævintýri líkast!

„Þetta er ævintýri líkast, maður hefur aldrei lent í öðru eins,“ sagði Hafþór Þórðarsson, skipstjóri á Erling KE þegar VF hafði samband við hann til að spyrja um gang mála á fiskimiðunum. Hafþór og hans menn á Erling hafa undanfarið haldið sig efst á lista yfir aflahæstu bátana á vertíðinni, samkvæmt vef Aflafrétta, eru komnir með hátt í 900 tonn.

„Menn gætu veitt eins og þeir vildu undir eðilegum kringumstæðum en staðreyndin er sú að það eru allir að halda aftur af sér. Það er allstaðar kjaftfullur sjór af fiski, ekki bara þar sem við erum  að veiða norðaustur af Garðskaga. Maður heyrir alls staðar af mokveiði, s.s. frá Breiðafirði, Grindavík, Vestmannaeyjum og víðar en hvergi eins mikið og hérna. Gallinn er hins vegar sá að það má enginn fá neitt, það er enginn kvóti til,“ sagði Hafþór.

Hafþór segir að þrátt fyrir allt tal um hnignandi þorskstofn hafi þorskgengnd á Íslandsmiðum aukist verulega síðustu þrjú árin. „Þetta er þvert á allar reikningskúnstir fræðinganna. Það skilur enginn hvernig þeir í Hafró fá þessar niðurstöður. Það er fullur sjór af fiski og menn muna ekki aðra eins veiði. Um það eru allir sammála, hvort sem það eru netasjómenn, línusjómenn, snurvoðarbátar eða stórir togarar.

Að sögn Hafþórs eru þeir á Erling komnir langt með kvóta sinn. „Við höldum bara aftur af okkur og reynum að koma með þetta í þægilegum skömmtum fyrir fiskverkunina. Það væri ekkert mál að klára kvótann á tveimur dögum ef það mætti.“

Mynd/elg: Hafþór Þórðarsson, skipstjóri á Erling KE.