Morgunverðurinn á Konvin hótelinu hefst klukkan fjögur. Þá eru fyrstu gestirnir þegar farnir að hugsa um flugið, bílinn eða næsta áfangastað. Þegar líður á morguninn hafa margir þeirra yfirgefið hótelið og nýr hópur er væntanlegur síðdegis.

„Þetta er bara endurnýjun á hótelinu á hverjum einasta degi,“ segir Kristján Pétur. Félagi hans, Heiðar, bætir við að snemmbúinn morgunverður sé orðinn mikilvægur hluti þjónustunnar. Fyrir gesti sem eiga morgunflug getur skipt sköpum að fá að borða áður en lagt er af stað.

Það er erfitt að sjá þessa iðandi starfsemi fyrir sér þegar þeir lýsa fyrstu kynnum sínum af húsinu. Það hafði staðið autt árum saman eftir brottför varnarliðsins. Lagnir voru úr sér gengnar, vatn hafði komist inn og veggirnir báru þess merki að enginn hefði haft áhyggjur af því hvernig þar væri umhorfs.

Þeir félagar sáu hins vegar að herbergin og gangarnir gætu hentað fyrir hótel. „Við sáum tækifæri í að stækka reksturinn og flytja hann hingað.“

Tilviljun sem vatt upp á sig

Kristján Pétur starfaði í bankageiranum og Heiðar í fasteignageiranum þegar leiðir þeirra lágu saman árið 2015. Þeir þekktust ekki áður en fundu fljótt sameiginlegan áhuga á fasteignum og framkvæmdum. Fyrstu verkefnin voru meðal annars íbúðarbyggingar í Mosfellsbæ og hótelverkefni á höfuðborgarsvæðinu.

Tækifærið á Ásbrú kom þegar þeim bauðst að kaupa rekstur gistiheimilis við Valhallarbraut. Um svipað leyti keyptu þeir húsið sem nú hýsir Konvin hótelið. Þeir ráku um tíma gistingu í báðum húsunum, en færðu síðan meginreksturinn yfir í það stærra.

„Þetta var svolítið djarft á sínum tíma,“ segir Heiðar um ákvörðunina að fjárfesta á svæðinu. Kristján Pétur segir starfandi gistirekstur hafa verið lykilatriði: „Við sáum að þetta virkaði og að það væri hægt að byggja ofan á það.“

Endurbæturnar urðu umfangsmiklar. Að sögn þeirra hafa lagnakerfi og rafmagn verið endurnýjuð, húsið tekið breytingum að utan og ný sameiginleg rými orðið til. Hótelið er nú með 134 herbergi, mörg þeirra rúmgóð þriggja og fjögurra manna herbergi. Þeir áforma að fjölga herbergjunum lítillega.

Ný viðbygging á að bæta aðkomuna og færa veitingastað, bar og morgunverðaraðstöðu niður á jarðhæð. Núverandi morgunverðarsalur tekur um 60 til 70 manns í sæti, að þeirra sögn, en nýi salurinn verður mun stærri. Það kemur sér vel þegar hundruð gesta þurfa að komast í gegnum morgunverðinn á skömmum tíma.

„Þetta er líka andlitið á húsinu,“ segir Heiðar um breytingarnar. Þeir viðurkenna þó fúslega að útlitið hafi kostað sitt. „Þetta eru dýrustu fermetrarnir sem við höfum farið í,“ segir hann og hlær.

Frá keilusal að bílaleigu

Hótelið er aðeins hluti af starfseminni. Í fyrrverandi keilusal varnarliðsins er nú aðstaða bílaleigunnar Konvin Car Rental. Þar eru meðal annars hefðbundnir bílaleigubílar, húsbílar og bílar með þaktjöldum.

Tengingin við hótelið lá beint við, segja þeir. Margir gestir þurfa bíl þegar þeir koma til landsins og geta nú nálgast hann á sama svæði og þeir gista. Þaktjöldin má taka af bílunum yfir veturinn og nýta þá áfram sem venjulega bílaleigubíla.

Í nærliggjandi húsi hafa þeir jafnframt komið upp Konvin-setrinu, með lokuðum skrifstofum, sameiginlegri kaffiaðstöðu og fundarherbergjum. Þar eru ellefu skrifstofur auk aðstöðu fyrir háskólastarfsemi. Kristján Pétur segir að þar hafi myndast samfélag þótt hvert fyrirtæki hafi sitt eigið rými: „Á föstudögum hittast allir og skiptast á að halda kaffiboð.“

Þeir segja ákvarðanir sínar um nærliggjandi hús líka hafa snúist um götuna sjálfa. Þegar hótelið tók að breytast vildu þeir sjá umhverfið þróast með því. „Þetta skiptir máli fyrir heildarmyndina,“ segir Heiðar. „Við vildum að það væri fallegt að koma hingað.“

Næsta stóra verkefni er annars eðlis. Fyrrverandi hótelhúsi við Valhallarbraut er nú breytt í 64 íbúðir, aðallega stúdíóíbúðir og tveggja herbergja íbúðir. Þeir hyggjast eiga þær áfram og leigja út. Hluti þeirra gæti einnig nýst starfsfólki, enda sé húsnæði mikilvægt þegar mannaflafrekur rekstur stækkar.

Fólkið á bak við reksturinn

Kristján Pétur áætlar að á bilinu 70 til 80 þúsund manns gisti á hótelinu á ári. Margir dvelja aðeins eina nótt. Gestir sem eiga snemmt flug geta fengið morgunverð frá klukkan fjögur, farið með morgunrútu á flugvöllinn og, ef þeir koma á eigin bíl, skilið hann eftir við hótelið meðan þeir eru erlendis.

Að sögn félaganna starfa um 80 til 100 manns við fyrirtækin eftir árstíðum. Sumt starfsfólkið var þegar á staðnum þegar þeir tóku við rekstrinum og hefur verið þar áfram. Aðrir hafa færst í aukna ábyrgð í gegnum árin.

„Okkur hefur tekist vel að halda í gott fólk,“ segir Kristján Pétur. Heiðar tekur undir: „Fólk hefur fengið að vinna sig upp hjá okkur.“

Á bak við breytingarnar á húsunum er líka fastur hópur iðnaðarmanna. Þeir segja eigin smiði hafa unnið að endurbótum á svæðinu árum saman, auk fjölda verktaka og þjónustuaðila sem þeir kaupa vinnu af.

„Ásbrú á svo mikið inni“

Þegar þeir komu fyrst á Ásbrú upplifðu þeir svæðið sem hálftómt. Nú benda þeir á íbúa, skóla, íþróttastarf, gistingu og fyrirtæki sem fylla hverfið lífi. Þeir telja að starfsemin þar sé meiri en margir átta sig á við fyrstu sýn.

„Ásbrú er hverfi í Reykjanesbæ, alveg eins og Keflavík, Njarðvík og Hafnir,“ segir Kristján Pétur. Honum finnst umræðan stundum taka of lítið mið af því hversu margir búi, vinni og dvelji þar á hverjum degi.

Þeir sjá enn rými fyrir meiri þjónustu á svæðinu og eiga sjálfir húsnæði sem bíður næsta verkefnis. Þeir vilja velja starfsemi sem hæfir staðnum og þeirri ásýnd sem þeir hafa verið að byggja upp.

Samstarf þeirra félaga sem hófst með tilviljunarkenndu spjalli er því orðið að samfelldu verkefni við að endurnýja hús, skapa rekstur og móta hluta af Ásbrú. Þegar þeir eru spurðir hvort nú fari að hægjast um svarar Kristján Pétur án þess að hika:

„Við erum hvergi nærri hættir.“

Bóas Eðvaldsson hafði fengist við ýmislegt í innflutningi, meðal annars nýja og notaða vörubíla, vinnuvélar, hjólhýsi og húsbíla, þegar bóndi hafði samband og spurði hvort hann gæti útvegað sér gröfu. Fyrirspurnin virtist í fyrstu ekki boða neinar stórar breytingar á rekstrinum, en þegar Bóas fór að kanna markaðinn sá hann fljótt að verð á notuðum vinnuvélum var hátt og fór að leita annarra leiða.

Við þá leit rakst hann á kínverska vinnuvélaframleiðandann SANY, sem þá var lítt þekktur hér á landi, þótt fyrirtækið væri þegar einn af stærstu vinnuvélaframleiðendum heims. Hann ákvað að láta reyna á viðskiptin og niðurstaðan kom honum á óvart.

„Ég seldi honum eina nýja SANY-gröfu á svona um það bil sama verði og notaða vél sem ég gat flutt erlendis frá.“

Þessi eina vél varð upphafið að mun stærri þætti í starfsemi Elfoss. Fyrirspurnum fjölgaði, fleiri vélar voru fluttar inn og smám saman breikkaði úrvalið. Í dag nær það frá litlum gröfum upp í stórar vinnuvélar og krana, auk skotbómulyftara, lyftara og ýmissa rafknúinna tækja. Fyrsti rafknúni SANY-dráttarbíll fyrirtækisins er væntanlegur á næstu dögum.

Tæplega 300 skráningarskyld tæki

„Fyrstu vélarnar komu til landsins í byrjun ágúst 2023 og síðan höfum við flutt inn tæplega 300 skráningarskyld tæki á rúmum þremur árum. Það hefur verið ánægjulegt að sjá starfsemina vaxa og árið 2026 er þegar orðið langbesta árið okkar. Það má fyrst og fremst þakka okkar góðu og skynsömu viðskiptavinum sem hafa sýnt okkur traust og kunnað að meta tækin og þjónustuna.“

Bóas segir að á þessum tíma hafi orðið greinileg breyting á því hvernig íslenskir kaupendur líta á SANY.

„Núna koma menn bara og kaupa. Þeir eru búnir að sjá, heyra af og/eða prófa tækin og þekkja einhvern sem er búinn að kaupa. Það er mjög gott fyrir mig sem sölumann. Ein setning sem ég heyri líka oft frá tilvonandi viðskiptavinum þegar þeir koma og prófa er: „Kemur virkilega á óvart.““

Hann segir reynsluna undanfarin ár hafa styrkt trú sína á bæði tækin og framleiðandann.

„Eftir þennan tíma get ég sagt að SANY-tækin séu traust og góð, rétt eins og framleiðandinn sjálfur. Tækin halda líka áfram að batna. Á gröfunum er fimm ára ábyrgð samkvæmt ábyrgðarskilmálum SANY.“

Þess má geta að hér á landi er enn í fullu fjöri 23 tonna SANY-beltagrafa sem var flutt inn árið 2007, rétt fyrir hrun. Hún hefur því verið hér á landi í um 19 ár.

Vöxtur kallað á meira húsnæði

Vöxturinn kallaði fljótlega á meira húsnæði og ekki síður rúmt athafnasvæði. Bóas er frá Egilsstöðum og hafði einnig verið með starfsemi fyrir austan, en þegar hann fór að leita að hentugum stað á suðvesturhorninu skiptu flutningsleiðir til landsins miklu. Keflavík hafði lengi verið ofarlega í huga hans og þar á hann bæði ættingja og önnur tengsl.

Áður en Ásbrú varð fyrir valinu skoðaði hann meðal annars iðnaðarhúsnæði í Hafnarfirði. Þar varð honum hins vegar fljótt ljóst að hefðbundið iðnaðarsvæði hentaði illa starfsemi þar sem stórar vinnuvélar og flutningabílar þurfa að komast greiðlega að.

„Þegar maður gat ekki lagt bílnum fyrir utan iðnaðarhúsnæðið sá ég mína sæng upp reidda. Hér er nóg pláss enda byggt af bandaríska hernum.“

Á Ásbrú fann Bóas það rými sem starfsemin þurfti. Þar skipti ekki aðeins máli að geta komið vélunum fyrir heldur einnig að stórir bílar ættu auðvelt með að athafna sig og að möguleikar væru á frekari uppbyggingu. Hann segir þó að annað hafi ekki síður haft áhrif á ákvörðunina.

„Það er gott fólk hérna í Keflavík, jákvætt, og það er vel tekið á móti manni. Hér koma menn og hrósa manni fyrir fyrirtækið. Þeir hafa skilning á því að það þurfi fyrirtæki.“

Saga Elfoss fellur vel að þeirri breytingu sem orðið hefur á Ásbrú frá því að varnarliðið fór. Hús sem áður gegndu hlutverki í starfsemi hersins hafa smám saman verið tekin undir nýja atvinnustarfsemi og í húsnæði Elfoss eru ummerki fortíðarinnar enn sýnileg. Bóas segir að þar sem fyrirtækið starfar nú hafi áður verið tölvubúnaður hersins og öryggisgæsla með vopnuðum mönnum. Í dag eru þar vinnuvélar sem verið er að undirbúa fyrir verkefni víðs vegar um landið.

Heldur áfram að stækka

Starfsemin hefur haldið áfram að vaxa og Elfoss keypti í nóvember 2025 1.880 fermetra húsnæði við hliðina, með góðum bílastæðum allt í kring. Þar stendur yfir vinna við að laga að nýjum þörfum. Fjarlægðar voru innréttingar, settar stærri hurðir og rýmin gerð þannig úr garði að hægt sé að koma þar fyrir vélum og búnaði. Hluti húsnæðisins er leigður öðrum fyrirtækjum en annað verður nýtt undir starfsemi Elfoss. Sérstaklega skiptir máli að geta geymt rafmagnstæki, lyftur og annað innandyra yfir vetrartímann.

Þótt vinnuvél geti virst tilbúin til notkunar þegar hún kemur til landsins segir Bóas að töluverð vinna geti verið eftir áður en hún fer til kaupandans. Kröfur hafa breyst og búnaðurinn orðið sífellt flóknari. Tiltrótatorar, gripklær, fleygar og GPS-graftarkerfi, ljós, smurkerfi, Oilquick-búnaður þar sem menn þurfa ekki út úr vélinni til að setja vökvafleyg á bara sem dæmi ppl er meðal þess sem margir kaupendur vilja fá á vélarnar.

„Þetta er orðið flóknara en þegar ég og þú vorum yngri. Þá var bara skófla og þótti gott“

Elfoss hefur frá upphafi lagt áherslu á að eiga vélar á lager. Bóas segir að frá því að grafa er pöntuð þar til hún er komin til landsins geti liðið að minnsta kosti fjórir mánuðir, en verktaki sem fær verkefni vill sjaldnast bíða svo lengi eftir vélinni. Því þurfi að reyna að sjá eftirspurnina fyrir og eiga tæki tiltæk þegar kaupendur þurfa á þeim að halda.

Stundum ganga sendingarnar hratt út. Bóas nefnir sem dæmi nýlega sendingu sem kom með þrettán gröfum og átta skotbómulyfturum sem hafi farið fljótt til viðskiptavina. Samhliða sölunni rekur Elfoss tækjaleigu (Leiguvélar.is) og segir hann næg verkefni vera fyrir vélarnar.

Rafmagnstækjum fjölgar

Rafmagnstæki eru einnig orðin stærri hluti af framboðinu. Þar nefnir Bóas meðal annars rafmagnsgröfur, lyftara, vörubíla og námutrukka og segir íslenska viðskiptavini þegar hafa tekið slík tæki í notkun. Hann leggur þó áherslu á að rafmagn henti ekki endilega öllum verkefnum. Kostirnir séu mestir þar sem tækin vinna á afmörkuðu svæði, stutt er í hleðslu og hægt er að nýta lægri orkukostnað.

„Ég er svo sem ekki að halda því fram að rafmagnstæki henti í allt, en þau eru góður kostur þar sem það á við og geta sparað mikið í rekstrarkostnaði.“

Fjórir starfa hjá Elfoss að sögn Bóasar. Sjálfur sér hann um söluna ásamt pöntunum og ýmiss konar umsýslu og segir mikilvægt að láta yfirbygginguna ekki vaxa hraðar en starfsemina sjálfa. Hann segir fyrirtækið vera með gott starfsfólk, en ljóst sé að bæta þurfi við fólki þar sem álagið sé mikið.

„Við erum að reyna að halda yfirbyggingunni í lágmarki en við þurfum náttúrulega að veita þjónustu.“

Byggt upp skref fyrir skref

Bóas leggur jafnframt áherslu á að eigendur Elfoss séu þrír og uppbyggingin sé sameiginlegt verk þeirra.

„Þetta hefði ekki verið hægt án meðeigenda minna. Þeir eru miklir prinsippmenn sem leggja áherslu á heiðarleika, að standa við sitt og að hlutirnir séu gerðir almennilega. Ég er afar þakklátur fyrir að hafa þá með mér í þessu.“

Þegar horft er yfir starfsemina á Ásbrú í dag er langt frá fyrstu fyrirspurn bóndans um eina gröfu. Bóas segir þó að vöxturinn hafi ekki orðið samkvæmt fyrir fram gerðri áætlun. Reksturinn hafi fremur þróast með því að bregðast við verkefnum þegar þau komu upp, kanna nýja möguleika og láta á þá reyna.

„Við höfum byggt fyrirtækið upp skref fyrir skref og gripið tækifærin þegar þau hafa komið.“

Það hugarfar virðist hafa fylgt fyrirtækinu frá upphafi vinnuvélasölunnar. Ein beiðni leiddi til fyrstu gröfunnar, hún leiddi til fleiri viðskipta og eftir því sem starfsemin óx þurfti meira húsnæði, stærra svæði og fleiri tæki. Á Ásbrú fann Elfoss svigrúmið til þess.

Fengið góð viðbrögð á Ásbrú

Sjálfur segist hann hafa fundið fyrir góðum vilja frá því fyrirtækið kom á Ásbrú.

„Við erum bara þakklátir. Við höfum fengið svakalega góð viðbrögð.“

Og þegar haustlægðirnar ganga yfir Reykjanesið er að minnsta kosti eitt sem veldur honum minni áhyggjum en áður. Eftir árin í innflutningi hjólhýsa og húsbíla er lagerinn nú heldur þyngri.

„Ég sef alveg rólegur með gröfurnar, þær fjúka ekki,“ segir Bóas og hlær.

Þróun hraðahindrunarinnar hófst í janúar 2023 í samtali Íslandshúsa og Reykjanesbæjar um þörfina fyrir endingargóða og staðlaða lausn. Að sögn feðganna Óskars og Brynjars Húnfjörð hjá Íslandshúsum hafa tugir milljóna króna farið í þróunarstarfið.

„Þróunarferlið hefur verið ansi langt en það er mjög ánægjulegt að sjá árangurinn kominn í malbikið. Við erum búin að liggja yfir hönnun og þrívíddarteikningum en annað er að sjá þetta verða að veruleika. Ég er virkilega stoltur af útkomunni,“ segir Óskar Húnfjörð, stofnandi Íslandshúsa og hönnuður nýrra lausna fyrirtækisins.

Hann segir vonir standa til að lausnin geti orðið fyrirmynd að stöðluðum hraðahindrunum í sveitarfélögum um allt land.

Hönnuð eftir norskum leiðbeiningum

Óskar segir að fyrirtækið hafi leitað að samræmdum íslenskum forsendum um hvernig hraðahindranir ættu að vera hannaðar en ekki fundið nægilega skýrar leiðbeiningar. Því hafi verið leitað út fyrir landsteinana.

Hönnun hindrunarinnar byggist á rannsóknum og leiðbeiningum norsku Vegagerðarinnar. Unnið var út frá þremur meginþáttum: hæð hindrunarinnar, sveigjunni sem ekið er yfir og lengd hennar miðað við þann hámarkshraða sem gildir á hverjum stað.

Hindrunin í Nónvörðu er hönnuð fyrir götu þar sem hámarkshraði er 30 kílómetrar á klukkustund. Hún er tíu sentímetra há en lengd bungunnar er miðuð við fyrirhugaðan yfirferðarhraða.

Sama grunnhönnun getur nýst fyrir hraðahindranir við mismunandi hraðatakmarkanir. Lengd sveigjunnar yrði þá breytt þannig að sambærileg yfirferð næðist hvort sem hámarkshraðinn væri 30 eða 50 kílómetrar á klukkustund.

„Hraðahindrun á að vera skilaboð til ökumanns um að líta á hraðamælinn og draga úr hraða. Það á ekki að vera óþægilegt að aka yfir hana á þeim hraða sem hún er hönnuð fyrir,“ segir Óskar.

Kjörorð þróunarinnar hefur því verið „Öryggi án óþæginda“.

Fyrirsjáanleg fyrir strætisvagna og viðbragðsaðila

Við hönnunina var sérstaklega horft til strætisvagna, hópferðabifreiða og annarra stórra ökutækja. Hindrunin á að vera þannig úr garði gerð að farþegar, meðal annars þeir sem sitja aftast í strætisvagni, verði ekki fyrir óþarfa höggum þegar ekið er yfir hana á réttum hraða.

Stöðluð lögun getur einnig skipt miklu máli fyrir viðbragðsaðila. Ef sams konar hindranir verða notaðar víða geta lögregla, slökkvilið og sjúkraflutningamenn betur metið hvaða álag verður á ökutæki og farþega þegar farið er yfir þær.

„Þegar viðbragðsaðilar koma að staðlaðri hraðahindrun þekkja þeir hana og vita hverju þeir eiga von á. Þeir geta þá metið á hvaða hraða þeir geta farið yfir hana,“ segir Óskar.

Hraðahindrunin er gegnlituð rauð. Hugmyndin er að liturinn og lögunin gefi vegfarendum skýr skilaboð og að ökumenn læri að þekkja hvernig aka skuli yfir hindrunina.

Á að koma í veg fyrir polla og holur

Sérstök áhersla var lögð á að leysa vandamál sem gjarnan myndast við hefðbundnar hraðahindranir. Með tímanum getur malbik slitnað við brúnir þeirra þannig að holur og pollar myndast beggja vegna.

Lausn Íslandshúsa felst meðal annars í 50 sentímetra breiðum innkeyrsluflötum við báða enda hindrunarinnar. Þeir liggja á sama plani og malbikið.

Þannig lendir álagið frá hjólbörðum ökutækja á steyptri einingunni sjálfri en ekki á malbikskantinum framan við hindrunina. Engar hvassar brúnir eru á milli innkeyrsluflatarins og bungunnar.

Hraðahindrunin er sett saman úr forsteyptum einingum sem eru 115 sentímetrar á breidd og fimm metrar á lengd. Einingunum er raðað saman eftir breidd götunnar.

Endurskin steypt inn í yfirborðið

Hvítar yfirborðsmerkingar eru steyptar inn í hverja einingu samkvæmt forskrift Vegagerðarinnar. Þær eru gerðar úr hvítri hágæðasteypu sem blönduð er glerkurli. Glerkurlið endurkastar ljósi frá aðalljósum bifreiða og eykur þannig sýnileika hindrunarinnar í myrkri.

Þar sem bæði rauði liturinn og hvítu merkingarnar ganga inn í steypuna á ekki að þurfa að endurmála hindrunina. Yfirborðsmerkingarnar eiga því að vera viðhaldsfríar.

Undir hindruninni er jafnframt sérstakur stýriprófíll sem heldur einingunum í réttri stöðu. Hann getur einnig nýst sem lagnaleið þvert yfir götuna fyrir ljósleiðara, rafmagn eða aðrar veitulagnir.

Sveitarfélög geta því nýtt framkvæmdina til að útbúa lagnaleið undir götu um leið og hraðahindruninni er komið fyrir.

Framkvæmdin tekur um tvo daga

Einn helsti kostur forsteyptrar lausnar er að lögun og gæði hindrunarinnar ráðast í verksmiðju en ekki af aðstæðum eða vinnubrögðum á hverjum framkvæmdastað.

Brynjar Húnfjörð, framkvæmdastjóri Íslandshúsa, segir mikilvægt að færa hönnunina framar í ferlið og komast hjá því að þurfa að finna upp nýja útfærslu í hvert sinn sem hraðahindrun er gerð.

Forsteyptu einingarnar eiga einnig að stytta þann tíma sem loka þarf götunni. Miðað við reynsluna af uppsetningunni í Nónvörðu telja forsvarsmenn Íslandshúsa að verkið geti tekið um tvo daga frá því framkvæmdir hefjast þar til gatan er opnuð að nýju.

Fyrsti veturinn verður mikilvægt próf

Hraðahindrunin í Nónvörðu verður nú prófuð við raunverulegar íslenskar aðstæður. Fylgst verður með því hvernig hún þolir frost, vatn, salt, nagladekk og snjómokstur.

Samhliða því verður þróunarvinnunni haldið áfram. Á teikniborðinu eru meðal annars upphækkaðar gangbrautir með innsteyptum sebramerkingum, hraðahindranir fyrir götur með 50 kílómetra hámarkshraða og minni upphækkanir fyrir botnlanga og önnur svæði þar sem draga þarf sérstaklega úr umferðarhraða.

Íslandshús er nýsköpunarfyrirtæki með aðsetur á Ásbrú í Reykjanesbæ og hannar og framleiðir forsteyptar steypueiningar. Óskar Húnfjörð og Brynja Sif Ingibersdóttir stofnuðu fyrirtækið árið 2012 og hefur vöruþróun og nýsköpun verið stór þáttur í starfseminni frá upphafi.

„Mér finnst eins og ég sé að koma heim þegar ég kem hérna í hádeginu til ykkar.“ Þessi orð viðskiptavinar, sem Drífa Dan rifjar upp úr spjalli fyrr um daginn, segja kannski meira um Public Deli á Ásbrú en upptalning á réttum og hráefnum. Þau Kristinn Skúlason hafa lagt áherslu á að fólk fái góðan mat en líka að því líði vel, að það þekki andlitin sem taka á móti því og langi að koma aftur.

Fyrir Kristin, eða Kidda Skúla eins og margir Suðurnesjamenn þekkja hann, hefur staðurinn líka orðið vettvangur endurfunda.

„Það koma margir að heimsækja mig og til að spjalla. Þetta er búinn að vera voða skemmtilegur tími,“ segir hann.

Drífa hefur sína lýsingu á því: „Þetta er svona eins og endurfundir alla daga fyrir hann.“

Að hitta fólk, heyra sögur þess og vera hluti af samfélaginu í Reykjanesbæ er stór hluti af ánægjunni sem þau hafa af rekstrinum. Þau vilja að staðurinn sé líka vettvangur samveru, þar sem fjölskyldur og vinir geti sest niður yfir góðum mat, fagnað áföngum eða einfaldlega notið hversdagsins saman.

Litla Skúlabúðin

Þegar Kristinn og Drífa undirbjuggu opnun Public Deli á sínum tíma lýsti hann hugmyndinni sem nútímalegri hverfisverslun. Veitingastaður og verslun undir sama þaki áttu að auðvelda fólki hversdaginn; hægt yrði að setjast niður og borða eða grípa með sér mat og nauðsynjar.

Hugmyndin átti sér þó eldri rætur í lífi Kristins. Hann ólst upp í Keflavík og steig sín fyrstu skref í verslunarrekstri í Skúlabúð, verslun foreldra sinna við Lyngholt.

„Ég byrjaði snemma að hjálpa til í búðinni hjá pabba og mömmu,“ segir hann.

Reyndar stóð til að starfsferillinn yrði allt annar. Ungur ætlaði Kristinn að verða rakari og var á leið á samning á stofu í Reykjavík þegar hann kynntist konunni sem síðar varð eiginkona hans. Leiðin lá þess í stað inn í matvöruverslunina, fyrst í Víði, síðan Nóatún og loks Krónuna, þar sem hann stýrði rekstri og uppbyggingu um árabil.

Nú er hringurinn að einhverju leyti lokaður. Eftir áratugi á höfuðborgarsvæðinu er hann aftur kominn með verslun í sínum gamla heimabæ.

„Ég kalla búðina alltaf litlu Skúlabúðina,“ segir hann.

Of ung til að hætta

Eftir tæp átján ár sem rekstrarstjóri Krónunnar tók Kristinn að sér að vinna að uppsetningu flugeldhúss í gamla messanum á Ásbrú. Þar í nágrenninu sá hann húsnæðið sem áður hafði hýst Langbest og stóð þá autt.

Þau hjón höfðu lengi gengið með hugmynd að eigin stað. Þau höfðu meðal annars skoðað möguleika í Kópavogi, en þar hefði þurft að byggja starfsemina upp frá grunni. Á Ásbrú var tækifærið annað.

Fyrirmyndina höfðu þau séð í Svíþjóð: verslun og veitingar sem löguðu sig að stærð og þörfum hverfisins.

„Okkur langaði kannski að taka síðasta dansinn í lífinu. Við settum okkur fimm ára markmið og settum þetta upp hérna,“ segir Kristinn.

Að setjast í helgan stein hafði nefnilega verið prófað. Tilraunin gekk ekki sérstaklega vel.

„Okkur fannst við bara vera of ung til að hætta að vinna,“ segir Drífa. „Við prófuðum það en það hentaði okkur alls ekki. Við erum svo orkumikil.“

Golfið eitt og sér dugði ekki til, þótt þau hefðu bæði gaman af því. Eftir að reksturinn hófst hefur raunar gefist heldur minni tími til að sveifla kylfunum.

Börnin voru ekki alveg sannfærð í upphafi.

„Þau héldu að við hefðum hreinlega dottið á hausinn,“ segir Drífa og hlær. „En í dag sjá þau hvað við höfum gaman af þessu.“

Hverfið hafði sínar eigin hugmyndir

Reynsla Kristins úr matvöruversluninni var mikil, en Ásbrú átti eftir að koma honum á óvart.

Þau höfðu séð fyrir sér meiri eftirspurn frá fjölskyldum. Í upphafi urðu þau hins vegar vör við stóran hóp fólks sem vann á flugvellinum, hjá bílaleigum og víðar á svæðinu. Margir sóttu einfaldar lausnir í verslunina en nýttu veitingastaðinn síður en þau höfðu búist við.

Þá þurfti að hlusta.

„Við byrjuðum með meiri ferskvöru, ávexti og grænmeti, en það var ekki að virka eins og við höfðum hugsað okkur. Við einfölduðum þetta bara og fórum í það sem hverfið var að biðja um,“ segir Kristinn.

Mjólk, brauð, tannbursti, tannkrem og aðrar hversdagslegar nauðsynjar fengu sitt pláss. Gestir af hótelinu í næsta húsi og gistiheimilum í nágrenninu hafa líka nýtt sér verslunina.

Sama þróun varð á veitingastaðnum. Heimilismatur í hádeginu var ekki hluti af upphaflegu áætluninni en viðskiptavinirnir hjálpuðu þeim að finna þá leið.

„Þeir hafa líka hjálpað okkur að aðlagast umhverfinu,“ segir Kristinn.

Nú koma iðnaðarmenn, verktakar og starfsfólk fyrirtækja á svæðinu reglulega í hádegismat. Drífa nefnir einnig lögreglu, slökkvilið, Landhelgisgæslu og hermenn meðal gesta.

„Þetta er öll flóran. Við eigum mikið af góðum og traustum viðskiptavinum sem halda tryggð við okkur,“ segir hún.

Samloka með ferðasögu

Í hádeginu er boðið upp á heimilismat ásamt opnum matseðli. Þau leggja áherslu á að hafa val, meðal annars fyrir þá sem vilja fisk og þá sem kjósa kjötrétt.

Súpan er gerð frá grunni, brauð og kökur bökuð og sósurnar lagaðar á staðnum. Súrdeigspítsurnar hafa verið vinsælar, en samlokur úr pítsadeigi hafa líka eignast sinn aðdáendahóp.

Ein þeirra hefur meira að segja farið í töluvert ferðalag.

Drífa segir frá gestum sem keyptu samloku til að taka með í flug til Alicante. Þau borðuðu hins vegar á staðnum áður en lagt var af stað og samlokan beið því fram á kvöld.

„Hún var borðuð í kvöldmat með góðu rauðvínsglasi á Alicante. Ég fékk meira að segja senda mynd,“ segir Drífa, augljóslega ánægð með þessa óvæntu ferðasögu.

Á matseðlinum eru meðal annars salöt, vefjur, steikur, grillaður lax og rif með viskígljáa sem þau útbúa sjálf. Nú stendur til að endurnýja hluta matseðilsins.

„Við erum ekki að bylta öllu. Við ætlum aðeins að koma með nýjungar fyrir viðskiptavinina okkar,“ segir Kristinn.

Ferðahópar eru einnig orðnir hluti af starfseminni. Gestir hafa komið frá Ítalíu, Kína, Bandaríkjunum og Indlandi, auk íslenskra hópa á ferð um Suðurnes. Drífa segir ánægjulegt þegar ein heimsókn leiði af sér þá næstu og hópar bendi öðrum á staðinn.

Þótt erindin séu ólík leggja þau sömu áherslu á hlýjar móttökur og notalegt umhverfi, hvort sem gestir eru á ferðalagi, að fagna áfanga eða koma við í hádeginu. Í kynningu staðarins draga þau þá hugsun saman með orðunum: „Public Deli, þar sem gott fólk, góður matur og góðar stundir mætast.“

Hann á morgnana, hún á kvöldin

Þau hjón eru sjálf á staðnum alla daga en skipta með sér tímanum. Kristinn er morgunmaðurinn og mætir fyrstur. Hann heldur yfirleitt heim á milli fjögur og fimm og Drífa sinnir síðari hluta dagsins.

Þau reyna að eiga frí saman á sunnudögum. Að öðru leyti snýst þetta mikið um staðinn, starfsfólkið og gestina.

Drífa segir fólk stundum velta fyrir sér hvernig það fari að því að vinna saman dag eftir dag.

„Við erum búin að vinna saman svo lengi að við þekkjum hvort annað og leyfum hvort öðru að njóta sín. Hann er í sínu og ég í mínu.“

Hún sinnir meðal annars skrifstofuverkefnum auk þess að vera frammi meðal gesta. Þau segja nærveru eigendanna skipta máli en eru jafnframt fljót að nefna starfsfólkið.

„Við erum með frábært starfsfólk,“ segir Drífa. „Vaktstjórarnir okkar hafa verið með okkur frá byrjun.“

„Eigum við?“

Þótt þau hafi upphaflega sett sér fimm ára markmið hafa komið fyrirspurnir um hvort þau vilji opna sambærilegan stað annars staðar.

„Við höfum alveg litið hvort á annað og sagt: Eigum við?“ segir Drífa.

Kristinn viðurkennir að hugmyndin freisti.

„Ef maður væri fimmtán árum yngri hefði maður ekki hikað.“

Þegar Drífu var nýlega bent á laust húsnæði niðri í Keflavík var svarið þó skýrt:

„Nei, við erum hérna uppi á Ásbrú.“

Þau sjá breytingar í hverfinu, hús fá nýtt hlutverk og fleiri íbúar eru farnir að nýta sér staðinn. Drífa hafði frá upphafi lagt áherslu á að húsið yrði tekið í gegn að utan og gluggarnir bættir svo meiri birta kæmist inn. Nú horfa þau ánægð á umhverfið taka breytingum.

En þegar þau eru spurð hvort þau sjái eftir því að hafa ráðist í reksturinn þarf ekki langan umhugsunartíma.

„Ég held að við hefðum séð eftir því að hafa ekki gert þetta,“ segir Kristinn. „Þetta var draumur.“

BM Vallá, sem fagnar 70 ára afmæli sínu á árinu, hefur fjárfest fyrir mörg hundruð milljónir króna í stöðinni á Ásbrú. Stöðin, sem kemur frá þýska framleiðandanum Nisbau, er sérstaklega hönnuð með tilliti til staðbundinna aðstæðna, svo sem vindálags og jarðskjálftahættu. Þá er hún búin háþróaðri endurvinnslustöð sem endurnýtir alla afgangssteypu og útskolunarvatn.

Sjötíu ára saga

Saga BM Vallár nær aftur til ársins 1956 þegar Benedikt Magnússon frá Vallá hóf að moka möl í fjörunni á Kjalarnesi og selja í steypu. Í dag er BM Vallá hluti af samstæðu Hornsteins, sem er í meirihlutaeigu alþjóðlega steypurisans Heidelberg (53%) ásamt hópi innlendra fjárfesta (47%). Stöðin í Reykjanesbæ er sú þriðja í eigu BM Vallár en fyrir er félagið með steypustöðvar í Reykjavík og Akranesi og í samstarfi við Möl og Sand á Akureyri. Hjá BM Vallá starfa um 160 manns og þremur tugum meira í samstæðunni.

Ótrúlegur vöxtur og stór tækifæri

Aðspurður um ástæðu þess að ráðist var í þessa stóru fjárfestingu á Suðurnesjum segir Þorsteinn að umhverfið á svæðinu hafi breyst gríðarlega á undanförnum áratugum.

„Við höfum horft mjög lengi til Reykjanesbæjar og má segja að þessi fjárfesting eigi sér talsverðan aðdraganda. Hér hefur verið alveg ótrúlega kröftug uppbygging á undanförnum áratugum. Ótrúleg umbreyting sem svæðið hefur gengið í gegnum frá þeim tíma sem herinn fór og sú niðursveifla sem því fylgdi.“

Þorsteinn bendir á að íbúafjölgun á Suðurnesjum hafi tekið til sín drjúgan hluta af vexti suðvesturhornsins síðasta aldarfjórðunginn. Þá séu mikilvægir innviðir og stórframkvæmdir á svæðinu stór ástæða fyrir komu BM Vallár:

„Við horfðum til þess þegar maður horfir fram á veginn að það er auðvitað mikil innviðauppbygging fram undan, bæði í kringum flugvöllinn, í kringum raforkuframleiðslu og síðan sjáum við þetta metnaðarfulla landeldisverkefni sem Samherji er kominn af stað með á Reykjanesi. Við töldum orðið löngu tímabært að setja hér niður sterka stöð.“

BM Vallá náði samningum við Ístak um steypusölu í landeldi Samherja og hefur stöðin fengið „fljúgandi start“ frá því hún var gangsett af fullum krafti undir lok síðasta árs.

Hluti af framtíðarstefnu

Koma BM Vallár til Reykjanesbæjar er einnig stór hluti af framtíðarstefnumótun félagsins, en fyrirtækið hefur gert samkomulag við Reykjavíkurborg um að rýma athafnasvæði sitt á Höfðanum eigi síðar en árið 2032.

Þorsteinn útskýrir að breytingar á skipulagi í Reykjavík þýði að grófari atvinnustarfsemi þurfi að færa sig um set.

„Höfðinn er einstaklega þægileg staðsetning fyrir starfsemi eins og okkar, en við fáum hvergi þar nálægt pláss aftur. Við sáum fyrir okkur að í framtíðinni yrðu það tvær stöðvar sem myndu þjóna suðvesturhorninu að lágmarki. Þessi fjárfesting í Reykjanesbæ var náttúrulega liður í þeirri framtíðarstefnumótun.“

Stuttar boðleiðir og skilningur á verðmætasköpun

Eitt af því sem stendur upp úr í samtalinu er reynsla BM Vallár af samskiptum við stjórnsýsluna í Reykjanesbæ. Þorsteinn leyfir sér að bera vinnubrögðin saman við það flækjustig sem oft mætir fyrirtækjum á höfuðborgarsvæðinu.

„Eftir að hafa verið í talsverðum samskiptum við flókið regluverk víða þá var mjög frískandi að koma hingað. Það var gengið hratt og örugglega í hlutina og við lentum ekki í neinum tilfinnanlegum vandræðum.“

Hann segir að móttökurnar hjá bæjaryfirvöldum og starfsmönnum bæjarins hafi verið til fyrirmyndar:

„Stuttar boðleiðir og fólk á tánum við að koma hlutum áfram, sem er alltaf gaman að sjá. Ég held að þetta sé augljóst merki þess að hér sé fólk í raunhagkerfinu sem veit hvernig verðmætasköpun verður til og að hún er virði í tíma. Það er mikilvægt að hlutir gangi hratt og örugglega fyrir sig.“

Umhverfismálin í fyrirrúmi

Steypuiðnaðurinn hefur breyst mikið á síðustu áratugum og eru umhverfismál nú í brennidepli. Þorsteinn nefnir að tæknilega sé verið að gera svipaða hluti og Rómverjar gerðu fyrir 2.000 árum, en kröfurnar og vinnsluaðferðirnar séu allt aðrar.

„Megináherslan á síðastliðnum tíu til tuttugu árum er umhverfisáhrifin. Kolefnisspor sementsiðnaðar er nokkuð hátt á heimsvísu, en við höfum verið í fararbroddi hér á landi í þeirri vegferð. Heilt yfir í okkar starfsemi höfum við náð nærri þriðjungs lækkun á kolefnisspori frá 2020.“

Með nýju stöðinni í Reykjanesbæ, vistvænni steypu og aukinni nýtingu endurunninna hráefna telur Þorsteinn að BM Vallá sé vel í stakk búið til að þjóna kröfuhörðum markaði á Suðurnesjum til framtíðar.

Göngustígarnir meðfram strandlengjunni í Reykjanesbæ eru mikið notaðir allt árið. Þar mætast hins vegar vindur, salt, frost og sjógangur og því getur reynst erfitt að halda lýsingu og rafbúnaði í góðu ástandi.

Óskar Húnfjörð, stofnandi Íslandshúsa, segir að þróun ljósastólpanna hafi tekið um tvö ár. Verkefnið hafi orðið til í samtali við Reykjanesbæ vegna þeirra áskorana sem bærinn stóð frammi fyrir við lýsingu á göngustígum við sjóinn.

„Það þurfti að hanna stólpa sem væri fallegur, sterkur og gæti staðist þessar erfiðu aðstæður. Við vildum jafnframt komast hjá hefðbundinni járnbendingu vegna þess að stólparnir eru nálægt sjó og við vildum ekki eiga á hættu að tæring kæmi upp til lengri tíma,“ segir Óskar.

Sérstök steypublanda fyrir erfiðar aðstæður

Íslandshús unnu með danska sementsframleiðandanum Aalborg Portland við að finna rétta steypublöndu fyrir stólpana. Að sögn Óskars er steypan mun sterkari en sú sem almennt er notuð í húsbyggingum.

Rafkerfið þurfti einnig að vera sérstaklega vel varið enda getur sjór gengið yfir hluta mannvirkjanna. Þá þurftu stólparnir að þola seltu, frost og veðurálag, auk þess sem horft var til þess að þeir væru nægilega traustir til að draga úr hættu á skemmdarverkum.

Framkvæmdin við strandlengjuna reyndist þó ekki aðeins snúast um stólpana sjálfa. Eldri lagnir undir göngustígunum voru víða illa farnar og höfðu sumar verið fullar af sjó árum saman. Á köflum þurfti því að brjóta upp steypta stétt, endurnýja lagnir og útbúa nýjar undirstöður.

„Þetta er aðferð sem kostar sitt en við erum að horfa til langs tíma. Ég segi gjarnan að menn eigi ekki að spyrja hvað þetta kosti heldur hvað þetta kosti á ári. Það er það sem skiptir sveitarfélögin máli,“ segir Óskar.

Tilraunir með stólpana hafa staðið yfir í um tvö ár og fyrstu stólparnir við sjávarsíðuna í Keflavík hafa nú verið í notkun í rúmt ár. Að sögn Óskars hafa þeir staðist prófið með prýði.

Lýsingin færð lengra eftir strandlengjunni

Fyrir síðustu jól voru sambærilegir stólpar settir upp við göngustíg á Kambi í Njarðvík. Þar var notuð sérhönnuð undirstaða sem grafin er í jarðveg við stíginn og stólpinn síðan skrúfaður ofan á hana.

Í vor var verkefninu síðan haldið áfram eftir strandlengjunni í Innri-Njarðvík og í átt að Stapa. Þar þurfti einnig að gera við eldri lagnir og endurnýja frágang á köflum.

Ljósaröðin tengist meðal annars litlu útivistarsvæði við gamlan brunn við stíginn í Kópu í Innri-Njarðvík. Þar er lýsingunni ætlað að draga fram sögulegt umhverfi staðarins og skapa ákveðna torgstemningu fyrir þá sem fara um svæðið.

„Þetta hefur tekist óskaplega vel. Það er gífurleg umferð um þessa göngustíga og mikil ánægja meðal fólks með að verið sé að bæta lýsinguna,“ segir Óskar.

Hann segist sjálfur hafa upplifað hversu fjölbreyttur hópur nýtir stígana. Þegar hann var nýlega að prófa lýsinguna hafi hann hitt tvo unga menn sem höfðu hjólað stíginn og sest niður á bekk til að spjalla.

„Það er alveg ótrúlega skemmti-leg stemning þarna. Fólk gengur, hjólar og fer með hundana sína. Það eru í raun allir að nýta þetta.“

Merki, listaverk og sögur í stólpunum

Brynjar Húnfjörð, framkvæmdastjóri Íslandshúsa, segir hönnun stólpanna bjóða upp á ýmsa möguleika. Grunnurinn sé hvít steypa og því sé hægt að framleiða þá í mismunandi litum eftir óskum hvers sveitarfélags.

Stólparnir í Reykjanesbæ eru dökkgráir og merki bæjarins er steypt inn í þá. Brynjar segir merkið njóta sín sérstaklega vel þegar birtan fellur á það og skuggarnir draga það fram.

Einnig hefur verið þróuð lausn þar sem hægt er að koma fyrir laserprentaðri plötu úr ryðfríu stáli á stólpunum. Þannig væri til dæmis hægt að setja myndir af bæjarlistamönnum, persónum úr Íslendingasögunum eða upplýsingar um sögu viðkomandi staðar á hvern stólpa.

„Þetta gefur möguleika á að hafa ekki aðeins fallega lýsingu heldur líka einhvers konar sögugöngu eða upplýsingamiðlun eftir stígnum,“ segir Brynjar.

Áhugi víða um land

Reykjanesbær er ekki eina sveitarfélagið sem hefur sýnt lausninni áhuga. Íslandshús hafa lánað sveitarfélögum víða um land stólpa og undirstöður svo hægt sé að prófa búnaðinn í raunverulegu umhverfi áður en ákvörðun er tekin um stærri framkvæmdir.

Þannig geta sveitarfélög prófað mismunandi fjarlægð á milli stólpa, metið birtuna og fengið viðbrögð íbúa. Nýlega hóf Ísafjarðarbær til að mynda að setja upp stólpa af þessari gerð.

Feðgarnir segja verkefnið við strandlengjuna í Reykjanesbæ gott dæmi um hvernig samtal fyrirtækis og sveitarfélags getur leitt til nýrrar íslenskrar vöru.

„Við viljum gera hlutina vel frá upphafi,“ segir Brynjar og bætir við: „Góð ending skiptir gríðarlega miklu máli þegar horft er til framtíðar.“

Endurnýja lýsingu á 11 kílómetra strandleið

Lýsingin sem nú er unnið að við strandleiðina í Njarðvík er framhald stærra verkefnis Reykjanesbæjar við endurnýjun lýsingar á hinni ellefu kílómetra löngu strandleið. Verkefnið hófst við strandleiðina í Keflavík en síðar var Kamburinn í Njarðvík lýstur upp með svonefndum ljósálfum.

„Þessi framkvæmd nær til stórs hluta strandleiðarinnar í Njarðvík sem fékk ekki lýsingu þegar leiðin var upphaflega lögð,“ segir Aron H. Steinsson, veitustjóri Reykjanesbæjar.

Ljósálfarnir eru um 60 sentímetra há steypt ljós sem Íslandshús á Ásbrú þróaði í samstarfi við Reykjanesbæ og Hildiberg ljósahönnun. Þeir voru sérstaklega hannaðir fyrir erfiðar aðstæður við sjávarsíðuna, þar sem salt, vindur, snjór og frost fara illa með hefðbundinn ljósabúnað. Fyrstu hundrað ljósálfarnir voru settir upp árið 2025.

Ljósinu er beint niður á gönguleiðina til að draga úr ljósmengun og glýju. Mjúk birta fellur jafnframt á grjót og nærumhverfi stígsins. Ljósbúnaðurinn er útskiptanlegur þannig að ekki þarf að skipta um sjálfa steypueininguna þegar ljósgjafinn hefur lokið líftíma sínum.

Framkvæmdin fellur að nýsamþykktum leiðbeiningum Reykjanesbæjar um ljósvist. Þar er lögð áhersla á hlýja lýsingu, lágmarksbirtu og að ljósinu sé aðeins beint þangað sem þess er þörf. Sérstakrar varfærni skal gæta á strand- og náttúrusvæðum til að varðveita myrkurgæði og draga úr áhrifum á fugla og annað lífríki.

Næsti áfangi verkefnisins er fyrirhugaður á næsta ári. Þá stendur til að lýsa upp strandleiðina á Vatnsnesi og gönguleiðina neðan Bakkastígs í Ytri-Njarðvík.

Feðgarnir Óskar og Brynjar Húnfjörð hjá Íslandshúsum hafa þróað ljósálfinn.

„Við höfum alveg skýra sýn, við trúum því að Ísland geti orðið einn fremsti upplifunar- og vellíðunaráfangastaður heimsins. Innan félagsins hefur byggst upp dýrmæt þekking sem við nýtum þegar við þróum nýja áfangastaði, hönnunarvinnan leggur grunn að verðmætasköpun til framtíðar,“ segir Sigríður Margrét.

Bláa Lónið hlaut verðlaunin nú í annað sinn, en fyrirtækið hlaut þau fyrst árið 2004. Frá stofnun hefur starfsemin þróast og þekking byggst upp á því hvernig skapa má verðmæti úr samspili náttúru, rannsókna og hönnunar.

Sigurður Þorsteinsson, framkvæmdastjóri hönnunar, fjallaði um hvernig þekking á þörfum gesta, náttúran á hverjum stað og náið samstarf ólíkra fagstétta móta þróunarverkefnin. Blue Lagoon Design, hönnunarteymi fyrirtækisins sem er þverfaglegur hópur með aðstöðu í Garðabæ og Mílanó, leiðir hönnunarvinnuna í samstarfi við hönnuði, arkitekta, verkfræðinga og aðra sérfræðinga.

„Við byrjum á því að skilja fólkið sem kemur til okkar. Eftir hverju sækist það og hvernig sköpum við réttar aðstæður fyrir ógleymanlega upplifun? Sumir vilja verja tíma saman, aðrir leita að ró og næði. Þekking og reynsla innan félagsins hafa áhrif á ákvarðanir í okkar teymi, allt frá skipulagi rýma til þess hvernig við tökum á móti gestum,“ segir Sigurður.

Náttúran gefur hönnuninni stefnu. Jarðsjórinn með sínum sérstæðu eiginleikum og hraunið í Svartsengi hafa frá upphafi mótað upplifun Bláa Lónsins. Við þróun annarra áfangastaða er einnig unnið út frá náttúru og sérkennum hvers staðar og þeim möguleikum sem þar eru til að skapa upplifun fyrir gesti.

„Við hönnum í samtali við náttúruna. Við skoðum hvað einkennir hvern stað og hvernig við getum gefið fólki færi á að upplifa það sem sterkast. Hver staður er einstakur og kallar á sína nálgun segir Sigurður.

Gylfi Þór Gylfason fasteignasali er útibússtjóri Valhallar í Reykjanesbæ en hann hefur búið í Reykjanesbæ í fimmtán ár. Gylfi, sem hefur starfað hjá Valhöll í nokkur ár, mætti með hugmyndina um að opna útibú í Reykjanesbæ inn á borð Óskars og Snorra og leist þeim strax mjög vel á hugmyndina.

Þrjátíu ára fasteignasala

Í viðtali við Víkurfréttir segja þeir Óskar og Snorri að Valhöll sé þrjátíu ára gömul fasteignasala en þeir hafi tekið við rekstrinum árið 2023. Þeir segja að Reykjanesbær og nágrenni hafi vaxið sem ákjósanlegt búsetu- og atvinnusvæði að undanförnum árum og mikil uppbygging og íbúafjölgun hafi verið í nokkurn tíma. „Við höfum mikla trú á Suðurnesjum og sjáum mörg sóknarfæri þar. Við þurftum því ekki að hugsa okkur lengi um að opna skrifstofu í Reykjanesbæ þegar hugmyndin kom á okkar borð, ekki er verra að vera með heimamann í okkar liði en Gylfi Þór hefur verið lengi á svæðinu og því vel tengdur þar.“

Aðspurðir segja þeir að fasteignaverð á Suðurnesjum og sérstaklega í Reykjanesbæ hafi hækkað mikið í samanburði við höfuðborgarsvæðið á undanförnum árum. Mikil uppbygging á Suðurnesjum og möguleikar hafi haft áhrif en vissulega hafi margir flutt á svæðið þegar verðið á eignum var nokkuð lægra en á höfuðborgarsvæðinu.

Þurfa að hugsa út fyrir boxið

Valhöll opnaði í vor í Reykjanesbæ og Gylfi Þór segir að þrátt fyrir áskoranir á fasteignamarkaði á þessum tíma hafi gengið vel. „Munurinn er vissulega sá að núna tekur lengri tíma að selja eignir en þegar markaðurinn var hagstæðari í vöxtum og aðstæður betri í þjóðfélaginu. Það þarf að hafa meira fyrir sölunni núna. Íslendingar eru vanir því að eignir seljist frekar hratt, ólíkt því sem gerist víða erlendis þar sem algengt þykir að taki 6-12 mánuði að selja eignir. Núna þarf að hugsa út fyrir boxið og skoða ýmsa möguleika eins og íbúðaskipti. Við höfum selt talsvert af atvinnuhúsnæði hér á svæðinu en einnig íbúðir og sérbýli í flestum hverfum. Framboðið á fjölbreyttu íbúðarhúsnæði er mjög gott og við erum t.d. að selja fyrir BYGG sem er með vandaðar íbúðir í Reykjanesbæ.

Kaupendamarkaður

Núna má segja að það sé nokkur kaupendamarkaður og verð hefur staðið í stað í alllangan tíma. Það eru því mörg ágæt kauptækifæri um þessar mundir því markaðurinn á til að fara aftur upp eins og sagan hefur sýnt. Aðstæður fyrir fyrstu kaupendur að kaupa íbúðir í dag eru ágætar þar sem þeim stendur til boða að kaupa íbúðir með 95% veðsetningu í gegnum HMS á íbúðum sem falla þar undir og þá lána sumir bankar fyrstu kaupendum allt að 90% af kaupverðinu. Þó að vextir séu háir núna þá er leiga líka há. Markaður fyrir fyrstu kaupendur getur því verið hagstæðari núna en margir halda. Framboð íbúða er gott, t.d. í Innri Njarðvík, Ásbrú, Keflavík og víðar á Suðurnesjum.“

Þeir félagar segja að það muni hafa jákvæð áhrif að Reykjanesbær ákvað að afnema byggingarréttargjöld og eftir þá ákvörðun hafi áhugi verktaka á lóðum aukist mikið.

Gylfi Þór segir að staðsetning fasteignasölunnar í Reykjanesbæ sé mjög góð. Undir það taka þeir Snorri og Óskar og segja að stefnan sé að bæta við starfsfólki þegar fram líða stundir til að veita sem besta þjónustu.

Michelin-lyklar eru veittir hótelum sem skara fram úr þegar kemur að heildarupplifun gesta. Matið nær til dvalarinnar í heild, þar á meðal gæða þjónustunnar, hönnunar og þess hvernig sérkenni staðarins njóta sín.

Hjá Retreat mótast upplifun gesta  af nálægðinni við náttúruna, rólegu umhverfi, einstakri þjónustu þar sem vellíðun og þarfir gesta eru í forgrunni. Hönnunin tekur mið af umhverfinu og þjónustan af þörfum hvers gests.

„Við erum ákaflega stolt af þessari viðurkenningu. Hún er fyrst og fremst mikið hrós til starfsfólksins okkar sem tekur svo vel á móti gestum og leggur sig fram um að gera dvöl þeirra einstaka. Það er hlýjan, umhyggjan og fagmennskan, í stóru sem smáu, sem gerir dvölina einstaka. Viðurkenning sem þessi er einnig jákvæð fyrir  íslenska ferðaþjónustu  í heild og styrkir enn frekar orðspor Íslands sem áfangastaðar“, Sigrún Halldórsdóttir, framkvæmdastjóri rekstrar hjá Bláa Lóninu

Highland Base í Kerlingarfjöllum heldur sínum Michelin-lykli. Þar njóta gestir dvalar  í einstöku umhverfi miðhálendisins þar sem náttúruupplifun, kyrrð og vönduð þjónusta fara saman. Viðurkenningarnar eru staðfesting á því góða starfi sem unnið er á báðum stöðum og hvatning til að halda áfram  að þróa þjónustuna og skapa framúrskarandi upplifun fyrir gesti, segir í frétt frá Bláa Lóninu.

Sigríður Margrét Oddsdóttir flutti til Njarðvíkur þegar hún var tíu ára og eignast sínar bestu vinkonur. Hún tók nýlega við sem forstjóri Bláa Lónsins.

Sigríður dvaldi á Suðurnesjum í all nokkur ár þegar hún var stelpa en hún fylgdi fjölskyldunni til Njarðvíkur þegar faðir hennar, Oddur Einarsson, tók við sem bæjarstjóri Njarðvíkurbæjar. Sigga Magga er því komin nálægt sínum æskuslóðum þegar hún stýrir málum í Bláa Lóninu í Grindavík.

Þú hefur stýrt stórum vörumerkjum eins og Já og Lyfju og komst svo inn í Bláa lónið úr hringiðu atvinnulífsins hjá SA. Hvað var það sem dró þig að Bláa lóninu á þessum tímapunkti?

Bláa Lónið hf. er einstakt félag, ekki bara á Íslandi heldur á heimsvísu. Fyrirtækið hefur verið byggt upp með langtímasýn og hugrekki að leiðarljósi. Hjá fyrirtækinu starfar framúrskarandi fólk og að baki því stendur framúrskarandi fólk.

Grímur Sæmundsen hafði stýrt Bláa lóninu frá stofnun árið 1992 eða í rúm 33 ár. Hvernig er að taka við keflinu af forstjóra sem hefur verið svo samofinn sögu og ímynd fyrirtækisins?

Grímur er svo sannarlega ekki hættur þó að hann hafi látið af störfum sem forstjóri, hann tók við sem stjórnarformaður félagsins og er stærsti einstaki eigandi þess. Grímur er mikil fyrirmynd fyrir alla sem hafa ástríðu fyrir viðskiptum. Það voru því ekki bara tímamót í sögu félagsins þegar hann lét af störfum sem forstjóri, heldur tímamót í íslensku atvinnulífi. Það eru forréttindi að fá að vinna með Grími og við erum öflugt teymi.

Hvað hefur komið þér mest á óvart við innviði og menningu Bláa lónsins?

Þetta er magnaður hópur sem hefur mikla ástríðu fyrir því að veita góða þjónustu og ná árangri. Hitt er hversu skýr stefna fyrirtækisins er bæði í orði og framkvæmd, það er sjaldgæft að koma að félagi þar sem tækifærin eru jafn mörg og metnaðurinn jafn mikill.

Seigla og útsjóBláa lónið hefur þurft að sýna ótrúlega seiglu í gegnum eldsumbrot og raskanir á Reykjanesi á undanförnum árum. Hvernig hefur teymið tæklað þessa óvissu og hvernig horfir öryggis- og viðbragðsáætlun Bláa lónsins við þér í dag?

Bláa Lónið er fyrirmynd þegar kemur að seiglu og útsjónarsemi og því hefur ítrekað tekist að snúa áskorunum upp í tækifæri. Eftir því hefur verið tekið og um það hefur verið skrifað, það er til dæmis kafli sem heitir „Building Resilience in Volatile Environments: The Case of the Blue Lagoon in Iceland“ í bókinni „Crisis in Context“ eftir Þröst Ólaf Sigurjónsson og Láru Jóhannesdóttur sem ég hvet alla til að lesa. Það eru fá þjónustufyrirtæki á Íslandi sem búa að jafn góðum öryggis- og viðbragðsáætlunum.

Hvernig hefur gengið að ná aftur til erlendra ferðamanna og endurreisa upplifunina á svæðinu eftir allar lokanirnar og fréttaflutninginn erlendis?

Bláa Lónið hf. er mikilvægt fyrirtæki innan íslenskrar ferðaþjónustu, Bláa Lónið sjálft er eitt þekktasta vörumerki landsins og hátt hlutfall ferðamanna heimsækir þennan einstaka áfangastað. Tekjur félagsins jukust í fyrra um 36% frá fyrra ári, eiginfjárhlutfall félagsins er 52% og félagið stendur um þessar mundir að baki stærsta fjárfestingarverkefni innan íslenskrar ferðaþjónustu með uppbyggingu í Þjórsárdal. Ég myndi því segja að Bláa Lónið hafi náð vopnum sínum þó að við séum í raun bara rétt að byrja.

Skýr stefna

Bláa lónið er í dag miklu meira en baðstaður í Svartsengi — þar undir rekið þið hótelin Retreat og Silica, Highland Base í Kerlingarfjöllum, húðvörulínu og verkefni í Þjórsárdal og á Hoffelli. Hvert verður þitt helsta áherslumál í þessari víðtæku starfsemi?

Stefna félagsins er skýr og við höfum kortlagt með hvaða hætti við munum skapa aukið virði á komandi árum. Við ætlum að gera það á þrjá vegu, í fyrsta lagi með því að halda áfram að þróa og bæta upplifun allra okkar gesta í Svartsengi og styðja við vöxt Blue Lagoon Skin Science, í öðru lagi með þróunarverkefnum og uppbyggingu annars staðar á landinu, og í þriðja lagi með ytri vexti en á dögunum var tilkynnt um fyrirhugaðan samruna okkar við Arctic Adventures og fjárfestingu í öðrum baðlónum en hvort tveggja er háð samþykki Samkeppniseftirlitsins.

Íslensk ferðaþjónusta hefur þroskast mikið. Hvernig á Bláa lónið að halda stöðu sinni sem eitt helsta vörumerki landsins á næstu árum?

Alþjóðaviðskipti eru lífæð Íslands og íslensk ferðaþjónusta er í dag stærsta útflutningsgrein landsins. Að því sögðu þá eiga bæði ferðaþjónustan og Bláa Lónið mikið inni, sérstaklega utan háannar. Okkar framtíðarsýn er heilsu- og vellíðunarlandið Ísland, við leggjum áherslu á fjárfestingar og uppbyggingu innviða fyrir upplifunar- og vellíðunarferðaþjónustu. Sú tegund af ferðaþjónustu fellur einstaklega vel að styrkleikum og sérstöðu Íslands og fer jafnframt ört vaxandi. Ferðavilji á heimsvísu hefur aldrei verið meiri og það skiptir mjög miklu máli að við nýtum vel þá innviði sem hafa verið byggðir upp með því að markaðssetja landið undir réttum formerkjum.

Hvernig samræmist frekari stækkun og vöxtur Bláa lónsins kröfum samtímans um sjálfbærni, náttúruvernd og ábyrga ferðaþjónustu?

Bláa Lónið hefur alla tíð lagt mikla áherslu á sjálfbærni, náttúruvernd og ábyrga ferðaþjónustu. Vellíðan í sátt við náttúru og nærsamfélög. Bláa Lónið sjálft er gott dæmi um það hvernig hrakstraumur verður auðlind en það gerðist ekki af sjálfu sér heldur með áratugum rannsókna, þróunar, hönnunar og hugrekki til fjárfestinga. Við erum auk þess með fjölmargar gæðavottanir því til stuðnings.

Þú stýrðir stórum langtímakjarasamningum í störfum þínum hjá Samtökum atvinnulífsins. Hvernig nýtist sú víðtæka reynsla úr hringiðu atvinnulífsins inn í daglegan rekstur hjá stóru fyrirtæki eins og Bláa lóninu?

Fyrir fólk með ástríðu fyrir viðskiptum eru Samtök atvinnulífsins einstakur starfsvettvangur, þar gefast tækifæri til þess að hafa áhrif á rekstrarumhverfi fyrirtækja daglega. Öll verkefni veita manni dýrmæta reynslu, innsýn og tækifæri til þess að dýpka skilninginn á samtímanum.

Fréttir hafa birst af uppsögnum starfsfólks. Hvað eru margir starfsmenn í fyrirtækinu í Grindavík og svo á öðrum stöðum þar sem þið eruð með eignarhald?

Við fórum í skipulagsbreytingar í höfuðstöðvum félagsins fyrr í sumar, en tilgangur þeirra var fyrst og fremst að skerpa á hlutverki móðurfélagsins í þjónustu sinni við dótturfélögin, gera skilin á milli kjarnastarfsemi og stoðstarfsemi skýrari, auka áherslu á sölu- og markaðssetningu með tækni og á sama tíma sækja nauðsynlega hæfni til að ná árangri í framtíðinni. Á Íslandi starfa yfir 800 manns hjá samstæðunni en með þeim þróunarverkefnum og þeim ytri vexti sem er á teikniborðinu hjá okkur þá mun störfum innan samstæðunnar fjölga mjög mikið á komandi árum.

Hvernig myndi samstarfsfólk þitt lýsa þér sem leiðtoga — og hefur stjórnunarstíll þinn breyst eftir því sem þú tekur við stærri áskorunum?

Ég ímynda mér að þau telji mig kröfuharða og árangursdrifna. Ég er meingölluð, allt of metnaðargjörn, hégómagjörn og á það til að vera góð við sjálfa mig, en veg gallana upp með lífsgildunum mínum, legg áherslu á góð samskipti, að taka ábyrgð og líta jákvæðum augum á verkefnin.

Þú hefur opnað á að þú varðst nýverið amma. Hvernig heldurðu jafnvægi á milli þess að stýra einu stærsta ferðaþjónustufyrirtæki landsins og eiga gæðastundir með fjölskyldunni?

Því fylgja fórnir að ná árangri, sama hvort um ræðir fyrirtækjarekstur, íþróttir, stjórnmál eða listir. Það nær enginn topp árangri án þess að leggja mikið á sig, það þýðir fjarveru frá fjölskyldunni. Ég er sem betur fer mjög vel gift og maðurinn minn hefur tekið leiðtogahlutverkið að sér þegar kemur að fjölskyldunni.

Njarðvíkurpían

Þú ert með Suðurnesjatengingu eftir að hafa alið manninn þar þegar faðir þinn var bæjarstjóri í Njarðvík. Hvernig minnistu þess tíma og ertu enn með einhverja tengingu þangað?

Ég verð alltaf Njarðvíkingur í hjarta, þegar ég var tíu ára gömul og flutti til Njarðvíkur kynntist ég mínum bestu vinkonum sem ég held enn tengslum við, þó að þær hafi vissulega þurft að víkja fyrir vinnunni eins og fjölskyldan þegar kemur að samvistum undanfarin misseri.

Þegar þú færð gesti að utan eða vilt eiga góðan dag sjálf — hver er þinn uppáhaldskrókur í starfsemi Bláa lónsins og á Íslandi utan lónsins?

Bláa Lónið sjálft, þessi einstaki áfangastaður með þessum einstaka jarðsjó sem þú finnur hvergi annars staðar og er eitt af undrum veraldar. Jarðsjór sem er ríkur af steinefnum, örþörungum og kísli sem yfir þrjátíu ár af rannsóknum sýna að hafa lækningamátt. Öll mómentin sem þú getur upplifað ofan í lóninu, hvort sem er með Blue Lagoon Seltzer í hönd, í nuddi, floti, gufu, eða bara kyrrðinni sem þú finnur í fjarlægasta kima lónsins. Þetta eru níu milljón lítrar af jarðsjó sem endurnýja sig á 40 klukkustunda fresti og það er engu líkt að heimsækja lónið. Utan lónsins þá eru Jarðböðin á Mývatni, Fontana á Laugarvatni og Sjóböðin á Húsavík í miklu uppáhaldi.

Sigga Magga á nýjum slóðum í Þjórsárdal.

Við stjórnvölinn í útibúinu heldur Sighvatur Gunnarsson, sem fagnar brátt aldarfjórðungsstarfi hjá bankanum. Hann hefur upplifað gjörbreyttan veruleika í bankaþjónustu – frá því að afgreiða einfaldar millifærslur við afgreiðsluborðið yfir í að veita sérhæfða ráðgjöf um húsnæðiskaup, rekstur og kynslóðaskipti í atvinnulífinu. Þrátt fyrir að stafrænar lausnir og öpp hafi tekið yfir flest dagleg verkefni leggur Sighvatur ríka áherslu á mikilvægi persónulegra tengsla. Sú nálgun virðist skila sér en útibúið í Reykjanesbæ hefur síðustu ár mælst hæst allra eininga bankans í þjónustumælingum.

Í þessu viðtali fer Sighvatur yfir stöðuna á Suðurnesjum í dag, fjölbreyttari undirstöður atvinnulífsins með tilkomu gagnavera, fiskeldis og aukinnar uppbyggingar á Keflavíkurflugvelli, ásamt þeim tækifærum sem framtíðin ber í skauti sér. Hann deilir einnig persónulegri sýn á lífið fyrir utan bankann – mætingu á fótboltaleiki hjá Keflavík og Njarðvík, golfhringi á Leirunni og mikilvægustu fjármálaráðunum fyrir unga fólkið á svæðinu.

Umsvif og vöxtur

Starfsemi Íslandsbanka hefur stækkað mikið á Suðurnesjum á undanförnum árum. Hvað hefur drifið þennan vöxt áfram og hvernig hefur starfsemi bankans breyst á þessum tíma?

Vöxturinn  á Suðurnesjum hefur verið ævintýralegur á undanförnum árum og okkar hlutverk hefur einfaldlega verið að fylgja  samfélaginu eftir og styðja við vöxtinn, og kannski aðeins rúmlega það.  Fleira fólk flytur á svæðið og fyrirtækin eru að stækka. Það sjáum við á hverjum degi í útibúinu.  

Á sama tíma hefur starfið sjálft gjörbreyst. Þegar ég byrjaði árið 2001 var fólk að koma til okkar til að millifæra, taka út pening og greiða reikninga. Í dag gerir fólk þetta meira og minna  allt í gegnum appið í símanum.“ Í dag sest fólk niður með okkur  til að ræða  húsnæðiskaup, rekstur og ýmis flóknari málefni, til dæmis þegar  það stendur“ til að afhenda næstu kynslóð fyrirtækið. „Þá búum við að því að vera með sterkt teymi  með mikla reynslu sem þekkir svæðið vel.“ 

Staða atvinnulífsins

Suðurnesin hafa gengið í gegnum miklar sveiflur (Covid-19, náttúruhamfarir o.fl.). Hvernig er staðan á atvinnulífinu og íbúum á svæðinu í dag út frá sjónarhóli bankans?

Við getum tekið Grindavík út fyrir sviga en þar er staðan mjög erfið og snúin að mörgu leyti. Þar eru einhver fyrirtæki sem hafa náð að halda dampi þrátt fyrir miklar áskoranir á meðan önnur fyrirtæki hafa átt mjög erfitt. Ef við horfum á Suðurnesin almennt þá er staðan ágæt þrátt fyrir að atvinnuleysi sé í hærri kantinum hérna hjá okkur.

Það sem gerir mig bjartsýnastan er að undirstöðum í atvinnulífinu hér er beinlínis að fjölga. Ferðaþjónustan er áfram burðarás en við hana eru að bætast greinar sem varla voru til á svæðinu fyrir nokkrum árum.  Það er heilmikil uppbygging á Keflavíkurflugvelli og svo eru komin gagnaver, fiskeldi og stór bætt orkumannvirki. Þetta eru ólíkar greinar sem sveiflast ekki allar í takt. Í því felst mikill styrkur fyrir atvinnulífið á Suðurnesjum.

Flugvöllurinn og ferðaþjónustan

Keflavíkurflugvöllur og stóru tækifærin í kringum hann eru gríðarlega mikilvæg fyrir svæðið. Hvernig finnið þið fyrir uppbyggingunni í ferðaþjónustu og tengdum greinum í bankanum?

Umsvif á flugvellinum hafa aukist mikið, bæði vegna ferðaþjónustunnar og svo einnig vegna aukinna varnarumsvifa. Við finnum vel fyrir þessu í bankanum. Fyrirtæki sem hafa lengi verið í viðskiptum hjá okkur eru að vaxa á sama tíma og fyrirtækjum í greininni er að fjölga. Við sjáum einnig að hótel- og gistibransinn hefur vaxið undanfarið. Gistirýmum hefur fjölgað og gistimöguleikarnir eru orðnir fjölbreyttari, sem er mjög jákvætt fyrir ferðaþjónustuna hér á svæðinu.

Húsnæðismarkaðurinn

Það hefur verið mikill vöxtur í íbúafjölda og íbúðauppbyggingu á Suðurnesjum. Ertu að merkja breytingar á eftirspurn eftir húsnæðislánum eða samsetningu kaupenda (t.d. ungt fólk að flytja af höfuðborgarsvæðinu) eða er eftirspurnin núna í lágmarki út af háum vöxtum?

Samhliða kólnun á fasteignamarkaði hefur eftirspurn eftir nýjum lánum vegna fasteignakaupa dregist saman. Þrátt fyrir það hefur húsnæðislánasafn bankans vaxið síðustu misseri og við finnum vel fyrir eftirspurn hjá fólki sem vill m.a. endurfjármagna húsnæðislánin sín.

Ég ætla samt ekki að halda því fram að eftirspurnin sé eitthvað meiri hér á Suðurnesjum en á svæðunum í kringum okkur. Þróunin hér er í raun svipuð og annars staðar á suðurvesturhorninu. Vaxtastigið hefur sömu áhrif á fólk hvar sem það býr.

Stafræn þjónusta

Bankaþjónusta hefur færst mikið yfir í öpp og stafrænar lausnir. Hver er staða og mikilvægi þess að vera með öflugt og sýnilegt útibú á staðnum á tímum þar sem allt er að verða stafrænt?

Það er rétt að bankarnir hafa lagt mikla áherslu á stafrænar lausnir og hafa framfarir verið gríðarlega miklar. Þó að langflestir geti sinnt mestu af sínum bankaviðskiptum á netinu þá er það einfaldlega ekki þannig með alla. Þess vegna leggjum við mikið svo mikið upp úr því að vera með öflugt starfsfólk, svo fólk og fyrirtæki geti fengið sérhæfða og persónulega þjónustu þegar á þarf að halda. Bankinn gerir árlega þjónustukönnun meðal fyrirtækja sem eru í viðskiptum. Útibúið í Reykjanesbæ hefur mælst hæst allra eininga bankans í ánægju viðskiptavina síðustu ár. Við virðumst því vera að gera eitthvað rétt.

Íslandsbanki og
samfélagið á Suðurnesjum

Íslandsbanki á sér langa sögu á svæðinu. Hversu mikilvægt er það fyrir bankann að taka þátt í samfélaginu hér, t.d. með stuðningi við íþrótta- og menningarlíf?

Okkar helsta markmið er að vera hreyfiafl í samfélaginu. Það gerum við t.d. með því að veita framúrskarandi þjónustu og það gerum við einnig með því að styðja við og fjárfesta í verkefnum og hugmyndum sem eru samfélaginu okkar til framdráttar.

Það er okkur gríðarlega mikilvægt að vera í tengslum við samfélagið. Við styðjum við íþróttafélögin og ýmis menningarmál hérna á svæðinu. Til að mynda ætlum við að bjóða bæjarbúum frítt á leiki hjá stelpunum í fótboltanum um ljósanæturhelgina bæði hjá Keflavík og Grindavík/Njarðvík. Hvetjum alla til þess að mæta og styðja stelpurnar.

Svo reynum við líka að leggja okkar af mörkum í fræðslu. Fjármálalæsi ungs fólks er til dæmis eitthvað sem bankinn leggur mikla áherslu á.

Hvernig sérðu Suðurnesin þróast á næstu 5–10 árum og hvert verður hlutverk Íslandsbanka í þeirri vegferð?

Ég sé Suðurnes halda áfram að vaxa og ég held að vöxturinn verði fjölbreyttari en hann hefur verið. Áframhaldandi fólksfjölgun og uppbygging í atvinnumálum. Grindavík mun byggjast aftur upp og vonandi þurfum við ekki að bíða of lengi eftir því að það raungerist. Hlutverk Íslandsbanka verður það sama og það hefur alltaf verið. Við ætlum að fjármagna uppbygginguna og standa með fólki og fyrirtækjum, líka þegar á móti blæs. Það er svo sem ekkert nýtt. Við höfum verið hér frá 1963, þegar Verslunarbankinn opnaði á Hafnargötunni í Keflavík, en hann var einn af forverum Íslandsbanka. Á þeim rúmu sextíu árum hafa komið bæði góð ár og erfið. Við ætlum að vera hér næstu sextíu líka. Ég er heilt yfir mjög bjartsýnn fyrir hönd Suðurnesja.

Alltaf fundist gaman að grúska í tölum

NÆRMYND: Sighvatur Gunnarsson

Aldur: 50 ára

Fjölskylda: Kvæntur Þóru Kristínu Sveinsdóttur, grafískum hönnuði, og eiga þau fjögur börn saman. Tvo stráka sem eru Ingi Þór, sem er 26 ára, og Viktor Logi, sem er 19 ára, og svo tvær stelpur, Steinunni Ástrós, sem er 23 ára, og Evu Dís, sem er 15 ára.

Þú hefur starfað lengi hjá Íslandsbanka. Hvað er það sem heldur þér við efnið og gerir starfið enn þá skemmtilegra á hverjum degi?

Ég hef starfað í Íslandsbanka frá maí 2001. Ég starfaði fyrst sem lánastjóri og viðskiptastjóri fyrirtækja en tók svo við sem útibússtjóri árið 2008. Mér hefur alltaf fundist gaman að grúska í tölum og mér gefst tækifæri til þess á hverjum degi í bankanum. Stór hluti starfsins eru samskipti við fólk. Það er eitthvað sem mér leiðist alls ekki og ég hlakka því til að koma til starfa á hverjum degi. Svo hef ég verið gríðarlega heppinn með samstarfsfólk í gegnum tíðina sem hjálpar mikið til.

Þegar þú lítur til baka yfir þinn feril hjá bankanum, hver eru stærstu verkefnin eða áskoranirnar sem standa upp úr?

Það voru klárlega stærstu verkefnin sem ég hef komið að í kjölfar bankahrunsins árið 2008. Þá tóku við mjög erfið og flókin verkefni og margar mjög erfiðar ákvarðanir sem þurfti að taka. Það var líka mikil áskorun fyrir mig á sínum tíma að taka við sem útibússtjóri en það hefur verið gríðarlega skemmtilegt verkefni. En það stendur alltaf upp úr hvað ég hef unnið með mikið af frábæru fólki og hvað ég er búinn að eignast mikið af vinum í bankanum.

Hvað finnst þér skemmtilegast að gera á Suðurnesjum þegar þú tekur niður „bankastjóraglerógun“ og átt frí?

Mér finnst mjög gaman að kíkja út á golfvöll og spila golf í góðum félagsskap en þar er Leiran minn heimavöllur. En ég reyni nú samt að spila reglulega aðra velli á svæðinu. Ég er mjög duglegur að sækja fótboltaleiki hérna í Reykjanesbæ og reyni aðallega að sjá bæði strákana og stelpurnar í Njarðvík og Keflavík. Svo finnst mér voðalega gott að rölta um göngustíga Reykjanesbæjar á góðviðrisdögum. Það mættu samt vera fleiri góðir göngustígar í Reykjanesbæ og líka fleiri góðviðrisdagar.

Ef þú ættir að gefa ungu fólki á Suðurnesjum eitt gott ráð varðandi fjármál og framtíðina, hvert væri það?

Það eru mörg ráð sem mér detta í hug. Ekki eyða meira en þú aflar. Það er alltaf gott að spara og eiga fyrir hlutunum og jafnvel einhvern varasjóð. Forðist að fjármagna neyslu með yfirdrætti eða öðrum dýrum neyslulánum. Yfirdráttur í banka á að vera neyðarúrræði.

Við settumst niður með tveimur af eigendum stofunnar, þeim Þorvaldi H. Bragasyni og Benedikt Jónssyni, og ræddum um nýju stofuna, stökkbreytingu í tækni og þróun á tannheilsu landsmanna. Þriðji eigandinn er Theódór Friðjónsson tannlæknir og eiginkona hans María Guðjónsdóttir.

Fyrsta sérhannaða tannlæknastofan á svæðinu

Þeir þremenningar hófu samstarf nýlega en höfðu allir haft starfsemi í Reykjanesbæ í all mörg ár, Benedikt lengst en Theódór tók við rekstri Jóns Björns Sigtryggssonar tannlæknis fyrir nokkrum árum á Tjarnargötunni, sem hélt þó áfram hjá honum en er að hætta störfum. Þorvaldur hitti þá félaga á 3. hæðinni þar og fljótlega lágu leiðir og hugmyndir þeirra saman um nýtt framtíðar húsnæði. Eftir all nokkrar pælingar og umræður kom hugmynd sem fæddist í stólnum hjá viðskiptavini Þorvaldar sem bauð þeim húsnæði á Aðaltorgi í Reykjanesbæ.

„Hvað mig varðar þá var ég í húsnæði á Skólavegi 10 sem var byggt fyrir 53 árum síðan sem íbúðarhúsnæði,“ segir Þorvaldur. „Það var svolítið takmarkað hvað var hægt að gera þar en ég var þar frá 2007 til 2022. En svo seldi ég húsnæðið og leigði á Tjarnargötu ská á móti Benna og Tedda. Þá fór boltinn að rúlla.“

Þegar ákveðið var að reisa nýtt hús á Aðaltorgi var húsið enn á teikniborðinu og aðeins búið að útlitsteikna það. Tannlæknarnir stukku á tækifærið og komu að hönnuninni frá grunni.

„Ég held ég þori að segja að þetta sé fyrsta tannlæknastofan á Suðurnesjum og jafnvel bara á landinu öllu sem er í raun sérhönnuð sem slík frá grunni,“ segir Benedikt. „Yfirleitt þurfa tannlæknar að mæta með múrbrjót og byrja að brjóta fyrir lögnum. En hér er allt innbyggt frá upphafi.“

Þeir Þorvaldur og Benedikt fara fögrum orðum um samstarfið við Aðaltorg, eigendur hússins, og verktakana sem unnu við uppsetningu tannlæknastofunnar: „Þeir höfðu aldrei byggt tannlæknastofu áður en voru boðnir og búnir að mæta öllum okkar ýtrustu kröfum til að gera þetta vel úr garði. Við erum ótrúlega ánægð með útkomuna.“

Öll þjónusta á einum stað

Með nýja húsnæðinu hefur Aðalbros búið svo um hnútana að sjúklingar þurfa sjaldnast að leita annað eða aka til Reykjavíkur eftir þjónustu.

„Við bjóðum upp á öll þau tæki og tól sem þarf til að sinna nútíma tannlækningum,“ útskýrir Benedikt. „Við sinnum nánast öllu því sem snýr að tannlækningum á stofunni, en einnig erum við með sérfræðinga á okkar snærum ef sérstök tilfelli koma upp.“

Á stofunni starfa tíu tannlæknar og reynslumikið starfsfólk, auk þess sem Ædent, tannsmíðaverkstæði Ævars Péturssonar, er staðsett á sama stað.

„Það er mikill kostur að hafa tannsmiðina á ganginum,“ segir Þorvaldur. „Ef það þarf að bjarga einhverju snögglega þá sparast mikill tími fyrir sjúklinginn.“

Eitt af því sem benda má á er að aðgengi er til fyrirmyndar, auðvelt er fyrir fólk í hjólastól að komast inn og þá er lyfta í húsnæðinu.

Stafræna tæknibyltingin og 3D-röntgentæki

Ykkar starfsævi spannar nokkra áratugi. Hversu mikið hefur tæknin breyst í faginu frá því þið hófuð störf?

Benedikt, reynsluboltinn á stofunni segir breytinguna gríðarlega. „Stutta svarið er að það er nánast ekkert í tannlækningum í dag eins og þegar ég byrjaði. Sérstaklega síðustu ár hefur stafræna tæknin verið algjör lúxus. Að taka mát er bara gjörbreytt ferli. Gömlu góðu mátin sem þurftu að harðna uppi í fólki eru kannski bara 10% af öllum máttökum í dag. Allt hitt er stafrænt, sem er gríðarlega þægilegt bæði fyrir okkur og sjúklinginn.“

Þorvaldur rifjar upp hvernig myndatökur á stofunni hafi verið. „Fyrir rúmlega tíu árum síðan var ég enn að framkalla röntgenmyndir sem voru settar í fixer, þurrkaðar og hengdar upp. Þetta voru litlar myndir, 3x4 sentimetrar. Myndatakan í dag er stafræn og gæðin allt önnur. Í nýja húsnæðinu fengum við loksins pláss fyrir sneiðmyndatæki sem tekur þrívíddarmyndir og breiðmyndir. Það hjálpar okkur gríðarlega við flóknari aðgerðir eins og að setja niður implönt,  skoða erfiða endajaxla eða rótfyllingar. Þetta getum við gert samstundis á staðnum án þess að senda fólk í örfá tæki á höfuðborgarsvæðinu.“

Mikil breyting fyrir barnafjölskyldur

Sumum finnst enn ógnvekjandi að fara til tannlæknis og óttast stundum reikninginn. En að sögn Þorvaldar er staðan oft allt önnur en fólk heldur. Sjúkratryggingar koma inn hjá 18 ára og yngri, eldri borgurum og öryrkjum.

„Það eru góðir samningar í gangi hjá Sjúkratryggingum Íslands (SÍ) fyrir eldri borgara, öryrkja og börn,“ segir Þorvaldur. „Fyrir eldri borgara greiða Sjúkratryggingar í flestum tilfellum um 75% af gjaldskrá. Fólk heldur stundum að þetta sé svo dýrt og fer jafnvel erlendis í meðferðir, en áttar sig kannski ekki á því að það er mjög vel komið til móts við það hér heima.“

Einnig náðist stór áfangi upp úr 2015 þegar ákveðið var að börn undir 18 ára aldri fengju tannlæknaþjónustu að fullu endurgreidda (að frátöldu árlegu komugjaldi).

„Þetta breytti öllu fyrir barnafjölskyldur,“ bætir Benedikt við. „Kynslóðin sem er að eignast börn í dag, fólk á aldrinum 25 til 40 ára, hefur notið bestu mögulegu tannlæknaþjónustu og forvarna frá upphafi. Sú kynslóð er með langbestu tennurnar og yfirfærir þær góðu venjur á börnin sín.“

Áhyggjuefnið flutt yfir á eldri hópana

Hvernig hefur tannheilsa Íslendinga þróast yfir þá áratugi sem þið hafið starfað?

Benedikt lærði í Svíþjóð og hann segir að hann hafi fengið pínulítið sjokk þegar hann kom heim fyrir 36 árum.

„Þegar ég kom heim frá Svíþjóð árið 1990 fékk ég pínulítið sjokk. Það var ofboðslega mikið um tannskemmdir hér miðað við það sem ég hafði kynnst þar. En við tannlæknarnir í Reykjanesbæ, komum í sameiningu á kerfi með skólahjúkrunarfræðingum í bænum þar sem öll börn urðu að velja sér tannlækni og það voru yfir 90% heimtur. Það var mikið framfaraskref.”

Þorvaldur segir að áhyggjuefnið hafi í raun færst til. „Áður fyrr voru það börnin og unga fólkið, en í dag er stór vandi færður yfir á eldri borgara sem eru að koma inn á hjúkrunarheimili og stofnanir. Ólíkt því sem var áður var er stór hópur aldraðra í dag með sínar eigin tennur en ekki falskar tennur. En mikið af þessu fólki hefur ekki líkamlega getu til að bursta sig sjálft. Vegna manneklu á stofnunum er þessum hluta oft ekki sinnt og tannlæknaþjónusta þar er nánast engin. Ef það er brotalöm í kerfinu varðandi tannheilsu á Íslandi í dag, þá er það virkilega þar.“

Á árum áður var algengt að fólk fengi falskar tennur. Er það enn við lýði?

„Við þurfum enn að smíða góma, en stóri munurinn er sá að í dag er hægt að festa þá. Við setjum niður implönt sem virka sem akkeri fyrir gómana þannig að þeir smellast fastir. Það hefur gjörbreytt lífi fólks. Einnig reynum við alltaf að halda í þær tennur sem eftir eru, því þótt þú hafir bara tvær tennur eftir skiptir það öllu máli við að festa góm. Tannlækningar ganga út á lækningar en ekki niðurrif.“

Hlýleiki í fyrirrúmi

Þegar gengið er inn á nýju stofuna á Aðaltorgi mætir gestum stórt fiskabúr, mjúk lýsing, góð hljóðvist og hlýlegt andrúmsloft.

„Við lögðum mikla vinnu í útlit og upplifun. Okkur langaði að þetta væri þægilegur staður að koma á, frekar en köld stofnun,“ segir Þorvaldur. „Börnin dýrka fiskabúrið og við höfum fengið frábær viðbrögð frá viðskiptavinum síðan við opnuðum í vor.“

Að lokum inntum við þá eftir skilaboðum til íbúa á Suðurnesjum:

„Öll okkar vinna byggist á forvörnum,“ segir þeir félagar. „Ráð okkar eru einföld: Það skiptir öllu máli að sinna daglegri tannhirðu með flúortannkremi og tannþræði, og fara reglulega í eftirlit. Þá verða aldrei nein stórslys. Og muna að það er pláss fyrir öll hjá okkur í Aðalbrosi – öll eru hjartanlega velkomin!“

Aðstaðan er glæsileg og þægileg og allt er gert til að  viðskiptavinum, börnum og fullorðnum líði vel í Aðalbrosi.

Það fer vel um starfsfólkið á nýja staðnum og sömuleiðis viðskiptavinina í hlýlegri móttöku. Hér eru móttökuritararnir Fjóla Stefánsdóttir og  Lilja Þ. Tómasdóttir.

Það er nóg að gera hjá aðstoðarkonum tannlæknanna.

Séð inn í aðstöðu tannsmíðaverkstæðisins þar sem Ævar Pétursson er í forsvari.

Opnunin var hönnuð í samstarfi við Basalt arkitekta með það að markmiði að skapa ósvikna íslenska upplifun. Yfir 370 fermetrar og meira en 30% vörumerkja í verslununum eru tileinkuð íslenskri framleiðslu.

3.600 m² af endurnýjuðu verslunarrými: Nær yfir brottfarar- og komuverslanir ásamt verslun við brottfararhlið.

120 til 160 starfsmenn: Starfa hjá félaginu eftir árstíðabundnu álagi.

Tækninýjungar: Verslanirnar skarta stafrænum hillumiðum, sjálfsafgreiðslukössum og „lyftu og lærðu“ (e. lift and learn) skjátækni sem birtir upplýsingar um vörur þegar þær eru teknar úr hillu.

Sjálfbærni í hönnun: Innréttingar eru þrívíddarprentaðar úr endurunnu sjávarplasti frá spænska fyrirtækinu Nagami og veggfóður unnið úr endurunnum pappír.

Sérleyfið var veitt í kjölfar alþjóðlegs útboðs Isavia. Max Heinemann, forstjóri Gebr. Heinemann, segir opnunina marka upphaf nýs kafla í norrænni ferðaþjónustuverslun þar sem stafræn upplifun og staðbundnar rætur mætast.

Sveinbjörn Indriðason, forstjóri Isavia, fagnar samstarfinu og tekur fram að fjölbreytt vöruúrval og sérþekking Heinemann styrki samkeppnisstöðu flugvallarins og skapi verðmæti fyrir íslensk vörumerki.

NutraIngredients-verðlaunin eru ein virtustu verðlaun heims á sviði næringar, heilsuvara og fæðubótarefna. Verðlaunin voru afhent í Bangkok samhliða Vitafoods Asia, einni stærstu fagsýningu Asíu á þessu sviði.

Alls bárust 256 tilnefningar til NutraIngredients-Asia Awards í ár, fleiri en nokkru sinni fyrr. Alþjóðleg dómnefnd óháðra sérfræðinga úr greininni lagði mat á tilnefningarnar.

Stór alþjóðlegur markaður fyrir fæðubótarefni

Alþjóðlegur markaður fyrir fæðubótarefni og virk innihaldsefni í heilsuvörur er stór og ört vaxandi atvinnugrein. Þar starfa meðal annars framleiðendur vítamína, steinefna, jurtavara, próteina, þörungaafurða og annarra efna sem notuð eru í vörur ætlaðar til að styðja við heilsu og vellíðan.

Algalíf starfar á fyrirtækjamarkaði innan þessarar alþjóðlegu virðiskeðju. Fyrirtækið framleiðir náttúrulegt astaxantín úr örþörungnum Haematococcus pluvialis og selur hráefni sín til framleiðenda fæðubótarefna, alþjóðlegra heilsuvörumerkja, vöruþróunarfyrirtækja og dreifingaraðila víða um heim.

Astalíf™ er alþjóðlegt vörumerki Algalífs fyrir náttúruleg astaxantínhráefni. Astaxantín er rautt litarefni og öflugt andoxunarefni sem örþörungar mynda frá náttúrunnar hendi. Það er meðal annars notað sem virkt innihaldsefni í fæðubótarefni. Meira en hundrað vörumerki um allan heim nota hráefni frá Algalíf í vörur sínar.

Verðlaunin snúa að umfangsmikilli, tveggja ára endurmörkun Astalíf™ og breyttri framsetningu Algalífs á alþjóðamarkaði.

Íslensk þekking og framleiðsla kynnt á alþjóðamarkaði

Markmið verkefnisins var að byggja Astalíf™ upp sem leiðandi hágæðavörumerki á alþjóðlegum fyrirtækjamarkaði og styrkja vísindalegan, tæknilegan og markaðslegan stuðning við viðskiptavini Algalífs.

Stefna verkefnisins byggðist á fimm meginstoðum sem endurspegla sérstöðu fyrirtækisins: gæðum, áreiðanleika, sjálfbærni, vísindum og nýsköpun. Íslenskur uppruni er einnig afar mikilvægur í öllu markaðsstarfi Algalífs.

Svavar Halldórsson, sölu- og markaðsstjóri Algalífs, hafði frumkvæði að verkefninu og leiddi það, en hann ber ábyrgð á sölu- og markaðsstarfi fyrirtækisins á heimsvísu.

„Það er okkur mikill heiður að hljóta ein virtustu verðlaun í okkar atvinnugrein,“ segir Svavar. „Ég hef notið þeirra forréttinda að leiða verkefnið, en árangurinn byggist á sameiginlegu framlagi, þekkingu og vinnu alls starfsfólks Algalífs.“

„Öflugt markaðsstarf verður að byggjast á raunverulegum verðmætum. Allt sem við segjum um Algalíf byggist á þeirri þekkingu og vinnu sem á sér stað víðs vegar um fyrirtækið – við ræktun, framleiðslu, gæðamál, vísindastarf, vöruþróun, aðfangastýringu, sölu og markaðsmál. Þessi verðlaun eru viðurkenning fyrir allt starfsfólk Algalífs.“

Heildstæð endurmörkun

Verkefnið náði til nær allra þátta í alþjóðlegri framsetningu Algalífs og vörumerkisins Astalíf™.

Meðal þess sem ráðist var í var endurnýjun vörumerkja og vefsíðu, ný hönnun og framsetning á alþjóðlegum fagsýningum, aukin vísindamiðlun, stafrænar herferðir, kynningar, viðburðir og þjálfun fyrir viðskiptavini og dreifingaraðila.

Algalíf jók jafnframt stuðning við viðskiptavini sína, meðal annars með sammerkingum, þar sem alþjóðleg vörumerki útskýra uppruna hráefnisins á umbúðum og í markaðsefni, sérhæfðu markaðsefni og tæknilegri og vísindalegri upplýsingagjöf.

Endurmörkunin tengdist einnig fjárfestingu fyrirtækisins í vísindum og vöruþróun. Þar á meðal var markaðssetning Astalíf™ 20, náttúrulegrar astaxantínolíu með háum styrkleika, og AstaBead™ 5, astaxantíndufts sem meðal annars má nota í töflur, gúmmíhlaup og hylki.

Mikill vöxtur samhliða verkefninu

Endurmörkunin hefur farið saman við mikinn vöxt í sölu og aukinn sýnileika Algalífs á alþjóðamarkaði. Sala fyrirtækisins hefur vaxið hratt undanfarin ár og pantanir hafa haldið áfram að aukast á þessu ári.

Stafræn miðlun Algalífs hefur jafnframt eflst verulega. Fleiri heimsækja vef fyrirtækisins, sýnileiki þess á samfélagsmiðlum hefur aukist og Astalíf™ hefur náð til stærri alþjóðlegs hóps viðskiptavina og samstarfsaðila.

„Við erum gríðarlega stolt af því að koma með þessi verðlaun heim til Íslands,“ segir Svavar. „Þau staðfesta hversu langt við höfum náð en auka jafnframt metnað okkar til framtíðar. Við ætlum að halda áfram að fjárfesta í vísindum, nýsköpun, sjálfbærni og þjónustu við viðskiptavini og byggja Astalíf™ upp sem eitt traustasta vörumerki heims fyrir náttúrulegt astaxantín.“

Um Algalíf

Algalíf er íslenskt líftæknifyrirtæki og leiðandi framleiðandi í Evrópu á sjálfbæru, náttúrulegu astaxantíni úr örþörungnum Haematococcus pluvialis.

Örþörungarnir eru ræktaðir í lokuðum ljósræktunarkerfum með hreinu íslensku vatni og endurnýjanlegri jarðvarmaorku. Astalíf™-hráefni fyrirtækisins eru seld framleiðendum fæðubótarefna, heilsuvörumerkjum og dreifingaraðilum víða um heim.

Nánari upplýsingar um Algalíf má finna á www.algalif.com.

Um NutraIngredients-Asia Awards

NutraIngredients-Asia Awards verðlauna framúrskarandi árangur og nýsköpun í alþjóðlegum næringar- og fæðubótarefnaiðnaði. Verðlaunin ná meðal annars til hráefna, fullunninna vara, vísindarannsókna, nýsköpunar og markaðsstarfs.

Nánari upplýsingar má finna í opinberri tilkynningu um verðlaunahafa ársins 2026 og á vef NutraIngredients-Asia Awards.

Ljósanæturkjötsúpan er fyrir löngu orðin fastur liður í hátíðinni og einn af hápunktum dagskrár á föstudeginum. Samkvæmt dagskrá Ljósanætur leggur Skólamatarlestin af stað frá höfuðstöðvum fyrirtækisins klukkan 18:00 og í kjölfarið hefst skömmtun á súpunni við Tjarnargötu 12.

Á sama tíma og hátíðarundirbúningurinn stendur sem hæst er nýtt skólaár farið af stað hjá fyrirtækinu. Skólamatur þjónustar í dag um 125 leik- og grunnskóla á suðvesturhorni landsins og sér daglega um skólamáltíðir fyrir um 18 þúsund nemendur og starfsfólk.

„Upphaf skólaársins er alltaf stór áfangi hjá okkur. Á sama tíma og börn og starfsfólk skólanna hefja sitt skólaár erum við að koma af stað umfangsmikilli starfsemi sem snertir daglegt líf þúsunda barna og starfsmanna á hverjum degi,“ segir Jón Axelsson, forstjóri Skólamatar.

„Haustið byrjar alltaf hjá okkur í byrjun ágúst þegar við höldum fræðsludaga fyrir starfsfólk. Þar komum við saman og förum yfir reglur, verklag og nýjungar sem tengjast meðal annars matvælaöryggi, sérfæði, þjónustu og gæðamálum,“ segir Jón.

Jón segir jafnframt að ýmsar nýjungar séu fyrirhugaðar á komandi skólaári.

„Við ætlum meðal annars að breyta framsetningu vegan-máltíða, efla meðlætisbarinn með auknu úrvali og bæta upplýsingagjöf sem tengist sérfæði. Markmiðið er að gera þjónustuna enn betri fyrir nemendur, foreldra og skóla.“

Einn þeirra þátta í starfsemi Skólamatar sem hafa vaxið hvað mest á undanförnum árum er afleysingaþjónusta í leik- og grunnskólum. Með henni getur fyrirtækið brugðist hratt við þegar upp koma tímabundnar áskoranir, til dæmis vegna veikinda starfsfólks eða framkvæmda í skólahúsnæði.

Frekari uppbygging

Til að mæta áframhaldandi vexti stendur nú yfir frekari uppbygging á höfuðstöðvum Skólamatar á Iðavöllum í Reykjanesbæ. Þar er verið að taka í notkun nýja viðbyggingu og bæta við framleiðslutækjum sem styrkja framleiðslugetu fyrirtækisins og skapa aukið svigrúm til þróunar og framleiðslu á fjölbreyttum og hollum skólamáltíðum.

Þegar framkvæmdum lýkur er áætlað að framleiðslugeta fyrirtækisins aukist um allt að helming og styrki þannig enn frekar getu þess til að mæta vaxandi eftirspurn eftir skólamáltíðum.

Um 250 starfsmenn

Hjá Skólamat starfa nú um 250 manns og er undirbúningur haustsins eitt stærsta og umfangsmesta verkefni ársins. Markmiðið er að tryggja að nemendur og starfsfólk skóla fái næringarríkar, öruggar og góðar máltíðir frá fyrsta degi skólaársins.

„Við erum stolt af því að vera hluti af skólasamfélaginu og hlökkum bæði til að taka þátt í Ljósanótt og hefja nýtt skólaár með okkar viðskiptavinum. Ljósanótt er jafnframt frábært tækifæri til að hitta foreldra, nemendur, starfsfólk skóla og aðra íbúa svæðisins á sama tíma og við undirbúum eitt mikilvægasta verkefni okkar, að sjá þúsundum barna fyrir góðum skólamáltíðum á hverjum degi,“ segir Jón Axelsson.

Viney er fjölskyldufyrirtæki í eigu hjónanna Pálínu Guðjónsdóttur og Ívars Þórðarsonar. Þau segja flestar ákvarðanir teknar yfir eldhúsborðinu heima, allt frá því hvaða vörumerki séu tekin inn til þess hvernig verslunin er hönnuð.

Vildu bæta þjónustuna í heimabænum

Hugmyndin að stofnun Vineyjar spratt af þörf sem Pálína og Ívar sáu í nærsamfélaginu.

„Reykjanesbær er yfir 22 þúsund manna bæjarfélag, um tvöfalt fjölmennara en Selfoss þar sem heil flóra af sérverslunum þjónustar íbúana. Bæjarfélag af okkar stærð á að standa undir sínu eigin úrvali. Það á ekki að þurfa að keyra til Reykjavíkur til að fá almennilegt úrval af snyrti- og húðvörum, og enn síður til að fá ráðgjöf sem er eitthvað meira en „þessi er vinsæl núna“,“ segir Ívar.

Fyrsta árið hefur gengið vonum framar og segja þau Pálína að reynslan hafi sýnt að íbúar á Suðurnesjum kunni vel að meta góða þjónustu. Í versluninni er lögð áhersla á að bjóða vandaðar vörur fyrir alla hópa, þar á meðal sígild merki á borð við Estée Lauder og Clinique, íslenska framleiðslu eins og Andrea Maack og DrBragi, ásamt miklu úrvali af vinsælum kóreskum húðvörum.

Hlustað á viðskiptavinina og hafist handa

Pálína og Ívar leggja mikla áherslu á að hlusta á óskir viðskiptavina.

„Í desember í fyrra fengum við sérstaklega margar fyrirspurnir um hárvörur og karlmannavörur. Strax eftir áramót fórum við í málið og bættum við þremur hágæðamerkjum: K18, Design.me og Daimon Barber,“ segir Pálína.

Á þessu ári tók fyrirtækið svo stórt skref þegar það hóf beinan innflutning og tryggði sér einkaumboð fyrir tvö vörumerki á Íslandi, Rom&nd og s.nature.

„Þetta eru bæði merki sem margir hafa verið að kaupa erlendis, en nú eru þau fáanleg hjá okkur á Hafnargötunni og í vefversluninni okkar, viney.is,“ bætir Ívar við.

Veisluhöld og sérfræðingar á Ljósanótt

Hringurinn lokast á Ljósanótt, en Ljósanótt í fyrra var einmitt fyrsta alvöru helgin í rekstri verslunarinnar. Í tilefni afmælisins verður slegið upp hátíð í versluninni alla hátíðina.

Kvöldin 2. og 3. september mun Viney bjóða upp á léttar veitingar, vín og drykki á Hafnargötu 35. Þá mæta sérfræðingar frá nokkrum vörumerkjum og ilmhönnuðurinn Andrea Maack verður einnig á staðnum til að kynna ilmi sína. Einnig verður boðið upp á afslætti og kaupauka allt hátíðarhaldið.

„Endilega kíkið við og spjallið við okkur. Við verðum þarna allan tímann og hlökkum mikið til að fagna með bæjarbúum,“ segir Pálína að lokum.

Opnunartími Viney á Ljósanótt:

• Miðvikudagur: 11:00–22:00
• Fimmtudagur: 11:00–22:00
• Föstudagur: 11:00–20:00
• Laugardagur: 11:00–20:00
• Sunnudagur: 13:00–17:00

Verslunin er staðsett á Hafnargötu 35 í Reykjanesbæ og vefverslun á www.viney.is

Ný tækifæri í Reykjanesbæ

Arndís er nýflutt aftur á Suðurnesin eftir að hafa búið á Höfn síðustu ár ásamt fjölskyldu sinni, þar sem hún rak kránna Hafið. Þegar ættarhúsið hennar fór á sölu varð heimflutningurinn að veruleika og nýtt tækifæri skapaðist.

Sæunn hafði á sama tíma verið að þróa sína eigin hugmynd. Hún byrjaði að baka brauð í Covid-faraldrinum en fór í fæðingarorlof á sama tíma og margir sneru aftur til vinnu eftir samgöngubann. Heimabaksturinn tók fljótt yfir og áður en hún vissi af var hún farin að baka mörg kíló af brauði fyrir fólk í bænum.

Í gegnum baksturinn varð henni ljóst hversu miklu máli litlu stundirnar í kringum mat og kaffi geta skipt samfélagið. „Gott brauð og kaffibolli eru ekki aðeins matur og drykkur heldur tilefni til þess að fólk hittist, spjalli og njóti samvista. Sú upplifun var einn helsti drifkrafturinn að hugmyndinni um Gömlu búð,“ segir Sæunn og bætir við:

„Upphaflega var þó ekki ætlunin að opna heilt kaffihús. Fyrsta hugmyndin var einfaldlega lítill brauðskúr. Síðan kom kaffið inn í myndina og hugmyndin fór smám saman að þróast í átt að kaffihúsi.“ Fyrir um tveimur árum ákvað Sæunn að setja markmiðið fram með skýrum hætti og sagðist ætla að opna kaffihús. „Þegar Reykjanesbær auglýsti Gömlu búð til leigu sá ég tækifæri sem passaði við þá sýn. Umsókn var send inn og í desember fékk ég þær fréttir að við hefðum fengið húsnæðið.“

Gamla búð verður kaffihús og veitingastaður

Arndís segir að Gamla búð verði kaffihús á daginn og veitingastaður á kvöldin. Á daginn verður hægt að fá nýbakað brauð, kaffi, samlokur, kökur, sætabrauð og annað góðgæti. Þegar kvölda tekur breytist stemningin og boðið verður upp á pizzur og smárétti, þar sem súrdeig verður í mikilvægu hlutverki. Þá verður einnig rekin lítil sælkeraverslun í húsinu með úrvali af góðgæti til að taka með sér heim.

Þótt matur og drykkur séu stór hluti af starfseminni er markmiðið þó ekki eingöngu að reka enn einn staðinn þar sem hægt er að fá sér að borða. Sæunn og Arndís sjá Gömlu búð fyrst og fremst sem samfélagsrými.

„Húsið sjálft hefur þar mikið að segja. Þær lýsa því sem einstaklega sjarmerandi og ljóðrænu rými sem bjóði upp á möguleika til sköpunar og ólíkra viðburða. Ætlunin er að rýmið verði opið fyrir fólk úr samfélaginu, hvort sem það vill vinna þar, hitta vini, koma með prjónana, njóta kaffis í rólegheitum eða einfaldlega sitja með sjálfu sér,“ segir Arndís.

Flutti burt fimmtán ára

Sú sýn á sér einnig persónulegar rætur hjá Sæunni. Fimmtán ára gömul flutti hún úr bænum í litla stúdíóíbúð með frænku sinni með það markmið að sitja sem mest á kaffihúsum. „En samfélagið mitt var ekki þar. Sú þörf hefur ekki horfið með árunum. Aðgengi að kaffihúsi og samfélagsrými er hluti af lífsgæðum.“

Lengi hefur verið kallað eftir kaffihúsi á Suðurnesjum en um leið hefur verið ákveðin tortryggni gagnvart því hvort slík starfsemi geti gengið upp. Sæunn og Arndís telja hins vegar að tíminn sé réttur og að eftirspurnin eftir stað þar sem fólk getur komið saman sé meiri en áður.

Fjölbreytt og lifandi dagskrá

Þær vilja jafnframt að dagskráin í Gömlu búð verði lifandi og fjölbreytt. Áform eru um prjónakvöld, litla tónleika, ljóðalestur, listasýningar, mömmumorgna og aðra viðburði sem geta orðið til í samvinnu við samfélagið. Þær vilja leyfa sér að leika sér með rýmið og sjá hvað gerist þegar fólk fær stað til að koma saman án þess að þurfa endilega sérstakt erindi.

Ljósanótt verður fyrsta tækifærið fyrir bæjarbúa til að kynnast Gömlu búð. Dyrnar verða opnaðar á fimmtudaginn og verður þar boðið upp á fjölbreytta dagskrá. Gunnella heldur uppi stuðinu með partýbingói og einnig verða tónlistaratriði og ljóðalestur. „Við bjóðum uppá brauðsmakk, verðum með til sölu kaffi og kakó og svo verður barinn opinn. Einnig verður hægt að tryggja sér kaffikort og bjórkort í forsölu,“ segir Arndís.

Opnunin um Ljósanótt er tímabundin en aðeins fyrsta skrefið í átt að fullri starfsemi segja þær stöllur. Enn á eftir að breyta viðbyggingu hússins í eldhús og því er nokkur vinna fram undan. Stefnt er að því að Gömlu búð opni dyr sínar formlega í fullum rekstri fyrir desember, ef allt fer eftir óskum

Þær Sæunn og Arndís eru spenntar fyrir verkefninu og vita að nóg er fram undan. Þær eru þó ákveðnar í að láta hugmyndina verða að veruleika.

„Það sem byrjaði með brauði er því orðið að stærri framtíðarsýn, stað þar sem fólk getur komið saman, notið góðs matar og kaffis, tekið þátt í viðburðum eða einfaldlega droppað inn og verið. Okkar von er að Gömlu búð verði ekki aðeins kaffihús eða veitingastaður heldur rými sem samfélagið eignar sér og fyllir af lífi,“ segja þær Sæunn og Arndís.

Gamla búð fær nýtt líf með nýju kaffihúsi og veitingastað. Hugmynd tveggja ungra kvenna er að verða að veruleika.

Verulegur viðsnúningur í rekstri

Framlegð jókst úr 20,3 milljónum dala í 50,4 milljónir dala á milli ára. Rekstrarbatinn endurspeglar aukin umsvif eftir umfangsmikla uppbyggingu atNorth á Íslandi.

Félagið fjárfesti fyrir 195,4 milljónir dala í varanlegum rekstrarfjármunum árið 2025 (CAPEX). Heildareignir námu 479,1 milljón dala í lok árs og höfðu aukist úr 300,4 milljónum dala frá árslokum 2024.

Tap ársins nam 11,6 milljónum dala og var nær óbreytt frá fyrra ári. Það skýrist einkum af auknum fjármagnskostnaði og afskriftum vegna þeirrar umfangsmiklu uppbyggingar sem félagið hefur ráðist í.

„Afkoman sýnir skýrt að sú mikla uppbygging sem við höfum ráðist í er farin að skila sér í sterkari grunnrekstri. Tekjur nær tvöfölduðust og EBITDA batnaði verulega. Við höfum byggt upp sterkan grunn til að mæta ört vaxandi eftirspurn eftir afkastamiklum og sjálfbærum tölvuinnviðum og erum vel í stakk búin fyrir næsta vaxtarskeið,“ segir Eyjólfur Magnús Kristinsson, forstjóri atNorth.

Áframhaldandi uppbygging á Íslandi

Uppbygging hélt áfram í gagnaverum atNorth á Akureyri og í Reykjanesbæ. Á Akureyri var fyrri áfangi 16 milljarða króna stækkunar gagnaversins tekinn í rekstur. Jafnframt gerði félagið fimm ára samning við Landsvirkjun um afhendingu 12 MW af raforku til gagnaversins frá síðari hluta árs 2026.

Í Reykjanesbæ hefur verið unnið að umfangsmikilli stækkun vegna samninga við stóra erlenda viðskiptavini. Þar á meðal er aukin þjónusta við skýjafyrirtækið Crusoe. Áætluð fjárfesting vegna þeirrar uppbyggingar nemur um 32 milljörðum króna og fellur að stærstum hluta til árið 2026.

Fyrirhuguð sala styður næsta vaxtarskeið

Í febrúar 2026 var tilkynnt að CPP Investments og Equinix hefðu gert samkomulag um kaup á atNorth af Partners Group. Virði viðskiptanna nemur fjórum milljörðum Bandaríkjadala. Kaupin eru háð hefðbundnum skilyrðum, þar á meðal samþykki eftirlitsaðila.

Að viðskiptunum loknum mun CPP Investments fara með ráðandi hlut.  atNorth mun áfram starfa sjálfstætt undir eigin vörumerki. Félögin hafa jafnframt gert bráðabirgðasamkomulag um fjármögnunarpakka að fjárhæð 4,2 milljarða dala til að styðja við næsta vaxtarskeið atNorth.

Fyrsta gagnaver atNorth í Noregi

Í júní 2026 tilkynnti atNorth um fyrirhugað gagnaver í Haugaland í Vestur Noregi. NOR01 verður fyrsta gagnaver atNorth í Noregi og markar þann áfanga að félagið sé með starfsemi eða uppbyggingaráform í öllum norrænu ríkjunum. Það er hannað til að þjónusta vaxandi notkun og reiknigetu gervigreindar, afkastamikla tölvuvinnslu og stórtæka skýjaþjónustu.

Gagnaverið í Noregi verður knúið endurnýjanlegri orku eins og öll önnur gagnaver atNorth og viðræður eru þegar hafnar við áhugasama aðila um endurnýtingu varma frá gagnaverinu. Svalt loftslag á Norðurlöndum tryggir líka að ekki þarf eins mikla orku til að kæla búnað og á heitari svæðum. Þetta er í samræmi við sjálfbærnistefnu atNorth sem er kjarninn í allri uppbyggingu félagsins.

Norrænt samstarf um samkeppnishæfni

Vegna aukinna umsvifa atNorth á Norðurlöndum, sem leiðandi gagnaversfyrirtæki, bauðst fyrirtækinu að taka þátt í stofnun Nordic Compass, norrænum samstarfsvettvangi leiðandi fyrirtækja. Markmið þess samstarfs er að vinna að aukinni samkeppnishæfni, viðnámsþrótti og nýsköpun á Norðurlöndum. Eva Sóley Guðbjörnsdóttir, aðstoðarforstjóri og fjármálastjóri atNorth, er fulltrúi fyrirtækisins á vettvangi Nordic Compass. Þátttaka atNorth tengist meðal annars djúptækni, gervigreind, sjálfbærum tölvuinnviðum og norrænum orkukerfum.

Umfangsmiklar endurbætur á verslunarrýmum á Keflavíkurflugvelli hófust í ágúst 2025 og kröfðust verulegrar fjárfestingar hér á landi. Breytingarnar ásamt endurhönnun á verslununum eru þær viðamestu sem gerðar hafa verið á fríhafnarverslun í Keflavík frá upphafi og ein stærsta fjárfesting í ferðaþjónustuverslun á Íslandi á síðari árum.  Þegar þeim lýkur, í september á þessu ári, hefur Heinemann fjárfest tugum milljóna evra í verkefninu.

Búast við arðsamari rekstri í framtíðinni

Verulegar fjárhæðir fóru einnig í að breyta rekstrinum úr opinberum rekstri yfir í einkarekstur en innleiða þurfti ný kerfi og lausnir til að tryggja sjálfbæran og farsælan rekstur á Íslandi.

„Í upphafi breytinganna urðu smávægilegar tafir sem leiddu til þess að tekjur félagsins fyrir árið 2025 eru undir áætlunum. Fyrirtækið er þegar komið í hagnað og hefur fulla trú á því að breytingarnar muni skila betri og arðbærari rekstri í framtíðinni. Þrátt fyrir neikvætt eigið fé í árslok 2025 leikur enginn vafi á rekstrarhæfi félagsins,“ segir Liam Grundy, framkvæmdastjóri Ísland Duty Free.

Flestir starfsmenn héldu áfram störfum

Meðalfjöldi starfsmanna í fullu starfi (e. FTE) á árinu var 137,56 en flestir fyrrum starfsmenn Isavia í fríhöfninni héldu áfram störfum. Fjöldi starfsmanna í fullu starfi í lok tímabilsins var 129,74. Nokkuð jöfn skipting er á starfsfólki eftir kyni en 56% starfsfólks voru konur og 44% karlar. Kynjahlutfall stjórnenda árið 2025 var 40% konur og 60% karlar en er nú, eftir breytingar á stjórnendateymi 60% konur og 40% karlar.

Heildartekjur félagsins árið 2025 námu 8.167 milljónum króna en tap ársins var 769 milljónir króna. Heildareignir í árslok námu 3.265 milljónum króna.

Við tókum Arnar Má tali um hvernig ævintýrið hófst, matseðilinn sem matgestir bóna diskana eftir og framtíðaráform fjölskyldunnar.

Hálfgert djók sem varð að veruleika

Hverjir standa á bak við Brim Bistro og hvernig kviknaði hugmyndin?

„Það er ég, Arnar Már Halldórsson, konan mín Birna Ármey Þorsteinsdóttir og strákurinn okkar, Ármann Guðni. Það hefur verið draumur hjá konunni minni í langan tíma að prófa að reka veitingastað. Við komum hingað í góðu veðri í maí, sátum hérna frammi og heyrðum í þeim sem reka hótelið. Þau sögðu okkur að veitingastaðurinn sem var hérna væri nýlokaður. Við spurðum í hálfgerðu djóki hvort við mættum taka við en áður en við vissum af var farið yfir málin og við boðin velkomin að reyna!“

Og þið stukkuð á tækifærið?

„Konan mín vildi hoppa á þetta strax. Ég sagði að við þyrftum aðeins að sofa á þessu, en tveimur dögum seinna hringdi ég í Gísla Heiðarsson, sem á hótelið. Hann kom með tilboð og við byrjuðum strax að safna leyfum og koma okkur í gang.“

Stórir skammtar og sósur sem fólk skrapar upp til síðasta dropa

Hvers konar matseðil bjóðið þið upp á?

„Staðurinn heitir Brim Bistro og við bjóðum upp á heimilislegan mat. Við erum með mjög stóran matseðil: panini, smørrebrød, hamborgara, pastasalöt, fiskrétti, plokkfisk og lambafillé.

Flestar uppskriftirnar eru frá konunni minni og allar sósur gerir hún alveg frá grunni. Við erum líka í samstarfi við Týnda bakaríið sem gerir allt okkar brauðmeti, hamborgarabrauðin, panini-brauðin og rúgbrauðið hjá þeim er alveg sér á báti.“

Hvernig hefur fólk verið að taka í matinn?

„Ekkert nema vel. Sérstaklega lambafilléið, saltfiskurinn, kjötsúpan og þorskurinn á pönnunni hafa slegið í gegn. Ég hef meira að segja séð að fólk er farið að biðja um aukaskeiðar til að geta klárað sósuna sem kemur með þorskinum.

Meginreglan okkar er að hafa sanngjarnt verð og stóra skammta. Við viljum ekki að fólk fari svangt héðan. Maður hefur farið á veitingastaði þar sem búið er að skera allt niður, en við viljum frekar hafa þetta vel útilátið.“

Fjölskyldan í eldhúsinu

Hver er það sem stendur við pönnurnar?

„Birna, konan mín, á fimm börn og hefur alltaf verið frábær kokkur. Við erum ekkert lærð í þessu, en hún elskar að elda og finnst gaman í eldhúsinu. Flestar uppskriftirnar eru hennar, fyrir utan saltfiskréttinn sem er uppskrift frá mömmu minni og heitir í höfuðið á henni.

Í dag er konan mín yfirkokkur og stýrir öllu, en Ármann sonur okkar sér um grillið, ofninn og alla aðalréttina.“

Uppselt næstum alla daga frá verslunarmannahelgi

Hvernig hefur gengið frá því þið opnuðuð?

„Við opnuðum 16. júlí. Við vorum með „soft opening“ á laugardeginum áður sem gekk misvel en við höfðum aldrei unnið í veitingaeldhúsi áður. En við lærðum rosalega mikið af því og þegar við opnuðum opinberlega á sunnudeginum gekk allt mjög vel og enginn kvartaði.

Fyrst þurfti ekkert að bóka borð, en núna verður fólk helst að bóka. Það er búið að vera fullt hjá okkur næstum alla daga frá verslunarmannahelgi og við höfum þurft að vísa fólki frá.“

Hvað getið þið tekið á móti mörgum?

„Það eru sæti fyrir 55 manns, en við miðum yfirleitt við 50 manns á kvöldi. Þetta er enn þá aukavinna hjá okkur, við mætum hingað beint eftir okkar venjulegu vinnu, þannig að 50 aðalréttir á kvöldi er alveg hæfilegt álag fyrir okkur í eldhúsinu eins og er.“

Enskt boltatilboð og pizzur á næsta leiti

Hver eru framtíðaráformin hjá Brim Bistro?

„Eldhúsið er opið frá 17:00 til 21:00 á virkum dögum fyrir aðalréttina. En um helgar ætlum við að sýna enska boltann og opna fyrr, allt eftir því hvenær leikirnir byrja. Þá verðum við með sértilboð á drykkjum og hamborgurum.

Í byrjun september fáum við svo pizzuofn og þá bætast pizzur við matseðilinn; bakaríið ætlar líka að gera pizzudeigið fyrir okkur. Hugmyndin í framtíðinni er svo að bjóða upp á hlaðborð öðru hvoru, eins og pizzuhlaðborð eða almennan heimilismat eins og kótilettur í raspi eða Cordon Bleu. Það er margt skemmtilegt á teikniborðinu,“ segir Arnar Már Halldórsson að endingu.

Landsbankinn var stofnaður árið 1886 og hefur því verið hluti af íslensku samfélagi í 140 ár. Þetta eru sömuleiðis stór tímamót fyrir TM sem fagnar 70 ára afmæli. Það er því sannarlega tilefni til að gera sér glaðan dag saman.

Boðið verður upp á léttar veitingar og góða stemningu í 30 útibúum Landsbankans víðs vegar um land. Við hvetjum viðskiptavini til að líta við og fagna þessum tímamótum með okkur. Útibúin á Breiðdalsvík, Djúpavogi, Kópaskeri og Skagaströnd eru ekki opin á fimmtudögum og því verða ekki veisluhöld þar í þetta sinn.

Kíktu við í útibú nálægt þér og fagnaðu með okkur.

Við hlökkum til að sjá þig!

„Hér er saman kominn öflugur hópur með fjölbreytta reynslu og ólíkan bakgrunn. Við erum vel í stakk búin til að takast á við næsta áfanga. Fram undan er spennandi vegferð þar sem við ætlum að efla markaðssókn okkar,  þróa upplifun gesta áfram og sækja af krafti þau tækifæri sem felast í sterkri stöðu Bláa Lónsins. Ég hef mikla trú á þessu teymi og því sem við getum áorkað saman,“ segir Sigríður Margrét Oddsdóttir, forstjóri Bláa Lónsins.

Helgi Júlíusson er framkvæmdastjóri fjármála (CFO).  Helgi hefur setið í framkvæmdastjórn Bláa Lónsins frá árinu 2022, hann er með C.Sc. gráðu í byggingarverkfræði frá Háskóla Íslands, með M.Sc. gráðu í rekstrarverkfræði frá Technical University of Denmark (DTU) og með MBA gráðu frá Cranfield School of Management, auk þess sem hann er með próf í verðbréfaviðskiptum.  Helgi var áður framkvæmdastjóri Framtakssjóðsins Icelandic Tourism Fund og þar áður forstjóri Pennans. 

Hildur Þórisdóttir er framkvæmdastjóri mannauðs (CHRO).  Hildur er ný í framkvæmdastjórn Bláa Lónsins en hún kemur til starfa frá Festi hf. þar sem hún starfaði sem mannauðsstjóri. Hildur er með B.A. í sálfræði og M.Sc. í viðskiptafræði frá Háskóla Íslands.  Hildur hefur starfað við mannauðsmál um árabil, meðal annars hjá Straumi-Burðarás Fjárfestingabanka, Kviku banka, Mannviti og Lyfju.   

Jóhann Valur Sævarsson er framkvæmdastjóri sölu (CCO).  Jóhann er nýr í framkvæmdastjórn Bláa Lónsins en hann kemur til starfa frá Icelandair þar sem hann starfaði sem forstöðumaður fyrirtækjaarkitektúrs, gagna og sjálfvirknivæðingar. Áður starfaði Jóhann Valur hjá Air Atlanta, WOW air og NOVA.  Jóhann er með B.Sc. gráðu í verkfræði frá Háskólanum í Reykjavík og M.Sc. gráðu í verkfræði frá Technical University of Denmark (DTU).

Sigrún Halldórsdóttir er framkvæmdastjóri rekstrar (COO).  Sigrún hefur setið í framkvæmdastjórn Bláa Lónsins frá árinu 2020 sem framkvæmdarstjóri mannauðs. Í því hlutverki hefur hún unnið þvert á félagið og öðlast víðtæka yfirsýn yfir starfsemina. Hún er með B.Sc. gráðu í rekstrarverkfræði frá Háskólanum í Reykjavík og M.S. gráðu í mannauðsstjórnun frá Háskóla Íslands.  Áður en hún hóf störf hjá Bláa Lóninu gegndi hún hlutverki ráðgjafa á sviði rekstrar- og mannauðsmála. 

Sigurður Long er framkvæmdastjóri tækni (CTO).  Sigurður er með B.Sc. gráðu í viðskiptafræði frá Háskóla Íslands og M.Sc. gráðu í upplýsingatækni frá ITU í Danmörku.  Sigurður hefur starfað hjá Bláa Lóninu síðan 2019 og setið í framkvæmdastjórn frá árinu 2020.  Hann var áður framkvæmdastjóri upplýsingatæknisviðs Olíuverzlunar Íslands hf. og starfaði hjá Össuri og Maritech síðar Wise ehf. 

Sigurður Þorsteinsson er framkvæmdastjóri hönnunar (CDO).  Sigurður er með BA gráðu og diplómu gráðu í iðnhönnun (Industrial Design) frá Istituto Europeo di Design, IED í Mílanó.  Sigurður rak eigið fyrirtæki á sviði hönnunar, branding og nýsköpunar, Design Group Italia I.D. S.r.l. í Mílanó sl. 28 ár.  Á þeim vettvangi starfaði hann fyrir Bláa Lónið allt frá árinu 1997 og nánast einvörðungu sl. fimm árin.  Samhliða sölu á fyrrnefndu fyrirtæki sínu á Ítalíu hóf Sigurður störf sem framkvæmdastjóri hjá Bláa Lóninu í fullu starfi á árinu 2022. 

Bláa Lónið hf. er móðurfélag öflugra fyrirtækja sem eru leiðandi hvert á sínu sviði og kjarnast um upplifunarferðaþjónustu, heilsu og vellíðan, húðvísindi og þróun sjálfbærra áfangastaða. Öll starfsemi okkar byggir á áralangri reynslu af rannsóknum, hönnun og nýsköpun með virðingu fyrir náttúrunni að leiðarljósi. Samspil vel mótaðra áherslna í hönnun og viðskiptum hefur staðsett dótturfélög okkar fremst í sínum flokki.

Undir viðskiptasvið Ísland Duty Free heyra vörustýring, markaðsmál, aðfangakeðja og birgðastýring. Sviðið gegnir því lykilhlutverki í mótun vöruúrvals og upplifunar viðskiptavina.

„Við erum afar ánægð að fá Helgu Dís í þetta lykilhlutverk. Ráðningarferlið var vandað og samkeppnin hörð en afar sterkir umsækjendur bæði innan fyrirtækisins og utan þess sóttu um. Það segir sína sögu að niðurstaðan hafi verið innanhússráðning,“ segir Liam Grundy, framkvæmdastjóri Ísland Duty Free.

Helga Dís hefur gegnt starfi vöruflokkastjóra snyrtivara og sérvöru hjá Ísland Duty Free undanfarna mánuði og þekkir því starfsemina, teymið og birgja félagsins vel. Áður starfaði hún hjá Samkaupum, fyrst sem þjónustu- og upplifunarstjóri, svo sem markaðsstjóri Nettó, þar sem hún stýrði markaðsmálum og þjónustuupplifun keðjunnar á landsvísu og loks sem vöruflokkastjóri. Þar áður var hún rekstrarstjóri veitingastaðarins Hjá Höllu á Keflavíkurflugvelli og starfaði um árabil hjá Bláa lóninu.

Helga Dís er með meistaragráðu í þjónustustjórnun og BS-gráðu í viðskiptafræði frá Háskóla Íslands. Hún sat í bæjarstjórn Grindavíkurbæjar á árunum 2018 til 2024.

„Ég er full tilhlökkunar að taka við þessu spennandi hlutverki. Fram undan eru einstakir tímar hjá Ísland Duty Free og ég hlakka til að leiða áfram uppbyggingu á vöruúrvali og upplifun viðskiptavina ásamt frábæru samstarfsfólki,“ segir Helga Dís Jakobsdóttir.

„Helga Dís hefur á skömmum tíma sýnt í verki að hún er öflugur leiðtogi og viðhorf hennar og gildi samræmast einstaklega vel stefnu Ísland Duty Free. Það er okkur því sérstakt ánægjuefni að sjá leiðtoga vaxa innan okkar eigin raða,“ segir Liam.

Consensa innkaupaþjónusta og ráðgjöf hafði umsjón með útboðsferlinu fyrir hönd Suðurnesjabæjar. Eitt tilboð barst, frá Skólamat ehf., sem uppfyllti skilyrði útboðsins og var tilboðið samþykkt.

Samningurinn var undirritaður í síðustu viku af Axel Jónssyni, stjórnarformanni og eiganda Skólamatar ehf., og Árna Gísla Árnasyni, sviðsstjóra og starfandi bæjarstjóra Suðurnesjabæjar.

„Það er ánægjuleg niðurstaða að semja við Skólamat sem hefur sinnt þessari þjónustu fyrir Suðurnesjabæ og forvera sveitarfélagsins um árabil með góðum árangri. Það er einnig kostur að semja við fyrirtæki sem er með sína aðalstarfsstöð á Suðurnesjunum. Við hlökkum til áframhaldandi góðs samstarfs við Skólamat, hér eftir sem hingað til,“ sagði Árni Gísli við undirritun samningsins.

Samstarf Skólamatar við sveitarfélagið og forvera þess nær rúma tvo áratugi aftur í tímann.

„Við hjá Skólamat fögnum því að hafa verið valin til að sinna áfram þessari mikilvægu þjónustu fyrir Suðurnesjabæ. Samstarf okkar við sveitarfélagið og forvera þess hefur staðið yfir í rúma tvo áratugi og á þeim tíma hafa myndast sterk tengsl og gagnkvæmt traust. Markmið okkar hefur ávallt verið að bjóða upp á góðar, næringarríkar og fjölbreyttar máltíðir fyrir nemendur og starfsfólk skólanna. Við erum stolt af því að vera fyrirtæki með rætur á Suðurnesjunum og hlökkum til að halda áfram að vinna með Suðurnesjabæ að því að styðja við vellíðan og námsumhverfi barna og ungmenna á komandi árum,“ segir Jón Axelsson, forstjóri Skólamatar ehf.

Mercedes-Benz eActros 400 er fullrafknúinn vörubíll með allt að 400 km drægni við hagstæð skilyrði og er hannaður fyrir krefjandi dreifingar- og flutningsverkefni. Með þessari fjárfestingu dregur Kalka enn frekar úr kolefnisspori starfseminnar og styður við þá stefnu fyrirtækisins að byggja upp hringrásarhagkerfi og lágmarka umhverfisáhrif í allri starfsemi.

Kalka hefur það að leiðarljósi að vera leiðandi í umhverfismálum á sviði úrgangsmeðhöndlunar á Íslandi. Umhverfisstefna fyrirtækisins byggir á ábyrgri meðhöndlun úrgangs, aukinni umhverfisvitund og sjálfbærum lausnum sem endurspegla gildi fyrirtækisins um hringrás, umhverfi og samfélag.

„Við erum afar ánægð með að taka þetta mikilvæga skref að bæta fyrsta rafknúna vörubílnum af þessari stærð við flotann okkar. Rafvæðing flutninga fellur vel að framtíðarsýn Kölku og styður við markmið okkar um að draga úr losun gróðurhúsalofttegunda og byggja upp sjálfbærari starfsemi til framtíðar,“ segir Steinþór Þórðarson, framkvæmdastjóri Kölku.

Davor Lucic, rekstrarstjóri sorphirðu og endurvinnslustöðva, segir að verkefni fyrir svona bíl hafi smám saman verið að koma upp á yfirborðið. „Við byrjuðum fyrir 6 árum að stækka sendiferðabílinn okkar og nýta ferðir hans betur. Við vorum svo komin upp í stærstu gerð af sendiferðabíl og sáum tækifæri til að nýta ferðir enn betur. Við flytjum m.a. ýmis endurvinnsluefni sem safnast í Vogum og vonandi í Grindavík líka í framtíðinni. Bíllinn kemur sér líka vel í stærri afhendingar á tunnum og kerjum og í flutninga t.d. á textíl inn á höfuðborgarsvæðið. Þá er algengt að eitthvað sé til að taka til baka suðureftir. Það er mjög jákvætt að geta aukið nýtinguna á bílnum og á sama tíma þurrkað kolefnissporið alveg út“, segir Davor.

Kalka er með tvo minni sendiferðabíla „í snattinu“ og þeir eru báðir rafdrifnir. „Við næstu endurnýjun vinnuvéla verður skoðað hvort rafknúnar vélar geti hentað verkefnunum hér“, bætir Davor við.

Hjá Landfara ehf. ríkir einnig ánægja með afhendinguna.

„Það er ánægjulegt að sjá fyrirtæki eins og Kölku taka afgerandi skref í orkuskiptum með því að velja Mercedes-Benz eActros 400. Bíllinn sameinar öfluga afkastagetu, góða drægni og hagkvæman rekstur og hentar afar vel fyrir íslenskar aðstæður. Við erum stolt af því að fá að vera hluti af þessari vegferð með Kölku,“ segir Ólafur Þór Þórðarson, sölustjóri vörubíla hjá Landfara ehf.

Um bílinn

•   Mercedes-Benz eActros 400 fullrafknúinn vörubíll

•   Allt að 400 km drægni við hagstæð skilyrði

•   17 bretta vörukassi frá Kiesling

•   2,5 tonna vörulyfta

•   Afhentur af Landfara ehf.,

     umboðsaðila Mercedes-Benz Trucks á Ísland

„Við erum afar stolt af því að bjóða úrval frá okkar fremstu hönnuðum, þar á meðal á Hekla Ísland, Ugla Handverk, Farmers Market, Bjarni Viðar og Sign ásamt úrvali af handprjónuðum íslenskum lopapeysum.  Markmið okkar er að tryggja að bæði Íslendingar og erlendir gestir geti fundið fallegar og einstakar hönnunar- og gjafavörur í hæsta gæðaflokki,“ segir Sigrún Edda Elíasdóttir, markaðsstjóri Saga Giftstore.

Drífa ehf. sem mun reka Saga Giftstore átti hagstæðasta tilboðið í útboði um rekstur gjafavöruverslunar á Keflavíkurflugvelli sem lauk á dögunum. Drífa ehf. er íslenskt fyrirtæki með áratuga reynslu af verslunarrekstri og þróun verslunarlausna.

„Við á Keflavíkurflugvelli bjóðum nýjan rekstraraðila hjartanlega velkominn og erum gríðarlega spennt fyrir opnun Saga Giftstore,“ segir Þórunn Marinósdóttir, forstöðumaður viðskiptatekna og sölu á KEF. „Þessi nýja verslun verður tilvalinn staður fyrir erlenda ferðamenn sem vilja taka með sér minjagrip frá Íslandi og jafnframt fyrir íslenska flugvallargesti sem leita að handverki og hönnun í hæsta gæðaflokki.“

Þegar blaðamann ber að garði tekur sjálfur vertinn, Bogi Jónsson, á móti honum með bros á vör. Bogi er mörgum kunnur, enda enginn nýgræðingur í bransanum. Það eru nefnilega heil 40 ár síðan hann hóf rekstur með hinum landsþekktu „Boga-Rúllum“ úr matarvangi. Síðan þá hefur hann rekið taílenska veitingastaði, vöruhús og heimaveitingahús á Álftanesi.

Eftir fjármálahrunið keyptu Bogi og eiginkona hans, Narumon Sawangjaitham, Hólavelli við Skagabraut 86 í Garðinum og hafa búið þar til margra ára. Bogi lét hendur standa fram úr ermum, reif eldri byggingar á landareigninni og reisti nýtt hús sem nú hýsir þetta líka dásamlega kaffihús ásamt vinnustofu hans.

Minningaveggurinn sem bjargað var úr geymslu

Kaffi Skúrinn er ekki bara staður til að fá sér kaffisopa; hann er lifandi safn og vitnisburður um litríkan starfsferil Boga. Inni á kaffihúsinu má skoða ýmsa muni og á vinnustofunni ber hæst merkilegan minningavegg sem á sérstaka sögu. Veggurinn stóð áður á einum af fyrri veitingastöðum Boga og á hann höfðu þjóðþekktir einstaklingar ritað nöfn sín og kveðjur. Þegar Bogi þurfti að gera breytingar á þeim stað vildi hann ómögulega að mála yfir þessar dýrmætu minningar. Hann tók því vegginn einfaldlega niður í heilu lagi, setti í geymslu, og nú, áratugum síðar, hefur veggurinn fengið nýtt líf og heiðurssess á Garðskaga. Þar hafa ritað nöfn sín Megas, Björk, Jón Páll Sigmarsson og fjölmargir aðrir landsþekktir einstaklingar.

Kaffi og krúttlegur flóamarkaður

Rómantíkin og samvinnan svífur yfir vötnum á Hólavöllum. Á meðan Bogi stendur vaktina og hellir upp á kaffið fyrir gesti og gangandi sér Narumon, eiginkona hans, um flóamarkað sem staðsettur er í nýlega uppgerðu húsi, sem áður var fjós og hlaða, rétt við hliðina á kaffihúsinu.

Þótt þau hjónin séu bæði komin á eftirlaun leyndist greinilega nóg af krafti í þeim og þau viðurkenna að þau hafi hreinlega of gaman af því að standa í svona rekstri til að sitja auðum höndum. Staðurinn er lítill og tekur fáa í sæti, sem er að sögn Boga alveg passleg stærð fyrir þau tvö til að halda utan um. Viðtökurnar hafa samt farið fram úr björtustu vonum og það hefur verið mun meira að gera en þau áttu von á.

Heimamenn eru strax farnir að dásama staðinn. Kristín Júlla Kristjáns, íbúi í Suðurnesjabæ, skrifaði nýverið dásamlega umsögn á Garðmenn og Garðurinn á fésbókinni þar sem hún útnefndi Kaffi Skúrinn sem nýja uppáhalds kaffihúsið sitt:

„Maður finnur svo vel ástina og kærleikann sem er lagt í þetta, andinn þarna er svo góður að þig langar ekki að yfirgefa staðinn og svo spillir ekki fyrir að það er líka lítill krúttlegur flóamarkaður á staðnum. Ég elska þetta!“

Sólmyrkvi í vændum og vetrarplön

Fram undan er spennandi sumar og Bogi segist strax farinn að búa sig undir mikið fjör þann 12. ágúst næstkomandi, en þá mun almyrkvi á sólu sjást einstaklega vel af Garðskaganum og búist er við miklum fjölda ferðamanna á svæðið.

Hvað framtíðina varðar tekur Bogi lífinu með ró. Þegar hausta tekur og veturinn gengur í garð gerir hann ráð fyrir að það verði jafnvel bara opið um helgar, en það eigi allt eftir að koma betur í ljós á næstu vikum.

Fyrir þá sem vilja upplifa einstaka alúð, sögu, góðan kaffisopa og skemmtilegan flóamarkað í einu fegursta umhverfi Suðurnesja þá er Kaffi Skúrinn opinn alla daga á milli klukkan 12:00 og 20:00. Það er óhætt að mæla með bíltúr á Garðskaga.

Á vinnustofu Boga má sjá ýmsa muni og skilti sem tengjast starfsferlinum.

Bláa Lónið hefur frá upphafi staðið í fararbroddi í uppgangi baðlónsmenningar á Íslandi. Kaupin eru markviss liður í áformum félagsins um áframhaldandi áherslu á hágæða upplifun og vellíðan í vexti félagsins til framtíðar víða um land.

„Uppbygging baðlóna á Íslandi hefur verið einn helsti vaxtarsproti ferðaþjónustu allt frá stofnun Bláa Lónsins og skýr sérstaða landsins sem áfangastaðar. Bláa Lónið hefur fjárfest í einstökum áfangastöðum víða um land og staðirnir þrír eiga það allir sameiginlegt að hafa sína eigin sögu að segja. Um leið endurspegla þeir þau miklu gæði afþreyingar og vellíðunar sem Bláa Lónið hefur lagt áherslu á og falla því vel að vörumerki félagsins. Við sjáum af mánaðarlegum könnunum sem við gerum að þrír fjórðu ferðamanna heimsækja baðlón á meðan á dvöl þeirra á Íslandi stendur. Árangur Bláa Lónsins hefur veitt fjölmörgum innblástur og er rekstur baðlóna í dag mikilvægur þáttur í sérstöðu og styrkleika landsins sem áfangastaðar,“ segir Sigríður Margrét Oddsdóttir, forstjóri Bláa Lónsins.

Kaupin eru gerð með fyrirvara um samþykki hluthafafundar Bláa Lónsins hf. og Samkeppniseftirlitsins.

Nái viðskiptin fram að ganga mun Bláa Lónið hf. eiga meirihluta í Norðurböðum. Áður hafði félagið tryggt sér meirihluta í Fontana á Laugarvatni. Bláa Lónið undirbýr nú skráningu á íslenskan hlutabréfamarkað. Landsbankinn og Fossar fjárfestingarbanki eru umsjónaraðilar útboðsins.

Sigríður Margrét Oddsdóttir, forstjóri Bláa Lónsins.

Thule á sér langa sögu og hefur verið bruggaður á Akureyri allt frá árinu 1966. Nú er verið að skerpa á stefnunni og breyta bjórnum í 4,4% Lite bjór sem er glútenfrír, með minna af kolvetnum og færri kaloríum. Breytingin þýðir þó ekki að ný vörulína líti dagsins ljós, heldur verður Thule einfaldlega alltaf Lite upp frá þessu.

Vildu gera Thule meira Thule

Atli Sigurður Kristjánsson, framkvæmdastjóri markaðssviðs Coca-Cola á Íslandi, segir breytingarnar miða að því að mæta óskum neytenda í dag sem leita í auknum mæli í léttari valkosti án þess að fórna bragðinu.

„Við vildum gera Thule meira Thule. Hann hefur alltaf verið léttur í anda; kaldur, ferskur, einfaldur og íslenskur í gegn. Hann er ekki að reyna að vera flókinn eða hátíðlegur, heldur á hann að geta hlegið að sjálfum sér og Íslandi í leiðinni,“ útskýrir Atli Sigurður.

Handrit frá Hugleiki og fyrsta herferðin bönnuð

Nýrri staðfærslu fylgir hressileg auglýsingaherferð undir slagorðinu Alltaf léttur. Alltaf lite. Þar fer annar kunnur Suðurnesjamaður mikinn, en það er leikarinn Jón Bjarni sem fer með aðalhlutverkið í auglýsingunum á móti félaga sínum Nikulási.

Handritin eru skrifuð af Hugleiki Dagssyni og byggja á séríslenskum augnablikum og húmor sem flestir landsmenn þekkja. Thule á nefnilega dálítið skrautlega sögu þegar kemur að auglýsingum en Atli Sigurður rifjar upp gamla og dálítið djarfa sögu frá upphafsárum bjórsins.

„Það tók markaðsteymi Thule nokkur ár að finna rétta tóninn þegar bjórinn var nýkominn á markað. Eitt skemmtilegasta dæmið er frá 1969 þegar ein fyrsta sjónvarpsauglýsing Thule vakti gríðarlega athygli. Þar bað fúlskeggjaður kúreki, á leið til aftöku, um einn ískaldan Thule sem sína hinstu ósk. Það þótti fullmikið fyrir sinn tíma, olli talsverðu uppnámi og var auglýsingin bönnuð eftir aðeins fáeinar sýningar í sjónvarpi,“ segir Atli Sigurður og brosir að lokum: „Ég vona að við séum búin að finna rétta tóninn fyrir íslenskt samfélag í dag.“

Nýi, létti Thule-bjórinn verður fáanlegur á næstu dögum og vikum á börum, veitingastöðum og í Vínbúðunum.

Í spilaranum er ein af auglýsingunum. Það eru aldurstakmörk á spiluninni og því þarf að horfa á auglýsinguna á Youtube.

Guðrún Olsen (33 ára) er forstöðumaður stefnu og umbreytinga hjá Icelandair.

Inga Lára Jónsdóttir er framkvæmdastjóri þjónustu og snjallra lausna HS Veitna. Hún hóf störf hjá HS Veitum á síðasta ári eftir að hafa verið framkvæmdastjóri Securitas á Suðurnesjum í nokkur ár.

Ráðgjafarfyrirtækið Góð samskipti, sem er í eigu almannatengilsins Andrésar Jónssonar, hefur birt lista yfir 40 efnilega stjórnendur í viðskiptalífinu árið 2026 sem eru 40 ára og yngri.

Þetta er í fimmta sinn sem félagið birtir slíkan lista, en markmið fyrirtækisins er að gefa hann út á tveggja ára fresti.

„Listinn er tekinn saman til að lyfta fólki sem hefur staðið sig vel í því vandasama hlutverki að vera stjórnandi en getur einnig gefið vísbendingu um hverjir gætu átt eftir að taka við æðstu stöðum í íslenskum fyrirtækjum á næstu árum,“ segir í grein Góðra samskipta á Medium.

Andrés fékk fjölda ábendinga og hann segir að reynt hafi verið að velja einstaklinga sem hafa náð langt í kröfuhörðu umhverfi eða sinna stjórnunarstöðum sem fela í sér mikla ábyrgð innan íslenskra fyrirtækja.

Umsögn um Ingu Láru:

Inga Lára Jónsdóttir (40), framkvæmdastjóri þjónustu og snjallra lausna HS Veitna

Inga Lára tók við sem framkvæmdastjóri nýs sviðs, þjónustu og snjallra lausna hjá HS Veitum í júní á síðasta ári, eftir að hafa verið valin úr hópi 110 umsækjenda. Sviðið var stofnað í kjölfar skipulagsbreytinga sem tóku gildi í byrjun árs 2025, með það að markmiði að setja þjónustu við viðskiptavini í enn sterkari forgang. Undir sviðið falla þrjár deildir sem eru í beinni snertingu við viðskiptavini: mæladeild, þjónusta og innheimta.

Inga Lára hefur mannaforráð yfir 15 starfsmönnum af um 90 starfsmönnum fyrirtækisins og ber ábyrgð á rekstri, árangri, starfsþróun, fjárhagsáætlun og samstarfi við önnur svið. Þjónustusvið HS Veitna nær til yfir 80 þúsund íbúa auk fjölda fyrirtækja og stofnana. Áður en Inga Lára kom til HS veitna starfaði hún sem forstöðumaður Securitas á Suðurnesjum og stýrði þar hátt í hundrað manns.

Sem stjórnandi leggur Inga Lára megináherslu á að skapa vinnuumhverfi þar sem starfsfólk upplifir öryggi, stuðning og starfsánægju. Hún hvetur til frumkvæðis og ábyrgðar, vill að fólk þori að stíga fram með hugmyndir og lítur á mistök sem eðlilegan hluta af þróun og árangri. Traust, gagnkvæm virðing og hreinskilin samskipti eru hornsteinar í hennar hugmyndafræði, ásamt metnaði fyrir árangri og skýrum markmiðum. Hún leggur áherslu á samvinnu og að virkja styrkleika hvers og eins og vinnur einnig markvisst að eigin þróun sem leiðtogi.

Inga Lára er með Bsc í viðskiptafræði frá Háskóla Íslands og meistaragráðu í stjórnun og forystu frá Háskólanum á Bifröst.

Guðrún Olsen (33), forstöðumaður stefnu og umbreytinga Icelandair

Guðrún er forstöðumaður stefnu og umbreytinga hjá Icelandair og leiðir stefnumótun, umbreytingar og stafræna þróun félagsins. Hún ber ábyrgð á að tengja saman langtímastefnu og framkvæmd í daglegum rekstri og tryggja að umbreytingarverkefni skili raunverulegum og mælanlegum árangri þvert á félagið.

Hún gegnir lykilhlutverki í ONE Transformation breytingaferli Icelandair og vinnur að stefnumótun, forgangsröðun og stærri ákvörðunum sem móta framtíð félagsins. Undir hana fellur einnig vöru- og verkefnastjórnun stafrænna lausna, auk þess að tryggja að ákvarðanir séu gagnadrifnar og að framkvæmd haldi dampi frá hugmynd að innleiðingu.

Guðrún leiðir 11 manna teymi sem vinnur þvert á stefnumótun, umbreytingar, verkefnastjórnun og vöruþróun, og starfar náið með framkvæmdastjórn og stjórn félagsins að lykilverkefnum og stefnumótandi málum. Sem stjórnandi telur Guðrún fólk og þróun þess skipta höfuðmáli. Hún leggur áherslu á að skapa umhverfi þar sem starfsfólk fær ábyrgð, tækifæri til að takast á við krefjandi verkefni og skýran stuðning til að vaxa í starfi. Traust, skýr endurgjöf og tenging við heildarmynd fyrirtækisins eru grunnstoðir í hennar stjórnunarstíl.

Guðrún er með BA gráðu í lögfræði frá Háskólanum í Reykjavík og LLM frá Kaupmannahafnarháskóla. Áður starfaði hún m.a. hjá Boston Consulting Group (BCG) í Kaupmannahöfn.

atNorth hefur ekki náð að kynna sig eins vel fyrir íbúum á Suðurnesjum, ólíkt því sem gerist á Akureyri þar sem mun fleiri þekkja starfsemina. Í Reykjanesbæ starfar fólk bæði af svæðinu og af höfuðborgarsvæðinu og vill Magnús kynna fyrirtækið betur fyrir heimamönnum og auka nándina við samfélagið.

Stanslaus uppbygging líkt og dómkirkjan í Barcelona

Magnús svaraði þeirri gagnrýni sem oft heyrist að gagnaver skapi fá störf miðað við aðra stóriðju. Hann benti á að hjá atNorth á Íslandi starfi 120 manns í dag en að sú tala verði nær 150 fyrir árslok, sem þýðir um fimm bein störf á hverju megavatti (MW) miðað við 25 MW raforkunotkun.

„Flest stóriðja á sér eitt byggingartímabil sem tekur tvö til þrjú ár, en gagnaver eru hins vegar svolítið eins og La Sagrada Familia (Gaudi) kirkjan í Barcelona – þau eru í stanslausri uppbyggingu,“ sagði hann. Líftími tölvubúnaðar er aðeins 3–5 ár og því fylgi viðvarandi vinna við endurnýjun á kæli- og rafkerfum.

Vegna þessa hefur fyrirtækið verið með að lágmarki 200 verktaka í vinnu á svæðinu á degi hverjum síðustu fjögur ár, og sér Magnús það ekki breytast á næstunni. Fyrirtækið leggur áherslu á að að lágmarki 50% verktaka séu af því svæði þar sem starfað er og hefur sú tala oft verið mun hærri á Suðurnesjum. Þá eru 85–90% starfsmanna með sérfræðimenntun, ýmist iðn- eða háskólamenntaðir, oft á verk- og tæknisviði.

Til marks um áframhaldandi vöxt er atNorth nú að byggja um 2.000 fermetra skrifstofuhúsnæði á svæði sínu í Reykjanesbæ, sem mun hýsa fasta starfsmenn á vegum atNorth og viðskiptavina þess, en gagnaverið virkar að mörgu leyti eins og skrifstofuhótel fyrir tölvubúnað.

Fremstir í Evrópu í gervigreind en Ísland að missa af lestinni

Viðskiptavinir atNorth eru um 100 talsins, þar af um 25 íslenskir. Innlendu viðskiptavinirnir telja þó aðeins um 1–2% af veltu félagsins, en yfirgnæfandi meirihluti viðskiptavina kemur frá Bandaríkjunum. Þá eru um 80% af nýjum viðskiptavinum síðustu tvö ár tilkomnir vegna gervigreindar.

„Það eru mjög fáir, ef einhverjir, fremri okkur í Evrópu í uppbyggingu á svona stórum gervigreindarklösterum,“ sagði Magnús. Hann viðurkennir þó að Ísland sé aðeins að missa af lestinni vegna skorts á raforku og flutningsgetu í raforkukerfinu. Fyrir fimm árum var 100% af starfsemi atNorth á Íslandi en í dag er hlutfallið komið niður í c.a. 15% þar sem vöxturinn hefur færst erlendis.

Stjórnarfundur fyrirtækisins mun á næstunni samþykkja stækkunarfasa upp á 18 MW til viðbótar í Reykjanesbæ, en frekari vöxtur veltur á samningum við flutningsaðila raforku og KADECO, sem útvegar land undir starfsemina.

atNorth er nú þegar í stóru verkefni í Danmörku þar sem afgangsvarmi gagnaversins verður nýttur í heilsárstómataræktun til að minnka kolefnisfótspor vegna innflutnings. Eyjólfur kallar eftir samstarfi við heimamenn og sveitarfélagið um svipuð verkefni á Suðurnesjum.

Vilja rækta tómata eða þörunga með afgangsvarma í Reykjanesbæ

Ein stærsta áskorun atNorth á Íslandi snýr að umhverfismálum og nýtingu á afgangsvarma. Erlendis endurnýtir fyrirtækið stóran hluta af umfram varma, meðal annars til húshitunar og í framtíðinni matvælaræktunar, en það hefur gengið erfiðlega hér á landi þar sem heitt vatn er ódýrt. Evrópskar reglugerðir munu hins vegar líklega takmarka byggingu gagnavera án varmanýtingar eftir árið 2030.

atNorth er nú þegar í stóru verkefni í Danmörku þar sem afgangsvarmi gagnaversins verður nýttur í heilsárstómataræktun til að minnka kolefnisfótspor vegna innflutnings. Eyjólfur kallar eftir samstarfi við heimamenn og sveitarfélagið um svipuð verkefni á Suðurnesjum.

Algalíf ræktar örþörunginn Haematococcus pluvialis, en úr honum er unnið andoxunarefnið astaxanthin, sem Kári kallar réttilega ákveðið „undraefni“. Efnið er öflugasta náttúrulega andoxunarefni sem hægt er að rækta á iðnaðarskala í dag og er notað í hágæða fæðubótarefni fyrir menn og í vaxandi mæli fyrir gæludýr.

Einstök tækni og gríðarlegur þrýstingur

Framleiðsluferlið á Ásbrú tekur um sex vikur og byggir á lokuðu rörkerfi sem fyrirtækið hefur sjálft þróað en það þykir eitt það fullkomnasta í heiminum. Upphafið má rekja til tveggja Norðmanna með reynslu úr fæðubótageiranum, en í dag er Algalíf á meðal stærstu framleiðenda í heiminum á náttúrulegu astaxanthini og það fyrirtæki í geiranum sem hefur vaxið hvað hraðast og mest undanfarin ár.

Tæknin og umfangið á Ásbrú er magnað en hér eru nokkrar staðreyndir úr verksmiðjunni eftir stækkun:

Húsnæðið er orðið um
14.000 fermetra.

400 kílómetrar af glerrörum liggja um verksmiðjuna þar sem þörungurinn er ræktaður undir þúsundum LED-ljósa sem loga allan sólarhringinn.

1.000 bara þrýstingur er notaður í sérhæfðu ferli með koltvísýringi til að draga olíuna (astaxanthinið) út úr lífmassanum. „Þetta jafngildir því að kafað sé niður á tíu kílómetra dýpi og það er ekki á mörgum stöðum á jörðinni sem menn ráða við svona krefjandi ferli,“ segir Kári.

Framleiðslan er afar verðmæt en eitt kíló af hreinu, náttúrulegu astaxanthini kostar um eina milljón króna. Ólíkt helstu samkeppnisaðilunum, sem margir hverjir rækta þörunga utandyra, sem og í opnum tjörnum (þar sem hætta er á mengun og smithættu), fer öll framleiðsla Algalífs fram innandyra við fullkomlega stýrðar aðstæður. Þá fullvinnur Algalíf alla sína vöru hér á landi í mismunandi styrkleika af astaxanthin olíu , sem gefur félaginu mikið samkeppnisforskot.

Íslenskir lífeyrissjóðir
inn sem eigendur

Algalíf lauk nýverið við mikla stækkun sem hófst árið 2021. Við það meira en þrefaldast framleiðslugetan, fer úr 1.500 kílóum af hágæðaafurð á ári í allt að 5.000 kíló.

Samhliða þessari uppbyggingu urðu mikil tímamót í eigendahópnum síðasta haust þegar framtakssjóðurinn Aldir keypti 50% hlut í félaginu á móti tveimur norskum stofnendum þess. Á bak við Aldir standa sterkir íslenskir fjárfestar og margir stærstu lífeyrissjóðir landsins. Kári segir að nýir fjárfestar komi með gríðarlegan styrk og fjármagn inn í félagið sem veiti gott svigrúm fyrir frekari uppbyggingu.

Hjá Algalíf starfa nú um 70 manns af 17 mismunandi þjóðernum. Um 70% starfsfólksins er heimafólk með búsetu í Reykjanesbæ. Þá eru um 40% starfsmanna sérfræðingar og vísindafólk og hlutfall kvenna er sömuleiðis um 40%. Kári hrósar erlenda starfsfólkinu sérstaklega: „Margir hverjir eru ansi duglegir að læra íslenskuna og hreyknir af því. Þetta fólk er búið að setjast hér að með fjölskyldur og börn og er mjög mikilvægur innviður í sveitarfélaginu.“

Horfa til frekari stækkunar á Ásbrú

Sérstaða Íslands og Suðurnesja spilar stórt hlutverk í velgengni Algalífs. Hreina vatnið, kalda loftslagið sem heldur smitum í lágmarki, og ekki síst stöðug endurnýjanleg raforka í gegnum langtímasamninga skipta sköpum. Verksmiðjan notar um 7 megavött (MW) af raforku í dag, sem framleidd er í jarðvarmavirkjunum HS Orku og afhent af HS Veitum. Fyrirtækið er þegar með tryggan orkusamning upp á 10,5 MW til ársins 2037.

Þrátt fyrir að ætla að taka því aðeins rólega í ár á meðan nýja byggingin er keyrð upp í full afköst  er Algalíf þegar farið að plana næstu skref. Markaðurinn úti í heimi vex um 10% á ári og 95% af framleiðslunni fer til útflutnings.

Framtíðarmarkmiðið er að Algalíf verði stærsti og öflugasti astaxanthin framleiðandi í heimi sem og sækja fram í ræktun og nýtingu á öðrum örþörungum sem henta okkar framleiðslu aðferðum og þekkingu innanhúss. Eins geta falist mikil tækifæri að koma astaxanthini inn í lækninga- og lyfjabransann (líkt og omega-lýsisolíur eru þegar orðnar að uppáskrifuðum lyfjum víða erlendis), og gangi það eftir þyrfti fyrirtækið líklegast að fimmfalda stærð sína.

Algalíf hefur þegar tryggt sér forleigurétt frá KADECO fyrir lóð til að stækka áfram í suðvesturátt út frá núverandi nýbyggingu á Ásbrú. Upphaflegt húsnæði félagsins var  þar sem áður var hlaupabraut og vélaverkstæði hersins). Þar sem nýja byggingin var hönnuð með stóran lager, fullvinnslu og skrifstofur í huga munu næstu stækkanir einungis snúa að framleiðslukerfunum sjálfum, sem gerir áframhaldandi vöxt mun fljótlegri og hagkvæmari.

Það voru sérstakur og ansi bragðgóður fundur sem fór fram í Grindavík á dögunum. Í kjölfar stórs fundar Samtaka atvinnulífsins á Bryggjunni, ákvað stjórnendateymi Bláa lónsins, stærsta fyrirtækis Grindavíkur, að skella sér í óvænta heimsókn til þess minnsta: Handverkskonfektgerðarinnar Neskju við Hafnargötu. Það var sjálfur bæjarstjórinn, Fannar Jónasson, sem kom heimsókninni á og leiddi hópinn til súkkulaðismökkunar.

Neskja er nýtt sælkerafyrirtæki sem stofnað var af hjónunum Ívari Kjartanssyni og Chidaphu Kruasaeng, sem betur er þekkt sem Kung. Kung er enginn nýgræðingur í bransanum en hún er menntuð frá hinum virta French Pastry School í Chicago, starfaði um árabil við hlið Hafliða Ragnarssonar, fremsta súkkulaðimeistara landsins, og á að baki þrjár ferðir með íslenska kokkalandsliðinu – meðal annars þegar liðið nældi í þriðja sætið á Ólympíuleikunum árið 2020.

„Vildum vera hluti af uppbyggingunni í Grindavík“

Þrátt fyrir jarðhræringar og erfiða tíma á svæðinu voru þau Ívar og Kung aldrei í vafa um hvar þau vildu opna draumafyrirtækið sitt.

„Við sáum tækifæri í Grindavík, með alla þessa uppbyggingu að fara af stað, og við vildum vera hluti af henni. Okkur fannst tilvalið að koma hingað,“ sögðu þau skötuhjú þegar þau sýndu stjórnendum Bláa lónsins litlu en tæknilegu aðstöðuna sína.

Opnun nýrra fyrirtækja eins og Neskju gefur samfélaginu mikið móralskt stökk, að sögn Fannars bæjarstjóra, sem mætti galvaskur með í heimsóknina.

Neskja framleiðir hágæða húðað konfekt (dragee) og karamellur úr fyrsta flokks hráefni frá Belgíu, Frakklandi og Ítalíu, blandað íslenskum aðalbláberjum, lakkrís og karamellum ýmis konar. Vegna þess að fyrirtækið er enn að stíga sín fyrstu skref er nánast allt gert í höndunum, en afkastageta þeirra tveggja er um 200 konfettdósir á dag en molarnir kallast Völur.

Súkkulaðikúlur í litum Bláa lónsins?

Í heimsókninni voru stjórnendur lónsins fljótir að gæða sér á handverkinu og fóru Fannar bæjarstjóri og Sigríður Margrét Oddsdóttir, forstjóri Bláa lónsins, á kostum við að smakka hinar ýmsu tegundir, s.s. saltkaramellu-, og lakkríssúkkulaðikúlur.

Fljótlega fór fólk að velta fyrir sér mögulegu samstarfi á milli þessa stærsta og minnsta fyrirtækis í bænum. Neskja framleiðir þegar sérsniðið Benz-konfekt fyrir bílaumboðið Öskju sem fylgir nýjum bílum, og var sú hugmynd reifuð á staðnum hvort Kung gæti hannað sérstakar lúxussúkkulaðikúlur í bláum kísillit lónsins.

Spurð út í það hvort hún sæi tækifæri í samstarfi við Neskju stóð ekki á svörum hjá forstjóra Bláa lónsins:

„Þetta súkkulaði er auðvitað hreinlega ávanabindandi, þannig að ég þarf aðeins að jafna mig! Þetta var svo stórkostleg upplifun,“ sagði Sigríður Margrét sæl í bragði með körfu af konfekti í hönd.

„Við erum að sjálfsögðu í samstarfi við fullt af fyrirtækjum og það er frábært að vera hér og fá tækifæri til að skoða þetta. Fyrsta skrefið er náttúrulega að fara með þessa ótrúlegu gjöf sem ég fékk til fólksins okkar sem velur vörur í búðirnar okkar og leyfa því að smakka. Þetta er alveg einstök gæðavara.“

Með samrunanum verður til gríðarlega öflugt og breiðvirkt ferðaþjónustufyrirtæki. Bláa Lónið er leiðandi í upplifunar-, heilsu- og vellíðunarferðaþjónustu, á meðan Arctic Adventures sérhæfir sig í ævintýra- og afþreyingarferðum, auk þess að reka fjölsótta áfangastaði á borð við Kerið, Fjaðrárgljúfur og Raufarhólshelli.

Veltan yfir 34 milljarðar króna

Umsvif hins sameinaða félags verða mikil en samanlagðar tekjur fyrirtækjanna tveggja námu um 34,3 milljörðum króna á árinu 2025. Stöðugildi félaganna eru samtals um 1.120, þar af 780 hjá Bláa Lóninu og 340 hjá Arctic Adventures.

Samhliða þessum stóru tíðindum var tilkynnt að Bláa Lónið hafi nú hafið formlegan undirbúning að skráningu á íslenskan hlutabréfamarkað.

Horfa fram á áframhaldandi vöxt

Sigríður Margrét Oddsdóttir, forstjóri Bláa Lónsins, segir kaupin mikilvægt skref í þá átt að staðsetja Ísland sem einn fremsta áfangastað heims í vellíðunarferðamennsku:

„Upplifun og vellíðan er bæði okkar sérstaða og styrkleiki.“

Ásgeir Baldurs, forstjóri Arctic Adventures, tekur í sama streng og kallar þetta mikil tímamót:

„Bláa Lónið hefur byggt upp eitt sterkasta vörumerki Íslands á alþjóðavísu og með sameiginlegum styrk félaganna skapast einstakt tækifæri til áframhaldandi vaxtar og þróunar.“

Fyrirtækjaráðgjöf Landsbankans er ráðgjafi kaupanda (Bláa Lónsins) í viðskiptunum og ARMA Advisory er ráðgjafi seljanda (Arctic Adventures).

Mediacom er eitt elsta birtingahús landsins. Fyrirtækið hefur um árabil verið í samstarfi við stærsta birtingafyrirtæki heims, EssenceMediacom, sem nú er hluti af WPP Media og starfar í yfir 80 löndum.

Sigurjón tekur við starfinu af Þórmundi Bergssyni, sem verið framkvæmdastjóri félagsins frá stofnun. Þórmundur, sem er í dag 67 ára, hefur starfað lengur en flestir aðrir á sviði auglýsingabirtinga á Íslandi eða í tæp 40 ár. Hann og Mediacom hafa getið sér gott orð en fyrirtækið þjónar fjölda innlendra og erlendra viðskiptavina. Þórmundur færist nú í starf ráðgjafa hjá fyrirtækinu.

Þórmundur Bergsson: „Það er ánægjuefni að geta afhent ævistarfið í hendur yngra fólks sem hefur sömu ástríðu og maður sjálfur. Sigurjón hefur nú þegar komið inn með fjölda nýrra hugmynda um hvernig við getum þjónað viðskiptavinum Mediacom enn betur en áður og ég hlakka til að vinna með honum áfram.“

Sigurjón Rúnar Vikarsson, nýr framkvæmdastjóri Mediacom á Íslandi, er 34 ára og starfaði áður sem rekstrarstjóri Hopp. Þar áður starfaði hann m.a. við viðskiptaþróun, hugbúnaðarþróun og markaðsmál hjá Nova. Sigurjón er með MBA-gráðu frá Háskóla Íslands og B.Sc.-gráðu í tölvunarfræði frá Háskólanum í Reykjavík. Þá hefur hann sótt stjórnendanámskeið hjá IESE. 

Til sýnis verða smart #1, smart #3 og hinn margverðlaunaði smart #5. Þrír alrafmagnaðir bílar með ólíkan karakter en allir byggðir á sömu hugmyndafræði smart um nútímalega hönnun, snjallar tæknilausnir og rafmagnaða akstursupplifun.

smart #1 markaði upphaf nýrrar kynslóðar smart-bíla og sameinar nettar stærðir, góða drægni og vandaðan búnað. Bíllinn hentar jafnt í borgarakstri sem lengri ferðir og býður upp á allt að 420 kílómetra drægni. Þrátt fyrir fyrirferðarlítið útlit er innanrýmið rúmgott og vel skipulagt. smart #1 hefur meðal annars hlotið Red Dot Design-verðlaunin fyrir hönnun og notendaupplifun.

Sportlegri nálgun má finna í smart #3 sem sker sig úr með straumlínulagaðri hönnun og kraftmiklum aksturseiginleikum. Bíllinn býður upp á allt að 415 kílómetra drægni og kemur með fjórhjóladrifi sem tryggir gott grip og stöðugleika við fjölbreyttar aðstæður. Líkt og #1 hefur #3 einnig hlotið alþjóðlega viðurkenningu fyrir hönnun sína.

Einnig verður nýr smart #5, stærsti bíllinn frá smart til þessa á svæðinu. Bíllinn sameinar rúmgott innanrými, mikla drægni og öfluga rafmagnstækni og er hannaður með fjölskyldulífið jafnt sem lengri ferðalög í huga. Drægnin er allt að 540 kílómetrar og hraðhleðslugeta allt að 400 kW.

smart #5 hefur hlotið fjölda alþjóðlegra viðurkenninga frá því hann kom á markað og hefur hlotið mjög góðar undirtektir hér á landi. Hann var valinn öruggasti stóri SUV-bíll ársins 2025 af Euro NCAP, rafmagnaður fjölskyldubíll ársins 2026 hjá What Car?, hlaut Red Dot Design-verðlaun fyrir hönnun og notendaupplifun og var jafnframt valinn bíll ársins í Noregi árið 2025.

Sumarsýningin fer fram föstudaginn 19. júní frá klukkan 13:00 til 17:00 að Njarðarbraut 11 hjá Öskju í Reykjanesbæ.

Eins og sjá má á meðfylgjandi myndum er nýja rútan hönnuð á einstaklega litríkan og áberandi hátt. Að sögn forsvarsmanna Bus4u Iceland er bílnum ætlað að vera ákveðið tákn í flórunni á íslenskum vegum.

„Hjá Bus4u Iceland trúum við því að fjölbreytileikinn geri lífið ríkara. Við komum úr mismunandi áttum, höfum ólíkar skoðanir og veljum mismunandi leiðir í lífinu,“ segir í færslu frá fyrirtækinu í tilefni af fyrstu ferð bílsins.

„Samt eigum við öll eitthvað sameiginlegt – við leitum að virðingu, öryggi, gleði og góðri upplifun á leiðinni. Þess vegna vildum við setja þessa sérstöku rútu á götuna. Hún er tákn um það að hjá Bus4u eru allir velkomnir.“

Undir kjörorðunum „Ólíkar leiðir. Sami áfangastaður“ vildi fyrirtækið koma á framfæri þakklæti til farþega sinna, starfsfólks, samstarfsaðila og vina fyrir að vera hluti af ferðalaginu og minnir á að ávallt séu allir velkomnir um borð.

Gangi sameiningin eftir yrði nýr sjóður sá næst stærsti á landinu með um 1.600 milljarða króna eignir miðað við stöðu sjóðanna í lok síðasta árs, segir í tilkynningu frá Stjórnum Festu lífeyrissjóðs og Gildis-lífeyrissjóðs

Fjöldi innlendra birgja tók þátt í viðburðinum og skapaðist skemmtileg stemning.

„Við leggjum mikið upp úr því að gera íslenskum vörum hátt undir höfði í verslunum okkar,“ segir Liam Grundy, framkvæmdastjóri Ísland Duty Free. Hann segir að breytingar á verslunum miði meðal annars að því að gera íslenskum vörum hátt undir höfði og gefa þeim gott rými sem höfði til erlendra og innlendra ferðamanna.

„Við höfum lagt mikinn metnað í að gera íslenska svæðið í búðunum aðlaðandi og áberandi með vísan í íslenska náttúru og sérkenni. Við viljum auka enn frekar framboð á íslenskum vörum ekki aðeins á Íslandi heldur þegar fram í sækir einnig í verslunum á flugvöllum erlendis. Við viljum líka að ferðalangar fái framúrskarandi þjónustu í verslunum og þess vegna eru svona birgjadagar, þar sem birgjar hafa tækifæri til að kynna vörur sínar fyrir starfsfólki, afar mikilvægir,“ segir Liam.

Fimmföldun á orkugetu inn á svæðið

Við byrjum á stóru fréttunum. Þið voruð að taka í notkun nýtt tengivirki á svæðinu. Hvað þýðir þetta nákvæmlega fyrir starfsemina?

„Þetta hefur gríðarlega mikla þýðingu. Við höfum verið í rekstri hér á Ásbrú síðan 2012 og erum því að detta í 15 ár í rekstri gagnavers. Gamla tengivirkið okkar, sem við tókum í notkun í upphafi, var 45 megavött. Nýja tengivirkið er hins vegar upp á 240 megavött, sem er rúmlega fimmföldun á þeirri orku sem við getum tekið á móti. Þetta er gríðarlega mikilvægt skref fyrir framtíð okkar og skýr skilaboð um hvert við stefnum.“

Af hverju ákváðuð þið á sínum tíma að reka ykkar eigið tengivirki í stað þess að treysta eingöngu á hefðbundna innviði?

„Tengivirkið er í raun tengipunkturinn okkar við Landsnet, sem flytur orkuna til okkar. Við ákváðum snemma að reka eigið tengivirki til þess að hafa betri stjórn á orkunni og hvernig við dreifum henni innan okkar svæðis. Þegar við erum að byggja nýja gagnasali og stækka, þá stjórnum við sjálf leiðunum sem orkan fer.“

Gagnavinnsluver frekar en gagnaver

Gagnaversiðnaðurinn virðist vera í gríðarlegum vexti. Hvað er það sem drífur þessa miklu eftirspurn áfram?

„Þetta er einn sá iðnaður á Íslandi sem vex hvað hraðast. Gagnaver í dag eru hreinlega orðin hluti af grunninnviðum samfélagsins, á borð við samgöngur eða rafmagn. Nútímalífstíllinn okkar treystir á við getum flétt upp fréttum í rauntíma, bókað flug á netinu eða notað heimabankann – öll þessi þjónusta reiðir sig á gagnaver sem grunninnvið.

En það sem hefur gerst á síðustu 12 til 18 mánuðum er eitthvað alveg einstakt. Leikurinn breyttist bókstaflega á alheimsvísu yfir nóttu vegna gervigreindarinnar (AI). Maður er vanur því að iðnaður þróist hægt og bítandi, en þarna var eins og maður hefði farið að sofa á sunnudagskvöldi í ákveðnum veruleika, og vaknað á mánudagsmorgni í nýjum heimi þar sem eftirspurnin hafði margfaldast á alheimsvísu. Allt í einu voru allir farnir að nota gervigreindina. Grunninnviðir gervigreindarinnar eru gagnaver; þar inni keyra líkönin. Með gervigreindinni varð risavaxin breyting í þessum iðnaði.“

Var þetta eitthvað sem þið sáuð fyrir?

„Við vorum ómeðvitað mjög vel undirbúin. Ísland hentar einstaklega vel fyrir tækni sem kallast High Performance Computing (HPC) eða ofurtölvurekstur. Við ákváðum fyrir tíu árum að sérhæfa okkur í þeim hluta gagnaversiðnaðarins. Viðskiptavinir okkar eru í raun miklu meira að vinna úr gríðarlegu magni upplýsinga heldur en að geyma þær. Þess vegna er orðið „gagnaver“ kannski dálítið rangnefni yfir starfsemi okkar á Íslandi – „gagnavinnsluver“ væri mun réttara. Þar sem við vorum þegar sérhæfð í ofurtölvurekstri og öll hönnum okkar á gagnasölum miðaðist við það, smellpössuðum við inn í þarfir gervigreindarlíkananna þegar sú bylgja fór af stað.“

Kom þessi fimmföldun á tengivirkinu þá til vegna þessarar sprengingar?

„Nýja spennuvirkið er búið að vera í framkvæmd í þrjú ár, þannig að ákvörðunin var tekin fyrir þessa miklu AI-bylgju. Við höfum raunar verið í stöðugum framkvæmdaham frá árinu 2012, alltaf að byggja eða breyta. Við gerðum ráð fyrir jöfnum og stöðugum vexti á Ásbrú, en þessi þróun gerir það að verkum að við þurfum að hlaupa mun hraðar en plön gerðu ráð fyrir.“

Frá BMW yfir í íslensku tæknifyrirtækin

Hverjir eru helstu viðskiptavinir ykkar?

„Fókusinn okkar hefur alveg frá byrjun verið á stór, erlend fyrirtæki, svokallaða enterprise viðskiptavini. Einn af okkar allra fyrstu viðskiptavinum árið 2012 var þýski bílaframleiðandinn BMW og síðar var Volkswagen lengi í viðskiptum hjá okkur. Að fá svona stór fyrirtæki strax í upphafi mótaði fyrirtækið og verkferlana okkar; við urðum að vera með þjónustuna á 100% hreinu til að standast þeirra ströngu alþjóðlegu kröfur, staðla og verkferla . Í dag erum við mikið með erlend fyrirtæki úr upplýsingatæknigeiranum (IT), fjármálageiranum, stórar rannsóknarstofnanir og háskóla, aðallega frá Bretlandi, Evrópu og Bandaríkjunum.“

En hvað með innlenda markaðinn, eiga íslensk fyrirtæki hlutdeild hjá ykkur?

„„Já, við erum með nánast öll alla helstu íslensku þjónustufyrirtækin í viðskiptum við okkur. En skalinn á því sem við erum að gera er einfaldlega það stór að þótt öll helstu upplýsingatæknifyrirtæki landsins séu með sinn rekstur hjá okkur, þá telst það samt sem áður mjög lítill hluti af heildarrekstrarumhverfi gagnaversins.“

Sagan á servíettunni og fullkomið veðurfar

Ef við spólum aðeins til baka – hvernig varð þessi hugmynd um stórtækan gagnaversrekstur á Íslandi eiginlega til?

„Fyrirtækið var stofnað árið 2008 en hugmyndin fæddist í raun á servíettu inni á skrifstofu tölvuleikjafyrirtækisins CCP. Hilmar, þáverandi framkvæmdastjóri CCP, var orðinn langþreyttur á því að þurfa stanslaust að senda tæknimenn til London til þess að vinna í gagnaverinu sem keyrði EVE Online-leikinn. Hann velti því fyrir sér af hverju það væri ekki hægt að reka gagnaver á Íslandi.

Að málinu komu sípan íslenskir og erlendir fjárfestar og stjórnendateymi með mikla reynslu úr gagnaversgeiranum vestanhafs og austan. Þeir sáu strax að Ísland bjó yfir einstökum kostum: Grænni, endurnýjanlegri orku og stanslausum vindi allt árið um kring.“

Skiptir íslenski vindurinn og kuldinn virkilega svona miklu máli?

„Já, heldur betur. Það er ekkert einsdæmi í heiminum að gagnaver nýti umhverfis eða utanaðkomandi loft til kælingar til þess að ná niður rekstrarkostnaði. En munurinn á Íslandi og öðrum löndum, eins og í Skandinavíu eða Kanada, er sá að hér getum við gert þetta allt árið um kring. Sumrin á Íslandi verða ekki of heit og veturnir verða heldur ekki of kaldir. Ef umhverfið úti verður of kalt, þá þarftu að eyða mikilli orku í að hita loftið upp áður en þú hleypir því inn í salina. Ísland liggur hins vegar alltaf á þessu fullkomna hitastigsbili fyrir utanaðkomandi kælingu, sem hefur bein og mjög jákvæð áhrif á orkunotkunina okkar.“

Af hverju varð Ásbrú á Suðurnesjum fyrir valinu sem staðsetning, yfirgefnar stórbyggingar Varnarliðsins sem var ný farið í burtu?

„Herinn fór árið 2006 og þegar fyrirtækið er stofnað tveimur árum síðar stóðu þarna margar tómar byggingar sem vantaði nýtt hlutverk. Það passaði fullkomlega við okkar umhverfisvænu framtíðarsýn að endurnýta húsnæði fremur en að byggja allt frá grunni. Við keyptum þessar byggingar árið 2008 – gamla verslun varnarliðsins, lagerhúsnæði og hús sem búslóðir hermanna biðu á milli þess sem þeir voru sendir annað. Að utan sérðu nákvæmlega sömu útveggi og þök og voru þá, en öllu innvolsinu hefur verið breytt í hátæknigagnaver.

Þegar við mættum fyrst á svæðið blasti við ákveðin sjón. Sum rými og skrifstofur voru nánast ósnert frá því að Kaninn fór. Þar voru skrifborð með pappírum, pennar og kaffibollar, rétt eins og fólk hefði bara staðið upp og átt von á að mæta aftur daginn eftir. En gekk hreinlega út og sagði bless. Við þurftum að byrja á að hreinsa þetta allt út. Þegar við byrjuðum var gagnaversiðnaður hreinlega ekki til á Íslandi og við þurftum að eiga mikil samtöl við stjórnvöld til að gera umhverfið samkeppnishæft. Við viljum meina að sjálft orðið „gagnaver“ hafi orðið til í íslenskri tungu í kringum tilkomu Verne,“ segir Styrmir kýminn.

Áhrif á nærsamfélagið: Fjöldi starfa og samstarf við FS

Hvað þýðir starfsemin á Ásbrú fyrir atvinnulífið á Suðurnesjum í dag?

„Í dag starfa tæplega 50 manns beint hjá Verne og starfsmannafjöldinn hefur vaxið stöðugt. Almennt er gert ráð fyrir því að fyrir hvert starf sem er beint að vinna hjá gagnaveri skapist 2-5 afleidd störf. Þetta er fólk frá íslenskum upplýsingatæknifyrirtækjum, iðnaðarmenn og tæknimenn sem þjónusta búnaðinn okkar eða viðskiptavinina. Við erum orðin veigamikill þáttur í atvinnulífi svæðisins og þau áhrif munu aukast.“

Eru áform um frekari stækkun á næstunni?

„Já, við erum með mörg spennandi verkefni í pípunum og horfum björtum augum á framtíðina. Miðað við okkar útreikninga gerum við ráð fyrir að auka mikið við starfsmannafjöldann hjá okkur  á næstu árum. Samhliða því má gera ráð fyrir að afleiddum störfum muni fjölga líka. Þetta eru dýrmæt og verðmæt tæknistörf sem krefjast menntunar. Þess vegna erum við mjög ánægðir að fá að taka þátt í þessum rekstri. Það er ekki sjálfgefið að Ísland sé hluti af þessari gervigreindarbylgju sem er að ganga yfir heiminn. Og við þurfum sameiginlegt átak margra aðila með okkur til að standa með okkur í þessari uppbyggingu.“

Þið nefnduð á kynningu á dögunum áhugavert samstarf við Fjölbrautaskóla Suðurnesja (FS). Í hverju felst það?

„Við sjáum fram á mikla mannaflaþörf í náinni framtíð og viljum tryggja að unga fólkið á svæðinu sjá tækifærin sem eru að skapast. Við settum okkur í samband við FS, en skólinn er með frábærar brautir í rafvirkjun, vélvirkjun, pípulagningum og annarri iðnmenntun. Hugmyndin sem við erum að þróa með þeim er að búa til sérstaka gagnaverssérhæfingu innan veggja skólans.

Krakkarnir myndu áfram læra sína hefðbundnu rafvirkjun eða vélvirkjun, en fengju sérhæfða áfanga eða verkefni sem undirbúa þau beint undir það hvernig stoðkerfi gagnavera virka. Þetta er „win-win“ staða; við fáum vel undirbúið framtíðarstarfsfólk og krakkarnir útskrifast með verðmæta þekkingu beint út í atvinnulífið í sínu nærumhverfi.“

Er nýja Suðurnesjalína 2 mikilvæg forsenda fyrir þessum vaxtaráformum ykkar?

„Jú, hún er algjör forsenda fyrir áframhaldandi framtíðarvexti Verne á þessu svæði. Við erum í nánu og góðu sambandi við Landsnet varðandi það mál, erum vongóðir og treystum því að það mál klárist sem allra fyrst.“

Frá Securitas yfir í framkvæmdastjórastólinn

Hverjir eiga gagnaverið á Ásbrú í dag?

„Í upphafi var þetta hópur íslenskra og erlendra fjárfesta og lífeyrissjóðirnir komu inn á tímabili. Árið 2022 var fyrirtækið selt til breska sjóðsins D9 og þá stækkaði Verne-brandið út fyrir landsteinana; gagnaver í Bretlandi og Finnlandi voru færð undir merki Verne þar sem nafnið okkar þykir mjög sterkt á alþjóðavísu. Árið 2024 keypti svo franskur innviðasjóður, sem hetir Ardian, eignasafnið. Þeir eiga einnig Mílu á Íslandi. Ardian er einn stærsti sjóður Evrópu sem sérhæfir sig í innviðum á borð við virkjanir og flugvelli. Gagnaver Verne er eina gagnaverseignin í þeirra safni.  En þótt eigendurnir séu erlendir, þá erum við algjörlega rekin sem sjálfstætt, íslenskt fyrirtæki hér heima.“

Að lokum Styrmir, hver er þinn eigin bakgrunnur og hvernig komst þú inn í þennan iðnað?

„Ég er upprunalega Reykvíkingur en flutti á Suðurnesin fyrir um átta árum síðan. Ég hóf störf á svæðinu árið 2011, þá sem starfsmaður Securitas. Ég var ráðinn til að taka yfir staðbundna gæslu hjá Securitas á svæðinu sem Kjartan Már Kjartansson stýrði þá, og mitt aðalverkefni var að hanna og setja upp öryggisgæsluna og skrifa verkferlana fyrir Verne á Ásbrú. Þannig fékk ég tækifæri til að taka þátt í uppbyggingunni frá fyrsta degi sem verktaki, uns ég var ráðinn yfir sem starfsmaður Verne árið 2013.

Eftir að hafa keyrt á milli í fimm ár tókum við fjölskyldan ákvörðun um að flytja suður árið 2014. Konan mín, Fríða, vinnur sem deildarstjóri í Stapaskóli. Við búum í Innri-Njarðvík og erum sammála um að þetta sé ein besta ákvörðun sem við höfum tekið. Samfélagið tók ótrúlega vel á móti okkur. Krakkarnir byrjuðu að æfa með Njarðvík og ég endaði sjálfur á því að vera formaður barna- og unglingaráðs í fótboltanum í Njarðvík í átta ár. Ég skilgreini mig algjörlega sem Reykjanesbæjarbúa í dag.“

Hvernig horfir framtíðin við þér eftir 15 ár í bransanum?

„Það er gríðarleg bjartsýni í gangi en líka ákveðin, heilbrigð óttablandin virðing fyrir því hversu stór verkefnin fram undan eru. En það sem lætur mig sofa afar vel á nóttunni er teymið mitt hérna hjá Verne. Flestir starfsmennirnir okkar hafa verið hér í meira en tíu ár. Sú reynsla og þekking sem þar býr tryggir að við getum með fullu öryggi tekist á við allt það sem framtíðin ber í skauti sér.“

Séð yfir húsakynni Verne Global á Ásbrú. Næsta stækkun verður í austur, til hægri á myndinni.

Nýja tengivirkið sem nýlega var tekið í notkun.

Verne hefur nýtt vel húsnæði sem Varnarliðið var með í sinni starfsemi.

Þær eru líka ofurvaxnar pípurnar sem notaðar eru til kælingarinnar á tölvubúnaðinum.

Núverandi og verðandi fulltrúar Reykjanesbæjar voru á kynningu í Verne nýlega, f.v. Kjartan Már Kjartansson, fráfarandi bæjarstjóri, Gunnlaugur Kárason, formaður bæjarráðs og Vilhjálmur Árnason, næsti bæjarstjóri.

Spennandi áskorun og 59 ára saga

Hvernig er að opna búð í Keflavík í dag?

„Það er bara spennandi, já, ég held ég geti ekki sagt neitt annað en það.“

Hvernig kom þetta til?

„Ég tók starfsnám hérna hjá honum Eggerti Hannah, sem tók við verslunarrekstrinum af foreldrum sínum árið 2017. Ég hóf námssamning hjá honum, byrjaði árið 2022 ef ég man rétt. Ég er búinn að vera hérna síðustu ár að hjálpa honum af og til og kláraði námssamninginn hér. Svo var kominn tími hjá honum að hætta og hann bauð mér að kaupa. Ég sá bara ekki annað í stöðunni en að segja já.“

Varstu þá að læra gullsmíði?

„Já, ég lærði gullsmíði hjá Eggerti og útskrifaðist úr Tækniskólanum fyrir rétt rúmu ári, um miðjan maí í fyrra.“

Þetta er svolítið mikil áskorun að taka við svona rótgróinni verslun?

„Já, þetta er mikið viðbrigði og einmitt áskorun. Þetta er 59 ára gömul verslun. Það verður vinna að halda þessu við en bara ótrúlega spennandi. Krefjandi örugglega, en ég er bara spenntur.“

Ertu að breyta miklu?

„Ekki þannig, ég er bara búinn að breyta útlitinu svolítið inni í búðinni. Ég er enn þá með svipaða vöru en búinn að taka inn eitthvað nýtt. Svo á þetta bara eftir að þróast. Það þarf að sjá taktinn í þessu, sjá hvað virkar og hvað ekki, og svo bara panta inn það sem mér líst vel á þegar að því kemur.“

Eina úraverslunin á Suðurnesjum

Hvernig var fyrsti dagurinn?

„Hann var mjög góður, virkilega góður og langt fram úr væntingum. Það kom ótrúlega mikið af fólki; sumir komu bara að heilsa og spjalla, það var alveg frábært.“

Þannig að það er alveg grundvöllur fyrir svona sérverslun í bænum?

„Já, ég held það. Þetta er eina úraverslunin á Suðurnesjunum og það er alltaf einhver sem vantar úr eða batterí. Svo finnst mér áhuginn á skartgripum líka vera að aukast hjá fólki. Þannig að ég held að þessi búð eigi fullan rétt á sér í dag.“

Og þú sérð fullt af möguleikum?

„Já, ekki spurning. Annars væri ég ekki í þessu.“

Klassísk úr og vasahnífar á sterum

Hvað er „heitt“ í dag?

„Ég er rosa hrifinn af Tissot-úrunum. PRX-línan er mjög vinsæl og heit vara á flottu verði. Svo er ég líka með úr frá Raymond Weil og Orient sem ég er mjög hrifinn af – þau eru á flottu verði miðað við að vera sjálftrekt úr. En svo er ég með alveg heilan helling af batteríisúrum, bæði dömu- og herraúr.“

Og gömlu góðu Casio-úrin, eru þau ennþá til?

„Gömlu góðu Casio-úrin eru enn þá til og það á bara eftir að bætast í úrvalið þar. Svo er ég með nóg af gull- og silfurvöru. Við erum með allt frá 5.000 krónum og upp úr, þannig að allir geta komið og verslað hér. Silfurhálsmenin seljast alltaf vel og hjartað er til dæmis alltaf klassík. Ég trúi ekki öðru en að fólk finni eitthvað fyrir sig eða aðra hérna inni.“

Helgi Líndal er einnig að selja Leatherman fjölnotatól og býður upp á áletrun á þau. „Leatherman er geggjuð græja og í raun bara gamli góði vasahnífurinn á sterum og frábær gjöf fyrir iðnnema.“

Þú ert að byrja hérna nánast beint eftir útskriftir úr skólunum, hefðirðu kannski þurft að vera mánuði fyrr á ferðinni?

„Já og nei, þetta var svona eina tímasetningin sem hentaði og var í boði. Við þurftum svolítinn tíma í að breyta hér inni. Svo tók tíma að hafa samband við heildsala og fá nýjar vörur. Ég tók til dæmis inn ný ilmkerti sem heita By Krummi og eru með ótrúlega skemmtilegum lyktum.“

Framtíðin og fjölskyldustuðningurinn

Verður þú á bak við alla daga að smíða, eða hvað ætlarðu að gera við gullsmíðina?

„Já, já, ég mun fara að smíða einhvern lager sjálfur eftir mig. Núna gefst loksins almennilegur tími í það. Það er náttúrulega kostnaðarsamt þannig að það tekur tíma, en hægt og rólega mun ég byggja upp ágætis lager. Margir komu í dag og spurðu einmitt um hluti eftir mig, en því miður átti ég engan lager eins og er. En það kemur.“

Hverjir verða með þér í vinnunni?

„Eins og staðan er núna er ég einn, en mamma mín og Elsa kærastan mín eru búnar að hjálpa mér hérna í allan dag. Ég held að þær muni koma og hjálpa mér af og til.“

Mamma þín er nú með smá verslunarreynslu hér við Hafnargötuna ásamt systur sinni?

„Já, þær systur ráku SI-verslunina að Hafnargötu 61 í mörg ár, þannig að þær þekkja rekstur á Hafnargötunni vel.“

Hvernig ætlarðu svo að hafa opið?

„Eins og staðan er núna stefni ég á að hafa opið frá 10 til 18 alla virka daga og frá 11 til 14 á laugardögum. Það gæti svo sem breyst, en það er allavega hugmyndin í dag.“

Hannah fjölskyldan kveður nú eftir 59 ár í rekstri.

Moss hefur frá árinu 2020 verið undir stjórn Agga Sverrissonar yfirmatreiðslumeistara. Aggi er fæddur og ólst upp í Reykjavík, en byggði upp feril sinn í London þar sem hann fór fyrir Texture Restaurant & Champagne Bar. Texture hlaut Michelin-stjörnu árið 2010 og hélt henni í tíu ár.

Á Moss hefur Aggi unnið áfram með þá sýn sem hefur einkennt feril hans: einfaldleika, árstíðarbundin hráefni, nákvæm vinnubrögð og skapandi nálgun við matargerð. Matseðlar Moss taka reglulegum breytingum og þar mætast íslensk hráefni, asísk áhrif og næm tilfinning fyrir náttúru landsins. Árið 2023 hlaut Moss Michelin-stjörnu og hefur haldið henni samfellt síðan.

„Að halda Michelin-stjörnunni fjórða árið í röð skiptir okkur gríðarlega miklu máli. Þetta er viðurkenning fyrir allt teymið á Moss og alla þá sem koma að upplifun gesta á The Retreat. Michelin-staðallinn skapar metnað, dregur að sér hæfileikaríkt fólk og gerir kröfur um framúrskarandi gæði í öllu sem við gerum. Fyrir gesti hefur stjarnan líka raunverulegt gildi. Því fylgir bæði ábyrgð og mikill ávinningur að halda henni,“ segir Aggi Sverrisson, yfirmatreiðslumeistari Moss.

Árið 2024 varð Aggi sendiherra Dom Pérignon, fyrstur matreiðslumanna á Norðurlöndum til að hljóta þann heiður. Sama ár varð Moss hluti af Dom Pérignon Society, lokuðu alþjóðlegu samfélagi veitingastaða sem gefur staðnum aðgang að sjaldgæfum árgerðum frá vínframleiðandanum.

Michelin-stjörnur eru veittar til eins árs í senn og veitingastaðir þurfa því stöðugt að standast strangar gæðakröfur Michelin Guide. Moss hefur haldið Michelin-stjörnu samfellt frá árinu 2023 og hlýtur nú aðra stjörnu fyrir þá heildarupplifun sem teymið hefur byggt upp með framúrskarandi hráefnum, sköpun, hönnun og þjónustu.

Verslunin hefur verið í rekstri í hálfa öld en Björgvin og fleiri keyptu reksturinn af Róberti Svavarssyni fyrir þremur árum. Þegar Bústoð lokar verður engin húsgagnaverslun í rekstri á Suðurnesjum.

Nokkrar sviptingar hafa verið í verslunarrekstri í Reykjanesbæ að undanförnu. Verslunin Kóda hætti fyrr í vetur eftir rúm fjörutíu ár og þar á undan lokaði Krambúðin sem upphaflega var Sparkaup. En það eru líka jákvæðar fréttir því Helgi Líndal hefur keypt rekstur Georgs V. Hannah og er að opna þar úra- og gjafavöruverslun en Hannah fjölskyldan hafði rekið verslun á sama stað í meira en hálfa öld.

Hér að neðan má sjá færslsu Björgvins:

Að sigla vindinn

„Bústoð er ekki að hætta rekstri.

Hins vegar höfum við tekið þá erfiðu ákvörðun að loka versluninni okkar í Reykjanesbæ í sumar en halda áfram með Bústoð í Garðabæ.

Það er ákvörðun sem ég tek með sorg í hjarta, enda hef ég starfað hjá Bústoð í Reykjanesbæ í meira en 13 ár, þar af undanfarin rúm þrjú ár sem eigandi.

Á þessum árum byggðum við upp öflugt fyrirtæki sem fór úr því að velta um 70 milljónum króna árið 2014 , í yfir 280 milljónir á árunum 2021–2022. Það voru sannkölluð góðærisár. Þegar ég keypti reksturinn árið 2023 tók hins vegar við allt annað rekstrarumhverfi næstu ár. Kostnaður hefur hækkað gríðarlega á sama tíma og samkeppnin hefur harðnað verulega. Rekstrarforsendur margra sérvöruverslana hafa breyst til hins verra og við höfum ekki farið varhluta af því.

Sem betur fer tókum við þá ákvörðun að opna verslun í Garðabæ. Þar hefur Bústoð náð til nýs og stærri markaðar, viðskiptavinahópurinn breikkað og meðalaldur viðskiptavina lækkað verulega. Við sjáum því áfram mikil tækifæri fyrir fyrirtækið til framtíðar.

Bústoð mun því halda áfram að dafna, en því miður ekki lengur með starfsemi í Reykjanesbæ. Ef ég mætti velja myndi ég miklu frekar vera að tilkynna lokun annars staðar en í mínum eigin heimabæ. En sem eigandi þarf ég að horfa raunsætt á stöðuna. Reksturinn í Reykjanesbæ hefur því miður ekki borið sig og þrátt fyrir að hafa haldið í vonina, fjárfest í versluninni og lagt mikið í nýtt vöruúrval og endurbætur, þá hefur það ekki dugað til.

Staðreyndin er sú að í dag þarf gríðarlega mikla veltu til að standa undir þeim kostnaði sem fylgir rekstri verslana. Verðbólga, launahækkanir og annar rekstrarkostnaður hafa breytt leiknum á mjög skömmum tíma.

Verslunin í Reykjanesbæ lokar þó ekki strax. Strax hefjum við rýmingarsölu sem mun standa yfir í sumar á meðan birgðir endast. Þar gefst tækifæri til að gera virkilega góð kaup og ég hvet alla til að kíkja við.

Að lokinni lokun munum við Birgitta standa vaktina í Garðabæ og taka þar áfram á móti viðskiptavinum með sama metnaði og áður.

Við munum jafnframt halda áfram að styðja við íþróttastarf og menningarlíf á Suðurnesjum. Þótt verslunin flytjist burt slær hjartað okkar áfram hér og mun alltaf gera það.

Ég vil sérstaklega þakka fyrrverandi samstarfsaðila mínum og núverandi leigusala fyrir skilning, stuðning og gott samstarf í gegnum þetta ferli. Þó okkur þyki öllum þessi niðurstaða afar sár, hefur verið mikilvægt að finna þann skilning sem sýndur hefur verið.

Vonandi sé ég ykkur sem flest í Bústoð í sumar, fyrst í Reykjanesbæ og svo í Garðabæ.“

Viktor Steinn er með BS og MSc í matvælafræði frá Háskóla Íslands en hann stundaði einnig skiptinám í University of Wisconsin í Madison í Bandaríkjunum. Hann starfaði áður hjá Eurofins í Danmörku og í gæða- og vöruþróunarteymi Ölgerðarinnar.

„Ég er afar spenntur fyrir þessu nýja starfi og þakka það traust sem mér er sýnt. Ég hlakka til að takast á við nýjar áskoranir með frábæru samstarfsfólki“ segir Viktor en hann hóf störf þann 18. maí síðastliðinn.

„Við erum virkilega ánægð að fá Viktor til liðs við okkur og teljum að hann passi einstaklega vel inn í Skólamatarfjölskylduna. Reynsla hans og þekking mun nýtast vel í starfi hans sem gæðastjóri og fellur vel að áherslum Skólamatar um gæði og öryggi,“ segir Jón Axelsson, forstjóri Skólamatar.

Skólamatur er fjölskyldufyrirtæki sem sérhæfir sig í framleiðslu og framreiðslu á ferskum og næringarríkum mat fyrir börn í leik- og grunnskólum. Hjá Skólamat starfa um 260 starfsmenn á um 130 starfsstöðvum á suðvesturhorni landsins.

„Markmið breytinganna eru fyrst og fremst að skerpa á hlutverki móðurfélagsins í þjónustu sinni við dótturfélögin, við viljum gera skilin á milli kjarnastarfsemi og stoðstarfsemi skýrari, auka áherslu á sölu og markaðssetningu með tækni, tryggja örugga framkvæmd þróunar- og fjárfestingaverkefna en á sama tíma sækja nauðsynlega hæfni til þess að ná árangri í framtíðinni“ segir Sigríður Margrét Oddsdóttir forstjóri Bláa Lónsins. „Í dag sjáum við á eftir góðu samstarfsfólki sem hefur staðið sig mjög vel og við óskum alls hins besta“ segir hún enn fremur. 

Heildarfjöldi stöðugilda hjá samstæðunni lækkar úr 807 í 778 við breytingarnar og eftir þær starfa alls 116 í höfuðstöðvum félagsins, engar breytingar voru gerðar á rekstri dótturfélaga innan samstæðunnar. 

Nýr GLC markar nýjan kafla hjá Mercedes-Benz og sameinar langa drægni, hraðvirka hleðslu og nýja kynslóð tækni í fágaðri og rúmgóðri heild, segir í tilkynningu frá Öskju.

Bíllinn skilar allt að 715 kílómetra drægni samkvæmt WLTP og nýtir nýtt 800 volta hleðslukerfi sem styttir hleðslutíma verulega. Þá býður GLC einnig upp á allt að 2.400 kg dráttargetu sem hentar vel íslenskum aðstæðum.

„Þetta er klárlega einn mest spennandi Mercedes-Benz sem við höfum fengið í langan tíma. Hann er bæði rosalega fallegur, þægilegur og fullur af nýrri tækni og svo er drægnin rosalega góð eða allt að 715 km. Við hlökkum mikið til að sýna bílinn loksins í eigin persónu,“
segir Jón Halldór, sölustjóri Öskju í Reykjanesbæ.

GLC kemur með nýja MB.OS stýrikerfinu frá Mercedes-Benz þar sem gervigreind er nýtt til að gera aksturinn snjallari og persónulegri. Með Digital Extras appinu getur ökumaður meðal annars fylgst með hleðslu, forstillt hitastig í bílnum og nálgast upplýsingar um bílinn í gegnum snjallsíma.

Meðal staðalbúnaðar eru meðal annars:

• MBUX snjallkerfi með raddstýringu
• 360° myndavél
• Íslenskt leiðsögukerfi
• Glerþak með SKY CONTROL
• Rafdrifnar sætastillingar með minni
• Háþróuð aksturs- og öryggiskerfi
  
  

Mercedes-Benz fagnar jafnframt 140 árum af nýsköpun á árinu og markar nýr GLC mikilvægt skref í áframhaldandi þróun vörumerkisins.

Forsala á nýjum Mercedes-Benz GLC er hafin hjá Öskju og verð hefst frá 12.390.000 kr.

Gestir eru velkomnir í sýningarsal Öskju í Reykjanesbæ laugardaginn 30. maí frá kl. 12–16 til að skoða bílinn og upplifa nýjan GLC í fyrsta sinn.