Víkurfréttir - Viðskipti

Isavia og airBaltic fagna 10 ára samstarfi

Fri, 29 May 2026 09:50:12 GMT

Um þessar mundir fagna Keflavíkurflugvöllur og lettneska flugfélagið airBaltic tíu ára samstarfsafmæli. Flugfélagið hóf reglubundið flug á milli Ríga-flugvallar (RIX), heimaflugvallar síns í Lettlandi og KEF í maí 2016. Fram til ársins 2021 var flugleiðin aðeins í boði yfir sumartímann en síðan þá hefur verið flogið þrisvar sinnum í viku á veturna og fjórum sinnum í viku á sumrin. Á þessum áratug hefur airBaltic flogið um tvö þúsund flugferðir á milli KEF og RIX með yfir tvö hundruð þúsund farþega.

„Samstarfið við airBaltic hefur skapað mikilvæga flugtengingu á milli Íslands og Eystrasaltsríkjanna sem hefur verið vel nýtt undanfarinn áratug,“ segir Grétar Már Garðarsson, forstöðumaður flugfélaga og markaðsmála á Keflavíkurflugvelli. „Það hefur ekki bara opnað greiða leið á milli Íslands og Lettlands, heldur einnig opnað á fjölbreyttar tengingar til landanna í kring og áframhaldandi flugtengingar um Evrópu og víðar. Það er ánægjulegt að líta yfir farinn veg eftir tíu ára farsælt samstarf, sem hefur fest sig rækilega í sessi á Keflavíkurflugvelli. Við erum þakklát fyrir samstarfið og hlökkum til að styrkja tengslin á komandi árum á þessum sterka grunni."

airBaltic er stærsta flugfélag Eystrasaltsríkjanna og rekur einn yngsta flugvélaflota Evrópu, sem byggir á Airbus A220-300 flugvélum. Félagið býður viðskiptavinum upp á þægilega og sveigjanlega ferðamöguleika og tengir Eystrasaltsríkin við 80 áfangastaði í Evrópu og víðar.

„Síðastliðinn áratug hefur flugleiðin milli Keflavíkurflugvallar og Ríga gegnt mikilvægu hlutverki við að styrkja tengsl Íslands og Lettlands og gefið ferðalöngum frá Íslandi tækifæri til að heimsækja eina stærstu borg Norður-Evrópu, ásamt því að kynnast ríkulegri menningu og fallegri náttúru Lettlands. Flugleiðin hefur einnig verið mikilvæg gátt að Eystrasaltsríkjunum, Finnlandi og Evrópu allri í gegnum umfangsmikið leiðakerfi airBaltic,“ segir Mantas Vrubliauskas, framkvæmdastjóri leiðakerfis hjá airBaltic. „Við viljum tjá þakklæti okkar til langtímasamstarfsaðila okkar, Keflavíkurflugvallar og Ríga-flugvallar (RIX), fyrir áframhaldandi samstarf og stuðning við vöxt airBaltic,“ bætti Vrubliauskas við.

Í sumar verður flogið leiðina fjórum sinnum í viku en eins og er flýgur airBaltic þrisvar sinnum í viku milli Keflavíkurflugvallar (KEF) og Ríga-flugvallar (RIX). Komutími samkvæmt flugáætlun er 23:55 alla sunnudaga, miðvikudaga og föstudaga en brottfarartími er 00:45 alla mánudaga, fimmtudaga og Laugardaga.

Viktor Steinn ráðinn gæðastjóri Skólamatar

Thu, 28 May 2026 14:48:36 GMT

Viktor Steinn Sighvatsson Jensen hefur verið ráðinn gæðastjóri Skólamatar. Viktor mun hafa umsjón með þróun og viðhaldi gæðakerfis og gæðahandbókar fyrirtækisins ásamt því að sinna fræðslu og þjálfun starfsfólks, nýsköpun og vöruþróun.

Viktor Steinn er með BS og MSc í matvælafræði frá Háskóla Íslands en hann stundaði einnig skiptinám í University of Wisconsin í Madison í Bandaríkjunum. Hann starfaði áður hjá Eurofins í Danmörku og í gæða- og vöruþróunarteymi Ölgerðarinnar.

„Ég er afar spenntur fyrir þessu nýja starfi og þakka það traust sem mér er sýnt. Ég hlakka til að takast á við nýjar áskoranir með frábæru samstarfsfólki“ segir Viktor en hann hóf störf þann 18. maí síðastliðinn.

„Við erum virkilega ánægð að fá Viktor til liðs við okkur og teljum að hann passi einstaklega vel inn í Skólamatarfjölskylduna. Reynsla hans og þekking mun nýtast vel í starfi hans sem gæðastjóri og fellur vel að áherslum Skólamatar um gæði og öryggi,“ segir Jón Axelsson, forstjóri Skólamatar.

Skólamatur er fjölskyldufyrirtæki sem sérhæfir sig í framleiðslu og framreiðslu á ferskum og næringarríkum mat fyrir börn í leik- og grunnskólum. Hjá Skólamat starfa um 260 starfsmenn á um 130 starfsstöðvum á suðvesturhorni landsins.

Skipulagsbreytingar í höfuðsstöðvum Bláa Lónsins

Thu, 28 May 2026 12:08:00 GMT

Starfsmönnum Bláa Lónsins voru í dag kynntar skipulagsbreytingar í höfuðsstöðvum félagsins. Breytingarnar fela það í sér að 29 stöðugildi verða lögð niður, 55 starfsmenn flytjast á milli sviða og ráðið verður í ný störf sem ekki voru til innan félagsins. Skipurit félagsins verður uppfært samhliða breytingum.

„Markmið breytinganna eru fyrst og fremst að skerpa á hlutverki móðurfélagsins í þjónustu sinni við dótturfélögin, við viljum gera skilin á milli kjarnastarfsemi og stoðstarfsemi skýrari, auka áherslu á sölu og markaðssetningu með tækni, tryggja örugga framkvæmd þróunar- og fjárfestingaverkefna en á sama tíma sækja nauðsynlega hæfni til þess að ná árangri í framtíðinni“ segir Sigríður Margrét Oddsdóttir forstjóri Bláa Lónsins. „Í dag sjáum við á eftir góðu samstarfsfólki sem hefur staðið sig mjög vel og við óskum alls hins besta“ segir hún enn fremur.

Heildarfjöldi stöðugilda hjá samstæðunni lækkar úr 807 í 778 við breytingarnar og eftir þær starfa alls 116 í höfuðstöðvum félagsins, engar breytingar voru gerðar á rekstri dótturfélaga innan samstæðunnar.

Nýr Mercedes-Benz GLC frumsýndur hjá Öskju í Reykjanesbæ

Wed, 27 May 2026 13:51:44 GMT

Nýr og alrafmagnaður Mercedes-Benz GLC verður frumsýndur hjá Öskju í Reykjanesbæ að Njarðarbraut 11 frá kl. 12–16 nk. laugardag 30. maí.

Nýr GLC markar nýjan kafla hjá Mercedes-Benz og sameinar langa drægni, hraðvirka hleðslu og nýja kynslóð tækni í fágaðri og rúmgóðri heild, segir í tilkynningu frá Öskju.

Bíllinn skilar allt að 715 kílómetra drægni samkvæmt WLTP og nýtir nýtt 800 volta hleðslukerfi sem styttir hleðslutíma verulega. Þá býður GLC einnig upp á allt að 2.400 kg dráttargetu sem hentar vel íslenskum aðstæðum.

„Þetta er klárlega einn mest spennandi Mercedes-Benz sem við höfum fengið í langan tíma. Hann er bæði rosalega fallegur, þægilegur og fullur af nýrri tækni og svo er drægnin rosalega góð eða allt að 715 km. Við hlökkum mikið til að sýna bílinn loksins í eigin persónu,“
segir Jón Halldór, sölustjóri Öskju í Reykjanesbæ.

GLC kemur með nýja MB.OS stýrikerfinu frá Mercedes-Benz þar sem gervigreind er nýtt til að gera aksturinn snjallari og persónulegri. Með Digital Extras appinu getur ökumaður meðal annars fylgst með hleðslu, forstillt hitastig í bílnum og nálgast upplýsingar um bílinn í gegnum snjallsíma.

Meðal staðalbúnaðar eru meðal annars:

MBUX snjallkerfi með raddstýringu
360° myndavél
Íslenskt leiðsögukerfi
Glerþak með SKY CONTROL
Rafdrifnar sætastillingar með minni
Háþróuð aksturs- og öryggiskerfi

Mercedes-Benz fagnar jafnframt 140 árum af nýsköpun á árinu og markar nýr GLC mikilvægt skref í áframhaldandi þróun vörumerkisins.

Forsala á nýjum Mercedes-Benz GLC er hafin hjá Öskju og verð hefst frá 12.390.000 kr.

Gestir eru velkomnir í sýningarsal Öskju í Reykjanesbæ laugardaginn 30. maí frá kl. 12–16 til að skoða bílinn og upplifa nýjan GLC í fyrsta sinn.

United Airlines hefur flug milli Keflavíkur og Washington D.C.

Fri, 22 May 2026 13:57:35 GMT

United Airlines hóf í dag beint flug til Keflavíkurflugvallar frá Washington D.C. og var af því tilefni tekið vel á móti farþegum við komuna til Keflavíkurflugvallar. Í sumar mun United Airlines fljúga daglega á milli KEF og Dulles flugvallar sem fjölgar valkostum ferðalanga, bæði hvað varðar þægindi og flugtengingar.

„Það er mjög ánægjulegt að taka á móti fyrstu farþegum United Airlines frá Washington,“ segir Bjarni Páll Tryggvason, framkvæmdastjóri þjónustu og rekstrar á Keflavíkurflugvelli. „United Airlines er mikilvægur samstarfsaðili og við hlökkum til að sjá áframhaldandi samstarf okkar styrkjast og vaxa á komandi árum. Sú ákvörðun að bæta Washington við sem nýjum áfangastað, samhliða Newark/New York og Chicago, endurspeglar traust United Airlines á Íslandi sem eftirsóttum áfangastað og undirstrikar vaxandi eftirspurn eftir ferðum til og frá landinu.“

United Airlines hefur flogið til Keflavíkurflugvallar frá árinu 2018 og mun í sumar einnig fljúga daglega frá tveimur öðrum flugvöllum, Newark/New York og Chicago O'Hare.

„Við erum afar spennt að hefja okkar fyrstu flug milli Keflavíkur og Washington D.C., sem undirstrikar enn frekar mikilvægi Íslands innan alþjóðlegs leiðakerfis United," segir Amit Badiani, yfirmaður sölu fyrir Afríku og Evrópu utan leiðakerfis hjá United Airlines. „Sumarið 2026 munu viðskiptavinir okkar á Íslandi njóta enn fjölbreyttari ferðamöguleika og greiðra tenginga til yfir 50 áfangastaða í Ameríku í gegnum tengistöð okkar í Washington D.C. Þá munu bandarískir ferðalangar einnig fá fleiri möguleika til að ferðast til Íslands og upplifa náttúrufegurð landsins, þar á meðal Bláa lónið, miðnætursólina, svartar sandstrendur og fleira."

United Airlines mun fljúga daglega til og frá Keflavíkurflugvelli (KEF) til Washington Dulles International Airport (IAD) fram til 23. september. Komutími samkvæmt flugáætlun er 8:30 og brottfarartími 11:30.

Washington Dulles International Airport (IAD) er einn mikilvægasti tengiflugvöllur austurstrandar Bandaríkjanna og lykilmiðstöð fyrir millilandaflug. United Airlines er stærsta flugfélag vallarins og flýgur þaðan til yfir 50 áfangastaða innan Bandaríkjanna sem og til Mið- og Suður-Ameríku.

„Takk, meistari, þú bjóst svo sannarlega til minningar“

Thu, 21 May 2026 08:55:00 GMT

Það eru söguleg tímamót í Keflavík nú þegar Vilberg Skúlason, okkar eini sanni Villi í Pulsuvagninum, hefur skilað svuntunni eftir ríflega 46 ára starf. Fréttirnar af starfslokum hans komu flatt á marga en í kjölfarið fylgdi bylgja af hlýju, gleði og nostalgíu sem sýnir hversu stóran sess hann skipar í hjörtum Suðurnesjamanna. Frá 1. apríl 1980 til 1. maí 2026 hefur Villi verið fastur punktur í tilverunni, maðurinn sem seðjaði ekki bara hungrið heldur mætti öllum með einlægu brosi og spjalli í gegnum lúguna á Pulsuvagninum við skrúðgarðinn í Keflavík.

Villaborgarinn: Bragð æskunnar og keflvísk klassík

Fyrir okkur sem höfum alist upp á Suðurnesjum er bragðið af matnum hans Villa órjúfanlegur hluti af lífinu eins og svo berlega kemur í ljós þegar athugasemdir við mynd sem Víkurfréttir birtu af starfslokunum eru lesnar. Nanna Gísladóttir Wium orðar það vel þegar hún segir að Villaborgarar hafi hreinlega „gert æskuna svo miklu betri“. Það er nefnilega eitthvað við það hvernig Villi græjaði matinn sem enginn leikur eftir.

Brynja Eiríksdóttir kallar Villaborgarann einfaldlega „keflvíska klassík“ og Bára Skúladóttir rifjar upp hvernig Villi mundi nákvæmlega hvernig fólk vildi fá sinn mat: „Hafa bara með tómat og steiktum? Já, og enn í dag mikil tómatsósa yfir og undir.“ Jafnvel þeir sem flutt hafa til útlanda, eins og Nína Guðmarsdóttir Hansell og Óskar M Jónsson, segja að Pulsuvagninn sé alltaf fyrsta stoppið þegar komið er „heim“ í Keflavík. Einu sinni notaði keflvískur flugstjóri á Boeing „júmbó-þotu“ stutt stopp á Keflavíkurflugvelli til að skjótast niður í Keflavík til að ná sér í Villa borgara.

Sálfræðingurinn og öðlingurinn við grillið

Það sem fólk minnist þó hvað mest er fas Villa og hans einstaka jafnaðargeð í gegnum áratugina. Hjörleifur Guðmundsson hittir naglann á höfuðið þegar hann lýsir Villa og Arnóri syni hans sem nokkurs konar „sálfræðingum“ bæjarins. Villi var aldrei of upptekinn fyrir gott spjall eða smá grín.

Jón Pétursson rifjar upp dýrmæta minningu sem margir strákar úr „gamla daga“ tengja við:

„Þvílíkt jafnaðargeð sem hann sýndi okkur strákunum þegar við vorum að koma um miðjar nætur um helgar í alls konar ástandi að fá okkur einn geggjaðan Villaborgara fyrir svefn.“

Ása Pétursdottir tekur í sama streng og lýsir honum sem „algjörum demanti“ sem spyrði mann alltaf innilega hvernig maður hefði það, og annar lesandi dásamar þessa einstöku þjónustulund sem einkenndi hvern einasta vinnudag í tæpa hálfa öld.

Samheldni, vinnusemi og sögulegar rætur

Vinnusemi Villa var til eftirbreytni en hann var aldrei einn í eldlínunni. Karl Hermannsson dregur fram hve samhent hjón Villi og Gulla voru en hún vann þétt við hlið hans af miklum dugnaði í gegnum árin. Fyrir marga var Pulsuvagninn líka fyrsti skólinn á vinnumarkaðnum og segir Sigrún Guðný Halldórsdóttir að það hafi verið dásamlegt að hefja starfsferilinn hjá Villa.

Þótt Hildur Guðmundsdóttir rifji upp upphafssögu vagnsins og nefni brautryðjendur eins og Danna Þórðar (sem flutti inn upprunalega vagninn frá Danmörku) og Sigga Lú, þá eru allir á einu máli um að það var Villi sem gæddi vagninn þeirri sálu sem flestir þekkja og elska í dag.

Vagninn stendur áfram – Takk fyrir allt, Villi!

Kveðjurnar streyma inn frá öllum hornum samfélagsins. Logi Geirsson, Steinþór Jónsson, Gunnar Oddsson, Róbert Ragnarsson og fjöldamargir aðrir senda honum sínar bestu kveðjur og kalla hann „King“, „Meistara“ og „Öðling“. Kristmundur Carter orðar það einfaldast: „Takk, meistari. Þú bjóst svo sannarlega til minningar.“

Við Suðurnesjamenn þökkum Villa fyrir ógleymanlega þjónustu, óteljandi spjallstundir og mat sem bragðast eins og heima. „Nú er kominn tími til að hvíla svuntuna og njóta lífsins með fjölskyldunni. Gangi þér allt í haginn, kæri Villi!“ eru fín lokaorð.

Þótt okkar maður sé hættur að standa við pulsupottinn og borgarapönnuna er huggun harmi gegn að Pulsuvagninn heldur áfram starfsemi sinni. Inga Gústafsdóttir sem gerðist meðeigandi fyrir um tuttugu árum keypti hlut stofnandans og ætlar að reka vagninn áfram í sömu mynd og verið hefur.

Anna Hildur W Björnsdóttir til Ísland Duty Free

Thu, 21 May 2026 06:42:00 GMT

Ísland Duty Free hefur ráðið Önnu Hildi W. Björnsdóttur í stöðu framkvæmdastjóra mannauðs og menningar fyrirtækisins.

Anna Hildur hefur víðtæka reynslu og þekkingu á málaflokknum úr alþjóðlegu rekstrarumhverfi. Hún hefur síðustu ár starfað á alþjóðamarkaði, nú síðast hjá Carbon Recycling International (CRI), þar sem hún sinnti mannauðs- og menningarmálum þvert á starfsemi fyrirtækisins á Íslandi, í Danmörku, Póllandi og Kína. Þar áður starfaði hún meðal annars sem mannauðsstjóri hjá Travelshift ehf., Iceland Hotel Collection by Berjaya og sem People & Culture Business Partner hjá IKEA, þar sem hún studdi við framkvæmd mannauðsstefnu í fjölbreyttu umhverfi. Anna Hildur er með meistaragráðu í mannauðsstjórnun frá Háskóla Íslands auk meistaragráðu í sálfræði frá sama skóla.

Endurspeglar vel þá menningu sem Ísland Duty Free vill byggja upp

„Við erum svo sannarlega heppin og mjög ánægð með að fá Önnu Hildi til liðs við okkur. Hún hefur sterkan bakgrunn, frábæra alþjóðlega reynslu og áralangan feril að baki við uppbyggingu og stefnumótun mannauðsmála þvert á landamæri. Gildi Önnu Hildar og sýn á starfið tóna fullkomlega við stefnu Ísland Duty Free. Hún endurspeglar vel þá menningu sem við viljum byggja upp, sem grundvallast á trausti og fjölskylduvænu samfélagi. Hún kemur með ferskt sjónarhorn inn í heim ferðaverslunar og við erum mjög spennt að hefja þá vegferð saman,“ segir Liam Grundy, framkvæmdastjóri Ísland Duty Free.

„Það er virkilega spennandi að ganga til liðs við öflugt teymi Ísland Duty Free og taka þátt í áframhaldandi þróun fyrirtækisins á þessum tímamótum. Á mínum ferli hef ég lagt ríka áherslu á að styðja við starfsfólk og teymi í gegnum umbreytingar og ég trúi staðfastlega að mikilvægasta undirstaða alls árangurs sé að byggja upp og hlúa að gagnkvæmu trausti. Nú þegar uppbyggingin á verslun Ísland Duty Free í Leifsstöð er á lokametrunum hlakka ég mikið til að vinna með teyminu að áframhaldandi uppbyggingu á framtíðarstefnu, starfsumhverfi og menningu fyrirtækisins,“ segir Anna Hildur.

Skál fyrir fortíðinni, skál fyrir framtíðinni

Fri, 15 May 2026 06:52:00 GMT

Þetta voru fyrstu orð Steinþórs Jónssonar þegar við settumst niður með honum og eiginkonu hans, Hildi Sigurðardóttur, í tilefni af 40 ára afmæli Hótel Keflavíkur og stórhátíðarinnar Vor á Vatnsnesi sem fram fer um helgina.

Hildur tekur boltann hlæjandi:

„Já, ef þetta væri bara svona auðvelt. Steini fer alltaf beint í aðalatriðin og kemst mjög langt á því að einfalda stóru málin. Góð dæmi eru KEF SPA & Fitness og nú Vatnsnes. Hann sagði okkur fjölskyldunni einfaldlega að það væri gaman að gera spa í kjallaranum og gera svo upp húsið á móti hótelinu.

Síðan byrjaði hann bara að grafa holu í gólfið í gömlu Ofnasmiðjunni okkar og nú sjá allir sýnina hans. Við sáum hana ekki þá og hefðum eflaust stoppað hann ef þessi risaáform hefðu verið lögð fram á teikningum frá byrjun. En Steini byrjar einfaldlega og hannar hlutina jafnóðum þegar hann sér möguleikana birtast.

Sama var með Vatnsnes. Fyrir mörgum árum sendi hann bæjaryfirvöldum í Reykjanesbæ erindi um að koma að uppbyggingu hússins en því var formlega hafnað. Ef það er eitt sem minn maður kann ekki þá er það að sætta sig við nei. Hann heldur einfaldlega áfram.

Samningur við okkur var síðan gerður árið 2023 og ég held að öll bæjarstjórnin verði ánægð með að hafa skipt um skoðun þegar hún kemur að skoða framkvæmdirnar. Ég veit að bæjarbúar verða ánægðir að sjá Vatnsnes og þær miklu framkvæmdir sem þar hafa verið unnar undir stjórn Steina, í anda byggingarársins 1934,“ segir Hildur.

Steinþór er fljótur að svara þessari yfirferð Hildar og minnir hana kurteislega á að hann hafi fyrst fengið nei frá henni þegar hún var 15 ára. Nú muni þau hins vegar fagna 40 ára brúðkaupsafmæli í júní, fjórum dætrum, fjórum tengdasonum og þremur barnabörnum ríkari.

„Þetta nei hefur alltaf verið mér innblástur um að gefast aldrei upp og sú ákvörðun á sínum tíma er án efa sú besta sem ég hef tekið og grunnurinn að því sem við fögnum í dag,“ segir hann.

Auk 40 ára afmælis hótelsins varð Hildur, hótelstjórafrúin, sextug þann 11. maí síðastliðinn og því margar ástæður til að fagna hjá KEF fjölskyldunni.

Steinþór með hjólbörurnar við Hótel Keflavík aðeins viku áður en hótelið opnaði 17. maí 1986. Myndin er úr safni VF en hún birtist á baksíðu blaðsins 15. maí 1986.

„Ef við byrjum á fortíðinni, sem þið hjá Víkurfréttum hafið gert svo góð skil í þessu kosninga- og afmælisblaði, þá þótti hugmyndin um hótel í Keflavík ekki arðbær. Mörgum fannst við pabbi fullbjartsýnir þegar við opnuðum hótelið en okkur tókst að sanna hið gagnstæða.

Þegar ég hugsa til baka til 17. maí 1986 var lítið bókað en við vorum samt jákvæð og ákveðin í að fyrsta hótel svæðisins myndi ganga. Í dag er staðan allt önnur og sumarið að stórum hluta fullbókað og margar vikur þegar uppseldar.

Samt eru ákveðin teikn á lofti í heiminum. Hlutirnir breytast hratt og það höfum við upplifað af eigin raun síðustu 40 ár, t.d. þegar herinn fór, í Eyjafjallajökulsgosinu og svo auðvitað í Covid-faraldrinum sem breytti landslaginu á augabragði. Í dag eru það stríð, verkföll og efnahagsástand sem hanga yfir en öll áföll í heiminum hafa með einum eða öðrum hætti áhrif á ferðaþjónustuna.“

Á þessum tímamótum segir Steinþór jafnframt eðlilegt að horfa fram á veginn:

„Við erum sannarlega að horfa til framtíðar og fólk getur verið visst um að við erum hvergi hætt. Reynslan af bæði KEF Restaurant á sínum tíma og síðar KEF SPA hefur sýnt að þetta voru góðar hugmyndir sem hafa styrkt rekstur Hótel Keflavíkur til muna.

Ég er jafnframt sannfærður um að Vatnsneshúsið muni styrkja ímyndina og starfsemina enn frekar með fleiri gistirýmum, auknu funda- og móttökuplássi og betri aðstöðu fyrir veislur og viðburði á komandi árum.“

KEF Center

Eins og við mátti búast kom stór hugmynd fram undir lok samtalsins þegar Steinþór upplýsti að í framhaldi af kaupum þeirra hjóna á hjólbarðaverkstæðinu við Framnesveg, Olís-lóðinni og Aðalstöðinni og lóðum þar í kring hefði hann farið að horfa á framtíð Vatnsness sem eina heild og sæi þar ótrúleg tækifæri.

„Ég sá fljótt að stækkun hótelsins ein og sér og skipulag hverrar lóðar fyrir sig væri ákveðin tímaskekkja. Því ákvað ég að horfa á allt svæðið sem eina heild.

Hugmyndin vatt hratt upp á sig og síðustu tólf mánuði hef ég látið teikna allt svæðið. Ég mun kynna þessa stóru framtíðarsýn að einhverju leyti um helgina og síðar í umfjöllun Víkurfrétta með myndum og teikningum.

Í grunninn yrði Vatnsnes nýtt miðbæjarsvæði með verslun og þjónustu, 1.100 íbúðir og allt tengt glæsilegri skemmtiferðaskipahöfn annars vegar og KEF Lagoon hins vegar með fullkomnu útibaðlóni og heilsulind á heimsmælikvarða við náttúrulega kletta við sjávarsíðuna. Starfsemin yrði svo tengd KEF SPA & Fitness sem háklassa upplifun, innan- og utandyra, en KEF SPA þrefaldast að stærð auk uppbyggingar heilsulindarinnar á norðanverðu Vatnsnesinu.

Frá Vatnsnesi er eitt fallegasta útsýni landsins og nálægðin við Keflavíkurflugvöll og ferðamennina sem þar fara um er sterkur grunnur fyrir framtíðina. Styrkleiki hugmyndarinnar felst í skýrri framtíðarsýn þar sem uppbyggingin byggir á sterkum grunni og fer fram í áföngum þar sem hver eining styrkir hver aðra.

Ég vona að myndirnar og teikningarnar sýni bæjarbúum hversu öflugt samfélag við getum byggt upp og skapi trú á að Reykjanesbær geti orðið eitt flottasta og öflugasta bæjarfélag landsins. Mín draumsýn liggur allavega fyrir,” segir Steinþór að lokum.

Hildur endar viðtalið á þessum orðum:

„Þrátt fyrir allt hefur þessi vegferð verið gríðarlega skemmtileg og mótað líf fjölskyldunnar. Samstarfið við Jón og Unni, tengdaforeldra mína, í upphafi var einstakt og traustið sem þau sýndu okkur Steina gaf allri þessari miklu vinnu tilgang. Það var erfitt að taka ein við þegar þau kvöddu, því samstarf Steina og Jóns var að mínu mati einstakt. Þeir gerðu bókstaflega allt saman. Fyrst tengt Ofnasmiðjunni, svo uppbyggingu hótelsins og þess á milli voru helgarnar notaðar til að byggja bústaði við Meðalfellsvatn og endurbyggja hús fjölskyldunnar á Ólafsfirði enda báðir duglegir og miklir framkvæmdamenn alla tíð.

Ég myndi taka þennan 40 ára slag aftur alla daga og er þakklát bæjarbúum fyrir stuðninginn og velvildina sem er grundvöllur fyrir svona rekstri. Vilji okkar Steina og dætra okkar er að halda áfram að byggja upp fyrirtækið og samfélagið. Reynslan hefur kennt okkur að trúa á það sem við erum að gera og halda ótrauð áfram.“

Uppsetningu á 7,5 megavatta gervigreindarinnviðum hjá Verne í Reykjanesbæ lokið

Tue, 12 May 2026 15:29:31 GMT

Gagnaversfyrirtækið Verne og gervigreindarskýjalausnin Nscale hafa lokið fyrsta áfanga í uppsetningu á umfangsmiklum tæknibúnaði í gagnaveri Verne í Reykjanesbæ. Á aðeins þremur mánuðum tókst að koma upp 7,5 megavatta (MW) afkastagetu fyrir sérhæfða skjákortavinnslu, sem er lykilþáttur í keyrslu gervigreindarlausna.

Verkefnið markar ákveðin tímamót í starfsemi Verne á Íslandi þar sem þetta er fyrsta uppsetning fyrirtækisins hér á landi sem nýtir vökvakælingu til að mæta mikilli hitamyndun frá öflugum tölvubúnaði. Áfanginn er hluti af stærri samningi milli fyrirtækjanna tveggja um samtals 15 megavatta orkugetu, en vinna við annan áfanga er þegar hafin.

Styrmir Hafliðason, framkvæmdastjóri Verne á Íslandi, segir hraðann á uppsetningunni sýna hvað hægt sé að áorka þegar réttir samstarfsaðilar, innviðir og staðbundnar aðstæður koma saman. Alls komu yfir 75 sérfræðingar frá alþjóðlegum tæknifyrirtækjum á borð við NVIDIA, Lenovo og Vertiv að verkefninu, en innviðirnir samanstanda meðal annars af 128 tækjareknum og yfir 20 þúsund tengisnúrum.

Mikill vöxtur í útflutningstekjum

Verkefnið endurspeglar þá miklu eftirspurn sem nú ríkir eftir sjálfbærri hýsingu fyrir gervigreind og háhraðatölvuvinnslu. Ísland þykir eftirsóknarverður kostur vegna aðgangs að 100 prósent endurnýjanlegri orku og hagstæðra náttúrulegra skilyrða til kælingar.

Vöxtur greinarinnar er talsverður, en samkvæmt gögnum frá Íslandsbanka námu útflutningstekjur af fjarskipta-, tölvu- og upplýsingaþjónustu um 110 milljörðum króna árið 2025. Er það 50 prósenta aukning frá árinu áður. Spár benda til þess að hýsingarmarkaðurinn á Íslandi muni halda áfram að stækka verulega á næstu árum, en áætlað er að virði hans gæti ríflega tvöfaldast fyrir árið 2030.

Búnaðurinn sem nú hefur verið settur upp nýtir nýjustu kynslóð NVIDIA GB300 skjákorta, sem eru sérstaklega hönnuð fyrir flókna gervigreindarreikninga og auðlindafreka tölvuvinnslu.

Ferðaþjónusta á Suðurnesjum: 32% útflutningstekna og þúsundir starfa

Mon, 11 May 2026 10:30:27 GMT

Nýjustu gögn sýna að ferðaþjónusta er áfram einn af mikilvægustu máttarstólpum efnahagslífsins á Íslandi og sérstaklega á Suðurnesjum. Árið 2024 nam hlutfall greinarinnar af heildarútflutningstekjum þjóðarinnar 32% og fjöldi erlendra ferðamanna náði um 2,2 milljónum.

Sterk staða á Suðurnesjum

Ferðaþjónustan veitir fjölda fólks atvinnu á Suðurnesjum, en alls starfa um 31 þúsund manns við greinina á landinu öllu. Í Reykjanesbæ einum voru starfandi einstaklingar í ferðaþjónustu 3.773 talsins árið 2024. Til samanburðar voru 442 starfandi í greininni í Suðurnesjabæ, 242 í Grindavíkurbæ og 135 í Sveitarfélaginu Vogum. Þetta kemur fram í gögnum frá Samtökum ferðaþjónustunnar sem gefin voru út í apríl 2026.

Þegar horft er til atvinnutekna kemur í ljós að ferðaþjónusta vegur þungt í héraðinu:

Í Reykjanesbæ koma 30% atvinnutekna úr ferðaþjónustu.
Í Suðurnesjabæ er hlutfallið 22%.
Í Grindavíkurbæ er hlutfallið 15%.
Í Sveitarfélaginu Vogum er hlutfallið 13%.

Milljarðar í skatttekjur til sveitarfélaga

Umsvifin skila sér beint í vasa sveitarfélaganna í formi útsvars og fasteignaskatta. Áætlaðar skatttekjur af ferðaþjónustu árið 2024 voru hæstar í Reykjanesbæ, eða rúmlega 5,3 milljarðar króna. Suðurnesjabær áætlaði tekjur upp á 699,1 milljón króna, Grindavíkurbær 402,8 milljónir og Sveitarfélagið Vogar 169 milljónir króna.

Tímamót í Þjórsárdal - risa framkvæmd Bláa Lónsins

Thu, 07 May 2026 09:58:52 GMT

Framkvæmdir Bláa Lónsins hf. í Þjórsárdal eru stærsta fjárfestingin í íslenskri ferðaþjónustu um þessar mundir en í gær var skrifað undir sérleyfis- og lóðaleigusamninga milli íslenska ríkisins og Bláa Lónsins hf. um uppbyggingu og rekstur þjónustumiðstöðvar og annarrar atvinnustarfsemi í ferðaþjónustu í Þjórsárdal. Samningurinn er fyrsta skrefið í uppbyggingu gestastofu í mynni Þjórsárdals þar sem fjölbreytt þjónusta verður í boði fyrir ferðamenn en dalurinn er eitt merkasta náttúru- og sögusvæði Íslands, segir í tilkynningu frá Bláa Lóninu.

Samningurinn er hluti af metnaðarfullri uppbyggingu sem Bláa Lónið hf. stendur að baki í Þjórsárdal, verkefnið í heild sinni er stærsta fjárfestingin í íslenskri ferðaþjónustu um þessar mundir. Auk starfseminnar í gestastofunni vinnur félagið að uppbyggingu hágæða hótels í Rauðukömbum, Mountain Retreat og Fjallabaðanna.

Framkvæmdir eru í fullum gangi og er stefnt að því að opna fyrsta hluta starfseminnar sumarið 2027 og að öll starfsemin verði komin í rekstur vorið 2028.

„Ísland býr yfir mikilli sérstöðu og tækifærin fram á veginn liggja í upplifunar- og vellíðunarferðamennsku, við eigum fullt erindi á heimssviðið um þessar mundir. Hjá Bláa Lóninu starfar einstakur hópur starfsfólks við hönnun, vísindi og upplifun og þetta uppbyggingarverkefni er gott dæmi um þá hæfni, þá langtímasýn og það hugrekki sem einkennt hefur Bláa Lónið frá stofnun þess. Gestastofan og Fjallaböðin í Þjórsárdal munu til lengri tíma verða einn áhugaverðasti áfangastaðurinn í ferðaþjónustu á Íslandi,“ segir Sigríður Margrét Oddsdóttir, forstjóri Bláa Lónsins.

„Íslensk ferðaþjónusta er í hópi mikilvægustu útflutningsgreina landsins og skapar tekjur og störf víða um landið. Öflug ferðaþjónusta stuðlar auk þess að fjölbreyttu mannlífi, afþreyingu og þjónustu sem allir geta notið. Það er þess vegna alltaf ánægjulegt þegar einkafjárfestar ráðast í miklar fjárfestingar sem gera Ísland enn áhugaverðara og fjölbreyttara í augum ferðamanna. Uppbyggingin í Þjórsárdal er metnaðarfullt og gott dæmi um sjálfbæra nýtingu náttúruauðlinda í víðum skilningi á þessu merkilega náttúru og sögusvæði“ segir Daði Már Kristófersson, fjármála- og efnahagsráðherra.

Arion banki og Vörður opna útibú í Reykjanesbæ

Tue, 05 May 2026 09:56:09 GMT

Arion banki og Vörður opnuðu í dag nýtt útibú í Reykjanesbæ. Núverandi starfsemi Varðar í Krossmóa flyst í sameiginlegt húsnæði með Arion banka sem stendur við Aðalgötu 64 á Aðaltorgi. Svæðisstjóri er Einar Hannesson. Allt starfsfólk útibússins er búsett á svæðinu. 

Um er að ræða svokallað kjarnaútibú þar sem verður að finna fjölbreytta fjármála- og tryggingaþjónustu fyrir einstaklinga og fyrirtæki, segir í frétt frá fyrirtækjunum. Útibúið er staðsett í þjónustukjarna á fyrstu hæð og starfa þar ellefu manns til að byrja með. Opnunartími er kl. 9:00-16:00. Fólk á leið til útlanda getur keypt gjaldeyri hjá gjaldkera á opnunartíma útibúsins og eins verður þar gjaldeyrishraðbanki sem er opinn allan sólarhringinn.

„Opnunin markar viss tímamót hjá Arion banka því að við höfum ekki opnað nýtt útibú í langan tíma, svo að þetta er virkilega spennandi verkefni. Þá á Vörður sér langa sögu í Reykjanesbæ, enda höfum við verið með útibú í þessu öfluga sveitarfélagi síðan 1999. Við ætlum að láta fjármál og trygginga vinna saman og styðja við uppbyggingu og kröftugt atvinnulíf. Hér er mikil gróska og með auknum umsvifum Arion opnast ennþá fleiri tækifæri.

Við hlökkum til að taka á móti fólkinu á svæðinu og eiga góð samtöl um fjármál og tryggingar. Sjáumst á Aðaltorgi,“ segir Einar Hannesson, svæðisstjóri einstaklinga í Reykjanesbæ.

Aðgengi er einstaklega gott beint frá Reykjanesbraut og næg bílastæði verða fyrir utan útibúið.

Einar Hannesson, svæðisstjóri einstaklinga hjá Arion og Verði.

Byggir brú á milli hugmynda og framkvæmda

Sun, 26 Apr 2026 08:15:00 GMT

Þuríður H. Aradóttir Braun, starfar sem verkefnastjóri hjá Sambandi sveitarfélaga á Suðurnesjum og er jafnframt forstöðukona Markaðsstofu Reykjaness. Hún hefur víðtæka reynslu úr ferðaþjónustu, svæðisþróun og alþjóðlegu samstarfi og hefur lagt sitt af mörkum til uppbyggingar og þróunar svæðisins á undanförnum árum.

Hún er ferðamálafræðingur með þjóðfræði sem aukagrein frá Háskóla Íslands, auk þess sem hún hefur lokið námi í markaðssamskiptum og almannatengslum frá Opna háskólanum í Reykjavík og MBA gráðu frá Háskólanum í Reykjavík.

Samfélagið í forgrunni

Í starfi sínu vinnur Þuríður að þróun, markaðssetningu og uppbyggingu áfangastaðarins Reykjaness í nánu samstarfi við sveitarfélög, fyrirtæki og hagaðila á svæðinu. Þá kemur hún einnig að verkefnum Reykjanes jarðvangs bæði innanlands og á alþjóðavettvangi.

Helstu verkefnin snúa að uppbyggingu og þróun ferðaþjónustu, bæði til skemmri og lengri tíma. Þar felst meðal annars stefnumótun, verkefnastjórnun í innlendum og alþjóðlegum samstarfsverkefnum og stuðningur við atvinnulíf og samfélag, sérstaklega á tímum áskorana.

Það sem gerir starfsemina sérstaka að hennar mati er hversu nátengd hún er samfélaginu. „Við erum ekki aðeins að markaðssetja áfangastað heldur að vinna með raunverulegu fólki, fyrirtækjum og samfélögum sem eru í stöðugri þróun. Reykjanesið er kraftmikið svæði þar sem náttúra, nýsköpun og áskoranir mætast og það kallar á sveigjanleika, samvinnu og skýra sýn.“

Brú á milli hugmynda og framkvæmda

Þuríður segir sig lánsama að vinna við það sem henni finnst bæði skemmtilegt og gefandi. Hún vinnur mikið með alþjóðlegum samstarfsverkefnum sem tengjast sjálfbærni, nýsköpun og uppbyggingu samfélaga og fær þar tækifæri til að tengja Reykjanes við stærra samhengi.

Ferill hennar hefur þróast í kringum ferðaþjónustu, svæðisþróun og verkefnastjórnun þar sem hún hefur unnið með fjölbreyttum hópum fólks, bæði innanlands og erlendis. Í dag snýst hennar hlutverk að miklu leyti um að byggja brú á milli hugmynda og framkvæmda og skapa raunveruleg áhrif fyrir samfélagið.

Kraftur og samkennd á Suðurnesjum

Aðspurð um kosti þess að búa á Suðurnesjum nefnir hún fyrst og fremst samfélagið sjálft. „Það er ótrúlega magnað að tilheyra samfélagi eins og á Suðurnesjum. Hér er nálægðin við náttúruna mikil, krafturinn í samfélaginu sterkur og samkenndin áberandi. Það er stutt í allt en samt mikið rými til að vaxa, skapa og hafa áhrif.“

Mikilvægi tengslanets og sýnileika kvenna

Þuríður hefur komið að starfi FKA Suðurnesja frá upphafi og telur mikilvægt að vera hluti af vettvangi þar sem konur styðja hver aðra, deila reynslu og skapa tækifæri.

„FKA Suðurnes er öflugur vettvangur sem skapar tengingar, styður við konur í atvinnulífinu og eykur sýnileika þeirra. Slík félag skiptir miklu máli fyrir þróun samfélagsins. Öflug þátttaka kvenna í atvinnulífinu hefur bein áhrif á uppbyggingu og ímynd svæðisins og því er mikilvægt að við vinnum saman að því að efla það.“

Að hennar mati veitir FKA bæði tengslanet, innblástur og vettvang til að taka þátt í umræðu og þróun. „Það skiptir miklu máli að hafa aðgang að samfélagi kvenna sem deila svipuðum áskorunum og tækifærum.“

„Taktu pláss – ekki bíða eftir leyfi“

Að lokum leggur Þuríður áherslu á mikilvægi þess að konur treysti eigin getu og taki virkan þátt.

„Stattu með sjálfri þér og treystu því að þú eigir fullt erindi. Vertu óhrædd við að taka þátt, prófa þig áfram og gera mistök – því þannig lærirðu og vex.“

Hún bætir við að samfélagið mótist af þátttöku okkar allra:

„Oftar en ekki standa konur á bak við stór og krefjandi verkefni án þess að fá viðurkenningu – því þurfum við að breyta. Við mótum samfélagið saman með því hvernig við styðjum hver aðra.“

Og skilaboðin eru skýr:

„Taktu pláss. Ekki bíða eftir leyfi.“

Bílbót bauð í fertugsafmæli

Sat, 25 Apr 2026 06:21:00 GMT

Bílasprautunar- og réttingaverkstæðið Bílbót fagnaði fjörutíu ára afmæli í janúar sl. en fyrirtækið var stofnað af þeim bræðrum Ólafi og Halldóri Inga Sigurjónssonum og ráku þeir það til 2007 þegar frændurnir Henning Ólafsson og Rúnar Ingibergsson keyptu það af þeim og hafa rekið síðan.

„Við erum elsta starfandi fyrirtæki í þessum geira á Suðurnesjum og örugglega eitt það elsta á landinu. Reksturinn gengur vel en auðvitað hefur stundum verið mótvindur á þessum fjórum áratugum en hér erum við enn og hvergi nærri hættir,“ sögðu þeir félagar Henning og Rúnar en þeir buðu ásamt konum sínum, þeim Sólveigu Skjaldardóttur og Sigríði Ölmu Ómarsdóttur til afmælisveislu síðasta föstudag í tilefni þessa stóra áfanga.

Bílbót hefur alla tíð verið að Bolafæti 3, er í dag í 600 fm verkstæðishúsnæði og hefur farið í gegnum þrjár stækkanir á þessum fjörutíu árum, síðast árið 2018, þar sem 200 fm viðbygging var byggð aftan við húsið en þar fara bílrúðuskipti fram. „Við settum þar líka inn nýjan málningarklefa sem er bylting frá því sem var áður en þessi nýi er hitaður með vatni í stað olíu sem var orkugjafinn áður og er með fullkomnustu síun á lofti sem er í boði í dag sem gerir það að verkum að það er sama og engin mengun af málun hjá okkur,“ segja þeir frændur og aðspurðir um hvort frekari stækkun á húsnæði liggi fyrir svöruðu þeir því að það stæði ekki til.

Ein skemmtileg staðreynd í söguni er að á þessum tæpu 40 árum sem hafa einungis 19 starfsmenn unnið hjá Bílbót að frátöldum eigendum sem er ótrúlega lítil starfsmannavelta á þessum langa tíma.

Á annað hundrað manns mættu og samfögnuðu eigendum á þessum merku tímamótum í sögu fyrirtækisins og gerðu sér glaðan dag undir ljúfum tónum tónlistardúetts sem gerði garðinn frægan undir merkjum Sóldaggar á árum áður.

Hér að neðan má sjá myndir úr afmælisfjörinu hjá Bílbót.

Langbest fagnar 40 ára afmæli með nýjungum

Wed, 22 Apr 2026 11:02:03 GMT

„Er ekki tilvalið að bjóða upp á nýjungar á svona stórum tímamótum. Við vonum að þær falli í kramið hjá viðskiptavinum okkar en við erum að gera mjög spennandi breytingar og nýjungar á matseðlinum okkar sem við tökum í gagnið á sumardaginn fyrsta,“ segir Ingólfur Karlsson, eigandi veitingastaðarins Langbest sem fagnar 40 ára afmæli á þessu ári.

Langbest opnaði á Hafnargötu 62 árið 1986. Matseðill veitingastaðarins hefur verið nánast óbreyttur frá upphafi þar sem aðaláhersla hefur verið lögð á pizzur og létta grillrétti í skyndibitastíl. Eftir að Langbest flutti alla starfsemi sína á Aðaltorg í Reykjanesbæ var tekin upp borðaþjónusta sem hefur kallað á breyttar áherslur í matargerð. „Nú ætlum við að svara því kalli og m.a. bjóða upp á nýja og spennandi „bistró“ rétti sem allir eru handgerðir úr íslensku hráefni í hæsta gæðaflokki. Við munum þó halda áfram að bjóða uppá pizzur og bernaise ásamt okkar geysivinsæla kjúklingasalati sem við höfum reyndar breytt lítillega,“ segir Ingólfur en hann og Helena Guðjónsdóttir, kona hans hafa staðið í brúnni í tæpa þrjá áratugi.

„Þegar við fluttum á Aðaltorg frá Ásbrú fyrir þremur árum vildum við gera einhverjar nýjungar á matseðlinum en ákváðum að fresta því til að einbeita okkur að því sem þurfti að gera við það að byggja nýjan veitingastað á nýjum stað. Við fengum til okkar matreiðslumanninn Kristófer Hugason sem hefur verið í framlínu á nokkrum þekktum veitingastöðum á höfuðborgarsvæðinu og í sameiningu höfum við útbúið marga nýja rétti sem verða á matseðlinum. Við höldum okkar pizzumatseðli og kjúklingasalatinu vinsæla að ógleymdri bernaise-sósunni okkar sem við höfum alltaf lagt mikla vinnu í.“

Meðal nýjunga að sögn Ingólfs verða sex nýir og mjög girnilegir smáréttir og margt fleira. „Við munum bjóða upp á nýja útfærslu á hamborgurum sem verða veglegri en áður, „fiskur og franskar“ verða einnig með breyttu lagi, þorskur í bjórdeigi og alvöru tartarsósa. Þá munum við í fyrsta skipti bjóða upp á lúðu sem mig grunar að verði vinsæl. Nýjar gerðir af Ribey nautasteikum og lambasteikum verða í mjög skemmtilegri útfærslu, sérstaklega hugsaðar til að deila. Svo munum við bjóða upp á æðislega kjötsúpu á nýja matseðlinum. Þetta eru áskoranir fyrir okkur að fara í svona breytingar og nýjungar en við gerum alla okkar rétti frá grunni úr íslensku gæða hráefni. Til að undirstrika að gera eitthvað frá grunni má nefna að við verðum með nýjar franskar kartöflur sem við gerum frá grunni og eftir að hafa boðið nokkrum í smakk er ég bjartsýnn á að viðbrögðin við þeim verði mjög góð.“

Ingólfur segir að á síðustu árum hafi það aukist að hópar hafi komið. Til að mæta því verði boðið upp á sérstaka hópa matseðla. „Þetta eru nokkur þúsund manns á undanförnum árum og alltaf að verða vinsælla að hvers kyns hópar og klúbbar vilji koma og eiga góða stund í mat og drykk.“

„Með þessum breytingum á þessum stóru tímamótum mun gæðastaðall veitingastaðarins hækka. Við verðum aðeins fínni en þó áfram á viðráðanlegu verði. Aðalatriðið er að við munum áfram leggja ást og alúð í þetta,“ segir Ingólfur.

Á myndunum eru nokkrir af nýjum réttum á matseðli Langbest sem tekur gildi á sumardaginn fyrsta. VF/myndir: Hilmar Bragi

Kaupfélag Suðurnesja hagnast um 1,1 milljarð: Meðal stærstu hluthafa í Dröngum

Thu, 16 Apr 2026 11:32:20 GMT

Aðalfundur Kaupfélags Suðurnesja (KSK) var haldinn þann 19. mars síðastliðinn í húsakynnum félagsins að Krossmóa 4a. Fundurinn markar tímamót í sögu félagsins sem fagnaði 80 ára afmæli á síðasta ári, en hlutverk þess hefur verið endurskilgreint eftir sölu á hlutabréfum í Samkaupum.

Fundurinn var vel sóttur en rétt til setu hafa 60 fulltrúar sem kjörnir eru á fundum sex deilda félagsins. Eysteinn Eyjólfsson var fundarstjóri og Guðbjörg Ingimundardóttir fundarritari.

Hagnaður og breytt eignasafn

Sigurbjörn Gunnarsson, formaður stjórnar, flutti skýrslu þar sem fram kom að hagnaður ársins 2025 nam 1,1 milljarði króna. Þessi mikli hagnaður skýrist einkum af söluhagnaði hlutabréfa í Samkaupum, en hluturinn var seldur í skiptum fyrir hlut í Dröngum hf. Við þessi skipti varð KSK næststærsti hluthafi Dranga, sem eiga og reka fyrirtæki á borð við Orkuna, Löður og Lyfjaval.

Bókfært eigið fé kaupfélagsins nam 8,4 milljörðum króna í lok árs 2025. Dótturfélagið KSK eignir ehf., sem á á fjórða tug fasteigna, þar á meðal verslunarmiðstöðina við Krossmóa, skilaði sömuleiðis góðri afkomu eða um 85 milljónum króna í hagnað.

Tæplega 7.000 félagsmenn

Félagsmönnum fækkaði um 150 á milli ára og eru þeir nú tæplega 7.000 talsins. Skýrist fækkunin aðallega af aðstæðum í Grindavíkurdeild félagsins. Þótt KSK eigi ekki lengur beinan hlut í verslunarrekstri munu félagsmenn áfram njóta sérstakra kjara í verslunum Samkaupa samkvæmt samkomulagi þar um.

Á starfsárinu hélt stjórnin 16 fundi þar sem ný stefna félagsins var mótuð. Framvegis vill félagið vera traustur og sýnilegur þátttakandi í atvinnulífi á Suðurnesjum og öflugur bakhjarl samfélagsins. Sem dæmi um samfélagslegan stuðning var Velferðarsjóði Suðurnesja veittur einnar milljónar króna styrkur á sl. ári.

Breytingar á stjórn eftir 37 ár

Mikil tímamót urðu við stjórnarkjör þar sem Guðbjörg Ingimundardóttir gaf ekki kost á sér til áframhaldandi setu. Hún sat í stjórn félagsins í 37 ár og voru henni færðar þakkir fyrir ómetanlegt starf. Halldóra G. Jónsdóttir kom ný inn í varastjórn félagsins.

Stjórn KSK er skipuð þannig:

Formaður: Sigurbjörn Gunnarsson
Varaformaður: Eysteinn Eyjólfsson
Ritari: Inga Brynja Magnúsdóttir
Meðstjórnendur: Garðar Newman og Anna Birgitta Geirfinnsdóttir
Varastjórn: Jóngeir H. Hlinason, Andri Freyr Stefánsson og Halldóra G. Jónsdóttir.

Garðar Newman, fulltrúi KSK í stjórn Dranga, og Brynjar Steinarsson, framkvæmdastjóri KSK eigna, fluttu einnig fundarmönnum yfirlit yfir uppbyggingarstarf og framtíðarhorfur í rekstri þessara félaga.

Pólskt dótturfélag Royal Iceland hlýtur eftirsótta viðurkenningu

Thu, 16 Apr 2026 06:58:00 GMT

Dótturfélag íslenska sjávarútvegsfyrirtækisins Royal Iceland í Póllandi hlaut nýverið hina virtu viðurkenningu „Forbes’ Diamond“ fyrir framúrskarandi rekstur. Félagið er stórleikari á evrópskum markaði en afurðir þess rata á sushi-staði um alla álfuna.

Viðurkenningin þykir talsverður heiður í pólsku viðskiptalífi. Hún er að mörgu leyti sambærileg við viðurkenningu CreditInfo á Íslandi, þar sem fyrirtæki eru útnefnd „Fyrirmyndarfyrirtæki“ byggt á ströngum rekstrarlegum skilyrðum og fjárhagslegum styrk.

Einstakur árangur á erfiðum markaði

Þótt samlíkingin við íslensku fyrirmyndarfyrirtækin sé til staðar, er pólska útgáfan sýnu strangari. Aðeins um 0,3% fyrirtækja í Póllandi hljóta Forbes-demantinn hverju sinni, sem er mun lægra hlutfall en þekkist hér á landi. Þessi árangur undirstrikar sterka stöðu og heilbrigðan rekstur dótturfélagsins á samkeppnismiðuðum markaði.

Sushi fyrir alla Evrópu

Starfsemi félagsins í Póllandi er umfangsmikil en þar eru framleiddar hágæða sjávarafurðir sem sérstaklega eru hannaðar fyrir sushi-markaðinn. Afurðirnar eru seldar til veitingastaða og heildsala um alla Evrópu og spila þannig mikilvægt hlutverk í útflutningskeðju Royal Iceland.

Wojciech Bondera, framkvæmdastjóri pólska félagsins, veitti verðlaununum viðtöku fyrir hönd fyrirtækisins við hátíðlega athöfn nýverið.

Metfjöldi umsókna í sumarstörf Bláa Lónsins

Tue, 14 Apr 2026 09:41:26 GMT

Gífurlegur áhugi er á sumarstörfum hjá Bláa Lóninu hf. í ár en ríflega 7.500 umsóknir bárust um 200 störf sem ráðið verður í fyrir komandi sumar hjá félaginu. Þetta er mesti fjöldi umsókna sem fyrirtækið hefur fengið til þessa og ríflega þreföldun frá því sem áður hefur verið.

Hjá Bláa Lóninu hf. og dótturfélögum þess starfa um 850 starfsmenn bæði hérlendis og erlendis. Innan Bláa Lónsins eru fjölbreytt störf í þjónustu, upplifun, framleiðslu, hönnun, vísindarannsóknum, tækni og stjórnun. Starfsfólk Bláa Lónsins er með ólíkan bakgrunn, menntun, færni og reynslu. Lögð er áhersla á sterka liðsheild þar sem starfsfólk fær þjálfun, ábyrgð og tækifæri til að þróast í starfi. Mikill áhugi á störfum endurspeglar mikilvægi ferðaþjónustu sem atvinnugreinar fyrir ungt fólk og þau fjölbreyttu tækifæri sem þar bjóðast.

„Það er afar ánægjulegt að sjá þennan mikla áhuga á störfum hjá okkur. Við leggjum ríka áherslu á að skapa aðstæður þar sem fólk fær tækifæri til að blómstra í starfi og þróa hæfileika sína“ segir Sigrún Halldórsdóttir, framkvæmdastjóri mannauðs, menningar og vellíðunar hjá Bláa Lóninu.

Bláa Lónið hefur hlotið alþjóðlegar viðurkenningar sem framúrskarandi vinnustaður, þar á meðal European og Global Inspiring Workplaces Awards árið 2025, auk viðurkenninga á borð við Vinnustaður í fremstu röð frá Moodup. Bláa Lónið var einnig valið Menntafyrirtæki atvinnulífsins árið 2023

Áhugi á sumarstörfum endurspeglar ekki aðeins sterka stöðu Bláa Lónsins sem vinnustaðar heldur einnig mikilvægi upplifunarferðaþjónustu sem atvinnugreinar sem býður upp á fjölbreytt og spennandi tækifæri.

Sigrún Halldórsdóttir, framkvæmdastjóri mannauðs, menningar og vellíðunar hjá Bláa Lóninu.

Flugvélaverkfræðingur og hönnuður rannsakar hringrásarmöguleika í Græna iðngarðinum

Sat, 11 Apr 2026 07:02:00 GMT

Óðinn Finnsson Bell, starfsnemi hjá Græna iðngarðinum (IEBP), vinnur nú að því að kortleggja auðlindir svæðisins með það að markmiði að hámarka endurnýtingu og sjálfbærni.

Græni iðngarðurinn (Iceland Eco-Business Park) hefur kynnt nýjasta liðsmann sinn, Óðin Finnsson Bell, sem er nú hálfnaður í starfsnámi hjá fyrirtækinu. Óðinn fetar óvenjulega en spennandi braut, en hann er bresk-íslenskur hringrásarhönnuður með bakgrunn í flugvélaverkfræði.

Brú á milli tækni og sköpunar

Starfsnámið er liður í MA-námi Óðins í Hönnun og nýju umhverfi (Design and New Environments) við Listaháskóla Íslands. Þar nýtir hann tæknilega þekkingu sína úr verkfræðinni til að takast á við skapandi úrlausnarefni í grænu iðnaðarumhverfi.

Helstu verkefni Óðins hjá IEBP snúa að:

Kortlagningu efnisstrauma: Greining á því hvaða efni og aukaafurðir falla til á svæðinu.
Gerð efnisvegabréfa: Þróun á svokölluðum „Material Passports“ sem halda utan um uppruna og umhverfisáhrif efna til að auðvelda endurnotkun.
Skapandi endurvinnslu: Rannsóknir á því hvernig má breyta „úrgangi“ í verðmæta nýsköpun.

„Við erum mjög ánægð með að hafa Óðin með okkur. Það er dýrmætt að sjá hvernig hugmyndir hans og nálgun geta opnað nýjar leiðir í hringrásarhönnun hjá okkur,“ segir í tilkynningu frá Græna iðngarðinum.

Hringrásarhugsun í verki

Verkefni Óðins eru mikilvægur hlekkur í framtíðarsýn Græna iðngarðsins, þar sem áhersla er lögð á að ekkert fari til spillis. Með því að hanna ferla þar sem auðlindir nýtast aftur og aftur, stígur iðngarðurinn mikilvæg skref í átt að kolefnishlutleysi og raunverulegu hringrásarhagkerfi.

Samkaup eykur hlut sinn í Kjötkompaní og styrkir samstarfið enn frekar

Fri, 03 Apr 2026 12:42:00 GMT

Samkaup hefur aukið eignarhlut sinn í Kjötkompaníinu upp í 48%, samkvæmt tilkynningu frá félaginu. Í október sl. sendu félögin út tilkynningu þar sem fram koma að Samkaup hafi keypt 38% hlut í Kjötkompaní og síðan þá hefur samstarfið gengið vel og skapað enn frekari vilja til að fjárfesta í samstarfinu. Markmið Samkaup er að einfalda líf viðskiptavina með fjölbreyttu og aðgengilegu vöruúrvali. Þannig eykur samstarfið sérstöðu Samkaupa enn frekar með því að bjóða gott úrval kjötvara og meðlætis sem Kjötkompaní og Matbúrið hafa að bjóða.

Jón Örn Stefánsson, matreiðslumeistari og eigandi Kjötkompanís fagnar þessu skrefi. „Sérstaka okkar er í kjöti og með þessu sjáum við tækifæri til að dýpka samstarfið enn frekar og vinna náið með vöruflokkastjórum, verslunarstjórum og kjötstarfsmönnum í verslunum. Við sjáum mikil samlegðaráhrif við að þjónusta matarþarfir viðskiptavina.

Samkaup rekur 65 verslanir um land allt undir vörumerkjunum Nettó, Kjörbúðin og Krambúðin. Stefnt er að því að breikka vöruúrvalið frá Kjötkompaníinu í verslunum en áfram verður lögð áhersla á vörur undir merkjum Matarbúrsins, sem sérhæfir sig í þróun tilbúinna rétta.

„Það er styrkur fyrir okkur að fá Kjötkompaní í enn frekara samstarf. Þekking þeirra og reynsla í kjöti mun gera okkur kleift að þjónusta viðskiptavini enn frekar með gæða úrvali fyrir grillsumarið sem framundan er. Reynslan þeirra er mikil og samstarfið styrkir vegferðina að bæta upplifun og þjónustu í verslunum. Við hlökkum til að kynna vörurnar betur fyrir viðskiptavinum“ Segir Auður Daníelsdóttir, forstjóri Samkaupa.

Samkaup hf. er vaxandi verslunarfyrirtæki á dagvörumarkaði sem rekur yfir 60 verslanir um allt land m.a. undir merkjum Nettó og Prís. Samkaup er dótturfélag Dranga hf. sem er móðurfélag framsækinna fyrirtækja á neytendamarkaði. Systurfélög Samkaupa eru Orkan og Lyfjaval.

Köfunarþjónustan og Köfunarþjónusta Sigurðar sameinast

Thu, 02 Apr 2026 09:32:49 GMT

Miklar breytingar hafa átt sér stað á markaði köfunarþjónustu hér á landi, en tilkynnt hefur verið um sameiningu tveggja rótgróinna fyrirtækja. Köfunarþjónustan ehf. og Köfunarþjónusta Sigurðar munu héðan í frá starfa undir merkjum Köfunarþjónustunnar ehf.

Sameiningunni er ætlað að búa til öflugra félag með víðtækari þekkingargrunn og meiri tækjabúnað til að sinna vaxandi verkefnum í haftengdri starfsemi.

Reynsla og sérhæfing undir einn hatt

Bæði fyrirtækin búa yfir langri sögu:

Köfunarþjónustan hefur um árabil sinnt fjölbreyttum verkefnum fyrir orkufyrirtæki, sveitarfélög, hafnir og sjávarútveginn.
Köfunarþjónusta Sigurðar hefur byggt upp sterkt orðspor, sérstaklega á sviði sérhæfðra köfunarverkefna.

Með samrunanum flyst starfsemin undir eina stjórn og verður framvegis hýst í höfuðstöðvum Köfunarþjónustunnar í Hafnarfirði.

Sigurður Örn verður verkefnastjóri

Sigurður Örn Stefánsson, eigandi Köfunarþjónustu Sigurðar, mun ekki láta af störfum heldur taka við lykilhlutverki sem verkefnastjóri hjá hinu sameinaða félagi. Hann mun ganga til liðs við stjórnendateymið og nýta reynslu sína við daglega þjónustu og framkvæmd verkefna.

Starfsmannateymi Köfunarþjónustu Sigurðar sameinaðist liði Köfunarþjónustunnar þann 1. apríl sl.

„Samruninn er hluti af markvissri uppbyggingu Köfunarþjónustunnar og styður við langtímastefnu um vöxt og aukin umsvif um land allt,“ segir í tilkynningu félagsins.

Aukinn slagkraftur fyrir viðskiptavini

Fyrirtækið leggur áherslu á að viðskiptavinir muni njóta góðs af auknum slagkrafti og breiðara baklandi. Með því að sameina kraftana á einn stað er stefnt að því að mæta kröfum markaðarins um enn meiri fagmennsku og hagkvæmni í rekstri.

Mikið úrval bifreiða frá traustum aðilum

Thu, 02 Apr 2026 06:10:00 GMT

„Það er óhætt að segja að þróunin sé hröð í bílaheiminum. Landsmenn hafa tekið henni vel og við erum heppin að vera með fjölbreytt úrval af bílum frá traustum aðilum. Við erum með allar gerðir frá Suzuki-umboðinu og VATT og það hefur gengið mjög vel,“ segir Kjartan Steinarsson, bílasali hjá KSteinarsson í Reykjanesbæ.

Kjartan segir að það sé góð tilbreyting að geta boðið meira úrval af öðrum bílategundum en fólksbílum en sala á BYD-bílum hefur verið frábær en KSteinarsson hóf sölu á þeim fyrir rúmu ári síðan þegar breytingar urðu á högum bílasölunnar.

Árangursríkt samstarf

„Við höfðum verið í áralöngu samstarfi við Suzuki bíla og selt samnefnda bíla í langan tíma. Í rafbílavæðingunni hefur fyrirtækið bætt við sig fjölda gerða bíltegunda sem hafa fengið mjög góðar móttökur. Núna getum við boðið upp á fleiri tegundir fólksbíla en líka úrval sendibíla og pallbíla. Og það verður að segjast eins og er að það er mjög hagstætt verð á þessum bílum í dag,“ segir Kjartan sem hefur starfað sem bílasali í nærri fjóra áratugi en hann hóf störf sem bílasali árið 1989.

Tveir stærstu í heiminum

Hann segir að um sé að ræða tvo af stærstu rafbílaframleiðendum heims sem starfi í fjölda landa. Maxus-bílarnir eru þar á meðal en það er dótturfélag SAIC Motor, eins stærsta bílaframleiðanda Kína. Vörumerkið er þekkt fyrir nýstárlega tækni og fjölbreytt úrval af borgarjeppum, pallbílum og sendibílum sem seldir eru í 42 löndum. Þá sé SAIC-samstæðan í nánu samstarfi við alþjóðleg merki á borð við Volkswagen og General Motors.

Spennandi og áhugaverðir tímar í bílageiranum

„Við bílasalar eigum í fullu fangi með að fylgjast með örri og spennandi þróun í rafbílunum. Það er ótrúlegt hvað þetta gerist hratt. Breytingarnar eru miklar í bílageiranum. Nýjar rafhlöður og hleðslustöðvar hafa þróast hratt og verða sífellt öflugri. En þetta er spennandi og skemmtilegt,“ segir bílasalinn til tæpra fjörutíu ára.

KYNNING.

„Það er mjög hagstætt verð á þessum bílum í dag,“ segir Kjartan bílasali.

Bílamerkin hjá KSteinarsson

SUZUKI

Suzuki bílar hf. í Skeifunni hafa verið traust umboð á Íslandi í tæp 40 ár. Fyrirtækið sérhæfir sig í sölu og þjónustu á Suzuki bifreiðum, mótorhjólum og fjórhjólum, auk varahluta. Suzuki leggur ríka áherslu á persónulega og faglega þjónustu og er nú einnig viðurkenndur sölu- og þjónustuaðili fyrir rafmagnsbíla frá JAC.

VATT

Vatt ehf. sérhæfir sig í sölu og þjónustu á rafknúnum bifreiðum með áherslu á góða þjónustu á öllum sviðum. Fyrirtækið er umboðsaðili fyrir BYD, stærsta rafbílamerki heims, sem býður upp á breiða og vandaða línu fólksbíla. Þá selur Vatt einnig rafsendi- og pallbíla frá Maxus, sem er hluti af SAIC-samstæðunni.

BYD

BYD er alþjóðlegt hátæknifyrirtæki og stærsti rafbílaframleiðandi heims. Frá stofnun árið 1995 hefur fyrirtækið byggt upp mikla sérþekkingu á rafhlöðum og sjálfbærum orkulausnum. BYD starfar í yfir 70 löndum og leggur áherslu á núlllosun, en fyrirtækið var meðal þeirra fyrstu í heiminum til að framleiða eina milljón rafknúinna fólksbíla.

MAXUS

Maxus er dótturfélag SAIC Motor, eins stærsta bílaframleiðanda Kína. Vörumerkið er þekkt fyrir nýstárlega tækni og fjölbreytt úrval af borgarjeppum, pallbílum og sendibílum sem seldir eru í 42 löndum. SAIC-samstæðan er í fararbroddi í bílaframleiðslu og á í nánu samstarfi við alþjóðleg merki á borð við Volkswagen og General Motors.

JAC

JAC Motors var stofnað árið 1964 og er í dag öflugt tæknifyrirtæki sem hannar og þróar fólksbíla, vélar og rafdrif. Fyrirtækið er einn stærsti framleiðandi rafbíla í heiminum, með yfir 33.000 starfsmenn og starfsemi í 130 löndum. JAC selur yfir 1,4 milljónir ökutækja árlega og er frumkvöðull á sviði rafvæðingar.

Bílapunkturinn valinn Fyrirmyndarfyrirtæki hjá Nemendastofu atvinnulífsins

Sun, 29 Mar 2026 08:48:00 GMT

Bílapunkturinn í Reykjanesbæ hlaut viðurkenningu sem Fyrirmyndarfyrirtæki Nemendastofu atvinnulífsins fyrir framúrskarandi árangur í þjálfun og fræðslu nýliða í vinnustaðanámi. Verðlaunin voru afhent við hátíðlega athöfn þar sem forseti Íslands veitti viðurkenninguna.

Valið fór fram úr hópi um 1.400 fyrirtækja víðs vegar af landinu, þar á meðal stórum og rótgrónum fyrirtækjum á borð við Össur, Marel og fleiri. Bílapunkturinn er jafnframt fyrsta fyrirtækið á Suðurnesjum til að hljóta þessa viðurkenningu.

Viðurkenningin er veitt fyrirtækjum sem skara fram úr í móttöku, þjálfun og uppbyggingu nýrra starfsmanna og leggja sérstaka áherslu á fræðslu og fagmennsku í starfsumhverfi sínu.

Aðstandendur Bílapunktsins segja viðurkenninguna vera mikinn heiður og hvatningu til áframhaldandi uppbyggingar. Viðurkenningin marki mikilvægan áfanga í starfsemi Bílapunktsins og undirstriki þann metnað sem lagður er í fagmennsku og uppbyggingu og endurmenntun starfsfólks. „Við erum afar stolt af þessari viðurkenningu. Hún staðfestir mikilvægi þess að leggja áherslu á góða þjálfun, fræðslu og stuðning við nýtt fólk í greininni,“ segir í tilkynningu frá fyrirtækinu.

Bílapunkturinn var stofnaður árið 2016 og er staðsettur í Grófinni 7, Reykjanesbæ. Eigandi er Valdimar Jón Sveinsson. Bílapunkturinn gerir tjónaskoðanir og viðgerðir fyrir öll tryggingarfélög sem og fyrir einstaklinga og fyrirtæki. Starfsmenn eru átta talsins.

Íslandshús fékk Nýsköpunarverðlaunin á Verk og vit

Sat, 28 Mar 2026 06:30:00 GMT

Fyrirtækið Íslandshús á Ásbrú fékk Nýsköpunarverðlaunin á sýningunni Verk og vit í Laugardalshöllinni um síðustu helgi fyrir framúrskarandi og hagnýtar lausnir í mannvirkjagerð. „Nýsköpun er hjartað í starfsemi Íslandshúss og það er því mikill heiður fyrir okkur að hafa fengið þessi verðlaun,“ segir Brynjar Húnfjörð framkvæmdastjóri fyrirtækisins en því hefur vaxið fiskur um hrygg á undanförnum árum og framleiðsla aukist með stöðugum nýjungum.

Íslandshús er fjölskyldufyrirtæki. Feðgarnir Brynjar og Óskar Húnfjörð reka það og eru eigendur en Óskar og Brynja Sif kona hans, sem eru bæði byggingafræðingar, stofnuðu það árið 2012. Fyrirtækið komst þá í fréttir þegar fyrsta framleiðsla þess, Dvergarnir, gerð úr afgangssteypu, kom á markaðinn. Dvergarnir voru ný hönnun á stólpum undir margs konar hýsi en þeir geta gegnt fleiri hlutverkum eins og margar af framleiðsluvörum fyrirtækisins sem hefur fjölgað ört á undanförnum árum.

Feðgar á ferð

„Þegar ég tók við sem framkvæmdastjóri fyrir ári síðan var ákveðið að pabbi myndi einbeita sér að nýsköpun. Hann hefur frá stofnun hannað allar okkar vörur og það hefur alltaf verið okkar markmið að koma á markað hágæðavörum sem hafa góða endingu, mikið notagildi og eru hentugar fyrir okkar viðskiptavini. Þess vegna eru kjörorð okkar „Við framleiðum lausnir“, segir Brynjar en auk þess að kynna vörur fyrirtækisins á sýningunni hafi heimasíða þess verið endurnýjuð og bætt. Þar er nú hægt að skoða megnið af framleiðslunni í þrívíddarmyndum sem er mikil framför og nýjung.

Brynjar segir að á Verk og Vit 2026 hafi þau sett fókusinn á sveitarfélög sem eru mikilvægir viðskiptavinir Íslandshúsa. „Við sýndum meðal annars nýjustu vörur okkar eins og Ljósálfinn, sérhannaðan ljósastólpa sem þolir íslenska veðráttu og skiltafestingakerfi úr ryðfríu stáli. Aðalstjarnan okkar á sýningunni var þó forsteypt hraðahindrun. Þetta er verkefni sem hefur tekið tvö ár í hönnun og markmiðið var að bæta líftíma, flýta framkvæmdartíma og minnka viðhald. Útkoman yrði meiri hagkvæmni og raunverulegur sparnaður fyrir sveitarfélög. Íslandshús eru því að móta ný viðmið í gerð hraðahindrana á Íslandi. Ljóst er af viðbrögðum sýningargesta að vel tókst til og við hlökkum til að vegfarendur fái að upplifa öryggi án óþæginda,“ bætir Brynjar við en hann segir að Verk og Vit hafi ávallt verið frábær vettvangur fyrir Íslandshús til að sýna vörur þess og eiga samtal við núverandi og nýja viðskiptavini í skemmtilegu umhverfi.

„Það er ánægjulegt að sjá metnað sýnenda verða meiri með ári hverju og það gagnast öllum þegar sýningin í heild er eins flott og vel heppnuð eins og raun ber vitni.“

Stuðst við kröfur Vegagerðarinnar í Noregi og á Íslandi

Óskar Húnfjörð segir að hugmyndavinna við forsteyptu hraðahindrunina hafi staðið yfir í tvö ár en þessi nýjung hjá fyrirtækinu fékk mikla athygli á sýningunni í Laugardalshöll. Íslandshús var með stóran og veglegan sýningarbás þar sem framleiðsluvörurnar nutu sín vel. Yfir básnum voru síðan stafrænir risaskjáir þar sem myndefni rúllaði í gegn allan sýningartímann.

Hraðahindrunin er forsteypt, gerð úr hágæðasteypu sem er lituð með rauðum lit. Hún er með 50 cm innkeyrsluflöt og bungu sem er 400 cm löng og 10 cm há. Við hönnun eininganna var stuðst við handbók norsku Vegagerðarinnar og handbók íslensku Vegagerðarinnar um yfirborðsmerkingu vega. Í hraðahindruninni eru tveir innsteyptir ferningar, framleiddir úr hvítri ofursteypu með ísettu glerkurli til að ná endurskinsáhrifum en rauði liturinn er einnig hugsaður svo hindrunin sé sýnilegri.

„Hraðahindranir hafa verið margs konar hér landi og hafa reynst misvel. Við teljum okkur vera komna með lausn sem henti vel á Íslandi og uppfylli flestar kröfur eins og lengri líftíma, framkvæmdahraða og minna viðhald. Hún vakti mikla athygli og við höfum fengið mikið af fyrirspurnum,“ segir Óskar.

Samstarfsaðilar fyrirtækisins í hönnun hraðahindrunarinnar eru Hnit verkfræðistofa, Reykjanesbær og Reykjavíkurborg. Þá hefur Íslandshús fengið styrki í tvígang frá Uppbyggingarsjóði Suðurnesja.

Ljósálfarnir standa sig vel

Ljósálfar eru hluti af framleiðslu fyrirtækisins og standa m.a. vaktina á strandleiðinni í Reykjanesbæ. Þeir eru ljósastólpar sem eru sérstaklega hannaðir með þarfir sveitarfélaga í huga. Þeir eru sterkbyggðir, búnir Led ljósabúnaði og vernda umhverfið gegn ljósmengun.

„Þetta hefur verið skemmtilegt þróunarverkefni með Reykjanesbæ og er enn í gangi. Við höfum verið að þróa nýjungar í Ljósálfunum sem m.a. tengjast merkingum á þeim og fleira,“ segir Óskar.

Íslandshús hlaut Nýsköpunarverðlaunin fyrir framúrskarandi og hagnýtar lausnir í mannvirkjagerð. Mat dómnefndar var að lausnir fyrirtækisins einkenndust af aukinni endingu, sveigjanleika og hagkvæmni í rekstri og viðhaldi.

Feðgarnir Brynjar og Óskar Húnfjörð.

Sýningarbásinn var veglegur og vakti verðskuldaða athygli.

Hagnaður Isavia rúmir 3,4 milljarðar þrátt fyrir krefjandi ár

Fri, 20 Mar 2026 15:33:00 GMT

Rekstrarafkoma Isavia (EBITDA) nam 12,2 milljörðum króna árið 2025 og eykst um 1,5 milljarða á milli ára. Þrátt fyrir tekjusamdrátt og brotthvarf flugfélagsins Play segir fjármálastjóri Isavia afkomuna vera góða miðað við aðstæður.

Heildarhagnaður Isavia-samstæðunnar eftir skatta nam tæpum 3,4 milljörðum króna á síðasta ári, samanborið við 5,2 milljarða árið 2024. Þótt rekstrarhagnaður fyrir afskriftir (EBITDA) hafi hækkað, þá höfðu neikvæð gengisáhrif og lægri rekstrartekjur áhrif á heildarniðurstöðuna.

Helstu niðurstöður ársins 2025:

Tekjur: 49,3 milljarðar króna (lækkuðu um 2,7 milljarða).
EBITDA: 12,2 milljarðar króna (jókst um 1,5 milljarða).
Fjárfestingar: 12,6 milljarðar króna (drógust saman úr 18 milljörðum).
Eiginfjárhlutfall: 43,4% við lok árs.

Brotthvarf Play og fækkun farþega

Um 8,2 milljónir farþega fóru um Keflavíkurflugvöll á árinu, sem er 2% fækkun frá fyrra ári. Ingibjörg Arnarsdóttir, framkvæmdastjóri fjármála hjá Isavia, segir að félagið hafi verið viðbúið ákveðnum sveiflum.

„Það er ljóst að brotthvarf Play í lok september hafði áhrif á rekstur Isavia,“ segir Ingibjörg. „Það má því segja að við á Keflavíkurflugvelli höfum verið viðbúin að einhverju leyti. Þá er stærri hluti þeirra farþega sem upp á vantar í hópi tengifarþega, þannig að áhrifin á tekjur okkar eru minni en ella.“

Bjart fram undan í fluginu

Þrátt fyrir áskoranir síðasta árs er útlit fyrir mikla umferð á komandi misserum. Í sumar munu 27 flugfélög fljúga til 80 áfangastaða frá Keflavík, og áætlun næsta vetrar gerir ráð fyrir 20 flugfélögum sem fljúga til 65 áfangastaða.

Aðalfundur Isavia verður haldinn þann 26. mars, þar sem ársskýrsla félagsins verður opinberuð í heild sinni.

Kappahl opnar í Krossmóa á Suðurnesjum

Fri, 20 Mar 2026 06:17:00 GMT

Mikil uppbygging er nú í gangi hjá sænska tískuvörumerkinu Kappahl á Íslandi en á næstu dögum opnar ný verslun í Krossmóa á Suðurnesjum.

Opnunin markar næsta skref í innleiðingu Kappahl á íslenskan markað eftir afar vel heppnaða opnun fyrstu verslunarinnar í Smáralind, þar sem fjölmenni mætti og viðtökurnar fóru fram úr björtustu vonum. Áætlað er að um 5.000 manns hafi nú þegar lagt leið sína í verslunina sem opnaði síðasta laugardag.

„Við erum gríðarlega þakklát fyrir þær móttökur sem Kappahl hefur fengið hingað til. Það er ljóst að íslenskir viðskiptavinir kunna vel að meta samsetninguna af skandinavískri hönnun, góðum gæðum og hagkvæmu verði,“ segir Albert Þór Magnússon, umboðsaðili Kappahl og Newbie á Íslandi, í frétt frá fyrirtækinu.

Suðurnes öflugur þáttur uppbyggingarinnar

Með opnun verslunarinnar í Krossmóa styrkir Kappahl enn frekar viðveru sína utan höfuðborgarinnar og gerir vörumerkið aðgengilegra fyrir íbúa Suðurnesja og nærliggjandi svæða.

„Suðurnesin eru mikilvægt og vaxandi markaðssvæði en eins og fólk veit er Reykjanesbær nú orðið stærsta bæjarfélag utan höfuðborgarinnar. Við sjáum því hér mikil tækifæri til uppbyggingar. Við hlökkum til að taka á móti viðskiptavinum á svæðinu og bjóða upp á fjölbreytt úrval fyrir alla fjölskylduna,“ segir Albert.

Sterk fjölskylduverslun með skandinavísk gildi

Kappahl var stofnað í Svíþjóð árið 1953 og er í dag eitt af leiðandi tískuvörumerkjum á Norðurlöndum með yfir 340 verslanir í Evrópu. Fyrirtækið leggur ríka áherslu á sjálfbærni, meðal annars með notkun lífrænnar bómullar, rekjanleika í framleiðslu og ábyrg vinnubrögð í allri virðiskeðjunni.

Verslanir Kappahl bjóða upp á fatnað fyrir konur, karla og börn, allt frá sígildum grunnflíkum til tískufatnaðar og undirfatnaðar á hagkvæmu verði.

Samhliða opnun verslananna geta viðskiptavinir einnig verslað í gegnum netverslunina kappahl.is, sem er opin allan sólarhringinn.

Uppbygging um allt land

Opnunin í Krossmóa er hluti af stærra uppbyggingarferli þar sem stefnt er að því að opna alls átta Kappahl-verslanir og a.m.k. eina Newbie-verslun á Íslandi á næstu misserum. Gert er ráð fyrir að fjórar verslanir að meðtalinni versluninni í Krossmóa opni nk. laugardag kl. 12:00.

„Við erum rétt að byrja. Það eru spennandi tímar framundan og við hlökkum til að halda áfram að byggja upp Kappahl og Newbie sem sterk og traust vörumerki á Íslandi,“ segir Albert Þór Magnússon að lokum.

Grímur lætur af störfum sem forstjóri eftir 33 ár – Sigríður Margrét tekur við

Thu, 19 Mar 2026 17:09:42 GMT

Mikil tímamót urðu hjá Bláa Lóninu hf. á aðalfundi félagsins í dag. Grímur Sæmundsen, stofnandi félagsins, hefur látið af störfum sem forstjóri eftir rúm þrjá áratugi í brúnni. Við keflinu tekur Sigríður Margrét Oddsdóttir.

Grímur kveður þó ekki félagið því hann tekur nú sæti í stjórn og var kjörinn stjórnarformaður á fundinum. Hann hefur stýrt fyrirtækinu frá stofnun þess árið 1992 og séð það vaxa úr nýsköpunarverkefni í einn þekktasta áfangastað landsins.

Verulegur viðsnúningur í rekstri

Samhliða forstjóraskiptunum voru kynntar rekstrartölur ársins 2025 sem sýna mikinn bata eftir krefjandi ár:

Tekjur: Námu 156 milljónum evra (um 23,4 milljarðar kr.) samanborið við 115 milljónir árið áður.
Hagnaður: Félagið skilaði 6,6 milljóna evra hagnaði (tæpum milljarði kr.), en árið 2024 var 7,6 milljóna evra tap á rekstrinum.
EBITDA: Nam 29,4 milljónum evra og rúmlega þrefaldaðist á milli ára.

Staða félagsins er sögð sterk með 52% eiginfjárhlutfall og eignir upp á 423,5 milljónir evra við árslok.

Horfa björtum augum til framtíðar

Grímur segist stoltur af uppbyggingunni og horfir til frekari tækifæra um land allt. „Með því að horfa til langs tíma, byggja á gæðum, hönnun og þeim einstöku eiginleikum sem Ísland hefur að bjóða er framtíð félagsins björt,“ segir Grímur í tilkynningunni.

Sigríður Margrét, nýr forstjóri, segir það heiður að leiða félagið inn í næsta kafla. Hún tekur við fyrirtæki sem er einn af stærstu vinnustöðum landsins, en stöðugildi voru 806 í lok ársins. Þá nam skattspor félagsins rúmum 4,3 milljörðum króna á árinu 2025.

Stjórn Bláa Lónsins hf. skipa: Grímur Sæmundsen (formaður), Ágústa Johnson, Erla Ósk Ásgeirsdóttir, Jón Sigurðsson og Ragnar Guðmundsson.

Ný framtíðarsýn kynnt fyrir útlit Græna iðngarðsins í Helguvík

Wed, 04 Mar 2026 11:02:22 GMT

Græni iðngarðurinn í Helguvík (Iceland Eco-Business Park) hefur kynnt nýja hönnun á ásýnd og framhlið iðngarðsins sem ætlað er að fanga auðkenni svæðisins til framtíðar. Hönnunin er verk Yasemin Kapkın, sem lauk meistaranámi í hönnun nýs umhverfis við Listaháskóla Íslands, en hún hóf störf við verkefnið í desember síðastliðnum. Markmiðið með framtíðarsýninni er að skapa samfellt og skýrt myndmál sem byggir á sjálfbærni og sveigjanleika eftir því sem fleiri fyrirtæki bætast í iðngarðinn. Frá þessu er greint á vef Græna iðngarðsins.

Í stað þess að gerbreyta núverandi iðnaðarhúsnæði byggir sýnin á því að aðlaga bygginguna að umhverfinu með tilliti til orkunýtni og varanleika. Lögð er áhersla á samfellu við núverandi steinsteypuvirki með notkun trefjasementplatna og utanáliggjandi einangrunarkerfis sem dregur úr orkunotkun án þess að raska burðarvirki eða innra rými hússins. Miðpunktur hönnunarinnar er hjarta iðngarðsins sem afmarkast af stálgrind og klæðningu úr kortenstáli, en það skapar sterkt en jafnframt hógvært byggingarlistaverk sem eldist vel með tímanum.

Efnisval endurspeglar umhverfissjónarmið þar sem notast er við meðhöndlaðan við til að mýkja ásýnd innganga og álplötur í einkennislit iðngarðsins til að samræma skilti og númeringu fyrirtækja. Þá er gert ráð fyrir endurunnu gleri í glugga og hurðir ásamt öflugum svörtum stálrömmum sem standast íslenska veðráttu. Lýsing er samþætt í hönnunina til að auka öryggi og læsileika á myrkum stundum en hún er lágvær og fellur vel að gróðri og gönguleiðum svæðisins.

Verkefnið er afrakstur góðs samstarfs við Listaháskóla Íslands og mun það halda áfram á árinu 2026. Nýr nemandi, Óðinn Finnsson-Bell, mun dvelja í sex vikur við iðngarðinn og rannsaka hvernig hægt er að nýta endurunnin efni í hönnunarskyni. Með þessari vegferð stefnir Græni iðngarðurinn að því að verða leiðandi í sjálfbærri atvinnuuppbyggingu og samfélagslegri hönnun á Suðurnesjum.

Magnús Orri gerir samning við RÚV um heimildarmynd frá Chile

Tue, 03 Mar 2026 15:34:26 GMT

Kvikmyndagerðarmaðurinn Magnús Orri Arnarson hefur undirritað samning við RÚV um kaup á nýrri heimildarmynd sem hann vinnur nú að. Myndin fjallar um Sumarheimsleika Special Olympics sem haldnir verða í Santiago í Chile í október árið 2027. Með samningnum hefur RÚV tryggt sér sýningarrétt á verkinu en áætlað er að myndin verði frumsýnd árið 2028.

Verkefnið er nú á frumstigi og fram undan er tveggja ára mikil og metnaðarfull vinna við að fylgja þessu stóra verkefni eftir. Magnús Orri segist í tilkynningu vera ótrúlega þakklátur fyrir það traust sem honum er sýnt með samningnum og hlakkar mikið til að deila þessari mikilvægu sögu með þjóðinni. Hann lýsir komandi vegferð sem stóru, krefjandi og spennandi ferðalagi sem hann hlakkar til að takast á við.

Samhliða vinnu við myndina leitar Magnús Orri nú leiða til að safna styrkjum fyrir verkefnið en markmiðið er að segja sögur sem skipta máli, opna nýja heima og sýna að allir geti stundað íþróttir óháð fötlun. Hann bendir á að framleiðsla sem þessi kosti mikla vinnu og fjármagn en hann trúi á verkefnið af öllu hjarta. Með honum í teyminu eru þau Anna Karólína Vilhjálmsdóttir og Jón Aðalsteinn og eru áhugasamir einstaklingar eða fyrirtæki sem vilja styrkja verkefnið eða eiga samstarf hvattir til að hafa samband við Magnús Orra.

Trúum á áframhaldandi uppbyggingu og bjarta framtíð samfélagsins á Suðurnesjum

Fri, 27 Feb 2026 14:32:59 GMT

Húsasmiðjan hefur opnað nýja verslun á Fitjum í Reykjanesbæ. Verslunin er stór og björt og hönnuð samkvæmt nýrri, verðlaunaðri verslunarhönnun Húsasmiðjunnar sem hlaut alþjóðleg DBA-hönnunarverðlaun árið 2023. Verslunin í Reykjanesbæ er sú þriðja sem opnar í þessu nýja útliti og er það sérstaklega ánægjulegt skref þar sem í ár eru 30 ár síðan Húsasmiðjan hóf fyrst starfsemi í sveitarfélaginu.

„Við erum mjög ánægð með viðtökurnar bæði frá fagfólki á svæðinu og ekki síður frá heimafólki sem er í framkvæmdum og endurbótum. Suðurnesjabúar hafa ávallt tekið okkur vel enda fögnum við 30 ára starfsafmæli hér á svæðinu síðar á árinu.

Við undirbúning og hönnun verslunarinnar var vandað til verka. Hún er í nýju útliti, björt og aðgengileg, með heildstætt vöruúrval þar sem þú finnur allt til framkvæmda og heimilisins undir einu þaki.

Með opnun nýrrar verslunar viljum við sýna í verki að við trúum á áframhaldandi uppbyggingu og bjarta framtíð samfélagsins á Suðurnesjum,“ segir Birna Ósk Einarsdóttir forstjóri Húsasmiðjunnar.

Í versluninni er öflug og rúmgóð verkfæradeild og hafa t.a.m. DeWalt og Stanley sett upp stóra deild. Þá er einnig mikið úrval frá þekktum gæðamerkjum á borð við Milwaukee, Makita, Black+Decker auk fleiri vörumerkja sem henta jafnt fagfólki sem heimafólki í framkvæmdum.

Mikil áhersla er lögð á þjónustu við fagfólk, meðal annars með skrúfu- og festingadeild og timbursölu sem hægt er að keyra í gegnum. Sölumenn Húsasmiðjunnar í Reykjanesbæ búa yfir áralangri reynslu í sérlausnum fyrir fagfólk, svo sem í utanhússklæðingum, gluggum, hurðum, timbri og plötum.

Einnig er í versluninni málningardeild með helsta úrvali Húsasmiðjunnar, þar á meðal LADY og Jotun Proff. Þá er gott úrval af vörum fyrir eldhús og baðherbergi, auk gólfefnadeildar þar sem finna má fjölbreytt úrval af parketi og flísum. Að lokum er árstíðadeild með grillum frá framleiðendum á borð við Weber, Char-Broil, Enders og Landmann. Jólaljósin verða svo að sjálfsögðu á sínum stað fyrir næstu jól.

Birna Ósk Einarsdóttir forstjóri Húsasmiðjunnar og Kjartan Már Kjartansson, bæjarstjóri Reykjanesbæjar, opnuðu verslunina formlega með því að saga í sundur myndarlegan planka. Birna var sjónarmun á undan Kjartani, sem hafði þó fengið að æfa sig á sögina skömmu áður.

Að neðan eru myndir úr opnunarhófi Húsasmiðjunnar á dögunum.

Nýr Kia EV5 frumsýndur

Wed, 25 Feb 2026 10:51:55 GMT

Nýr og alrafmagnaður Kia EV5 verður frumsýndur hjá Öskju Reykjanesi nk. laugardag, 28. febrúar, kl. 12-16. EV5 kemur með allt að 530 km drægni og er einnig væntanlegur fjórhjóladrifinn.

„EV5 er bæði góð og mikilvæg viðbót við rafmagnað úrval hér á landi því hann er í vinsælasta stærðarflokki okkar íslendinga. EV5 hentar vel fyrir íslenskar aðstæður enda með góða veghæð ásamt rúmgóðu innanrými fyrir alla fjölskylduna,“ segir Kristmann F. Dagsson, framkvæmdastjóri sölusviðs Öskju.

Ný verslun Húsasmiðjunnar opnuð á Fitjum — myndir

Sat, 14 Feb 2026 13:27:43 GMT

Húsasmiðjan hefur opnað nýja verslun á Fitjum í Reykjanesbæ og var opnunarhóf haldið á fimmtudag. Verslunin er hönnuð samkvæmt nýrri, verðlaunaðri verslunarhönnun fyrirtækisins sem hlaut alþjóðleg DBA-hönnunarverðlaun árið 2023 og er verslunin sú þriðja sem opnar í því útliti.

„Við erum einstaklega stolt af nýju versluninni og viðbrögðin hafa vægast sagt verið frábær,“ segir Birna Ósk Einarsdóttir, forstjóri Húsasmiðjunnar. Hún segir jafnframt ánægjulegt að opna á þessum tímamótum en í ár eru 30 ár síðan Húsasmiðjan hóf starfsemi í Reykjanesbæ.

Í framhaldi af opnuninni stendur yfir opnunarhátíð og í dag, laugardag, dagskrá með tilboðum og uppákomum fyrir fjölskyldur, auk kynninga á vöruúrvali, meðal annars í verkfæradeild og málningardeild.

Myndasafnið hér að neðan var tekið í opnunarhófinu.

Húsasmiðjan stækkar í Reykjanesbæ

Thu, 12 Feb 2026 12:37:56 GMT

Saga Húsasmiðjunnar spannar orðið næstum 30 ár á Suðurnesjum. Hún opnaði verslun á Smiðjuvöllum í Keflavík í nóvember 1996 en flutti sig um set í apríl 2008 og opnaði stóra og glæsilega verslun og timbursölu á Fitjum. Árið 2015 voru gerðar breytingar á versluninni og hún fór í minna rými. Nú eru aftur breytingar og Húsasmiðjan fer í stærra rými og hefur gjörbreytt rýminu - og verslunin hefur við það öðlast nýtt líf. „Þetta er algjör bylting,“ segir Gísli Jóhannsson, rekstrarstjóri verslunarinnar, sem lýsir breytingunni sem umskiptum úr „lítilli, þröngri búð“ yfir í opið og bjart verslunarrými með skýrri deildaskiptingu og betra flæði um alla verslunina.

Nýja hönnunin er sögð í takt við nýlegar endurbætur Húsasmiðjunnar á öðrum stöðum, meðal annars á Akureyri og Selfossi. Gísli bendir á að Akureyrarbúðin hafi á sínum tíma fengið bresk hönnunarverðlaun og að sama „hugmyndafræði“ sjáist nú í Reykjanesbæ: lægri hillur, betri yfirsýn og deildir sem „blasa við“ um leið og fólk kemur inn. Málningardeildin er þar sérstaklega nefnd. Hún var áður „úti í horni“ en er nú blasir hún við viðskiptavinum þegar þeir koma inn í verslunina. Þá er einnig mjög stór verkfæradeild þar sem fagfólk og fólk í framkvæmdum finnur ótrúlega mikið úrval frá Dewalt, Stanley, Makita, Milwaukee og Black+Decker.

Meira úrval og fleiri hendur

Með stækkuninni fylgir aukið vöruúrval, sérstaklega í verkfærum og tengdum vöruflokkum fyrir fagfólk og fólk í framkvæmdum. Gísli segir að viðbrögðin við stærri búð hafi verið mjög góð frá fyrsta degi. Verslunin opnaði á mánudaginn í síðustu viku og það hefur verið mikið rennerí alla daga, segir Gísli. Hann segir að Suðurnesjamenn hafi lengi vitað að breytingar væru í vændum og spurningin síðustu mánuði hafi iðulega verið einföld: hvenær stækkið þið?

Starfsmannahaldið hefur einnig verið styrkt. Gísli hefur bætt við tveimur stöðugildum, auk þess að fjölga á vöktum á annatímum, og leggur áherslu á að halda í reynslu og sérþekkingu innan verslunarinnar. Einar Lárus Ragnarsson er fyrrverandi verslunarstjóri Húsasmiðjunnar á Fitjum og vörustjóri í málningu hjá Húsasmiðjunni í 20 ár. Hann hafi komið inn tímabundið til að hjálpa við uppsetningu deildarinnar. Hann verður viðskiptavinum innan handar út febrúar og ætlar svo að koma aftur í sumar sem sumarstarfsmaður á Fitjum. Þá hefur einnig verið horft til frekari styrkingar í timbursölunni og ekki veitt af, segir Gísli

Sýnileiki skiptir miklu máli

Spurður um stöðuna á markaðnum, með háa vexti og kólnun á fasteignamarkaði, segir Gísli að verktakar haldi vissulega aðeins að sér en samt séu þeir „á fullu“ við að klára verkefni. Húsasmiðjan í Reykjanesbæ hafi ekki orðið mikið vör við samdrátt og hann telur að betri aðkoma, sýnileiki og rými skipti miklu máli til framtíðar: áður hafi þrengsli og bílastæðavandi einfaldlega fælt hluta viðskiptavina frá.

Nú sé verslunin hins vegar „svo vel merkt“ að skiltin „lýsi upp Njarðvíkurnar“ og sjáist langt að, og verið sé að fegra og bæta aðkomuna enn frekar.

Stækkunin kostaði Gísla eitt Evrópumót

Gísli þurfti að færa miklar persónulegar fórnir í janúar þegar flutningar á versluninni stóðu sem hæst. Evrópumótið í handknattleik stóð yfir á sama tíma en það var ekki inni í myndinni að taka sér frí frá vinnu til að fara og vera á meðal áhorfenda.

„Síðast missti ég af móti 2016… en ég hef verið á mótum síðan 2010,“ segir hann. Í ár var það ekki í kortunum. Verkefnið að flytja og opna nýja verslun var einfaldlega of stórt. Í stað þess að vera í stúkunni fylgdist hann með leikjunum úr vinnunni: kveikt var á tölvu, tvö sjónvörp voru í gangi inni í búð og starfsfólk hélt áfram að vinna á meðan stemningin sveiflaðist með úrslitum.

„Maður fann fyrir því,“ segir Gísli um að vera heima þegar hann er vanur að vera á staðnum en bætir við að það hafi líka verið „nóg að gera“ og ábyrgðin á verkefninu hafi ráðið.

Tilboð og formleg opnun

Í kjölfar flutningsins er stefnt á opnunarstemningu í þessari viku með tilboðum og kynningum í versluninni og hefst gleðin föstudaginn 13 mars og verður heilmikið um að vera á laugardaginn 14. febrúar. Gísli segir að frá föstudegi verði „tilboð út í eitt“ og um helgina verði mikil dagskrá, íspinnar og blöðrudýr fyrir börnin, Maja Ben með litaráðgjöf í málningardeildinni, svo eitthvað sé nefnt.

Svipmyndir úr nýrri og stærri verslun Húsasmiðjunnar í Reykjanesbæ. VF/hilmarbragi

Ný verslun Húsasmiðjunnar opnar í Reykjanesbæ

Wed, 11 Feb 2026 13:23:17 GMT

„Við erum einstaklega stolt af nýju versluninni og viðbrögðin hafa vægast sagt verið frábær. Það er sérstaklega ánægjulegt að opna nýja verslun í Reykjanesbæ á þessum tímamótum, þar sem Húsasmiðjan fagnar 30 ára afmæli á Reykjanesi síðar á árinu. Suðurnesjabúar hafa frá upphafi tekið Húsasmiðjunni afar vel og það hefur verið virkilega ánægjulegt að finna þann mikla áhuga sem nýja verslunin hefur fengið,“ segir Birna Ósk Einarsdóttir forstjóri Húsasmiðjunnar.

Hún bætir við að í vikunni sé opnunarhátíð sem hefst föstudaginn 13. febrúar.

Birna Ósk Einarsdóttir forstjóri Húsasmiðjunnar.

„Í tilefni opnunarinnar munum við standa fyrir glæsilegri opnunarhátíð allan febrúar. Hátíðin hefst föstudaginn 13. febrúar og á laugardeginum verður flott dagskrá þar sem við bjóðum íbúum á Suðurnesjum að fagna með okkur. Þar verða hagstæð tilboð, litaráðgjöf, blöðrurdýr og íspinnar fyrir börnin, verkfærakynning og fleira,“ segir Birna.

Einnig er í versluninni málningardeild með helsta úrvali Húsasmiðjunnar, þar á meðal LADY og Jotun Proff. Þá er gott úrval af vörum fyrir eldhús og baðherbergi, auk gólfefnadeildar þar sem finna má fjölbreytt úrval af parketi og flísum. Að lokum er árstíðardeild með grillum frá framleiðendum á borð við Weber, Char-Broil, Enders og Landmann. Jólaljósin verða svo að sjálfsögðu á sínum stað fyrir næstu jól.

Með nýju versluninni í Reykjanesbæ styrkir Húsasmiðjan enn frekar stöðu sína sem heildarlausn fyrir fagfólk og fólk í framkvæmdum – allt undir einu þaki.

Þórður Þorbjörnsson ráðinn verslunarstjóri BYKO í Reykjanesbæ

Thu, 05 Feb 2026 13:02:18 GMT

Þórður Þorbjörnsson hefur verið ráðinn verslunarstjóri BYKO í glænýrri verslun fyrirtækisins við Fitjabraut og hefur hann þegar hafið störf.

Þórður býr yfir víðtækri og traustri reynslu og starfaði í áratugi hjá Íslenskum aðalverktökum hf. þar sem hann gegndi meðal annars störfum innkaupastjóra, innkaupafulltrúa og birgðastjóra. Þórður er uppalinn í Keflavík og hefur verið virkur í félags- og stjórnarstörfum, meðal annars innan íþróttahreyfingarinnar í Keflavík.

BYKO hefur þjónustað íbúa á Suðurnesjum, jafnt einstaklinga sem fagaðila, frá 1996 og hefur fyrirtækið verið í fyrsta sæti í Íslensku ánægjuvoginni níu ár í röð.

Drangar semja við SPAR um notkun vörumerkis á Íslandi

Wed, 04 Feb 2026 11:19:17 GMT

Drangar, móðurfélag Samkaupa, hafa skrifað undir samning við alþjóðlegu verslunarkeðjuna SPAR International um notkun vörumerkisins hérlendis. Markmið samningsins er að í lok árs 2027 muni verslanir undir merkjum 10–11, Krambúðar og Kjörbúðar bera alþjóðlegt vörumerki SPAR. Eftir innleiðinguna mun Samkaup selja matvöru undir vörumerkjunum Prís, Nettó og SPAR.

Verslanir SPAR bjóða upp á fjölbreytt úrval matvöru, tilbúinna rétta og annarrar dagvöru frá birgjum um allan heim. Gert er ráð fyrir lægra vöruverði í verslunum sem reknar verða undir vörumerki SPAR, meðal annars vegna aðgengis að alþjóðlegum samningum SPAR við stærstu birgja heims. Með þessum samningi fær Samkaup aðgang að þekkingu og reynslu SPAR International sem rekur eitt stærsta smásölunet í heimi.

SPAR var stofnað í Hollandi árið 1932 og rekur í í dag verslunarnet með yfir 13.800 verslanir í 50 löndum. Starfsemi SPAR er víða innan Evrópusambandsins eða í 18 af 27 aðildarríkjum og þjónustar um 14,7 milljónum neytenda daglega.

Samkaup hf. er vaxandi verslunarfyrirtæki á dagvörumarkaði sem rekur 60 verslanir um allt land. Samkaup er dótturfélag Dranga hf. sem er móðurfélag framsækinna fyrirtækja á neytendamarkaði. Systurfélög Samkaupa eru Orkan og Lyfjaval.

Auður Daníelsdóttir, forstjóri Dranga hf.:

„Starfsfólk Samkaupa sem býr yfir áratuga þekkingu á íslenskum matvörumarkaði fær tækifæri til að kynna sér aðferðir og leiðir sem skilað hafa árangri á alþjóðamörkuðum og aðlaga þær að aðstæðum hér heima. Þannig færum við heimsverslun heim í hérað. Samstarf við alþjóðlegan verslunarrisa styður okkar vegferð og er jafnframt mikilvægur áfangi í vexti og viðgangi Dranga sem er nýstofnað móðurfélag framsækinna rekstrarfélaga á innlendum neytendavörumarkaði.”

Grindvíkingur með nýjungar í eldhúsinu á Dubliner

Tue, 03 Feb 2026 10:24:38 GMT

Vilhjálmur Lárusson eða Villi á Sjómannastofunni Vör í Grindavík hefur tekið við eldhúsinu á veitinga- og skemmtistaðnum Dubliner og hefur sett saman nýjan matseðil. Dubliner opnaði á síðasta ári á hinu fræga Keflavíkurhorni, Hafnargötu 30, og hefur fengið mjög góðar móttökur.

Vilhjálmur segir að nýjum manni fylgi jafnan nýjungar. Á nýjum matseðli verður m.a. boðið upp á fisk og franskar en Villi segir að það séu hæg heimatökin að koma með ferskan fisk frá Grindavík. „En svo erum við með skemmtilegar nýjungar eins og humarpylsu. Þá erum við með kjúklingasalat og humarsalat að ógleymdum góðum hamborgurum. Svo er hægt að fá sér belgíska vöfflu með rjóma og gott kaffi,“ segir Villi en hann hefur frá upphafi COVID-19 rekið sjómannastofuna Vör í Grindavík en það er veitingastaður sem býður upp á heimilismat í hádeginu. „Það hefur verið áhugavert og skemmtilegt og gengið vel,“ bætir Grindvíkingurinn við.

Þá eru uppi ýmsar hugmyndir um fleiri nýjungar á Dubliner eins og kótilettukvöld, ýmiss konar pop-up kvöld og sunnudagskaffihlaðborð.

Við opnun Dubliner var lögð áhersla var lögð á að skapa hlýlegt andrúmsloft við endurbyggingu staðarins. Þar er hægt að fara í pílu og púl og horfa á alla leikina í beinni útsendingu á tíu sjónvarpsskjám. Dubliner fékk verðlaun frá Reykjanesbæ þegar staðurinn var valinn „Jólafyrirtæki Reykjanesbæjar 2025“.

Hér má sjá brot af úrvalinu á matseðli Dubliner.

Samkaup fær reynslubolta úr Bónus

Tue, 03 Feb 2026 09:32:34 GMT

Samkaup og Nettó hafa ráðið tvo nýja lykilstjórnendur til starfa, báðir koma þeir frá Bónus þar sem þeir hafa starfað samanlagt í rúmlega hálfa öld. Ráðningarnar marka mikilvægt skref í áframhaldandi uppbyggingu Samkaupa sem reka auk Nettó, verslanirnar; Prís, Heimkaup, Krambúðirnar, Kjörbúðirnar og 10-11.

Nýr rekstrarstjóri Nettó – Otti Þór Kristmundsson

Otti hefur þegar hafið störf sem rekstrarstjóri Nettó og Kjörbúðanna, en hann byrjaði sem starfsmaður Bónus árið 1990, aðeins ári eftir að Bónus opnaði sína fyrstu búð og hefur starfað í dagvöruverslun í 35 ár og um árabil sem rekstrarstjóri. Otti hefur því umfangsmikla reynslu af rekstri í matvöruverslun og þjónustustarfsemi almennt.

„Það er okkur sönn ánægja að fá reynslubolta eins Otta inn í stjórnendateymið. Hans reynsla og þekking mun styrkja verslanir okkar um allt land og við förum því sterkari inn í nýtt ár með hann í okkar teymi“ segir Auður Daníelsdóttir, forstjóri Samkaupa og Dranga.

Upplýsingatækni verður sjálfstætt svið – Steinar Jónas Kristjánsson framkvæmdastjóri

Um áramótin voru gerðar breytingar á skipulagi fjármálasviðs Samkaupa þar sem upplýsingatæknideild, sem hingað til hefur heyrt undir fjármálasvið, varð að sjálfstæðu sviði og hefur Steinar Jónas Kristjánsson verið ráðinn framkvæmdastjóri nýs sviðs

Steinar kemur til Samkaupa með tæplega 30 ára reynslu á sviði upplýsingatækni bæði hérlendis sem erlendis en hann hefur frá árinu 2003 leitt upplýsingatæknisvið Bónus. Hann býr yfir mikilli víðtækri reynslu af upplýsingatækni, verslunarlausnum og verkefnastjórnun.

„Markmið þessara breytinga er að gera upplýsingatæknina að sjálfstæðri og öflugri einingu innan Samkaupa til að styrkja rekstur og bæta þjónustu til viðskiptavina. Samkaup þjónustar yfir 60 verslanir um allt land og því mikill fengur að fá inn þennan liðsstyrk. Upplýsingatæknin er lykilþáttur í starfseminni og því mikilvægt að sviðið hafi skýrt hlutverk og styðji við langtímastefnu félagsins“ segir Auður.

Samkaup hf. er vaxandi verslunarfyrirtæki á dagvörumarkaði sem rekur 60 verslanir um allt land m.a. undir merkjum Nettó og Prís. Samkaup er dótturfélag Dranga hf. sem er móðurfélag framsækinna fyrirtækja á neytendamarkaði. Systurfélög Samkaupa eru Orkan og Lyfjaval.

Beitir ehf. í Vogum: Ryðfríar lausnir fyrir fiskveiðar og vinnslu

Mon, 02 Feb 2026 10:53:20 GMT

Það eru til margar sögur af fyrirtækjum sem hefja starfsemina heima í bílskúr, með góðri hugmynd og þolinmóðum nágrönnum. Beitir ehf. í Vogum er eitt þeirra. Hjónin Hafsteinn Ólafsson og Þóra Bragadóttir stofnuðu til rekstrarins árið 1988, fyrst á kennitölu Hafsteins. Fljótlega varð þetta þó að fyrirtæki með sína eigin kennitölu en eins og Hafsteinn segir: „Við byrjuðum heima í bílskúrnum – alveg eins og Marel.“

Beitir er fjölskyldufyrirtæki sem sérhæfir sig í smíði úr ryðfríu stáli og býr yfir mikilli þekkingu á því sviði. Helstu verkefni hafa verið tengd sjávarútveginum og þá helst línu- og dekkbúnaður í báta og ýmis búnaður fyrir fiskvinnslur, s.s. færibönd og aðgerðar- og innmötunarkör. Mikið af verkefnum fyrirtækisins eru sérsmíði og aðstoð við viðskiptavini við að finna lausnir í hönnun og útfærslu.

En grunnurinn var einfaldur: byrja smátt, gera hlutina vel og standa við það.

„Þetta fór fljótt að vinda upp á sig,“ segir Hafsteinn um upphafsárin. „Og við sáum það að það gekk ekki lengur að vera heima.“ Bílskúrinn hafi verið sjálfstæður, þ.e. ekki sambyggður íbúðarhúsinu, og það hafi hjálpað, en samt hafi komið að mörkum. „Nágrannarnir voru nú mjög þolinmóðir og góðir. En maður getur ekki endalaust reynt á þá þolinmæði.“

Árið 2000 flutti fyrirtækið í nýtt húsnæði við Jónsvör á hafnarsvæðinu í Vogum. Þar hefur Beitir byggt upp verkstæði, vélar og kunnáttu og orðspor fyrir vönduð vinnubrögð. Fyrir nokkrum árum var byggt við húsið í Jónsvörinni en í viðbyggingunni eru staðsettar tvær „vatnsskurðarvélar“ sem geta skorið af mikilli nákvæmni í gegnum allt að fimm sentimetra þykkt stál, auk þess að geta skorið plast og gúmmí í miklum þykktum. Þessi skurðartækni er mjög nákvæm, upp á brot úr millimetra, og verkefnin eru óþrjótandi. Hafsteinn segir að vatnsskurðarvélarnar gætu þess vegna verið að störfum allan sólarhringinn.

Haldið til veiða í Upernavik á Grænlandi með beitningartrekt frá Beiti í júní 2008.
Að ofan er Hafsteinn með ánægðum heimamanni og viðskiptavini með trektina góðu.

Beitingartrektin sem kveikti allt og nafnið sem varð til

Spurningin um upphafið kemur alltaf aftur: Hver var fyrsta varan?

„Þetta byrjaði allt á beitingar-trekt,“ segir Hafsteinn. „Þess vegna kemur þetta nafn, Beitir.“ Í fyrstu hafi þetta gengið undir heitinu Vogatrektin, en nafn og vörumerki þurfti að standast samkeppni.

Hafsteinn rifjar upp sjávarútvegssýningu þar sem þau fréttu að búið væri að herma eftir vörunni þeirra. Þau vildu komast á þá sýningu með sína framleiðslu en uppselt var á innisvæði. Þau fengu hins vegar ábendingu um að hægt væri að sýna á útisvæði, sem þau gerðu.

„Ísdrottningin“

Útisvæðið var ekki beint draumastaða fyrir sýningu á þessum árstíma. „Þá fékk Þóra nýtt nafn,“ segir Hafsteinn og hlær. „Þeir kölluðu hana Ísdrottninguna.“ Þóra stóð vaktina úti í norðanvindi og kulda, með fjórar til fimm könnur og endalausan stuðning frá fólki sem sá hvað var í gangi. „Hún fékk endalausar kaffisendingar og dót til að standa úti.“

Það var ekki besta staðan að kynna vöruna úti í nepjunni, en þau létu það ganga.

„Það var eina plássið sem við fengum og það gekk alveg gríðarlega vel,“ segir Hafsteinn. „Þá var ekkert aftur snúið.“

„Bara ryðfrítt – ekkert annað“

Ef Beitir á eitt „grunnstef“ þá er það efnisvalið og gæðin. Ryðfrítt stál er málið. „Við fórum strax þangað. Hér er bara ryðfrítt, ekkert annað.“ Ávinningurinn sé bæði praktískur og faglegur: ending, hreinlæti og frágangur. „Menn uppgötvuðu að það er helmingi léttara að þrífa þetta. Það festist ekkert á því, það er svo slétt þegar búið er að „pólera“ og pússa stálið.“

Á sýningum hafi glansandi vörurnar jafnan vakið sérstaka athygli og viðskiptavinir spyrja stundum: „Heyrðu, ég gleymdi að spyrja… verður hún líka svona glansandi fín líka?“ og þá er átt við pússun og frágang, hluti sem er ekki sjálfgefinn alls staðar.

Vatnsskurðarvélarnar hjá Beiti í Vogum hafa næg verkefni og gætu verið í gangi allan sólarhringinn við að skera út verkefni.

Úr línu yfir í vinnslu og sérlausnir

Beitingartrektin var upphaf, en ekki endapunktur. „Svo fór þetta náttúrulega að vinda upp á sig,“ segir Hafsteinn. Beitir fór að smíða annan búnað fyrir línu og einnig netaspil og með tímanum meira og meira fyrir vinnslur.

Stundum er þetta stórt og mikið, stundum smærra en mikilvægt: sérsmíðaðir hlutir sem passa inn í verkflæði vinnslunnar, breytingar á skipum, lausnir sem verða til þegar einhver þarf eitthvað fljótt og það er ekki til á lager annars staðar.

Og þótt Beitir sé í Vogum þá liggja verkefnin víða. „Stærsti markaðurinn okkar er austur á fjörðum,“ segir Hafsteinn. Það á bæði við um álverið á Reyðarfirði og uppsjávarvinnslu á Fáskrúðsfirði en einnig í Noregi, Færeyjum og á Grænlandi.

Frá Upernavik á Grænlandi, þar sem fjölmargir grænlenskir sjómenn notast við tæki og útbúnað frá Beiti í Vogum. Landslagið er hrjóstrugt og lítið flatlendi. Bátar á legunni og börn að leik í brekkunni.

Grænland: „Við urðum alltaf að fara með öllu út“

Það er erfitt að tala við Hafstein án þess að Grænland komi upp. Í frásögn hans er Grænland ekki bara markaður heldur heill heimur af krefjandi aðstæðum, lausnum og menningu.

„Við sáum það strax að við urðum alltaf að fara og setja allt upp sjálfir,“ segir Hafsteinn. Hann lýsir því að fólk hafi oft verið óöruggt með nýjan búnað, ekki af því að það væri óviljugt heldur af því að það var einfaldlega nýtt.

„Svo fór maður með þeim einn túr og þá var bara verið að læra. Og Grænlendingar eru skotfljótir að læra,“ segir hann.

Flugdreki á hundraða metra dýpi

Sagan sem stendur þó upp úr er sagan af flugdrekunum.

Hafsteinn lýsir því þegar hann sá í fyrsta skipti hvernig menn leystu vandamál við að leggja línu í miklu dýpi við erfiðar aðstæður. „Þeir bjuggu til flugdreka og settu á hann lóð.“

Þetta var ekki leikfang heldur verkfæri: flugdreki sem fór niður og „flaug“ neðansjávar til að draga línuna út. „Þetta er rosalegt dýpi… fimm, sex, sjö hundruð metrar og jafnvel upp í þúsund,“ segir hann. „Og hann bara flaug þarna niðri.“

Hann segir að veiðarnar þar hafi líka verið að breytast; bátar stækki og tegundirnar verði fleiri. „Núna eru þeir að veiða bara þorsk og ýsu og helling af því,“ segir Hafsteinn. Grænlendingar hafa til þessa verið þekktir fyrir miklar grálúðuveiðar en minna verið í öðrum tegundum sem eru vel þekktar hér á landi.

Markaðssetningin á húsbíl um Noreg

Beitir fór sína eigin leið í markaðssetningu fyrir nokkrum árum. Hafsteinn segir að sýningar hafi verið lykillinn, sérstaklega á mörkuðum þar sem fólk vill sjá, snerta og spyrja.

Þau hjónin fóru líka bókstaflega „á veginn“ í húsbílaferðalag. Hann rifjar upp ferðir með húsbíl til Noregs, langt ferðalag þar sem markaðsstarfið fór fram á bryggjunni, í beinu samtali við heimamenn og kaupendur.

„Við vorum í tvo mánuði í annarri ferðinni og einn og hálfan í hinni,“ segir Hafsteinn. „Maður fór bara niður á bryggju og í bátana.“ Þau hjónin voru með bæklinga með sér og svo var þetta bara maður á mann en Norðmenn þekkja vel til þeirrar vöru sem Beitir framleiðir.

Umboðsaðili sem vildi fjórðung – og Beitir sleppti því

Eins og margir sem selja til útlanda prófaði Beitir að vinna með umboðsaðila en Hafsteinn segir að það hafi ekki gengið. „Þeir heimtuðu 25% af sölu fyrir það eitt að finna kaupanda,“ segir Hafsteinn. Í dag segist hann einfaldlega selja sjálfur héðan og það gangi vel.

Framtíðin og verkefnin sem fylla vikuna

Beitir hefur nú verið starfandi í 38 ár og eigendurnir eru komnir á eftirlaunaaldur. Það sé nóg að gera alla daga og Hafsteinn segir verkefnin oft vera of mörg. „Við vinnum hérna alla daga og meira að segja oft laugardaga og sunnudaga,“ segir hann. „Það er eiginlega allt of mikið.“

Hjá Beiti eru fimm starfsmenn. Fjórir starfsmenn eru á „gólfinu“ í smíðavinnunni og svo Þóra á skrifstofunni. Hafsteinn segir líka að fyrirtækið ráði vel við aukin verkefni – en þá eykst bara álagið á stjórnendur sem sjái fyrir sér að fara að hægja á ferðinni og aðrir taki við keflinu.

Það kemur að því að fólk þarf að huga að framtíðinni. „Ég er orðinn sjötugur,“ segir Hafsteinn. „Og það er ekki alveg gaman að vera alltaf á fjórða gír,“ segir hann og brosir.

Hugmyndin hefur komið upp að selja fyrirtækið í einu lagi, húsið, tækjabúnaðinn og reksturinn, þannig að einhver geti tekið við og haldið áfram. „Ef það er einhver þarna úti sem langar að komast í alvöru bissness… þá er hægt að kaupa þetta og hafa nóg að gera,“ segir Hafsteinn.

Vaxið af eigin rótum

Beitir ehf. er dæmi um fyrirtæki sem hefur vaxið af eigin rótum: úr bílskúr í verkstæði, úr beitingartrekt í heilan heim af ryðfríum lausnum. Og á leiðinni safnast sögur og orðið til mikil og góð vinátta á milli landa. Þau hjón fá oft góða gesti frá Grænlandi þegar þeir eru á ferðum milli Grænlands og Danmerkur með „millilendingu“ í Vogum. Þau hjón hafa einnig farið margar ferðir til Grænlands og eiga í góðu sambandi við viðskiptavini sína þar. Þau hafa dvalið á Grænlandi löngum stundum og segja Grænlendinga trausta vini.

Í gegnum árin hafa Grænlendingar oft átt erfitt með að útvega fjármagn. Margir Grænlendingar sjá sjaldan pening og hafa verið í viðjum kerfis sem var svipað og kaupfélögin hjá á Íslandi fyrir margt löngu. Þeir fengu sín veiðarfæri og búnað til veiða hjá „kaupfélaginu“ og lögðu inn aflann á móti sem greiðslu. Nú er hins vegar að verða breyting á og heimamenn eiga auðveldara í dag að fá fyrirgreiðslu þar sem áhugi heimsbyggðarinnar á Grænlandi er orðinn meiri.

Núna er Beitir að vinna að stóru verkefni fyrir Grænlendinga með smíði á hrognaskiljum og tengdum búnaði fyrir verkun grásleppuhrogna. Önnur vinnslan er í Maniitssoq og hin í Qeqertarsuaq. Hafsteinn sér fyrir sér að hann fylgi verkefninu út til Grænlands á næstu vikum, enda nauðsynlegt að fylgja verkinu alla leið.

Þá er Beitir einnig með verkefni í Skipasmíðastöð Njarðvíkur, þar sem fyrirtækið hefur verið að smíða allan búnað í fiskiskip, og austur á fjörðum, þar sem mikið er að gera fyrir álverið á Reyðarfirði.

Arion banki og Vörður opna nýtt útibú í Reykjanesbæ í vor

Thu, 15 Jan 2026 11:19:07 GMT

Á vormánuðum 2026 opna Arion banki og Vörður nýtt útibú í Reykjanesbæ. Núverandi starfsemi Varðar í Reykjanesbæ flyst í sameiginlegt húsnæði með Arion banka sem stendur á þróunarsvæði Aðaltorgs við Reykjanesbraut. Aðgengi við Aðaltorg er einstaklega gott fyrir íbúa Suðurnesja, beint frá stofnbraut, og næg bílastæði verða fyrir utan útibúið.

Um er að ræða svokallað kjarnaútibú þar sem verður að finna fjölbreytta fjármála- og tryggingaþjónustu fyrir einstaklinga og fyrirtæki. Útibúið verður staðsett í þjónustukjarna á fyrstu hæð og gert er ráð fyrir að fjöldi starfsfólks verði um tólf manns til að byrja með. Ráðinn hefur verið svæðisstjóri, Einar Hannesson, og fyrir eru þrír starfsmenn Varðar í Reykjanesbæ. Störfin í Arion banka verða auglýst í janúar. 

Iða Brá Benediktsdóttir, framkvæmdastjóri viðskiptabankasviðs og aðstoðarbankastjóri Arion banka:
„Opnunin markar viss tímamót hjá Arion banka því að við höfum ekki opnað nýtt útibú í langan tíma, svo að þetta er virkilega spennandi verkefni. Þá er mikil gróska á þessu svæði og við viljum styðja við uppbygginguna og kröftugt atvinnulíf á svæðinu. Það eru spennandi tímar fram undan í Reykjanesbæ.“

Iða Brá Benediktsdóttir framkvæmdastjóri viðskiptabankasviðs og aðstoðarbankastjóri Arion banka.

Guðbjörg Heiða Guðmundsdóttir, forstjóri Varðar:

„Við erum full tilhlökkunar fyrir opnun nýja útibúsins á Aðaltorgi við Reykjanesbraut. Vörður á sér langa sögu í Reykjanesbæ, enda höfum við verið með útibú í þessu öfluga sveitarfélagi síðan 1999. Nú færum við okkur í rýmra húsnæði með Arion banka á frábærri staðsetningu, og getum því veitt enn betri alhliða fjármálaþjónustu til íbúa Reykjanesbæjar á einum stað. Við erum til staðar fyrir Reykjanesbæ og hlökkum til að taka á móti viðskiptavinum í nýju húsnæði.“

Guðbjörg Heiða Guðmundsdóttir, forstjóri Varðar.

Sigríður Margrét Oddsdóttir nýr forstjóri Bláa Lónsins hf.

Tue, 06 Jan 2026 13:36:18 GMT

Sigríður Margrét Oddsdóttir hefur verið ráðin forstjóri Bláa Lónsins hf. frá 16. mars næst komandi. Grímur Sæmundsen sem verið hefur forstjóri Bláa Lónsins hf. frá stofnun þess 1992 lætur þá af störfum en tekur sæti í stjórn félagsins á næsta aðalfundi.

„Við bjóðum Sigríði Margréti velkomna til starfa. Ég tel þetta réttan tímapunkt fyrir félagið að ég stígi nú til hliðar sem forstjóri og feli öðrum að takast á við þær áskoranir og tækifæri sem eru fram undan og hlakka mjög til samstarfsins við Sigríði Margréti,“ segir Grímur Sæmundsen í tilkynningu.

„Ég tel það frábært tækifæri að fá að leiða starfsemi Bláa Lónsins hf. í samvinnu við stjórn félagsins og þann góða hóp sem starfar hjá félaginu, þau hafa byggt upp fyrirtæki sem er einstakt á heimsvísu. Ég sé ótal tækifæri í starfsemi félagsins og í íslenskri ferðaþjónustu sem verður mjög áhugavert og gaman að fá að takast á við á næstu árum,“ segir Sigríður Margrét Oddsdóttir í tilkynningunni.

Um 800 starfsmenn starfa hjá Bláa Lóninu hf. Undir rekstur félagsins fellur samnefndur áfangastaður og tengd starfsemi á Reykjanesi, þar á meðal hótelin Retreat og Silica. Einnig á og rekur félagið Highland Base í Kerlingarfjöllum og er að byggja upp baðstað, hótel og alhliða ferðaþjónustu í Þjórsárdal auk þess að undirbúa uppbyggingu á Hoffelli í Hornafirði. Þá á félagið hlutdeild í baðstöðunum Fontana við Laugarvatn, Jarðböðunum við Mývatn, Sjóböðunum á Húsavík og Vök á Egilsstöðum. Einnig hefur félagið á starfstíma sínum þróað og byggt upp húðvörufyrirtækið Blue Lagoon Skincare ehf, sem tekur nú fyrstu skrefin í alþjóðlegum vexti á þeim vettvangi.

„Ég elska að byggja upp, tengjast fólki og hafa gaman í leiðinni“

Wed, 31 Dec 2025 11:01:00 GMT

Nafn: Birgitta Ósk Helga Birgisdóttir

Aldur: 50 ára

Menntun: Sveinn í hársnyrtiiðn (hefur þó starfað lítið við það)

Starf: Meðeigandi Bústoðar og Snúrunnar – sér um verslunina í Garðabæ, vefverslun, samfélagsmiðla og auglýsingar

Búseta: Ytri Njarðvík / Reykjanesbær (síðan febrúar 2020)
Maður: Guttormur Pálsson húsasmíðameistari.
Börn: Valmar (29), Andrea (26), Patrekur (24), Páll (19).

Áhugamál: Golf, ferðalög, laxveiði (sérstaklega í Jöklu), fjölskyldutími og austurfötin.

Birgitta Ósk Helga Birgisdóttir er 50 ára og einn af eigendum Bústoðar og Snúrunnar. Hún er með ræturnar sínar á Borgarfirði eystra en hefur búið í Ytri Njarðvík (Reykjanesbæ) síðan í febrúar 2020. Birgitta sér um verslunina í Garðabæ, heldur utan um vefverslun, samfélagsmiðla og auglýsingar og er ein af þeim konum sem nýta kraft, forvitni og tengslanet til að skapa skemmtilegt og sterkt atvinnulíf – bæði á Suðurnesjum og út fyrir þau.

Hver er Birgitta Ósk?

Ég er Birgitta Ósk Helga Birgisdóttir, 50 ára. Ég er uppalin á Borgarfirði Eystri og er elst af fjórum systkinum. Það voru algjör forréttindi að alast þar upp. Ég er líka fjölskyldumanneskja – gift Guttormi Pálssyni sem er húsasmíðameistari frá Egilsstöðum og við eigum fjögur börn: Valmar 29 ára, Andreu 26 ára, Patrek 24 ára og Pál 19 ára.

Hvað starfar þú við í dag – og hvar?

Ég er ein af eigendum Bústoðar og Snúrunnar. Ég sé um verslunina okkar í Garðabæ og sinni líka vefverslun, samfélagsmiðlum og auglýsingagerð.

Hvernig byrjaði þetta ferðalag hjá Bústoð?

Ég byrjaði að vinna hjá Bústoð vorið 2023, þegar fyrirtækið var þá nýkomið með nýja eigendur. Svo kom ég inn sem meðeigandi ári seinna. Bústoð sem allir á Suðurnesjum þekkja er 50 ára og var rekin af sömu fjölskyldunni í 48 ár – rótgróin húsgagnaverslun sem margir kannast við.

Þið opnuðuð útibú í Garðabæ – hvað breyttist með því?

Við opnuðum útibú í Garðabæ um haustið 2024. Ég er verslunarstjóri þar og „keyri brautina góðu“ á hverjum degi. Við höfum fengið frábærar viðtökur og það hefur verið mikið að gera – verslunin er líka á rosalega góðum stað.

Og svo bættist Snúran við – segðu okkur frá því.

Já, í vor keyptum við Snúruna og bættum henni við hjá okkur. Svo nú rekum við tvær verslanir undir sama þaki, bæði í Garðabæ og Keflavík. Með Snúrunni fengum við geggjaða viðbót af gjafavöru og dásamleg merki sem við erum með einkarétt á hér á landi. Snúran er líka með flotta vefverslun sem við erum alltaf að vinna í og bæta við.

Hvað er fram undan hjá ykkur – eitthvað spennandi á nýju ári?

Já, alveg klárt. Á nýju ári stefnum við á að bæta við nýjum og flottum vörum bæði í Snúruna og Bústoð. Við erum stöðugt að þróa vefverslunina og vera dugleg að koma með ferskar vörur og góða upplifun.

Menntunin þín er hársnyrtiiðn – hvernig tengist það því sem þú gerir í dag?

Ég er sveinn í hársnyrtiiðn, en hef nú minnst starfað við það. En ég held samt að allt sem maður lærir nýtist: þjónusta, smekkvísi, samskipti og að ná tengingu við fólk – það fer alveg með manni í rekstur og verslun.

Segðu aðeins frá uppvextinum á Borgarfirði eystri.

Pabbi minn var framkvæmdastjóri Álfasteins alla mína æsku og líf okkar fjölskyldunnar snerist bókstaflega um steina og grjót. Við eyddum líka ófáum stundum í fjallaferðum með mömmu og pabba. Ég reyni að fara austur eins oft og ég get – helst á Borgarfjörð til mömmu – og svo elska ég líka að vera á Egilsstöðum hjá systkinum mínum og öðrum ættingjum.

Hvernig var skólagangan þín?

Ég var í grunnskóla á Borgarfirði, fór síðan í Alþýðuskólann á Eiðum, svo í Menntaskólann á Egilsstöðum og svo iðnskólann í Reykjavík.

Þið hafið verið dugleg að „bralla“ saman, þú og Guttormur. Hvað hafið þið gert?

Við höfum brallað ýmislegt saman. Við höfum búið í Hafnarfirði, á Egilsstöðum og núna í Reykjanesbæ / Ytri Njarðvík. Við höfum rekið gistihús á Egilsstöðum, byggt hús, gert upp íbúðir og selt. Við ákváðum að flytja suður þar sem maðurinn minn var að byggja hér og það var nóg að gera.

Þú opnaðir eigin verslun – hvernig var sagan þar?

Ég opnaði verslun á Egilsstöðum 2017 sem hét Verzlunarfélagið og rak hana þar alveg þar til við fluttum á Suðurnesin árið 2020. Þá tók ég búðina með mér og opnaði hana á Hafnargötunni og rak hana þar í 3 ár. Ég átti góðan tíma á Hafnargötunni.

Þú fórst líka í miðbæjarmál – hvað kom til?

Ég fór strax að starfa fyrir miðbæjarsamtökin Betri Bær og fór í stjórn þar. Í gegnum Betri Bæ kynntist ég fullt af góðu og skemmtilegu fólki. Þar sem ég þekkti kannski fjóra í bænum þegar við fluttum hingað, þá er algjör snilld að henda sér í svona félagasamtök til að kynnast fólki – og sérstaklega frábært að fara inn í FKA

Hversu lengi hefur þú búið á Suðurnesjum?

Við höfum búið í Njarðvík síðan í febrúar 2020. Við náðum að flytja svona rétt fyrir Covid.

Hverjir eru kostirnir við að búa á Suðurnesjum?

Hvað það er stutt til útlanda… nei djók! En jú, það er bara mjög gott hérna. Fólkið er frábært og við vorum strax velkomin í bæjarfélagið. Svo eru góðir golfvellir – en það mætti alveg vera aðeins meira af logni. Að flytja frá Egilsstöðum á Suðurnesin krafðist jákvæðni gagnvart veðurfari… hahaha.

Hvernig líst þér á FKA Suðurnes?

FKA er dásamlegt félag og það er alltaf gaman að fara á fundi og á hittinga. Það er eitthvað við að hitta frábærar konur og næra sál og líkama með gleði og hlátri.

Hvað varð til þess að þú skráðir þig í FKA?

Ég gekk í félagið stuttu eftir að ég flutti suður og meðan ég rak Verzlunarfélagið. Eftir að ég lokaði búðinni hætti ég í félaginu – en ég saknaði þess alltaf. Eftir að ég byrjaði aftur í fyrirtækjarekstri skráði ég mig fljótt aftur í félagið.

Hvað finnst þér FKA gera fyrir þig?

Ég hef kynnst frábærum konum sem ég hefði aldrei kynnst ef ekki væri fyrir þennan félagsskap. Það er svo dýrmætt að mynda gott tengslanet – bæði fyrir þig sjálfa og fyrirtækið. Mig langar að vera miklu duglegri að sækja það sem er í boði og ég þarf endilega að koma mér inn í golfið með þeim, ég held að það sé stuð!

Þegar þú ert ekki að vinna – hvað finnst þér skemmtilegast að gera?

Aðaláhugamálið mitt, annað en vinnan, er golf. Það er ekkert betra en að spila með góðum vinum og fjölskyldunni. Við eigum ófáar góðar samverustundir – ég, maðurinn minn og yngsta barnið spila líka mikið með okkur. Svo finnst okkur ekkert leiðinlegt að skreppa í eina góða laxveiði, sérstaklega austur í Jöklu. Ég elska líka að ferðast – spila golf, en líka að skoða nýja og spennandi staði.

Hvað er á döfinni hjá þér næst?

Það sem er á döfinni hjá mér á næstunni er að skreppa á sýningu til Parísar í janúar. Svo förum við að sjálfsögðu austur á Borgarfjörð á þorrablót – það er alveg nauðsynlegt að komast á alvöru gamaldags sveitaþorrablót og hlæja með fjölskyldu og sveitungum.

Að lokum – ert þú með heilræði til kvenna á Suðurnesjum?

Ekki hika við að koma í FKA, alveg óháð því hvað þið eruð að gera. Mér fannst fyrst að ég ætti bara erindi þangað sem fyrirtækjaeigandi – en hafði rangt fyrir mér. Félagið er fyrir allar konur, hvað sem þær eru að gera í atvinnulífinu.

Lokaorð

„Elsku FKA-konur, gleðilega hátíð og takk fyrir liðið ár. Hlakka til að gera svo miklu meira með ykkur á nýju ári. Ást og friður.“

Keflavík í Ísbílnum

Mon, 29 Dec 2025 05:44:00 GMT

Keflvíkingurinn Guðjón Kjartansson ásamt konu sinni, Tinnu Lyngberg Andrésdóttur, keyptu í félagi með Ragnari Guðmundssyni og Svanhildi Ö. Magnúsdóttur rekstur Ísbílsins sem margir þekkja af bjölluhljómnum.

Guðjón segir í samtali við Viðskiptablaðið að bílar á vegum fyrirtækisins hafi undanfarna daga verið á ferð um landsbyggðina að selja ís til ungra sem aldna.

„Við erum með fimm bíla úti á landi en það er ákveðin hefð hjá okkur að selja ís á landsbyggðinni fyrir jólin. Bílarnir hafa verið á Vestfjörðum, Skagafirði, Borgarfirði, Reykjanesi og á Suðurlandi í kringum Hvolsvöll frá því um miðjan desember.“

Guðjón segir að rekstur Ísbílsins sé í raun tvíþættur því hann sé einnig notaður í fleiri tegundir matvæla.

„Það er Ísbíllinn eins og við borgarbörnin þekkjum hann, þar sem bjöllunni er hringt og fólk stekkur út og kaupir íspinna fyrir sig og börnin. Svo er Ísbíllinn líka þjónustufyrirtæki fyrir bændur og minni byggðir úti á landi þar sem við seljum ís og önnur frosin matvæli eins og fisk, kjöt og rækjur.“

Á bakvið Ísbílinn eru 14 bílar sem fara um landið. Guðjón segir að Ísbíllinn, sé því í raun nærri því að vera matvöruverslun á hjólum þegar kemur að landsbyggðarstarfseminni. Þá selji Ísbíllinn einnig ístegundir sem fást hvergi annars staðar, bæði úr bílnum og í gegnum netverslun.

„Fyrsta verkefnið okkar var í kringum verslunarmannahelgina og svo höfum við verið að vinna í því að koma fyrirtækinu á nýjan stað, læra inn á reksturinn, ráða inn fólk og undirbúa okkur eins vel og við getum fyrir næsta sumar,“ segir Guðjón í viðtalinu við Viðskiptablaðið.

Mikil þróun og ný verkefni

Fri, 26 Dec 2025 14:28:00 GMT

„Það er mikið að gerast, mikil þróun í gangi, ný verkefni og talsverðar breytingar hafa verið undanfarið hjá okkur í jákvæða átt, þannig að staðan í Skólamat er góð – bæði hjá okkur og á þessum markaði sem við störfum á,“ segir Jón Axelsson forstjóri Skólamatar en fyrirtækið er orðið eitt það stærsta og í hópi þeirra elstu á Suðurnesjum. Það fagnaði aldarfjórðungsafmæli í fyrra.

Jón segir að breytingar hafi verið á markaðnum og líka hjá fyrirtækinu innanhúss. Þá hafi fyrirtækið verið í mikilli þróun.

„Við höfum verið að bæta hjá okkur tækjakost sem auðveldar okkur að bjóða upp á aukið úrval af aðalréttum og meðlæti. Við höfum verið að bæta við tækjakost líka til að auka afköst því fyrirtækið er í vexti og við höfum verið svona að finna hvernig á að takast á við vöxtinn hjá okkur. Skólamatur hefur verið að vaxa um það bil 10% á ári í nokkuð mörg ár. Það kemur í svona þrepum hvar áskoranirnar eru í því.“

Jón segir nýjan tækjabúnað styðja við stefnu fyrirtækisins um hollustu.

„Þetta eru sérhæfðar græjur sem samt gera það að verkum að við getum fylgt þessari stefnu að bjóða alltaf upp á hollasta kostinn sem mögulegt er.“

Samanburður við útlönd sýni að Íslendingar standi sig vel.

„Það er mikill munur á því hvernig matseðlarnir eru fram settir, raðað saman og innihaldið á réttunum og við sjáum það í erlendum samanburði að við getum verið rosalega stolt af því sem við bjóðum okkar viðskiptavinum upp á. Og það er út af þessari þróun sem átt hefur sér stað á 25 árum.“

Frá 12.000 í hádeginu upp í 120 skóla og milljarða veltu

Þið hafið vaxið mikið frá því að þið voruð 20 ára fyrirtæki. Hverjar eru helstu lykiltölurnar í dag – starfsmenn, veltan, umfang?

„Þegar við voruð 20 ára fyrir, fyrir sex árum síðan, vorum við að ná 12.000 máltíðum í hádeginu og vorum að sinna 60-70 skólum og þá var það mestan part grunnskólar. Á þessu tímabili höfum við bætt við okkur gríðarlega mikið af leikskólum og það er talsverður munur á þjónustu við leik- og grunnskóla. Leikskólarnir bjóða upp á morgunmat, ávaxtanesti, hádegismat og síðdegisnesti og það eru minni einingar í hvern skóla. Þannig að við höfum nálgast það talsvert öðruvísi.“

Rekstur Skólamatar hefur aukist á flestum sviðum, í veltu, fjölda starfsmanna og umfangi en ekki er langt síðan að fyrirtækið tók í notkun nýja viðbyggingu.

„Við erum að velta 3,5 til 4 milljörðum á þessu ári og hjá okkur eru um 240 starfsmenn. Núna erum við komin upp í 120 útstöðvar, leik- og grunnskóla og það eru aðeins fleiri leikskólar heldur en grunnskólar í þeim hópi.“

Þá bætast við heilmörg verkefni í einu, eins og nýlega í Reykjavík:

„Frá 1. október vorum við að bæta við okkur í Reykjavík til dæmis 30 skólum, 25 leikskólum og fimm grunnskólum. Það hefur verið mikið verkefni að takast á við því kerfin okkar eru orðin það rútíneruð. Innviðirnir okkar hafa tekist á við þetta ágætlega.“

Suðvesturhornið – og eldað á staðnum

Ykkar starfsemi er fyrst og fremst á stór höfuðborgarsvæðinu og suðvesturhorninu, er það ekki?

„Starfssvæðið er Reykjanesið, Hafnarfjörður, Garðabær, Kópavogur, Reykjavík og upp í Mosfellsbæ. Við höfum aðeins verið á Suðurlandi. Þannig að það er suðvesturhorn landsins sem er okkar starfssvæði. Það hentar alveg fyrir þetta konsept eins og það er hjá okkur, vegna þess að við erum að elda í hverjum leik- eða grunnskóla. Við erum alltaf með ofn, uppþvottavél og tæki og tól í öllum eldhúsum. Og við sjáum líka um starfsfólk í eldhúsinu, sérhæft starfsfólk.“

Jón leggur áherslu á að fólk misskilji stundum starfsemina þegar það sér bíla fyrirtækisins á ferðinni en þeir eru um tuttugu talsins.

„Margir halda að bílarnir okkar keyri á staðina með heitan og tilbúinn mat, þannig er það ekki. Við erum með mat sem er tilbúinn til eldunar sem er búið að undirbúa, magntaka og svo á lokaeldun sér stað í skólanum.“

Meginlínan sé sú að Skólamatur sjái um bæði hráefni og vinnuafl, en eldamennskan fari fram í skólunum sjálfum.

„Við erum með starfsfólkið í vinnu hjá Skólamat í leikskólanum eða grunnskólanum og það sér um matreiðsluna en fær bara tilbúinn „pakka“ sem hentar. Með þessu sparast mikið af sérhæfðu fólki sem kannski skortur er á. Með þessu þarf ekki að vera menntaður matreiðslumaður í öllum skólum. Þeir eru í miðlæga eldhúsi Skólamatar, tilbúnir í bakka upp fyrir fólkið sem vinnur í skólunum.“

Mikil sérhæfing – og stóra markmiðið

Jón segir að á bak við reksturinn sé mikil fagmennska og sérhæfing.

„Þannig að þetta starfar sem ein heild og við náum mikilli sérhæfingu. Við erum með matvælafræðing eða starfsmann með menntun í næringarfræði, nokkra matreiðslumeistara og mjög sérhæft fólk sem fylgir eftir gæðaferlum til að ná stóra markmiði Skólamatar, sem er að ná matnum sem fer á diskinn upp í munn og ofan í maga á börnunum okkar. Og það þarf að vera hollur matur, góður matur og svo margt annað.“

Stóra verkefnið sé að tryggja hollustu og gæði – og fylgjast skipulega með.

„Það er stóra verkefnið okkar sem við fylgjumst mikið með, með okkar mælitækjum, hvernig tekst til. Þannig að við erum meðal annars að þjónusta okkur foreldra, að börnin okkar borði hollan mat.“

Nýtt miðlægt eldhús – og spurning um næstu stækkun

Þið stækkuðuð nýlega húsnæði og tókuð nýtt miðlægt eldhús í notkun. Gengur það upp miðað við tíu prósenta vöxt eða þurfið þið þegar að huga að frekari stækkun?

„Við tókum í gagnið nýtt miðlægt eldhús 2023. Það var vegna þess að eldhúsið okkar var alveg sprungið. Við erum langt komin með að fylla þetta eldhús upp og við erum byrjuð að hugsa næstu skref af því að það tekur allt tíma. En við erum núna í 2.500 fermetrum í okkar húsnæði í Reykjanesbæ. Þar er sérstakt framleiðslueldhús sem framleiðir réttina okkar sem við gerum frá grunni sjálf. Við erum með sérstakt sérfræðieldhús sem er aðskilið frá öðrum, þar sem að við erum með mat fyrir þá sem eru með ofnæmi og óþol og þurfa sérþjónustu. Svo erum við með lager og starfsmannaaðstöðu og ýmislegt.

Þetta hefur nú bara tekist mjög vel, þessi framkvæmd sem við fórum í með stækkun á húsnæðinu. Við höfum auðvitað lært ýmislegt af því, en við erum mjög ánægð hvernig til tókst.“

Samt sé fyrirtækið þegar farið að horfa fram á næstu skref.

„Við erum svona á fyrstu skrefum í því að skoða hvað, hvernig maður vill stækka, hvort maður vilji bæta við núverandi húsnæði eða jafnvel að koma upp öðru eldhúsi ef að vöxturinn heldur áfram, sem maður veit aldrei. Svo þarf að taka varfærin skref í rekstri og passa að ekki sé farið of hratt og ekki of skammt heldur.“

Stór vinnuveitandi

Um þriðjungur viðskiptavina Skólamatar er á Suðurnesjum þar sem fyrirtækið er með aðsetur og því er stærri hluti viðskipta við fyrirtækið, eða tveir þriðju, utan Suðurnesja. Fyrirtækið er orðið stór atvinnuveitandi á svæðinu.

„Við erum með allan skalann, frá ómenntuðu fólki upp í hámenntað fólk með háskólagráður í okkar hópi. Stjórnunarteymið er fólk sem býr á Suðurnesjum.“

Hann bendir á að þjónustuaðilar séu líka að mestu héðan af svæðinu.

„Þetta er bara eins og atvinnulífið virkar og við finnum mikinn velvilja hér á svæðinu gagnvart okkar fyrirtæki, hjá þeim sem þjónusta okkur og við þurfum að eiga samskipti við. Það er mjög þægilegt og gott að reka þetta fyrirtæki í Reykjanesbæ, staðsett hér. Það hefur gengið vel að byggja upp húsnæði og fá pláss og aðgengi að fólki er bara mjög gott.“

Þið hljótið að teljast meðal stærstu fyrirtækja á Suðurnesjum, sérstaklega miðað við fjölda starfsmanna?

„Já, þetta er stórt hér á svæðinu og þegar ég segi 240 starfsmenn, það eru ekki mörg fyrirtæki þannig. Flugstöðin, eins og gefur að skilja, sker sig úr þar, en jú, við erum stór á Suðurnesjum.

En að matseðli dagsins hjá börnunum, hvernig er hann ákveðinn?

„Það er gert með því að hlusta,“ segir Jón og … með því að hlusta á viðskiptavinina, sem eru nemendur, starfshópar skólanna, foreldrar eða aðrir, og síðan er líka að fara eftir ráðleggingum færustu sérfræðinga hvað hollt er að bjóða upp á og kynna það, koma því í gegn.“

Jón segir að Skólamatur líti líka á sig sem þátttakanda í uppeldisstarfi.

„Við erum líka í uppeldisstarfi að kenna börnunum okkar að læra að meta ýmsar gerðir af mat. Það er ekki bara það að börnin séu að biðja um eitthvað óhollt eða eitthvað þannig, það er bara alls ekki þannig. Börnin sjálf, nemendur, hafa mikinn metnað fyrir bæði hollustu og gæðum og eru frábærir viðskiptavinir af því að þau láta skoðanir sínar í ljós.“

Hann segir að kerfisbundið sé fylgst með ánægju nemenda:

„Við fáum athugasemdir frá nemendum, en á hverjum einasta degi skráum við niður í öllum skólum sem við erum í, skráum niður ánægju með þann rétt sem var þann daginn. Og það gefur okkur mikinn mælikvarða á hvort það þurfi eitthvað að laga til næst þegar boðið er upp á þennan ákveðna rétt. Það eru margir þættir sem tekið er tillit til. Hollustuviðmið, ánægja, tíðni rétta – sumt má vera oft og sumt sjaldan – og hvernig reynslan er líka, hvað er nýtt í boði frá birgjum eða nýjar aðferðir sem við getum boðið upp á til þess að elda mat. En við mælum síðan árangurinn og förum eftir honum.“

Vinsælustu réttirnir – og ýsan

Geturðu nefnt þrjá vinsælustu réttina?

„Ég er ekki með þau fyrir framan mig en ég myndi segja kjúklingaborgari, tortilla og kannski grjónagrautur – hann er vinsæll hjá mörgum, ekki öllum. Ég ætla að skjóta á þetta,“ segir Jón og brosir.

Hvað með gömlu góðu ýsuna, er hún í boði?

„Hún er í boði og nokkuð oft en hún er ekki vinsælasti rétturinn. Það er ákveðin áskorun að bjóða upp á fisk, hvernig maður ber hann fram eða matreiðir eða hvernig hann er settur fram. Það er áskorun en við höfum náð ýmsum leiðum og þar skiptir líka samstarf við fiskbirgjana eða fiskvinnslurnar miklu máli. Þannig að það er boðið upp á ýsu, já,“ segir Jón og jánkar líka þegar hann er spurður hvort hún sé stundum steikt í raspi, sem er þekktur og vinsæll réttur á Íslandi.

Unnin matvara og gagnrýni

En hvað segirðu þá um kjúklingaborgara – myndi hann falla undir það að vera unnin matvara?

„Já, já, það, allur matur er unninn á einhvern hátt en ef við kannski skilgreinum það, unnin matvæli, þá eru þau mismikið unnin. Það sem kannski er verið svolítið að gagnrýna þar eru innihaldsefni sem eru í mat. Að vera ekki með mikið af viðbættum efnum sem eru notuð til bragðbæta eða lengja geymsluþol, til dæmis. Langt framleiðsluferli og mörg innihaldsefni eru blönduð saman í mat. Það er unnin matvara, já.

Þið fenguð gagnrýni fyrr á þessu ári frá móður í Reykjavík vegna innihaldsefna. Hvernig tókuð þið á því máli?

„Við fáum reglulega gagnrýni á matinn okkar, við köllum eftir því en þetta dæmi sem þú nefnir náði hátt í fjölmiðlum og við hlustum á það sem þessi áhugasama móðir hafði að segja.“

Hann segir að gagnrýnin snúist oft um innihaldslýsingar:

„Stundum er um það að ræða að fólk sé að lesa innihaldslýsingarnar okkar, sem eru mjög nákvæmar á netinu, og við höfum verið í fararbroddi með að birta nákvæmar innihaldslýsingar. Fólk þarf kannski skýringar á hvað hentar og ef einhverjar innihaldslýsingar eða innihald matvæla hentar ekki fyrir ákveðna einstaklinga, þá bjóðum við upp á sérfæði.“

Annars er maturinn okkar hollur og góður að mati flestra. Þannig að þegar kemur gagnrýni á innihald matarins þurfum við kannski að standa okkur betur í því hjá Skólamat að skýra hvaða innihaldsefni eru og til hvers þau eru og hvernig þetta er gert.

Við tókum þessari gagnrýni og hlustuðum eins og við gerum alltaf. Við teljum að við höfum komið á framfæri því sem þurfti og vorum í beinu sambandi við þessa konu, beint eða óbeint, og við þennan hóp. Allavega hefur umræðan dottið niður en við hvetjum til umræðu um gæði skólamáltíða af því að við höfum verið í fararbroddi við að bæta gæði skólamáltíða og munum halda því áfram.“

Hann rifjar upp að síðasti vetur hafi verið erfiður af ýmsum ástæðum.

„Veturinn í fyrra var erfiður líka vegna þess að það kom upp erfitt mál með mötuneyti í leikskóla sem við vorum ekki með. Það hafði áhrif á ímynd okkar allra gagnvart leikskólamötuneytum. Það var góð ábending um það hvað þetta er vandasamt að standa að þessu og þá þarf að vanda vel til verka. Og við fundum fyrir þeirri umræðu.“

Meðlætisbarinn vinsæll

Landlæknir hefur bent á að Íslendingar borði ekki nægilega mikið af grænmeti og ávöxtum. Þið hafið verið með salatbar og ávexti lengi. Hvernig gengur það?

„Við erum leiðandi í því að kenna ungu fólki að borða grænmeti og ávexti og höfum verið það í örugglega 20 ár. Það er búið að vera salatbar hjá okkur í langan tíma, mjög mörg ár.“

Jón segir að fyrirtækið hafi lært mikið um áhrif framsetningar.

„Við höfum lært mikið og þróað salatbarinn. Við sjáum að framsetning á grænmeti og ávöxtum skiptir miklu máli, hvernig það er skorið niður og hvaða grænmeti og ávextir passa með sem meðlæti. Er það forréttur eða desert?

Við höfum náð góðum árangri í að þróa meðlætisbarinn og erum í stóru átaki núna að auka úrvalið þar. Við erum að bjóða upp á bygg, salöt og svona meira úrval í meðlætisbarnum sem er nýja nafnið á salatbarnum.

Meðlætisbarinn geti líka verið valkostur fyrir börn sem eru ekki hrifin af aðalréttinum.

„Ef þú ert kannski ekki spenntur fyrir aðalréttinum er hægt að fara í meðlætisbarinn og fá sér alla vega eitthvað á móti.“

Hann nefnir sláandi dæmi um breytingu á neyslu þegar framsetningunni var breytt.

„Það var þegar við fórum úr því fyrir mörgum árum að bjóða upp á meðlætisbar þar sem hver og ein tegund var aðskilin frá annarri, ekki blandað salat í stórri skál, þá þrefaldaðist magn á hvern einasta nemanda sem hann fékk sér. Þá lærðum við að framsetningin skiptir máli og þá fórum við að þróa skurð enn betur og höfum þróað það mjög vel.“

Niðurstaða hans er skýr:

„Við teljum okkur kunna leiðir til þess að koma grænmeti og ávöxtum í börn þannig að þeim líki. Það er ekki okkar reynsla að það sé eitthvað erfitt. Það gengur bara mjög vel. Auðvitað misvel, misjafnt eftir aldri, en með því að prófa og athuga hvað virkar og hvernig, þá höfum við náð að finna leiðir til þess að koma grænmeti og ávöxtum að nemendum.“

Gjaldfrjálsar skólamáltíðir – breytingin stóra

Eftir síðustu Alþingiskosningar var ákveðið að skólabörn skyldu fá ókeypis, heita máltíð í grunnskólum. Sú ákvörðun hafði áhrif á Skólamat en hvernig hefur þessi breyting – gjaldfrjálsar skólamáltíðir – komið út fyrir fyrirtækið?

„Þetta gerðist fyrir síðasta skólaár. Þannig að það kom inn heill vetur og síðan þessi vetur, reynsla á þetta og þetta gerist í samstarfi stjórnvalda og verkalýðshreyfingarinnar. Þetta var mikil breyting fyrir okkur vegna þess að þetta var engin breyting í leikskólanum, en í grunnskólum var það þannig að foreldrar skráðu nemandann ef þau vildu fá skólamatinn og greiddu þá hluta verðsins og sveitarfélagið hluta.“

Jón segir að áður hafi skráning og greiðsla foreldra verið ákveðið „eftirlitskerfi“ í sjálfu sér.

„Ef ykkur líkaði ekki skólamaturinn þá bara skráðuð þið ekki nemandann í matinn. Við breyttum talsvert kerfunum okkar við þessa breytingu. Við þurftum að breyta hvernig nemendur voru skráðir til þess að þeir sem ekki vilja nýta sér skólamatinn geti þá haft það þannig. Þá sé ekki verið að búa til mat fyrir þá og ekki verið að rukka fyrir hann og finna leiðir til þess að minnka svo þetta verði ekki bara matarsóun.“

Lausnin sem þeir fundu felur enn í sér skráningu.

„Það er áfram skráning í grunnskólum. Foreldrar skrá nemandann þó að þau borgi ekki fyrir það. Ef nemandi mætir síðan ekki í ákveðið mikið, og nýtir sér ekki matinn nógu mikið, þá er hann strikaður út af þessum lista yfir þá nemendur sem eru með skólamat og ef hann síðan ákveður að vilja nýta sér það áfram, dettur hann inn á listann aftur. Við erum með ákveðin kerfi á þessu.

Þessi breyting var áskorun fyrir okkur en við teljum okkur hafa leyst hana vel í samstarfi við skólana. Við erum mjög stolt að segja frá því að matarsóun hefur ekki aukist við þessa breytingu, eins og við vorum hrædd um. Þannig að við höfum náð að halda utan um mætingu og kerfið virkar bara fínt.“

Heimilismatur – hugtak á hreyfingu

Getum við sagt að þetta sé heimilismatur í grunninn?

„Sko, hugtakið heimilismatur hefur verið svolítið á flökti undanfarin ár. Í huga okkar flestra er heimilismatur maturinn hjá ömmu. Þannig að við bjóðum upp á heimilismat, já, en það er bara misjafnt hvernig heimilin eru, með hvaða mat þau bjóða upp á. Yngri kynslóðir eru að breyta og við sjáum það á ýmsu að það er að minnka að heimilin geri mat frá grunni. Við erum svolítið að taka meira og meira undirbúinn mat inn á heimilið.“

En hann leggur áherslu á að grunnhugsunin sé samt sú sama:

„Þessi heimilismatur eins og við þekkjum hann er það sem virkar hjá okkur. Almennt er þetta venjulegur, góður heimilismatur.“

Mæting jókst

Hversu hátt hlutfall nemenda nýtti sér skólamat áður – og hvernig er staðan núna?

„Þetta var 80–85%. Einn til tveir nemendur sem voru ekki, af hverjum tíu. Nú er þetta komið upp í 90–95%, þannig að skráning nemenda klárlega jókst. Í þeim skólum sem við vorum í, var bara mætingin mjög mikil. Í yngstu árgöngum grunnskóla eru allir skráðir og voru allir skráðir. Í leikskóla eru allir að borða. Þegar kemur inn á fermingaraldur og unglingsárin er meiri sjálfstæður vilji. Þau vilja stundum fara að gera eitthvað annað og síðan í elstu bekkjum grunnskóla eykst mætingin aftur. Þetta eru mælingar sem við höfum séð ár eftir ár í mjög langan tíma.“

Hvernig meturðu þessa pólitísku ákvörðun – jákvætt, neikvætt eða hlutlaust?

„Við í Skólamat höfum sagt það lengi að við séum ekki pólitík. Þegar að pólitíkin er búin að taka sínar ákvarðanir gagnvart skólamat, þá mætum við og framkvæmum það þannig. Við tökum ekki afstöðu til þessa. En þetta var klárlega áskorun, okkar mælingar sýna að foreldrar eru ánægðir með þetta. Þó að þetta sé umdeilt í umræðunni, þá sjáum við það í okkar viðhorfskönnunum að foreldrar eru sáttir við þessa breytingu. Það er líka staðreynd að það eru fleiri að nýta sér skólamatinn, þannig að þetta er gott að því leyti.“

Aukinn kostnaður sveitarfélaga

Veistu til dæmis hvað þetta er að kosta Reykjanesbæ á hverju skólaári?

„Ég er ekki með það á hreinu en við sjáum það bara á umræðunni að bærinn hefur sagt, vegna gjaldfrjálsra skólamáltíða hefur kostnaður okkar aukist, en það lá alveg fyrir að ef þeir ætluðu að taka á sig hlut foreldra, þá væri það viðbótarkostnaður.“

Hvernig gekk þetta áður fyrir sig?

„Bærinn var áður að borga hluta af máltíð. Þetta virkaði þannig að það var gerður þjónustusamningur sem byggði á útboði. Þá voru einingaverð fyrir hverja máltíð sem að við afhendum og þá er ekki verið að rukka á jólum og páskum og þegar þeir eru í fríi og svona. Það var ákveðið verð og síðan gaf sveitarfélagið út gjaldskrá og hún var hluti af þessu verði og mismunurinn var greiddur af sveitarfélaginu. Við breytinguna yfirtekur sveitarfélagið hlut foreldranna en þetta var umtalsverð aukning fyrir sveitarfélagið.“

Hver er framtíðarmúsíkin og helstu áskoranir hjá Skólamat á næstu árum?

„Framtíðarmúsíkin gengur út á að halda áfram að hlusta á markaðinn, hvernig hann er að þróast, hvað er að gerast í skólamat almennt, hvað markaðurinn er að biðja um, en vera leiðandi líka í að kynna nýjar lausnir,“ segir hann en eitt stærsta verkefnið sé baráttan gegn matarsóun.

„Við höfum verið í miklu átaki í matarsóunarverkefni, að þróa tölvukerfin okkar þannig að við nýtum matinn betur og minna fari í ruslið, og þar höfum við náð gríðarlegum árangri.“

Hugmynd föðurins

Í lokin er óhjákvæmilegt að spyrja um uppruna hugmyndarinnar. Axel Jónsson, faðir þinn, hóf þessa vegferð árið 1999. Hvernig kviknaði hugmyndin?

„Viðskiptahugmynd pabba míns kemur þegar einsetning grunnskólanna átti sér stað. Nemendur hætta að fara heim í hádeginu og eru allan daginn í skólanum og þá þurfa þau að borða. Þannig kemur þetta til og þá þarf að fara að finna lausnir og síðan hafa lausnirnar þróast og batnað.“

Einsetning grunnskóla varð árið 1990. Níu árum síðar stofnaði hann Skólamat.

„Hann þurfti aðeins að melta þetta, koma þessu í gang. Hann hugsaði hratt. Markaðurinn þurfti að melta hans hugmyndir. En markaðurinn er í rauninni mjög sáttur í dag. Allavega þannig að það er vöxtur í eftirspurn á okkar þjónustu. Við erum og verðum bjartsýn og tökumst á við áskoranirnar með gleði og ánægju í samstarfi við marga aðila,“ segir Jón.

Samanburður við nágrannalönd – og Ísland fremst í flokki

Skólamatur hefur litið út fyrir landsteinana til að leita fyrirmynda – en niðurstaðan kom þeim sjálfum á óvart.

„Við erum búin að fara aðeins erlendis á sýningar eða skoða hjá kollegum okkar í Evrópu. Við héldum að við værum að fara að læra hvað væri hægt að gera, vorum að skoða þarna róbóta, færibönd og fleira í eldhúsum sem eru stærri en okkar. En við sáum það þegar við fórum að tala við kollega okkar að þar eru menn að færa sig úr því að vera með plastumbúðir sem eru sendar úr miðlægum eldhúsum, og síðan er umbúðunum hent, yfir í það að vera með margnota umbúðir sem við erum búin að vera með alla tíð.“

Skólamatur hafi til að mynda lengi notað margnota diska.

„Við vorum með postulínsdiska og færðum okkur síðan að mestu yfir í plastdiska sem eru léttari fyrir alla en eru margnota.“

Í matarsóunarmálum telur hann Skólamat vera skrefi á undan mörgum Evrópuríkjum.

„Kollegar okkar eru alveg á byrjunarreit gagnvart matarsóun. Þar er bara áætlað ákveðið magn og restin fer í ruslið. Við erum með kerfi sem hlustar í báðar áttir þannig að við sjáum hvað fór mikið og stillum magn sem sent er í skólann eða eldað út frá því. Og við erum líka með kerfi að ef það vantar mat, þá erum við með leiðir til þess að bæta í.

Með svona leiðum höfum við náð gríðarlega miklum árangri í matarsóun. Nú eru tveir aðilar sem bíða eftir að koma til okkar, annar frá Þýskalandi og hinn frá Frakklandi, sem vilja fá að skoða hvaða leið við hérna uppi á Íslandi erum að nota í að takast á við matarsóun, af því að menn sjá auðvitað kostnaðarsparnað, líka aukna ánægju þegar menn byggja svona tvíhliða kerfi. Þetta hefur komið okkur á óvart núna í vetur og síðastliðið vor þegar við vorum að fara út – þetta samstarf sem við höfum átt þarna – og ég sé að þetta er bara eitthvað sem er að þróast áfram og ég er mjög bjartsýnn gagnvart framtíð skólamáltíða á Íslandi.“

Komum vel út í samburði við útlönd

Hvernig er staðan í leik- og grunnskólum í nágrannalöndum okkar, til dæmis á Norðurlöndum?

„Það er mjög misjafnt,“ segir hann. „Danir til dæmis, við sjáum það á fólki sem við þekkjum í Danmörku að þar eru allir foreldrar bara að senda börnin með nesti. Og við fáum stundum svona skilaboð hérna, hvort að við getum ekki komið til Danmerkur – ‘ég er mjög leiður á að gera þrjár samlokur á dag fyrir hvert barn og þrjú börn, á hverjum degi’.“

Í Noregi eru menn eitthvað að byrja með heitar máltíðir. Í Svíþjóð er boðið upp á heitar máltíðir alls staðar og sveitarfélögin bjóða upp á það. Í Finnlandi er mikið talað um skólamáltíðir. Þar hefur það verið stór partur í góðu skólakerfi. Þar er alls staðar boðið upp á heita máltíð í leik- og grunnskóla. Í Þýskalandi er það svipað, það er boðið upp á á flestum stöðum, í Frakklandi og Bretlandi líka, þar er mikið um mötuneyti.“

Þannig að við erum bara framarlega, Íslendingar, miðað við þetta?

„Ég sé það hvað við erum mjög framarlega í að bjóða upp á, ekki bara skólamáltíðir, heldur hvaða máltíðir er boðið upp á,“ segir hann.

„Það sem boðið er upp á er að mínu mati – og það er auðvitað getur verið umdeilt og menn hafa allavega skoðanir á því – en að okkar mati í Skólamat eru gæði skólamáltíða og eldunaraðferðir sem við bjóðum upp á og samsetning matseðla mjög framarlega þegar við berum okkur saman við kollega okkar í Evrópu.“

Þrjúhundruð manns í Réttar-skötu

Tue, 23 Dec 2025 17:00:46 GMT

Um þrjúhundruð manns mættu í skötuveislu á Réttinum í Reykjanesbæ í hádeginu á Þorláksmessu. „Þetta eru nærri helmingi fleiri en í fyrra þannig að þetta kom okkur aðeins á óvart. En við vorum tilbúin og þetta gekk vel. Við buðum upp á ljúffenga skötu og fleira góðgæti,“ segir Magnús Þórisson, veitingamaður á Réttinum.

Á skötuhlaðborðinu var auk skötu, tindabykkja, saltfiskur og plokkfiskur. Þá gátu þeir sem vildu ekki fiskfang notið ljúffengs hangikjöts og tilheyrandi. Meðal eftirrétta var hátíðar grjónagrautur með sultu.

Tíðindamaður Víkurfrétta leit við um hádegisbilið og fékk sér skötu sem bragðaðist vel. Þá var húsfyllir en skötugestir komu frá klukkan hálf tólf til að verða tvö.

Hér að neðan má sjá nokkrar myndir frá skötufjöri á Réttinum.

Fyrirtækið sem óx upp úr gamla merkinu

Tue, 23 Dec 2025 07:34:00 GMT

Það vakti athygli þegar Blue Car Rental, ein stærsta bílaleiga landsins, fór í umfangsmikla og kostnaðarsama endurmörkun varðandi ásýnd fyrirtækisins og kynnti nýtt vörumerki í haust. Fyrirtækið var stofnað fyrir fimmtán árum með aðeins þrjá bíla í upphafi, er nú með yfir 130 starfsmenn á háannatíma og þjónustar tugþúsundir ferðamanna ár hvert.

Ólöf Lárusdóttir er vörumerkjastjóri hjá Blue Car og við spurðum hana: Þarf það virkilega?

„Svarið er já. Vörumerkið okkar var hætt að endurspegla raunverulegt umfang og stefnu fyrirtækisins. Við höfðum einfaldlega vaxið langt út fyrir það sem gamla merkið gat staðið fyrir,“ segir Ólöf.

Stofnað í bílskúr í Keflavík

Fyrir þá sem ekki vita var Blue stofnað í bílskúr í Keflavík. Magnús Sverrir og Guðrún Sædal settu af stað draum sinn með þremur bílum, logo sem frændi teiknaði og bláum lit sem táknaði heimabyggðina. Fimmtán árum síðar er fyrirtækið komið með yfir 130 starfsmenn á háannatíma og þjónustar tugþúsundir ferðamanna ár hvert.

Af hverju endurmörkun?

„Við fundum að vörumerkið hafði staðið kyrrt of lengi. Það skorti stefnu, stöðugleika og frásögn sem gæti leitt okkur inn í næsta kafla. Fyrirtækið hafði einfaldlega vaxið upp úr gamla merkinu. Markmiðið var að ná betra samhengi milli þess sem við gerum daglega og þess hvernig við birtumst út á við. Við vildum búa til ásýnd sem er jafn einstök og aðgreinandi eins og fyrirtækið sjálft.“

Ólöf segir að ráðast í þetta verkefni hafi ekki verið sjálfgefið. „Við þurftum að ræða, útskýra og sýna hvernig sterk vörumerkjahugsun getur hámarkað arðsemi fyrirtækisins. Hér skipti öllu máli að hafa stjórn sem trúði á breytinguna því svona verkefni er bæði tímafrekt og kostnaðarsamt. Finna þessa mikilvægu tengingu á milli fjármáladeildar og markaðsdeildar.“

„Fyrsta skrefið var að fara í gegnum heildræna vörumerkjarýni með Brandr. Við tókum viðtöl, gerðum netkannanir og héldum vinnustofur með starfsfólki, viðskiptavinum og samstarfsaðilum. Úr varð stefna sem skilgreindi kjarna BLUE loforð, staðfærslu, persónuleika og framtíðarsýn. Hún gaf okkur skýra mynd af því hver við erum í dag og hver við viljum vera í framtíðinni, hvernig skörunin er á milli, hvernig við sjáum okkur og hvernig aðrir sjá og upplifa okkur. Eftir að við fengum stefnuna í hendurnar þá var ljóst að ásýndin var ekki í takt við hvernig starfsmenn, viðskiptavinir og samstarfsmenn upplifðu vörumerkið.

Við fengum vörumerkjastofuna Saffron til að aðstoða okkur við að koma stefnu yfir í ásýnd. Samstarfið við Saffron í London leiddi okkur í gegnum nokkra möguleika en niðurstaðan var skýr. Við fundum að nýja ásýndin endurspeglar persónuleika BLUE.“

Tákn upphafs og enda ferðalags

Ólöf segir að merkið sameini fyrsta og síðasta staf nafnsins, B og E sem eru tákn upphafsins og endans á ferðalaginu. Þar á milli er ferðalagið sjálft.

„Þegar stafirnir mætast myndast stjarna sem lýsir veginn, rétt eins og við höfum gert fyrir milljónir ferðamanna í gegnum árin. Við bættum við mynstrum sem sækja innblástur úr íslenskri náttúru, árfarvegum, jöklum og eldsumbrotum. Nýr blár litur ásamt sérhönnuðu letri setur skýran og nútímalegan svip á allt sem við gerum. Þetta gefur okkur bæði stöðugleika og sterka aðgreiningu. Aðgreiningin var eitt af lykilmarkmiðunum í ferlinu. Við vildum losna undan þeirri mynd sem bílaleigur hafa lengi haft; málað bíl fyrir framan fjall eða foss. Þangað til núna hefði ég getað tekið hvaða auglýsingu sem er frá hefðbundinni bílaleigu, þar á meðal frá okkur, þannig það sé sagt, skipt út merkinu og fáir hefðu tekið eftir muninum. Nú hefur Blue sinn eigin svip, sína rödd og sína sögu sem enginn annar getur endurtekið.“

Með fólkinu frá fyrsta degi

Svona umfangsmikið verkefni snýst um svo mikið meira en hönnun og myndmerki að sögn Ólafar.

„Þetta sé menningarverkefni sem snýst um hvernig við hugsum, vinnum saman og tengjumst fólkinu okkar. Þar fær ný ásýnd sína raunverulegu merkingu.

Við lögðum mikla áherslu á að kynna breytingarnar fyrst fyrir starfsfólkinu. Við héldum starfsmannafund í miðju ferli þar sem við kynntum nýja ásýnd og fórum vel yfir af hverju breytingin skipti máli og hvaða tilgangi hún myndi þjóna í framtíðinni.

Starfsfólkið sem fékk að sjá merkið á undan öllum öðrum, ekki sem áhorfendur, heldur sem lykilaðilar sem var treyst fyrir að geyma þetta hjá sér um hríð áður en það fór út í kosmósið. Við vildum að starfsfólkið upplifði að það væri ekki bara að fylgjast með breytingu, heldur að taka þátt í henni. Að þau væru fyrst til að sjá nýja vörumerkið, fyrst til að bera það og fyrst til að segja söguna af því. Þannig myndu þau bera stoltið út til viðskiptavina.“

Áður en nýtt vörumerki var kynnt fyrir alheiminum hélt fyrirtækið innanhússkynningu á sprautuverkstæði þess þar sem kynntar voru lokaniðurstöður, þróun merkisins sýnd og sagan á bak við breytingarnar fyrir starfsfólkinu, mökum þess og börnum.

„Við dreifðum „Welcome to the new Blue“-gjafaöskjum með fatnaði og smávörum í nýju litasamsetningunni. Í framhaldi af því var merkið kynnt fyrir samfélaginu og þá er engin betri tími en á Ljósanótt þegar Keflavík og Njarðvík mættust í fótbolta. Það var táknræn stund, ekki bara vegna þess að tengingin við fótboltann í Keflavík er sterk, heldur líka vegna þess að þar á nafnið okkar sínar rætur. Þó að það hljómi vel að segja að Blue vísi í Blue Lagoon, þá var það í raun keflvíski blái liturinn sem skapaði nafnið.“

Menning og gildi

Ólöf segir að innleiðingunni sé langt frá því lokið og enn séu fjölmörg verkefni eftir.

„Eitt af fyrstu skrefunum okkar var að fá starfsfólkið til að anda að sér nýju gildunum ekki bara með því að kynna þau á blaði heldur með því að gera þau að sínum. Mér fannst þessi hluti sérstaklega fallegur og mikilvægur. Þetta var ekki bara kynning á nýju lógói heldur raunveruleg innleiðing á gildum í daglegt starf.

Fyrir mér hefur þetta ferli sýnt að endurmörkun snýst um svo mikið meira en bara hönnun þó svo að út á við sé það það sem flestir taka eftir. Þetta er ferðalag sem snýst um menningu sem birtist í samskiptum okkar, gildunum sem við stöndum fyrir og upplifuninni sem við sköpum saman. Ég er ótrúlega þakklát fyrir að vinna með teymi sem er hugrakkt, traust og með sköpunargleði sem flest fyrirtæki væru heppin með að hafa.“

Í vikunni var Blue Car tilnefnt sem eitt af bestu íslensku vörumerkjunum í flokki Vörumerki vinnustaðar. Þessi verðlaun eru veitt af Brandr og aðrir aðilar með því í flokki eru Íslandsbanki, Elko, Nox Medical, Nova og Sjóvá.

„Í febrúar verður svo sigurvegarinn tilkynntur. Það að hljóta þessa tilnefningu er einstaklega mikilvæg viðurkenning og skýr staðfesting á því að öll sú vinna sem hefur farið fram hjá okkur síðustu tvö ár er að skila sér bæði út á við og inn á við,“ sagði Ólöf að lokum.

Loksins kaffihús í Keflavík

Wed, 10 Dec 2025 13:49:22 GMT

„Það er óhætt að segja að KEF Café sé svar við kallinu frá bæjarbúum,“ segir Lilja Karen Steinþórsdóttir, aðstoðarhótelstjóri og markaðsstjóri á Hótel Keflavík, þegar hún er spurð hvað hafi kveikt hugmyndina að nýju kaffihúsi á hótelinu. „Í langan tíma hefur verið talað um að það vanti kósý, notalegt og fallegt kaffihús í Keflavík. Stað þar sem heimafólk geti hist, stoppað aðeins og notið góðra veitinga. Við ætluðum að taka þetta verkefni að okkur af alvöru og gera eitthvað sem bætir bæjarlífið okkar. Núna opnum við loksins hurðirnar að KEF Café.“

KEF Café er opið alla daga frá 05:00 til 17:00 og býður upp á hágæða kaffidrykki, nýbakað bakkelsi, sæta bita með kaffinu, og hið margrómaða morgunverðarhlaðborð Hótels Keflavíkur. „Við byrjum einfalt og vel,“ segir Lilja Karen. „Við viljum gera einn hlut í einu af fagmennsku en planið er að stækka þetta skref fyrir skref. Ef bæjarbúar eru ánægðir, og ef þetta verður sá vinsæli samverustaður sem við vonum, þá sjáum við fram á að þróa úrvalið miklu meira.“

Hún útskýrir að framhaldið gæti orðið afar skemmtilegt: „Við erum með fullt af hugmyndum. Næst á dagskrá er ‘High Tea’ upplifun þar sem gestir gætu notið te- og kaffisamsætis eða freyðivíns, smurð brauð, súpur, vöfflur, meira úrval af bakkelsi og alls konar smáréttum. Við erum opin fyrir hugmyndum bæjarbúa og viljum vinna út frá því sem fólk vill. Þetta er kaffihús fyrir samfélagið - ekki bara fyrir okkur.“

Skýr framtíðarsýn

Framtíðarsýnin er líka skýr: „Draumurinn er að samræma kaffihúsið og fallega Vatnsneshúsið við Hótel Keflavík, þannig að þessi tvö rými geti unnið saman í skapandi og fjölbreyttum rekstri. Þetta eru hugmyndir á teikniborðinu, en við ætlum að sjá hvað framtíðin ber í skauti sér.“

Umhverfið í KEF Café er hlýlegt, sjarmerandi og einstaklega vel hannað. Barsvæðið og glerskálar nýtast vel fyrir kaffihúsagesti yfir daginn, fullkomið fyrir létt spjall, vinahittinga, smá vinnu í tölvunni eða létta vinnufundi. „Við sjáum mikið af saumaklúbbum, vinahópum og fólki sem vill gera sér dagamun og hittast á notalegum stað,“ segir hún. „Glerskálinn er líka til dæmis hentugur fyrir foreldra í orlofi, þau geta lagt barnavagninn rétt fyrir utan glerið og setið í ró og næði með kaffibolla á meðan fylgst er með barninu. Svo þjónustum við að sjálfsögðu líka þá sem vilja bara rétt stökkva inn, grípa kaffi og krúðerí með sér út í daginn.“

Morgunverðarhlaðborð Hótel KEF er landsþekkt og afar vinsælt: „Við erum mjög stolt af úrvalinu okkar í morgunmat og viljum hvetja bæjarbúa til að nýta sér þetta oftar,“ segir Lilja Karen. „Hlaðborðið byrjar klukkan 05:00 og er frábær byrjun á deginum fyrir alla og er nýtt óspart af meðlimum KEF SPA meðlimaklúbbsins svo eitthvað sé nefnt. Það er fátt betra en að hefja daginn á góðri æfingu, skella sér í gufu og enda svo á hollum og góðum morgunmat.“

Markmiðið alltaf að hugsa lengra

Hún bætir við að það sé alltaf markmið KEF að hugsa lengra, gera betur og koma með nýjar hugmyndir: „Við reynum stöðugt að stíga út fyrir þægindarammann og þróa þjónustuna áfram. Við viljum þjóna bæjarbúum, gestum hótelsins og öllum sem vilja eiga góðar stundir.“

Að lokum sendir Lilja Karen hlýja jólakveðju:

„Ég býð alla hjartanlega velkomna á KEF Café. Þetta er yndisleg heimsókn í jólaösinni, að ganga um fallega bæinn okkar, koma inn í kósý og hátíðlegt rými, fá sér heitt súkkulaði og einn sætan mola og njóta augnabliksins.

Svo ég vitni nú í hann afa minn heitinn, Jón William Magnússon, sem stofnaði hótelið ásamt föður mínum, en hann hafði alltaf þessi einföldu og fallegu orð að leiðarljósi: Höfum gaman saman. Það er einmitt stefnan okkar hér á KEF - að skapa fleiri tækifæri til að njóta samverunnar og hafa gaman saman. Gleðilega hátíð.“

https://kef.is/is/cafe/

Lilja Karen Steinþórsdóttir, aðstoðarhótelstjóri og markaðsstjóri á Hótel Keflavík.

Sjöþúsund vinningar í Jólalukku VF

Wed, 10 Dec 2025 09:21:14 GMT

Átján verslanir á Suðurnesjum eru með í Jólalukku Víkurfrétta 2025 en þetta er í tuttugasta og þriðja skipti sem Víkurfréttir standa fyrir þessum vinsæla skafmiðaleik í samvinnu við verslanir í Reykjanesbæ í desember. Sjö þúsund vinningar verða skafðir af Jólalukkumiðum fyrir þessi jól en þeir eru frá fimmtíu fyrirtækjum á Suðurnesjum. Viðskiptavinir í þessum 18 verslunum fá Jólalukku skafmiða versli þeir fyrir 8 þúsund krónur.

Þá verða sextíu vinningar í þremur útdráttum í desember en dregið verður úr miðum (með engum vinningi á) sem skilað er í Nettó verslanir í Njarðvík og Keflavík. Stærsti útdráttarvinningurinn er glæsilegur hægindastóll frá Bústoð í Keflavík, fjögur Smart LG-sjónvörp auk tuttugu 15 þús. kr. inneignarvinninga frá Nettó. Nöfn vinningshafa verða birt á vf.is.

Færri farþegar um Keflavíkurflugvöll 2026

Mon, 08 Dec 2025 11:19:18 GMT

Spá Isavia fyrir árið 2026 gerir ráð fyrir að ríflega 7,5 milljónir farþega fari um Keflavíkurflugvöll (KEF), samanborið við 8,12 milljónir árið 2025. Það jafngildir 7,4% samdrætti á milli ára.

Aftur á móti er gert ráð fyrir að fjöldi erlendra ferðamanna sem heimsækja Ísland haldist nánast óbreyttur – um 2,24 milljónir árið 2026, sem er aðeins 1,2% minna en á þessu ári. Samdrátturinn í farþegafjölda tengist því fyrst og fremst fækkun tengifarþega og færri utanlandsferðum Íslendinga.

„Það er ljóst að eftirspurnin eftir Íslandi er áfram mjög mikil. Við gerum ráð fyrir álíka mörgum erlendum gestum og undanfarin ár,“ segir Grétar Már Garðarsson, forstöðumaður flugfélaga- og markaðsmála á Keflavíkurflugvelli. Hann bendir á að brotthvarf Play hafi haft áhrif á framboð, en með markvissri vinnu hafi tekist að lágmarka áhrifin á komu erlendra ferðamanna.

Mikill samdráttur í tengifarþegum og utanlandsferðum Íslendinga

Samkvæmt farþegaspá KEF fyrir 2026:

Heildarfjöldi farþega verður 7,51 milljón (8,12 millj. 2025) – 7,4% fækkun
Tengifarþegum er spáð að fækki um 15,3%
Utanlandsferðum Íslendinga er spáð að fækki um 13,2%
Brottfarar- og komufarþegum fækkar minna, eða um 4,5%.

Grétar Már segir að unnið hafi verið markvisst að því að fylla skarðið sem Play skildi eftir sig sem næststærsta flugfélag flugvallarins. „Ef við berum spána saman við rauntölur 2025 án Play sjáum við reyndar 5,3% fjölgun heildarfarþega á milli ára, sem sýnir að öðrum flugfélögum gengur vel að taka við hluta af því umfangi,“ segir hann.

Erlendir ferðamenn eru stöðugir – Íslendingar draga saman seglin

Í ferðamannaspá KEF fyrir 2026 er gert ráð fyrir:

2,24 milljónum erlendra ferðamanna til Íslands (2,27 millj. 2025) – 1,2% breyting
602 þúsund utanlandsferðum Íslendinga, samanborið við 693 þúsund á þessu ári – 13,2% fækkun

Grétar Már segir jákvætt að fjöldi erlendra ferðamanna sé orðinn stöðugur. Frá árinu 2023 hafi fjöldinn verið á bilinu 2,2–2,3 milljónir á ári, sem sýni að Ísland haldi áfram að vera sterkur áfangastaður á alþjóðavísu.

Ný flugfélög og fleiri tengingar

Þrátt fyrir samdrátt í tengifarþegum verður áfram mikið líf á flugvellinum:

27 flugfélög munu fljúga áætlunarflug til 80 áfangastaða yfir sumarið
20 flugfélög til 65 áfangastaða yfir veturinn
Tvö ný flugfélög, Alaska Air og Air Transat, hefja áætlunarflug til KEF
Tíu nýjar tengingar bætast við – fimm í Norður-Ameríku og sex í Evrópu
Hlutfall tengifarþega verður um 25%, sem er lægra en undanfarin ár

Um spána

Farþegaspá Keflavíkurflugvallar byggir á greiningu á eftirspurn eftir flugi til og frá landinu, á áformum flugfélaga, afgreiðslutímum sem þau hafa tryggt sér og gögnum úr innri kerfum flugvallarins.

Niðurstaðan: færri farþegar í heildina 2026 – en Ísland heldur áfram að laða til sín álíkan fjölda erlendra gesta og undanfarin ár.

Snjótörnin kom á óvart

Mon, 24 Nov 2025 09:33:00 GMT

Fyrstu mánuðirnir hafa gengið afar vel og við höfum fundið fyrir miklum áhuga frá íbúum á svæðinu. Viðtökurnar hafa verið framar vonum og það hefur verið ánægjulegt að fá þetta traust strax frá upphafi,“ segir Reynir Stefánsson, framkvæmdastjóri Dekkjahallarinnar sem opnaði á Fitjum í Njarðvík í haust.

„Snjótörnin kom öllum á óvart snemma í október, en starfsfólkið hjá okkur stóð sig frábærlega. Við vorum með gott verklag og tókst að taka móti öllum sem komu án mjög langra biðraða. Þessi snjótörn var góð prófraun á nýja verkstæðið og tækjabúnaðinn – og við stóðumst hana vel.“

Reynir segir að boðið sé upp á alla helstu dekkjaþjónustu: dekkjaskipti, jafnvægisstillingu, viðgerðir á dekkjum og dekkjahótel. „Við erum líka með felgur frá MAK og bjóðum ráðgjöf varðandi stærðir, öryggi og hentugustu lausnir fyrir hvert ökutæki.“

Eruð þið með gott úrval af vetrar- og heilsársdekkjum, hvaða merki eru vinsælust hjá ykkur?

„Já, við erum með mjög breitt vetrar- og heilsársdekkjaúrval. Vinsælustu merkin hjá okkur eru Continental, Falken og Yokohama, en við bjóðum líka Triangle og Sonar sem eru hagkvæmur og góður kostur fyrir marga. Þetta eru allt merki sem við höfum reynslu af og vitum að skila góðri frammistöðu í íslenskum aðstæðum.“

Hvað með vetrardekk með nöglum eða ekki. Eruð þið að hvetja fólk til að sleppa nöglum?

„Við ráðleggjum viðskiptavinum út frá þeirra aksturslagi og aðstæðum. Naglar eru enn mjög góð lausn fyrir þá sem keyra mikið í hálku eða út fyrir þéttbýli, en nútíma naglalaus vetrardekk hafa þróast mikið og henta mörgum jafnvel betur. Við hvetjum fólk ekki sérstaklega að sleppa nagladekkjum heldur veljum saman bestu lausnina.“

Er hægt að geyma dekkin á dekkjahóteli hjá ykkur í Reykjanesbæ?

„Já, við erum með rúmgott, þurrt og öruggt dekkjahótel. Þetta hefur reynst sérstaklega vinsælt enda léttir það lífið hjá mörgum – ekkert burðarvesen og við sjáum um skoðun, merkingu og að dekkin séu í toppstandi fyrir næstu árstíð.“

Hvað varð til þess að þið ákváðuð að opna Dekkjahöllina í Reykjanesbæ og hvað skiptir mestu máli fyrir ykkur á nýjum stað?

„Við höfum séð mikla uppbyggingu á svæðinu og fannst vanta öfluga þjónustuaðstöðu fyrir íbúa og fyrirtæki. Það skiptir mestu máli fyrir okkur að vera nálægt fólkinu, bjóða upp á trausta þjónustu og vera rekstur sem stendur með samfélaginu.“

Að sögn Reynis eru starfsmennirnir með mikla reynslu úr dekkja- og bílgreinum. „Við leggjum mikla áherslu á fagmennsku og góða þjónustu, og erum stolt af því hversu vel teymið vinnur saman – sérstaklega á annatímum.“

Hvernig horfir veturinn við ykkur – eru einhverjar sérstakar áskoranir eða tækifæri í dekkjamarkaðnum núna?

„Veturinn lítur út fyrir að verða annasamur og við finnum fyrir aukinni áherslu á gæði og öryggi. Fólk er að velja betri dekk og vilji er fyrir persónulegri ráðgjöf. Stærsta áskorunin er að halda uppi hraðri þjónustu þegar álagið er mest, en það er jafnframt tækifæri til að sýna okkar styrkleika.“

Hvernig tryggið þið hraða og góða þjónustu á annatíma þegar langur biðtími í tímabókanir myndast víða annars staðar?

„Við leggjum mikið upp úr skipulagi, réttu flæði á verkstæðinu og góðri þjónustu. Á annatímum er teymið okkar samstillt og við byrjum snemma og vinnum seint ef þarf. Við viljum vera staðurinn þar sem fólk fær afgreiðslu án þess að þurfa bíða í margar vikur eftir tíma. Hjá okkur afgreiðum við úr röðinni og hægt að komast að samdægurs.“

Reynir segir að eitt af markmiðum Dekkjahallarinnar sé að vera þjónustuaðili sem fólk getur treyst, skapa störf í bænum og taka þátt í að byggja upp jákvætt atvinnulíf í Reykjanesbæ. „Við ætlum að vera til staðar fyrir íbúa, fyrirtæki og félög – og leggja okkar af mörkum til öryggis í umferðinni með góðri ráðgjöf og faglegri þjónustu.

Í nóvember er opið á laugardögum milli 10:00 og 14:00. Á virkum dögum er opnunartíminn klukkan 8:00 til 17:00.

(KYNNING)