Víkurfréttir - Sjávarútvegur

Góð veiði hjá netabátum

Thu, 24 Jan 2019 06:00:00 GMT

Núna er janúarmánuður langt kominn og veiðin hefur verið að aukast. Hjá netabátum hefur veiðin verið mjög góð og hafa þeir netabátar sem róa frá Sandgerði fiskað mjög vel.

Þeir hafa verið með netin rétt utan við Sandgerði í ekki nema um 30 mín til 1 klst stími beint út úr höfninni. Bergvíkin GK sem er áður Daðey GK hefur mokfiskað og landað 56 tonnum í 8 róðrum og mest 12 tonn í róðri. Báturinn rær einungis með 4 trossur og í hverri trossu eru 28 net.

Í hinum róðrunum þá var Bergvík GK með um 7 til 9 tonn í aðeins 3 trossur og það kom fyrir að áhöfnin léti Erling KE draga síðustu trossurnar þeirra.

Erling KE hefur líka fiskað vel og er kominn með 123 tonn í 12 róðrum og mest 25 tonn. Aðrir bátar eru t.d. Maron GK með 36 tn í 15, Grímsnes GK 50 tonn í 8 róðrum, Hraunsvík GK 22 tonní 11 og Halldór afi GK 16,5 tonn í 11.

Og talandi um Grímsnes GK þá átti áhöfnin á Grímsnesi GK frábært ár, árið 2018, því að báturinn varð aflahæstur allra netabáta á Íslandi með um 1750 tonna afla.

Þetta er mjög merkilegt því að stærsti hlutinn af þessum afla var ufsi og líka það að Grímsnes GK er það sem kallaður er kvótalítill eða kvótalaus bátur.

Grímsnes GK var eini netabáturinn á landinu sem einbeitti sér svona mikið að ufsa og var við veiðar að mestu með suðurströndinni á svæðinu frá Þjórsárósum og austur fyrir Vík í Mýrdal.

Af öðrum netabátum árið 2018 þá var t.d. Erling KE með 1378 tonn í 113 róðrum.

Maron GK 911 tonn í 216 róðrum og má geta þess að Maron GK réri næst mest allra netabáta á landinu einungis Bárður SH réri oftar eða 228 róðra og yfir alla báta á landinu óháð veiðarfæri þá var Maron GK einn af örfáum sem fór yfir 200 róðra. Maron GK var aftur á móti stærsti báturinn sem réri þetta mikið árið 2018.

Halldór Afi GK var með 531 tonn í 187 róðrum. Hraunsvík GK 319 tonn í 131, Valþór GK 311 tonn í 98 róðrum. Sævar KE 175 tonn í 45 róðrum.

Höfum miklar áhyggjur komi til verkfalls

Mon, 31 Oct 2016 11:32:55 GMT

„Við höfum miklar áhyggjur af framvindu mála komi til verkfalls. Það mun ekki síður koma niður á þeim fiskverkunum sem eiga engan kvóta og versla allt sitt á fiskmörkuðum,“ segir Ragnar Kristjánsson, framkvæmdastjóri Fiskmarkaðs Suðurnesja í Fiskifréttum.

Ragnar segir ljóst að samdráttur hjá Fiskmarkaði Suðurnesja yrði gríðarlegur í sjómannaverkfalli því framboð af fiski mun hrynja en stórar útgerðir eins og Þorbjörn, Vísir, Gjögur, Hraðfrystihúsið Gunnvör og Skinney-Þinganes séu með meira en 50% framboðs hjá FMS, þó það sé mest aðrar tegundir en þorksur. Þá muni verð hækka mikið því einhverjir muni þurfa að kaupa til að viðhalda viðskiptasamningum.
Ragnar segir að eitthvað af fiski muni berast inn á markaðina en það verði ekki mikið. Helst verði það aðilar í krókaaflamarkskerfinu sem muni róa harðast og reyna að leigja til sín heimildir ef það gefur til veiða vegna veðurs. Trillusjómenn muni reyna að sækja fisk eins og hægt er en veðrið muni hafa mikið að segja hvernig sú sókn gangi.

Sala á fiskmörkuðum í ágúst og september var sú mesta frá stofnun markaða. Fiskframboð inn á markaði hefur aukist á undanförnum árum og verð á þorski lækkað.

Skemmtiferðaskip til Grindavíkur í fyrsta skipti

Mon, 31 Aug 2015 11:05:43 GMT

Skemmtiferðaskipið Ocean Nova kom til Grindavíkurhafnar í gær. Skipið er sérútbúið til siglinga á norðurslóðum og er ekki stórt en það tekur aðeins 78 farþega. Þetta er í fyrsta skipti sem skemmtiferðaskip leggst að bryggju í Grindavík eftir því sem fram kemur á grindavik.is.
Skipð var sérstaklega smíðað til að sigla innan um ísjaka á Grænlandshafi og var sjósett árið 1992. Það er þrátt fyrir smæð sína vel búið og í því er vegleg aðstaða, m.a. sérstaklega til að fylgjast með náttúrunni en auk þess er stór veitingasalur, bókasafn og fleira.

Makrílveisla í Keflavíkurhöfn

Mon, 31 Aug 2015 10:11:39 GMT

Það hefur verið mikið makrílfjör við og í Keflavíkurhöfn síðustu daga og þessum sprettharða fiski verið landað í miklu magni frá bátum og þá hafa stangveiðimenn ekki látið sitt eftir liggja og einnig rifið hann upp.

„Það er búið að vera gaman að vera hér á bryggjunni undanfarið. Menn róta makrílnum upp og svo hefur selur verið hér í sömu veislu. Honum hefur ekki leiðst,“ sagði einn af nokkrum bryggjugestum við VF.

Þegar VF leit við stóð yfir löndun úr bátnum Hlödda VE en sá makríll og frá fleiri bátum hefur farið til vinnslu í Saltveri í Njarðvík. Þá var bátur í höfninni frá Stakkavík í Grindavík á leið til löndunar. Stóð flutningabíll frá fyrirtækinu beið eftir spriklandi makríl. Sem sagt makrílfjör í hæstu hæðum þó verð hafi lækkað og erfiðar gangi að selja hann.

Löndun úr Hlödda VE við Keflavíkurhöfn.

Makrílfjör í blankalogni á sunnudegi í Keflavíkurhöfn.

Selur hefur haldið sig í höfninni síðustu daga, í veislu.

Mannfólkið lætur sig ekki vanta á bryggjuna.

Landað úr Stakkavík í Grindavík. Flutningabíll beið á bryggjunni.

Nóg af makríl, sjá mátti bæjarbúa koma við og taka nokkra fiska í soðið eða á pönnuna.

Hrognaveisla í Helguvík

Wed, 23 Feb 2011 16:13:00 GMT

Sjómenn leggja nú kapp á að veiða sem allra mest áður en loðnan hryggnir og drepst. Enn er talsvert eftir af kvótanum, en tvívegis hefur verið bætt við hann frá upphafi vertíðar.

Nokkrir sjómenn af skipinu Erlingi starfa nú tímabundið við loðnuverkun í Helguvík og er búið að vera nóg að gera að sögn strákanna í flokkunarstöðinni í Helguvík. Þar er loðnunni dælt inn frá skipunum og hrognin tekin úr henni. Hrognin eru svo verkuð í gegnum ýmsar vélar og tæki og dælt í kör þar sem þeim er svo lokað með plasti. Körin eru svo keyrð í frysti.

siggi@vf.is

Helgi Þór Haraldsson, starfsmaður við loðnuverkun, var óhræddur við að smakka hrognin og sagði þau mjög góð.

Aflaaukning í september

Thu, 14 Oct 2010 08:56:54 GMT

Heildaraflinn á Suðurnesjum í september jókst úr 3,427 tonnum í 4,114 tonn á milli ára.
Aukning var í bolfiskafla, m.a jókst þorskaflinn úr 1,013 tonnum í 1264 tonn. Nokkru munar um uppsjávarafla sem var enginn í fyrra en 330 tonn nú.
Í Grindavík jókst þorskaflinn úr 369 tonnum í 625 tonn milli ára í september. Þar jókst heildaraflinn úr 2,018 tonnum í 2,627 tonn, samkvæmt tölum frá Hagstofunni um aflabrögð í september.

Vilja hefja strandveiðar 1. apríl

Mon, 04 Oct 2010 09:27:47 GMT

Strandveiðikerfið var fyrirferðamikið í umræðunni á aðalfundi smábátafélagsins Reykjaness sem haldin var fyrir helgi. Ákveðið var að leggja til við aðalfund LS að í stað 1. maí yrði byrjunartími á strandveiðum færður til 1. apríl á svæði D. Á fundinum kom fram ánægja með núverandi svæðaskiptingu. Hins vegar var megn óánægja með að ufsi skuli ekki talinn til þorskígilda í heildarafla í stað kílóa eins og nú er.

Á fundinum var rætt um kvótaþak í krókaaflamarki en núverandi reglur gera ráð fyrir að ekkert fyrirtæki í krókaaflamarki sé heimilt að eiga meiri hlutdeild en 4% í þorski, 5% í ýsu og 5% þorskígildum. Fram kom að þegar lögin voru sett hafi eitt fyrirtæki, Stakkavík, verið yfir þessum viðmiðunarmörkum og hefur Alþingi frestað því að það láti frá sér hlutdeild þannig að hún fari niður fyrir umrædd mörk. Fundarmenn voru á einu máli um að lagaákvæðið væri ósanngjarnt gagnvart fyrirtækinu og afturvirkni væri vafasöm. Samþykkt var að beina því til aðalfundar LS að hann beitti sér fyrir því að lögum yrði breytt þannig að fyrirtækið gæti haldið hlutdeild sinni.

Aðalfundur Reykjaness samþykkti og ítrekaði tillögur um takmörkun trollveiða og lokun svæðis vestan Reykjaness.

Mikil aflaaukning í ágúst

Tue, 21 Sep 2010 10:44:00 GMT

Talsverð aflaaukning varð á Suðurnesjum í ágúst á milli ára. Heildaraflinn nú nam 4.211 tonnum samanborið við 2.675 tonn í ágúst 2009. Bolfiskaflinn jókst úr 1.514 tonnum í 2.775 tonn. Munar þar mest um aukningu í ufsa úr 461 tonni í 1.195 tonn. Stærstum hluta ufsaaflans var landað í Grindavík. Þar nam heildaraflinn 3.367 tonnum í ágúst síðastliðnum samanborið við 2.125 tonn í ágúst 2009, samkvæmt samantekt Hagstofunnar.

Veiddu makríl fyrir 150 milljónir króna

Tue, 21 Sep 2010 08:56:46 GMT

Í síðustu viku lauk makrílveiðum hjá togurum Þorbjarnar hf. Í Grindavík en allir togarar fyrirtækisins stunduðu veiðarnar. Heildaraflinn var 980 tonn og heildarverðmæti aflans um 150 milljónir króna, samkvæmt því sem fram kemur á vef fyrirtækisins.

Grindavík þriðja kvótamesta höfnin

Wed, 01 Sep 2010 09:53:11 GMT

Nýtt fiskveiðiár gengur í garð í dag. Líkt og í fyrra fer stærstur hluti aflamarks í þorskígildum talið til skipa með heimahöfn í Reykjavík, næst mest til Vestmannaeyja, og þar næst Grindavíkur. Alls fara um 34% aflamarks til skipa með heimahöfn á þessum stöðum, samkvæmt því sem fram kemur í frétt á vef Fiskistofu.

Þorbjörn hf í Grindavík ræður yfir 15.013.651 þorskígildistonnum sem er 5,55% hlutdeild heildaraflamarks. Þorbjörn er þar með í fjórða sæti yfir þau fyrirtæki sem ráða yfir mesta kvótanum. Vísir í Grindavík er í sjötta sæti með 11.570.805 þorskígildi sem gerir 4,28% hlutdeild.

Þrjú stærstu fyrirtækin eru HB Grandi, Brim og Samherji. Alls er úthlutað 288.042 tonnum, samanborið við 310.451 tonn, sem úthlutað var við upphaf síðasta fiskveiðiárs.

Mettúr hjá Hrafni Sveinbjarnarsyni

Mon, 16 Aug 2010 08:32:01 GMT

Hrafn Sveinbjarnarson GK 255, sem Þorbjörn í Grindavík gerir út, landaði 550 tonnum í Grindavík á dögunum. Aflinn var blanda af þorski, ýsu, ufsa, karfa, og grálúðu.
Verðmæti aflans var kr. 163 milljónir og er það mesta verðmæti sem skipið hefur komið með úr einni veiðiferð en hún stóð í 30 daga, samkvæmt því er fram kemur á heimasíðu fyrirtækisins.

Aflaaukning í maí

Wed, 16 Jun 2010 15:31:16 GMT

Heildaraflinn á Suðurnesjum í maí síðastliðnum nam 7,510 tonnum samanborið við 5,561 tonn á sama tíma á síðasta ári. Í Grindavík jókst heildaraflinn aflinn úr 4,125 tonnum í 5,600 á milli ára í maí.

Þorskaflinn var í víð minni á milli ára en ýsuaflinn jókst úr 504 tonnum í 1145 tonn. Þá barst meira af ufsa í land eða 715 tonn samaborið við 515 tonn í sama mánuði síðasta árs.

Dragnótaveiðar við Ísland – til stuðnings Jóni Bjarnasyni sjávarútvegsráðherra

Fri, 07 May 2010 10:31:38 GMT

Dragnótin er líklega vistvænasta veiðarfærið sem notað er við Ísland í dag og hefur verið frá því veiðar með dragnót hófust um miðja 19 öldina. Veiðisvæði dragnótar spannar einungis um 3-5% af landgrunninu innan lögsögu Íslands.

Ástæður þessa takmörkuðu veiðislóðar dragnótarinnar eru þær að dragnót er einungis hægt að nota á leir, malar og sandbotni. Veiðar með dragnót á mörgum veiðisvæðum við landið eru einnig mjög árstíðabundnar vegna breytilegrar göngu ýmisa fisktegunda.

Ástæður þess að einungis er hægt að veiða með dragnót á mjúkum botni eru þær að dragnótin og tógin sem henni tilheyra festast í botni, veiðarfærið rifnar og skemmist ef út á harðan botn er farið.

Einnig takmarkar dýpi sjávar virkni dragnótarinnar og eru veiðar sjaldnast stundaðar fyrir neðan 150 faðma dýp. Hér er komin skýringin á því hversu smávægilegt veiðisvæði dragnótarinnar er í samanburði við öll önnur veiðarfæri sem notuð eru við Ísland.

Eðli málsins samkvæmt spilla dragnótaveiðar hvorki botngróðri, botnlagi né lífríki sjávar á nokkurn hátt, enda engu til að spilla og er nánast um veiðar á berangri hafsbotnsins að ræða þar sem lítill botngróður þrífst. Veiðar með dragnót örva vöxt og viðgang ýmisa fisktegunda með yfirferð sinni eftir hafsbotninum þar sem hinar fjölbreytilegu lífverur hafsbotnsins verða að fæðu flatfiska og bolfiska.

Fiskur veiddur í dragnót jafnt flatfiskar allskonar, sem og bolfiskar leita út af hörðum botni inn á veiðisvæði dragnótarinnar eftir æti, þá gjarnan á liggjanda við sjávarfallskipti. Það æti sem um er að ræða er td, sandsíli, trönusíli og ýmsar aðrar tegundir smáfiska og smádýra, td. sandormar og krabbadýr. Veiðislóð dragnótarinnar er matborð hinna ýmsu fiskitegunda.

Besta hráefnið.

Fiskur veiddur í dragnót er mjög stutt dreginn þegar hann kemur um borð í veiðiskipið, oft líða ekki nema 20-30 mínútur frá því dragnótinni er kastað og að búið er að hífa voðina og fiskurinn kominn um borð. Lítil pressa er á fiskinum þar sem hann er hífður um borð í litlum skömmtum og er þá sprell lifandi þegar hann er blóðgaður frá móttöku í rennandi sjó.

Ef vel veiðist geta pokarnir orðið margir sem þarf að hífa um borð, en reynt er að hafa pokana ekki stærri en svo að þeir rúmi ekki meira magn af fiski en sem nemur 500-1000 kg. Er þetta gert til að fyrirbyggja að fiskur kremjist og blóðspryngi með tilheyrandi skemmdum og losi í holdi.

Fiskur veiddur í dragnót er að jafnaði vænni en fiskur sem veiðist í önnur veiðafæri að netafiski undanskyldum og vegur sá þáttur í rekstri dragnótaskipa mikið fyrir afkomu veiðanna þar sem oft er mikil munur á verði góðs dragnótafisks og fisks sem veiddur er í önnur veiðafæri.

Veiðar með dragnót.

Áður en ákvörðun um kast með dragnót er tekin þá þarf að gæta að ýmsum þáttum er varða strauma, sjávarföll, vindátt og sjólag. Einnig hafa birtuskilyrði og sólarljós mikið um það að segja hvernig fiskast. Mjög misjafnt er eftir árstíðum, dýpi og svæðum hver áhrif mismunandi þátta hafa til árangurs af veiðunum.

Það sem vegur þyngst í góðum árangri við veiðarnar ásamt samspili margra þátta er án efa það fæðuframboð sem fiskurinn hefur á viðkomandi veiðislóð. Ef fæðuframboð er takmarkað á veiðislóð dragnótar er næsta víst að lítið sem ekkert veiðist.

Ef pláss og dýpi á veiðislóð dragnótar er nægilegt þá er oftast kastað allri vírmanilunni sem til staðar er um borð í skipinu en ef plássið er takmarkað eins og algengt er á veiðislóð dragnótar út af Vestfjörðum og víðar, þar sem verið er að kasta dragnót á sand polla og gjótur sem leynast víða úti í hrauni, þá er mjög misjafnt hversu miklu er hægt að kasta.

Geta dragnótarinnar til að ná í fisk er bundin innan þess svæðis sem tógin afmarka með legu sinni á hafsbotni. Mjög misjafnt er hversu mikið flatamál þess svæðis er, þar sem dýpi, straumur, hversu mikið skverað er og lengd tógana sem eru úti ráða mestu þar um, en oft er það einungis 1/3 af lengd tógana sem skafa botninn en 2/3 eru laus frá botni upp í sjó í átt til veiðiskipsins.

Lokaorð.

Veiðislóð dragnótarinnar er eins og frjór akur bóndans sem yrkir landið af alúð og dugnaði.

Dragnótaveiðar ætti samt sem áður aldrei að leyfa á uppeldisstöðvum fisks líkt og inn á fjörðum og víkum og ekki heldur á veiðislóð minni strandveiðibáta.
Undirritaður leggur til að dragnótaveiðar verði víðast hvar ekki heimilar innan 4,5 sjómílna frá grunnlínupunktum nema að takmörkuðu leyti og þá einungis árstíðabundið.

Það liggur í hlutarins eðli að veiðar með dragnót á veiðislóð smáfisks ganga ekki upp líffræðilega vegna verndunarsjónamiða né hagfræðilega undir núverandi aflamarkskerfi fyrir innbyggða hvata sem leiða til brottkasts og svindls ýmiss konar.

Níels A. Ársælsson.

30 landanir á þremur tímum í Grindavík

Sat, 10 Apr 2010 12:52:30 GMT

Það var líf og fjör við bryggjuna síðdegis í fyrradag þegar handfæra- og línubátarnir streymdu til löndunar í Grindavík. Hvorki fleiri né færri en 30 bátar lönduðu á þriggja tíma tímabili og var því nóg að gera við að færa kör til og frá, upp á bíl og koma aftur með tóm kör. Flestir bátarnir voru með um 5 til 8 tonn í róðri, uppistaðan í aflanum er þorskur.

Alls lönduðu bátarnir um 200 tonnum. Þetta kemur fram á grindavik.is.

Faxaflóinn er fullur af fiski

Fri, 09 Apr 2010 13:54:14 GMT

Óhætt er að segja að þeir á Muggi KE hafi verið í mokveiði undanfarið. Í gær kom báturinn að landi með 16,6 tonn á 36 bala eða um 460 kíló á hvern. Aflinn daginn áður var einnig glimrandi góður en þá fengust 11 tonn á 32 bala.
Jóhann Gunnar Jónsson á Muggi segir Faxaflóann fullan af fiski, ekki bara þorski. Kvótaleysið geri það hins vegar að verkum að ekki megi veiða hann og því blasi við að menn bindi bát við bryggju.

Þessi afli Muggs er með eindæmum góður með hliðsjón af því að nokkuð gott þykir að fá 100 kíló á bala. „Maður hefur hingað til verið nokkuð ánægður með að fá 5-7 tonn í róðri þannig að þetta er mjög gott,“ sagði Jóhann í samtali við VF. Hann segir aflabrögð kollega sinna almennt hafa verið verið með miklum ágætum, flestir hafi komið að landi í gær með á bilinu 6-8 tonn. Hann segir Faxaflóann fullan af fiski.

Er þetta þá hefðbundið skot sem kemur á eftir loðnunni?

„Já, þetta var svona í fyrra líka. Þá vorum við að veiða á sömu slóðum og fengum 130 tonn í 13 róðrum eða 10 tonn að jafnaði í róðri. Það var í apríl í fyrra en það skiptir svo sem ekki máli hvaða mánuðir eru, strax í janúar vorum við farnir að fá svona róðra. Ef það gaf á sjó var alltaf hægt að finna fisk. Svo hefur verið mikið meira af loðnu en menn vildu halda, hún er ennþá að koma í gusum. Um daginn kom stór loðnutorfa löngu eftir að menn voru hættir að veiða. Þorskurinn er því í veislu núna þegar loðnan er að drepast á botninum,“ segir Jóhann. Hann segir þorskinn nokkuð vænan og meðalþyngdina á bilinu 5 - 6kg.

Jóhann segir verst að vera búinn með kvótann. Þá taki bara við sumarfrí nema hægt verði að leigja þorskkvóta en framboðið í þeim efnum sé reyndar harla lítið. Auk þess sé leigukvótinn á háu verði.

Jóhann gefur ekki mikið fyrir vísindi Hafró og segir kvótann hæglega geta verið miklu meiri miðað við það sem sjómenn upplifi úti á miðunum. „Þá er ég ekki bara að tala um þorskinn. Tökum sem dæmi loðnuna núna. Það hefði verið hægt að veiða miklu meira af henni. Núna í mars vorum við eitt sinn að koma inn til Sandgerðis og tókum lóðningu á torfu sem var míla á lengd og 40 faðma djúp. Á sama tíma var einn að koma af Rockall svæðinu búinn að keyra 600 mílur eftir kolmunna á meðan loðnan var sveimandi 2 mílur út af Sandgerði. Þetta sýnir nú bara hversu vitlaus stjórnunin á þessu er,“ sagði Jóhann.

Met túr hjá Hrafni Sveinbjarnarsyni

Tue, 06 Apr 2010 10:51:58 GMT

Hrafn Sveinbjarnarson GK 255 sem Þorbjörn hf.í Grindavík gerir út, landaði 560 tonnum í Grindavík á mánudaginn í síðustu viku. Aflinn var blanda af þorski, ýsu, ufsa, karfa, grálúðu og gulllaxi. Verðmæti aflans var 135 milljónir króna og er það mesta verðmæti sem skipið hefur komið með úr einni veiðiferð en hún stóð í 30 daga.

Á árinu 2009 lönduðu skip Þorbjarnar hf. 22.846 tonnum að verðmæti 5.191 milljónir kr. Afli frystitogara var 13.610 tonn. Afli línubáta var 9.236 tonn, samkvæmt því er fram kemur á heimasíðu fyrirtækisins.

Mynd/www.thorfish.is

Metmánuður hjá Erni KE

Tue, 06 Apr 2010 09:25:15 GMT

Nýliðinn marsmánuður var metmánuður hjá Erni KE sem var annar aflahæsti dragnótabáturinn á landinu með 331 tonn í 19 róðrum. Þar af fengust 26,1 tonn í einum róðri en báturinn hefur landað í Sandgerði. Af öðum dragnótabátum á svæðinu er það helst að frétta að Farsæll GK landaði 214 tonnum í Grindavík og Sigurfari GK landaði 201 tonni í Sandgerði í mars.

Línubáturinn Milla GK í Grindavík trónir efst á lista Aflafrétta yfir smábáta undir 10 bt en báturinn landaði rúmlega 33 tonnum í 13 róðrum í mars.

Sjá nánar á www.aflafrettir.com

Meiri heildarafli í febrúar

Wed, 17 Mar 2010 13:59:57 GMT

Heildaraflinn á Suðurnesjum jókst lítillega í febrúar á milli ára eða um rúm 212 tonn. Þorskaflinn jókst úr 3,538 tonnum í 4,817 tonn. Í öðrum bolfisktegundum varð samdráttur. Heildaraflinn á Suðurnesjum nam 14,078 tonnum í febrúar síðastliðnum samanborið við 13,866 tonn í sama mánuði 2009.
Þetta kemur fram í samantekt Hagstofu Íslands.

Mokar upp ýsu á flótta undan þorski

Mon, 15 Mar 2010 18:02:35 GMT

Grétar Þorgeirsson skipsstjóri á Farsæli GK 162 frá Grindavík er á flótta undan þorski og mokar upp ýsu á sama tíma. Frá 1. mars sl. hafa Grétar og hans menn borið um 125 tonn að landi í Grindavík og þar af um 90 tonn af ýsu.

Á fimmtudag í síðustu viku kom Farsæll GK að landi í Grindavík með 25,5 tonn sem er metróður hjá skipinu. Megnið af aflanum var ýsa og það mjög fallegur og góður fiskur, að sögn Grétars. Á föstudeginum komu þeir með 17 tonn úr tveimur hölum, en Farsæll er á dragnót og hefur aðallega verið í Hælsvíkinni undir Krýsuvíkurbjargi. Í dag segist Grétar hins vegar aðallega hafa verið á flótta undan þorski sem virðist vera um allan sjó.

„Það virðist engu máli skipta hvar við setjum út veiðarfæri, það er fiskur um allt,“ sagði Grétar við Víkurfréttir nú síðdegis. Hann var kominn með 12-13 tonn af ýsu og rauðsprettu í dag en eitthvað af þorski en í fyrsta halinu í morgun var a.m.k. eitt tonn af þorski. Þorskkvótinn er að verða búinn en hins vegar er erfitt að dýfa veiðarfæri í sjó og ákveða fyrirfram hvað kemur í pokann.

Grétar segir góða ýsuveiði hafa blossað upp nú í mars og hún sé meiri en í fyrra. Þá sé einnig almennt meira af öðrum fisktegundum einnig. Þorskurinn sé feitur og lifrarmikill. Hann sé hreinlega að springa af lifur. Það sé gott merki um betri tíð í hafinu og þess vegna vill Grétar, og örugglega sjómannastéttin í heild, sjá aukinn þorskkvóta. „Það ætti að vera auðvelt að auka þorskkvótann um 70-80 þúsund tonn,“ sagði Grétar. Hann bindur miklar vonir við yfirstandandi togararall og þætti skrýtið ef niðurstaðan úr rallinu yrði önnur en sú sem allir sjómenn eru að upplifa í dag - að hægt sé að ganga þurrum fótum yfir flóa og firði sem eru fullir af fiski og þar með gjaldeyri fyrir þjóðfélag sem þarf svo virkilega á honum að halda í dag.

Farsæll GK landar öllum sínum afla á markað. Þar eru að fást 280-300 krónur fyrir kílóið af ýsu. Kvótaleigan er hins vegar um 190 krónur fyrir kílóið af ýsu.

Efri myndin: Ýsa í kari úr risaróðri Farsæls GK í síðustu viku. Á neðri myndinni flýgur þorskur í þvottakar.

Ljósmyndir: Hilmar Bragi Bárðarson

Skorað á sjávarútvegsráðherra að auka aflaheimildir

Fri, 12 Mar 2010 09:04:10 GMT

Skorað er á sjávarútvegsráðherra að auka aflaheimildir í þorski, ýsu, ufsa,karfa, keilu og löngu í áskorun sem Fiskmarkaður Suðurnesja, Fiskmarkaður Íslands og Reiknistofa fiskmarkaða hafa sent frá sér. Þar kemur fram að nánast ekkert framboð sé á leigumarkaði með aflaheimildir og margar útgerðir að stöðvast í byrjun mars vegna niðurskurðar á aflaheimildum.

Áskorunin er svohljóðandi:

„Með stórfelldum niðurskurði á aflaheimildum s.l. haust er vegið að grundvallar starfssemi fiskmarkaða í landinu. Afleiðingar þessa mikla niðurskurðar eru tvennskonar hvað varðar framboð á fiskmörkuðum. Margar útgerðir eru nú í byrjun marsmánaðar að stöðvast og einnig hefur niðurskurðurinn þær afleiðingar að nánast ekkert framboð er á leigumarkaði með aflaheimildir. Fjöldi fiskvinnslufyrirtækja sem byggja vinnslu á hráefnisöflun með kaupum á íslenskum fiskmörkuðum eru nú í mjög alvarlegri stöðu og sjá í raun ekki fram á annað en fjöldauppsagnir fiskvinnslufólks. Slíkt mun hafa alvarlegar afleiðingar á mörkuðum okkar erlendis með íslenskar sjávarafurðir.

Niðurskurður aflaheimilda og algjört frost á leigumarkaði hefur hvað mest áhrif á þær útgerðir sem staðið hafa undir stöðugu framboði á íslenskum fiskmörkuðum.

Með hliðsjón af aflabrögðum undanfarna mánuði teljum við að engin hætta sé tekin þótt aflaheimildir verði auknar verulega og er í því sambandi hægt að vitna í útreikninga Hafró.

Við skorum því á sjávarútvegsráðherra að auka aflaheimildir í þorski, ýsu, ufsa,karfa, keilu og löngu.

Fiskmarkaður Íslands, Fiskmarkaður Suðurnesja, Reiknistofa fiskmarkaða.“

Smábátaeigendur á Reykjanesi styðja skötuselsfrumvarpið

Fri, 12 Mar 2010 08:19:46 GMT

Smábátafélagið Reykjanes samþykkti samhljóða á félagsfundi sínum þann 6. mars s.l. að lýsa yfir stuðningi við núverandi afstöðu stjórnar LS varðandi skötuselsfrumvarp sjávarútvegsráðherra. Fjölmörg mál voru rædd, en mest þó skötuselsfrumvarp sjávarútvegsráðherra, línuívilnun og strandveiðar.

Mikil og þung umræða var um yfirvofandi stöðvun fjölmargra útgerða vegna of lítilla veiðiheimilda. Samþykkt var að skora á sjávarútvegsráðherra að auka nú þegar við aflaheimildir í flestum tegundum: í þorski um 40.000 tonn, ýsu 15.000 tonn, ufsa 10.000 tonn, karfa 5.000 tonn og skötusel um 1.000 tonn.

Einnig var samþykkt að fulltrúar frá Smábátafélaginu Reykjanesi ræði við sjávarútvegsráðherra, um að heimiluð verði jöfn skipti í þorskígildum talið, á ufsa úr krókaaflamarki í aðrar tegundir úr aflamarki.

Þrettán loðnuskip á Faxaflóa - loðnuvertíð að ljúka

Mon, 08 Mar 2010 08:29:51 GMT

Þrettán loðnuskip eru nú stödd á Faxaflóa í sinni síðustu veiðiferð. Enn er verið að landa loðnu í Helguvík, þar sem loðnan er flokkuð og hrogn unnin úr henni til frystingar. Það er aðallega erfitt veður á loðnumiðunum sem er ástæða þess að veiðar standa ennþá en kvótar loðnuskipanna eru að klárast en eins og að framan segir, skipin flest í sinni síðustu veiðiferð.

Meðfylgjandi myndir voru teknar í Helguvík á föstudag þar sem löndun úr Vilhelm Þorsteinssyni EA var nýlokið.

Víkurfréttamyndir: Hilmar Bragi Bárðarson

Fróðlegur fundur með Pétri á Bryggjunni

Thu, 04 Mar 2010 08:57:18 GMT

Pétur H. Pálsson framkvæmdastjóri Vísis hf. flutti afar fróðlegan fyrirlestur á kaffihúsinu Bryggjunni í morgun. Þar kynnti hann starfsemi fyrirtækisins sem er ekki bara með fjórar starfsstöðvar á Íslandi heldur einnig í Þýskalandi og í Kanada. Vísir hefur fjárfest töluvert í sjávarútveginum í Kanada undanfarin ár og þrátt fyrir erfiðleika sjávarútvegs á Nýfundnalandi eru bjartari tímar framundan.

Pétur sagði að verkefnið í Kanada tæki 5 til 10 ár. Afkoman á Íslandi mun því standa undir kostnaði þangað til og fjárfestingin mun ráða miklu um stöðuna að þeim tíma liðnum. ,,Það er því mikið í húfi fyrir okkur að reksturinn á Íslandi gangi áfram eins og verið hefur," sagði Pétur.

Þá fór hann yfir sjávarútveginn á Íslandi en Íslendingar eru enn fastir í togstreitu um veiðarnar eins og hann nefndi. Pétur sagði að kvótinn væri enn notaður til atkvæðaveiða. Mjög skarpar línur eru að myndast á milli sjávarbyggða og höfuðborgar og það sé ætlun stjórnvalda að taka yfir ákvörðunarréttinn í athöfnum okkar, eins og hann komst að orði.

,,Það stendur til að kippa fótunum undan þeim fyrirtækjum sem enn eru í rekstri með upptöku veiðiheimildanna og skilja skuldirnar eftir," sagði Pétur sem benti á að fiskveiðistjórnun snýst um afkomu fyrirtækja og byggða og ræður úrslitum um afkomu.

Í lokin urðu svo fjörlegar umræður. Fundurinn var upplýsandi og gott innlegg í umræðuna um íslenskan sjávarútveg.

Frétt og mynd af www.grindavik.is

Risaróður hjá Ósk KE

Mon, 22 Feb 2010 09:07:58 GMT

Netabáturinn Ósk KE 5 gerði það mjög gott í janúar og varð í fjórða sæti á lista aflafrétta.com yfir aflahæsta netabáta landsins. Strákarnir á Ósk hafa einnig gert það gott í febrúar og segja aflafréttir frá risaróðri bátsins em kom með 31 tonna þorskafla og náði samtals 46 tonnum eftir aðeins tvo róðra.
Þess er einnig getið að Ósk KE, sem er 113 brúttótonn, var aflahærri heldur en mun stærri bátar á listanum.
Netabátarni hafa gert það ágætt í febrúar, að sögn aflafrétta. Ósk er fjórða aflahæst með 153 tonn og Erling KE kemur þar á eftir með 150 tonn.

Þá hafa línubátarnir í Grindavík verið í ágætis málum nú í febrúar. Sturla GK er annar aflahæstur með 266 tonn, Jóhanna Gísla með 243 tonn og Tómas Þorvaldsson með 211 tonn, svo einhverjir séu nefndir.

www.aflafrettir.com

Góð aflabrögð

Fri, 12 Feb 2010 11:57:35 GMT

Aflabrögð Suðurnesjabáta hafa verið með miklum ágætum undanfarið enda tíðin góð. Þeir feðgar Jón Jóhannson og Jóhann Jónsson á Muggi KE komu t.d. að landi með 13 tonn í fyrradag en aflann fengu þeir einungis á 18 bala samkvæmt frétt Aflafrétta. Uppistaða aflans var þorskur og fékkst hann um 17 mílur út af Sandgerði. Þetta gera 723kg á bala og að sögn Aflafrétta er um algjöran metafla að ræða. Þess má geta að róðurinn á undan hafði gefið 12 tonn á 23 bala.

Þá hafa smábátarnir frá Grindavík verið að tínast heim og hafa aflabrögð verið alveg prýðileg þar.
--

Mynd/www.aflafrettir.com - Full lestin á Muggi KE

Bernskan gerir stóran samning við Vísi

Fri, 05 Feb 2010 13:53:36 GMT

Pokabeituverksmiðjan Bernskan í Súðavík hefur gert samning við fiskvinnslufyrirtækið Vísi ehf. í Grindavík um kaup á fimm pokabeitningavélum og pokabeitu í allan báta fyrirtækisins. „Við vorum að klára hönnun á pokabeitningavél í línubáta, annars hefur allt verið handbeitt í landi,“ segir Kristján Andri Guðjónsson stjórnarformaður Bernsku ehf. Samningurinn hefur gríðarlega mikla þýðingu fyrir pokabeituverksmiðjuna. Að sögn Kristjáns Andra gæti verðmæti samnings verið vel á annað hundrað milljónir en hann felst í því að Bernska útvegi Vísi yfir 20 milljón pokabeitur á ári. Óðinn Gestsson, framkvæmdastjóri Íslandssögu, sem er einn eigenda fyrirtækisins, segir að samningurinn geti haft í för með sér tvöföldun á framleiðslu verksmiðjunnar. „Þetta er hrein og bein viðbót við framleiðslu Bernskunnar í dag og gangi samningurinn alveg eftir verður það tvöföldun á því magni sem nú er framleitt.“

Þróun og hönnun beitningavélarinnar er alfarið á vegum Bernskunnar en fyrsta eintakið var selt til Noregs. Þar hefur vélin verið í notkun undanfarnar vikur hjá norskri útgerð og vakið mikla athygli. „Með notkun beitningavélarinnar er afli bátsins tvöfaldur á við venjulegan balabát á þessu svæði. Háskóli í Noregi hefur gert rannsóknir á beitunni og allar þær prófanir hafa verið jákvæðar og óvírætt pokabeitunni í vil,“ segir Óðinn. Óformlegar viðræður standa nú yfir í Noregi um að koma upp beituverksmiðju á Trömsø-svæðinu. „Við höfum verið að kynna fyrir Norðmönnum hugmyndir um beituverksmiðju og nú stendur yfir leit að samstarfsaðilum til að hrinda því verkefni úr vör.“ ?
Óðinn segir að pokabeitan sé mun hagkvæmari en hefðbundin beita. „Í hverri pokabeitu eru 9-10 grömm af hráefni en í hefðbundinni handskorinni beitu eru um 15-30 grömm. Beitunotkunin minnkar því um helming nái þetta tilætluðum árangri.“

Upphaflega var hafist handa við að þróa pokabeituna til að freista þess að þróa beitu sem hægt væri að veiða ýsu á. Óðinn segir að allir bátar Íslandssögu hafi notað pokabeitu að undanförnu og veitt bæði þorsk og ýsu með góðum árangri.

Að verksmiðjunni Bernsku standa Byggðastofnun, Íslandssaga, HB-Grandi, Öngull, Frystikerfi, KM Stál og Póllinn.

Frá þessu er greint í máli og myndum á www.bb.is

Fiskvinnsla og útgerð er svona 2010

Fri, 29 Jan 2010 10:23:04 GMT

Alls voru 140 ný einkahlutafélög skráð á Suðurnesjum á nýliðnu ári, þar af 90 í Reykjanesbæ og 23 í Grindavík.
Af þessum 140 félögum voru 10 félög stofnuð um frystingu fiskafurða og 11 vegna bátaútgerðar. Annars er starfsemi hinna nýskráðu fyrirtækja mjög dreifð.
Athygli vekur að níu ný fyrirtæki voru stofnuð um byggingu atvinnu- og íbúðarhúsnæðis en miklar erfiðleikar hafa verið á byggingarmarkaði eftir Hrun og fjöldi fyrirtækja farið í þrot.
Þar sem algengt er að bera alla mögulega hluti saman við árið 2007 þá má geta þess að á því herrans ári voru 257 ný fyrirtæki skráð á Suðurnesjum.

Óskin aflahæst

Fri, 29 Jan 2010 09:04:19 GMT

Ósk KE og Erling KE eru efst á lista aflafretta.com yfir aflahæstu netabátana í janúar. Ósk hefur landað í Keflavík og Erling í Njarðvík. Ósk hefur landað samtals 157,5 tonnum í einum róðri og þar af 14 tonnum í einum róðri sem verður að teljast harla gott. Afli Erling nemur rétt rúmum 144 tonnum eftir 15 róðra.

Ósk KE er fyrsti netabáturinn til að komast yfir 100 tonnin á þessari vertíð

Sjá www.aflafrettir.com

Myndin: Ósk KE 5 - ljósmynd Gísli Reynisson

„Þá er þetta bara búið“

Wed, 27 Jan 2010 11:01:46 GMT

„Ef þetta verður boðið upp þá vitum við ekki hvort við fáum kvóta. Við getum fengið á einu tímabili en ekki öðru. Þá er þetta bara búið. Mér sýnist að innan fjögurra ára munu öll stærstu sjávarútvegsfyrirtækin líða undir lok í þeirri mynd sem þau nú eru,“ segir Eiríkur Tómasson hjá Þorbirni hf í Grindavík vegna fyrirhugaðrar fyrningarleiðar í sjávarútvegi sem stjórnvöld hafa boðað. Eiríkur segist eiga bágt með að trúa því að fyrningarleiðin verði farin enda sé hún best til þess fallin að setja þessa atvinnugrein í uppnám og rústa henni.

Þorbjörn hf er eitt öflugasta sjávarútvegsfyrirtæki landsins í dag með 400 manns á launaskrá og sjö skip á veiðum. Fyrirtækið hefur lagt áherslu á samfellu í veiðum til vinnslu og með því hefur ekki fallið niður dagur í vinnslunni í 8 ár ef frá eru talin sumarfrí.

Eiríkur segir að með fyrningarleiðinni verði skammtímasjónarmiðin allsráðandi og atvinngreininni kippt langt aftur í tímann.
„Gefum okkur að við værum með kvóta til tveggja mánaða. Öll vinnubrögð myndu miðast við það að ná tekjunum inn sem fyrst. Ég segi að þetta sé afurhvarf til fortíðar, - eingöngu yrði hugsað um veiðar en ekki vinnslu og fólk sæti verkefnalaust heima þegar ekki væri nægt hráefni, eins og þetta var hér áður fyrr,“ segir Eiríkur. Hann bendir á að menn hafi starfað eftir lögum um kvótakerfið frá 1984 í trausti þess að það yrði varanlegt. Þess vegna hafi menn lagt í miklar fjárfestingar, bæði í kvóta og tækjabúnaði.
Eiríkur segist sjá fyrir sér ákveðna málamiðlun sem gæti falist í því að greitt yrði gjald fyrir nýtingarréttinn á auðlindinni.

Sjá nánar í Víkurfréttum á morgun.

---

VFmynd/elg - Unnið við saltfiskpökkun í Þorbirni hf í Grindavík.

Metár hjá RSF

Tue, 26 Jan 2010 14:43:49 GMT

Síðasta ár var metár hjá Reiknistofu fiskmarkaðanna í Reykjanesbæ en selt var fyrir tæpan 21,8 milljarð króna sem er langhæsta söluverðmæti frá upphafi. Þetta er 28,7% meira en árið 2008 en þá seldist fyrir 16,9 milljarða.
Meðalverð á árinu 2009 var 210,52 kr. en það er hæsta meðalverð frá upphafi og í fyrsta skipti sem það fer uppfyrir 200 krónur. Þetta er hækkun um 17,2% frá árinu á undan.

Seld voru voru tæplega 104 þúsund tonn á síðasta ári sem er 9,8% meira á árið 2008. Það er fjóra mesta magnið frá upphafi, ef loðna er ekki tekin með í reikninginn.
Þetta kemur fram á heimasíðu RSF.

Ný hafnarvog í Grindavík í sumar

Sat, 23 Jan 2010 01:11:35 GMT

Bygging á nýju vigtarhúsi við höfnina í Grindavík gengur vel. Uppsteypu á húsinu er lokið og næsta skref er að loka því. Á myndinni sem fylgir þessari frétt sést að byrjað er steypa upp rampinn upp á vigtina. Stefnt er að því að húsið verði tilbúið í sumar, segir á vef Grinavíkurbæjar.

Verktaki er Grindin ehf., sem átti lægsta tilbúið í húsið, eða 46,8 milljónir króna sem er 74% af kostnaðaráætlun.

Aflaaukning í september

Wed, 14 Oct 2009 09:28:50 GMT

Heildaraflinn á Suðurnesjum í september nam 3,429 tonnum sem er 685 tonnum meira en í sama mánuði 2008. Í Grindavík, stærstu löndunarhöfninni, komu 1945 tonn á land í september síðastliðnum samanborðið við 1065 tonn í sama mánuði á síðasta ári. Þetta kemur fram í samantekt Hagstofu Íslands.
Heildarafli íslenskra skipa í nýliðnum septembermánuði, metinn á föstu verði, var 18,5% meiri en í september 2008.

September sló öll met

Mon, 12 Oct 2009 11:04:00 GMT

Söluverðmæti á fiskmörkuðum í september var 2,156 milljónir sem 60,7 % meira en í september 2008. Þetta er einungis í annað skiptið sem verðmæti fer yfir 2 milljarða í einum mánuði. Það gerðist líka í mars 2007 þegar salan fór í 2.228 milljónir í gegnum uppboðskerfi Reiknistofu fiskmarkaðanna sem hefur bækistöðvar í Reykjanesbæ.

Meðalverðið í september var kr. 237,06. Það er það hæsta í einum mánuði frá upphafi. Meðalverð í september 2008 var kr. 178,01 sem er hækkun um 33,2 %.

Í september sl. voru seld 9,096 tonn sem er það langmesta sem selt hefur verið í gegnum fiskmarkaðina í þeim mánuði, samkvæmt því er fram kemur á vef RSF.

Ef skoðuð er heildarsalan í september á fiskmörkuðum hér á Suðurnesjum þá fóru 610,479 kg í gegnum markaðinn í Grindavík. Meðalverð var 188 kr. og söluverðmæti var upp á 114,531 m.kr.

Í Sandgerði/Njarðvík var heildarsalan upp á 273,788 kg. Meðalverð var 257 kr. og heildarverðmæti námu rúmum 70 m.kr.

Fyrningaleiðin mun gera út um sjávarútvegsfyrirtækin

Sun, 07 Jun 2009 10:41:59 GMT

Þorsteinn Erlingsson, formaður Útvegsmannafélags Suðurnesja og eigandi Saltvers, segir hugmyndina um svokallaða fyrningarleið í sjávarútvegi til þess eins fallna að gera út af við sjávarútvegsfyrirtækin í landinu. Þar verði enginn undanskilinn. Verið sé að refsa þeim sem trúðu á framtíð íslensks sjávarútvegs í stað þeirra sem seldu kvótann sinn í ágóðaskyni.

Þorsteinn segir kvótakerfið hafa verið umdeilt á meðal ákveðinna stjórnmálaafla og að þau hafi kynt undir óánægjunni fyrir hverjar kosningarnar á fætur öðrum, „kannski til að beina athyglinni frá einhverju öðru,“ segir hann. Og enn er deilt. Nú um fyrningaleiðina svokölluðu sem mætt hefur harðri andstöðu sveitarfélaga og hagsmunaðila í sjávarútvegi.

Kvótakerfið hefur skilað árangri

Þorsteinn segist ekki hafa verið móti kvótakerfinu. Þegar það var sett á hafi verið allt of margir bátar og lítill fiskur. „Hefðum við haldið þessu áfram óbreyttu hefðum við einfaldlega klárað stofnana, líkt og gerst hefur í sumum löndum í kringum okkur. Menn urðu að finna út hvaða leiðir væru bestar því það þurfti að fækka bátum og fiskvinnslum. Auðvitað kostaði þetta átök, að sjálfsögðu. Það væri engin fiskur hér í dag ef ekki hefði verið settur á kvóti. Með skuttogaravæðingunni upp úr 1970 voru komin hér ný og miklu öflugri skip sem hreinsuðu upp miðin. Eða er fólk búið að gleyma bæjarútgerðunum sem var haldið gangandi með opinberu fé og ástandinu sem skapaðist í sjávarbyggðum í kjölfarið,“ spyr Þorsteinn ákveðinn.

„Þegar menn tala um að kvótakerfið hafi ekki skilað árangri má benda á að fyrir ekki nema sex árum kallaði Hafró okkur útvegsmenn hér á svæðinu á sinn fund. Þá var allt komið í óefni með humarstofninn. Ég veit ekki betur en að hann sé í mjög góðu lagi í dag. Eins er með ýsustofninn, ufsann líka og íslensku síldina þó við getum lítið gert við því að í hana hafi komist sýking. Í kringum 1970 vorum við hér um bil búnir að klára hana. Nú er norsk íslenska síldin óðum að ná sér á strik. Vissulega hefur þetta kerfi skilað árangri,“ segir Þorsteinn og bendir á að niðurstöður þorskrannsókna Hafró sl. haust hafi verið mjög jákvæðar. „Vonandi fáum við jafn jákvæðar fréttir af þorskinum á þessu ári.“

Óhætt að auka þorskkvótann

Hvað þorskinn varðar eru áhöld uppi um ástand hans. Sjómenn tala um fullan sjó af vænum þorski og vilja meiri kvóta á meðan vísindi Hafró segja eitthvað allt annað. Þorsteinn var inntur álits á þessu.
„Það er svo mikið af þorski að í rauninni má kalla það jákvæðasta vandamál sem við glímum við á Íslandi í dag. Þú getur hvergi farið um án þess að fá þorsk. Við höfum aldrei séð eins mikið af stórum og fallegum þorski og núna í vetur við Garðskagann og hann er mjög vel haldinn,“ segir Þorsteinn, sem hefur alla starfsævina verið við sjómennsku og útgerð. Hann eins og margur annar útvegsmaðurinn veltir vöngum yfir vísindaaðferðum Hafró. Þorsteinn telur að í þessu ljósi sé óhætt að auka við þorskkvótann og ekki veiti af eins og ástandið sé í efnahagsmálum þjóðarinnar. „Vonandi auka þeir þorskkvótann í 200 þúsund í haust og leyfa þeim sem vilja áfram búa á Íslandi að njóta vafans.“

Sjálfbær nýting

Þorsteinn segir kvótakerfið t.d. hafa kallað á kröfuna um sjálfbæra nýtingu auðlindarinnar. Hann hefur í mörg ár rekið útgerðar og fiskvinnslufyrirtækið Saltver en áherslur fyrirtækisins hafa verið í vinnslu á saltfiski.

„Núna í vetur höfum við fylgt eftir nýrri stefnu á þann veg að báturinn veiðir eingöngu fyrir vinnsluna, þar sem lögð er áhersla á fyrsta flokks gæði. Menn veiða því ekki meira en þeir þurfa hverju sinni. Báturinn hefur farið út klukkan fimm á morgnana með helmingi færri net en árið áður. Er kominn laust eftir hádegi og þá er búið að gera að fiskinum fyrir kvöldið. Báturinn hefur verið að koma inn með 2025 tonn af fallegum þorski sem við setjum strax í krapa um borð og kælum niður. Með þessu náum við að hámarka gæðin og fá þar af leiðandi betra verð. Bæði sjómennirnir og fólkið í vinnslunni er mjög ánægt með þetta fyrirkomulag. Með hefðbundnum vinnsluaðferðum í saltfiski vorum við að fá á bilinu 2025% í annan flokk. Núna sést varla fiskur í þeim flokki enda er meðferð aflans betri með því að veiða minna í hverjum túr. Menn eru almennt farnir að vinna svona í greininni sem miðast að því að ná meiri verðmætum út úr vinnslunni til að mæta aflasamdrætti. Eins er krafan á markaðnum orðin rík í þessa veru. Portúgalarnir vilja bara fyrsta flokks vöru og eru mjög ánægðir með fiskinn okkar sem er feitur og þykkur í hnakkann. Það er nægur markaður fyrir þennan fisk en slagurinn stendur auðvitað alltaf um verðið,“ útskýrir Þorsteinn.

Erlend lán til kvótakaupa

Stundum er talað um útvegsmenn sem einskonar forréttindahóp, kvótakónga eða sægreifa sem hafi einir aðgang að auðlindinni í hafinu. Þorsteinn segir að ekki sé allt sem sýnist í þeim efnum.
„Frá því kvótakerfið var sett á af stjórnvöldum og til að byggja upp stofnana, en ekki í þágu útvegsmanna eins og iðulega er haldið fram, hefur verið klipið af aflaheimildum togara og hefðbundinna vertíðarbáta til að setja í eitthvað annað, s.s. smábátakerfið eða aflamarkið. Þess vegna seldu svo margir kvótann sinn, óttuðust að enn frekar yrði gengið á þær fjárfestingar sem þeir höfðu ráðist í. Það er reyndar búið að reyna svo margt. Þetta hefur komið verst niður á vertíðarbátunum á suðvestursvæðinu og Breiðafirði.
Eina leiðin fyrir okkar til að bæta þetta upp var að kaupa kvóta. Menn kaupa kvóta en svo er klipið af honum jafnóðum. Menn hafa tekið erlend lán til kvótakaupa því önnur voru ekki í boði. Samhliða hruni á gengi krónunnar með tilheyrandi hækkunum erlendra lána hefur afurðaverð lækkað um 40%, þannig að fyrirtækin eru orðin mjög skuldsett,“ segir Þorsteinn. Hann tekur ekki undir það að gengismunurinn hafi komið sér vel fyrir útflutninginn. Verðlækkunin hafi komið í veg fyrir það.

Fyrningarleiðin óskiljanleg

Hugmyndir um svokallaða fyrningarleið hafa mætt harðri andstöðu, svo harðri að spyrja má hvort yfirvöldum sé stætt á því að fylgja hugmyndinni eftir. Þorsteinn segist vona að snúið verði frá þessum hugmyndum. Þær auki eingöngu á vandann því nú haldi menn að sér höndum.
„Það fjárfestir enginn í sjávarútvegi í dag, menn eru bara rétt að halda þessu gangandi. Þetta hefur eingöngu aukið á atvinnuleysið. Maður hefði haldið að yfirvöld ættu fremur að auka kvótann til að auka mönnum bjartsýni og auka atvinnu,“ segir Þorsteinn.
Hann telur fyrningarleiðina muni hafa slæmar afleiðingar fyrir þá sem byggt hafa upp stóru sjávarútvegsfyrirtækin, bæði með kvóta og vinnslu. Mörg þeirra hafa sérhæft sig í ákveðinni vinnslu með dýrum fjárfestingum í tækjabúnaði sem hefur verið þróaður og framleiddur innanlands af frumkvöðlafyrirtækjum á borð við Marel, Skagann og fleiri. „Ég hef t.d. fjárfest í búnaði fyrir loðnu og er mjög óánægður með Hafró skyldi ekki gefa út a.m.k. 100.000 tonna kvóta í vetur því loðnan deyr hvort sem er eftir hrygningu,“ segir Þorsteinn.

Þorsteinn spyr hvort yfirvöld ætli að ráðast á þann geira sem skilar mestum gjaldeyri inn í þjóðarbúið. „Ef þessi fyrningarleið verður farinn munum við sjá stærstu og blómlegustu sjávarútvegsfyrirtæki landsins líða undir lok. Fyrirtæki sem hafa skapað hundruði starfa í áratugi. Þessi fyrningarleið á eftir kippa fótunum undan öllum sem starfa í þessari grein, ekki bara útvegsmönnum, heldur einnig sjómönnum og landverkafólki. Öryggið er ekkert. Öll langtímamarkmið og allir söluamningar eru í uppnámi því þegar kvótinn fer á uppboð þá veit enginn hvar hann lendir,“ segir Þorsteinn.

Hinum tryggu refsað

„Þeir einu sem eru ánægðir með þetta eru þeir sem voru í frjálsri veiði, fengu kvóta, seldu hann og sumir tvisvar sinnum. Þeir eru mjög ánægðir með að komast enn á ný inn í kvótakerfið til að geta selt kvótann enn eina ferðina. Hinum, sem verið hafa sauðtryggir, má blæða. Ég er búinn að vera skipstjóri og útgerðarmaður alla mína ævi og ætlaði að reyna vera í þessu á meðan mér entist aldur til. Dóttir mín og tengdasonur eru tekin við rekstrinun að mestu. Þetta er ungt fólk og því nýliðun fyrir framtíðaráform fyrirtækisins. En nú á að gera út um okkur. Það er verið að hegna okkur fyrir það að hinir seldu. Þetta er ekki það sem þjóðin þarf,“ segir Þorsteinn.

Hrefnan étur allt að 300 þúsund tonn af þorski og ýsu á ári

Thu, 05 Mar 2009 09:30:39 GMT

Niðurstöður hrefnurannsókna Hafrannsóknastofnunarinnar á árunum 2003-2007 benda til þess hrefnan éti árlega allt að 300.000 tonn af þorski og ýsu. Það er fimmfalt meira magn en eldri rannsóknir hafa leitt í ljós. Til samanburðar má nefna að heildaraflamark þorsks og ýsu á yfirstandandi fiskveiðiári er um 250.000 tonn.

Samkvæmt vegnu meðaltali var bolfiskur 26% innihalds hrefnumaga í umræddum rannsóknum. Ýsa reyndist vera um 7% magainnihaldsins, þorskur 8% og annar bolfiskur 11%. Loðna reyndist aðeins um 8% af fæðu hrefnunnar og síld 14%. Áætlað er að hrefnan við landið éti árlega um 2 milljónir tonna af fiski.

Athygli vekur hversu stóran bolfisk er um að ræða. Þorskurinn var að uppistöðu 4-8 ára gamall, 50-80 sm að lengd og ýsan var að jafnaði 5-6 ára, 45-55 sm að lengd. Þessar niðurstöður voru kynntar í erindi þeirra Gísla A. Víkingssonar, Anton Galan, Droplaugar Ólafsdóttur og Sverris D. Halldórssonar á Hafráðstefnu stofnunarinnar fyrir skömmu.

Rannsóknir Hafrannsóknastofnunarinnar sýna miklar breytingar í fæðusamsetningu hrefnu á árabilinu 1985-1995 annars vegar og svo 2003-2007 hins vegar. Það bendir til þess að hún lagi sig að fæðuframboðinu í hafinu og éti í raun það sem hún kemst í hverju sinni. Frá þessu er greint á vef LÍÚ.

Mest landað af þorski í Grindavík á síðasta ári

Mon, 05 Jan 2009 14:19:55 GMT

Samkvæmt bráðabirgðatölum Fiskistofu var mest landað af þorski í Grindavík árið 2008, borið saman við aðrar hafnir á landinu, eða 13.730 tonn af 143 þúsund tonnum á landsvísu. Reykjavíkurhöfn kemur næst með 11.137 tonn og Sandgerðishöfn er með 8.078 tonn og Rif með 7.745 tonn.

Grindavík er í 2. sæti þegar kemur að heildar botnfisksafla. Reykjavík trónir á toppnum með 83.969 tonn, Grindavík í 2. sæti með 39.875 tonn og Hafnarfjörður í 3. sæti með 20.562 tonn.

Engum uppsjávarfiski var landað í Grindavík á síðasta ári en 55 tonnum af humri.

Sandgerði og Garði endurúthlutað byggðakvóta

Mon, 27 Oct 2008 16:20:32 GMT

Fiskistofa hefur nú lokið endurúthlutun byggðakvóta fyrir fiskveiðiárið 2006/2007, og er úthlutun byggðakvóta þess fiskveiðiárs því endanlega lokið, að því er fram kemur á heimasíðu Fiskistofu. Samtals var úthlutað 4.213.637 þorskígildiskílóum, sem skipt var milli byggðarlaga. Sandgerði og Sveitarflélagið Garður fengu úthlutað samtals 186 tonnum þar af fékk Garður 150 tonn.

Byggðakvótinn er eyrnamerktur skipum og var skiptingin eins og segir hér að neðan:

Sandgerði: = 36 tonn

Óli Gísla GK 112 19.755 kg.

Ísbjörn GK 87 8.657

Líf GK 67 7.587

Garður: = 150 tonn.

Gunnar Hámundarson GK 357 = 15.121

Sóley Sigurjóns GK 200 = 17.785

Sigurfari GK 138 = 15.834

Berglín GK 300 = 17.251

Baldvin Njálsson GK 400 = 18.451

Benni Sæm GK 26 = 15.661

Siggi Bjarna GK 5 = 15.794
Dóri GK 42 = 15.509
Alla GK 51 = 4.874

Faxi GK 84 =4.966

Magnús GK 64 =8.754

Happadís GK aflaverðmæti fyrir 193,6 m,kr. -2007

Thu, 07 Aug 2008 10:12:30 GMT

Smábátar frá Grindavík eru í þremur sætum af fjórum efstu á lista yfir aflaverðmæti krókaaflamarksbátar árið 2007

1. Happadís GK – 193,6 millj. kr. - 1.108 tonn

2. Kristinn SH - 184 millj. kr. - 1.054 tonn

3. Gísli Súrsson GK – 181 millj. kr. - 977 tonn

4. Auður Vésteins GK – 173 millj. kr. - 1.017 tonn

5. Sirrý ÍS - 170 millj. kr. – 1.321 tonn
Heimild: Fiskifréttir.

Krókaaflamarksbátum eins og hér um ræðir er úthlutað krókaaflamarki í þorski, ýsu, ufsa, steinbít, löngu, keilu eða karfa.

Þeim er einungis heimilt að stunda veiðar með línu og handfærum en geta fengið undanþágu með sérstökum leyfum til veiða á botndýrum með plógum og gildrum svo og til hrognkelsaveiða í net. Afli sem fæst við slíkar veiðar reiknast til aflamarks bátsins.

Hverjum báti er heimilt, án þess að til skerðingar komi, að veiða allt að 2% af heildarafla sínum í kvótabundnum botnfisktegundum, öðrum en þeim sem tilgreindar eru, þó þannig að afli í einni tegund fari aldrei yfir 1% af heildarafla bátsins.

Heimildir: Stjórnartíðindi

Smábátar í aflamarki fækkað um 90%

Wed, 23 Jul 2008 12:05:11 GMT

Á vef sjómanna www.skip.is er vitnað í Örn Pálsson framkvæmdastjóra Landssambands smábátaeigenda. Örn segir landssamband smábátaeigenda hafi að beiðni sjávarútvegsráðaneytisins leitað upplýsinga um þróunina á eignaraðild kvóta hjá smábátum.
Ráðuneytið þarf að svara áliti mannréttindanefndar Sameinuðu þjóðanna um kvótakerfið.

,,Í niðurstöðum samantektarinnar kemur m.a. fram að 1. janúar 1991 var heildarfjöldi smábáta sem fengu úthlutuðu aflamarki 1020 en í dag er tala smábáta í aflamarki 101. Samkvæmt þessu hefur smábátum í aflamarki fækkað um 90% frá því að þeir voru settir í kvóta. Flestir þeirra hafa selt og þar með hætt allri útgerð eða fært sig í annað veiðikerfi smábáta en einnig eru dæmi um að menn hafi stækkað bátana og haldið áfram í stærra kerfinu ” segir Örn.

Frá Sandgerði. Mynd:IngaSæm

Nánar er fjallað um málið í Fiskifréttum.

Aflahrun í júní

Mon, 14 Jul 2008 13:40:32 GMT

Í fréttatilkynningu frá fiskistofu kemur fram að samdráttur er á mili ára í heildarafla íslenskra skipa. Heildaraflinn í nýliðnum júní var 60.788 tonn. Það er rúmlega 51 þúsund tonna samdráttur í afla milli ára en aflinn í júní 2007 var 112.141 tonn. – Botnfiskaflinn í júní 2008 var 28.445 tonn miðað við 43.031 tonn í júní 2007. Þorskafli dróst saman um rúmlega 3 þúsund tonn milli ára.

Mest munar um hrun úthafskarfa þar sem aflinn fór úr 10.752 tonnum í júní 2007 í 3.187 tonn í nýliðnum júní. – Engum kolmunna var landað í júní 2008 en kolmunnaaflinn var rúmlega 34 þúsund tonn í júní í fyrra.

Síldarafli í júní minnkaði úr 32.651 tonni 2007 í 27.719 í júní 2008.

Heildarafli ársins 2008 var í lok júní 613.527 tonn. Á sama tíma í fyrra var heildarafli ársins 858.905 tonn. Munar þar mest um 158 þúsund tonna samdrátt í loðnuafla ársins og 69 þúsund tonn í kolmunnaafla.

Meira á vef fiskistofu.

Ráðstöfun afla á Suðurnesjum

Thu, 10 Jul 2008 10:32:27 GMT

Í dag kom út skýrsla frá Hagstofu Íslands: Afli, aflaverðmæti og ráðstöfun afla 2007.

Í skýrslunni kemur fram að á Suðurnesjum er landað jafnmiklum þorskafla og í öðrum landshlutum eða 27 þúsund tonn. Ýsuaflinn skiptist nokkuð jafnt á milli landssvæða en mest af honum er landað á Suðurnesjum, 16 þúsund tonnum.

Staðsetning vinnslu – hvar var aflinn unninn?
Af botnfiskaflanum voru 108 þúsund tonn (23%) unnin á höfuðborgarsvæðinu en næst á eftir koma Suðurnes með 91 þúsund tonn. Stærstur hluti þorskaflans fór til vinnslu á Suðurnesjum, 39 þúsund tonn eða 22%.
Suðurnes vinna næst mest úr magni flatfisks með 4.106 tonn og höfuðborgarsvæðið með 4.018 tonn.

2.164 tonn af skarkola voru unnin á Suðurnesjum eða 37% þess afla.

Heildaraflinn á Suðurnesjum var mest unninn í Grindavík eða 87 þúsund tonn en þar af voru 44 þúsund tonn botnfiskur og 42 þúsund tonn uppsjávartegundir.
inga@vf.is

Skýrslan er birti á vef Hagstofunnar.

Kóralsvæði á Reykjaneshrygg

Mon, 30 Jun 2008 17:07:07 GMT

Á síðustu árum hafa verið kortlögð allstór samfelld svæði á Reykjaneshrygg. Reykjaneshryggurinn er virkur eldfjallahryggur og á honum eru þekkt kóralsvæði á hraunasvæðum.
Talsvert er af kóral á svæðum sem heita Steinahóll, Þríburarnir og Jói-klakkur, á svæði sem nú eru lokuð fyrir togskipum.
Á myndinni sjást útlínur friðaða hólfsins „Mehlsack” sem er á sjálfum háhryggnum með tilheyrandi gígum, sprungusveimum, misgengjum og hraunum.

Af www.hafro.is

Smábátum fækkar á Reykjanesi

Mon, 30 Jun 2008 15:26:28 GMT

Á vef landsambands smábáta kemur fram að smábátafélagið Reykjanes er nærst stærsta svæðisfélagið innan LS með 88 báta sem lönduðu á árinu 2007. Árið 2005 voru þeir 96 og hefur því fækkað um 8 báta á þremur árum.

Árið 2007 lönduðu á landinu öllu 719 smábátar afla eða 59 bátum færra en árið áður.

Meðfylgjandi tafla er skrá yfir svæðisfélögin 15 og fjölda báta sem tilheyrðu þeim 2007, 2006 og árið 2005.

Af www.smabatar.is

Tvisvar sinnum meira af átu fannst út af Suðurlandi

Tue, 24 Jun 2008 12:03:03 GMT

Í vorleiðangri Hafrannsóknastofnunarinnar, sem farin var á rannsóknaskipinu Bjarna Sæmundssyni, fannst um tvisvar sinnum meira af átu en í meðalári út af Suðurlandi. Leiðangurinn var hluti af langtímavöktun á ástandi sjávar, næringarefnum, gróðri og átu á hafsvæðunum við Ísland.

Leiðangrinum lauk 26.maí og var Sólveig R. Ólafsdóttir leiðangursstjóri, en alls tóku 10 rannsóknamenn frá Hafrannsóknastofnuninni þátt í leiðangrinum. Skipstjóri var Ásmundur Sveinsson.

Af www.hafro.is

Stórlúðu landað í Sandgerði

Mon, 16 Jun 2008 19:48:53 GMT

Það er ekki daglegur viðburður að stórlúðu sé landað í tonnavís í Sandgerði en sú var raunin í dag.

Skipið Fagraenni frá Hvannasundi í Færeyjum kom til lands í morgun með um 11 tonn af vænni lúðu, þær stærstu voru á bilinu 100 til 150 kíló hver og voru þær fluttar til vinnslu í ID-fisk.

Skipverjarnir eru fimm talsins og höfðu verið við veiðar á Reykjaneshrygg í um tvær vikur. Ástæða þess að þeir lönduðu hér á landi í þetta skiptið er að landstímið, um 3 dagar, væri of langt fyrir aflann um borð.

Einn skipverja sagði í samtali við Víkurfréttir að þetta hefði verið ágætis túr. Aðspurður sagðist hann kunna vel við sig á lúðuveiðum. „Já, já. Þetta er fín vinna. Þetta er svolítil ævintýramennska.“

Kippa af vænum lúðum hífð frá borði. VF-mynd/Þorgils

Minni þorskafli - meiri sókn í aðrar tegundir

Sat, 14 Jun 2008 09:49:48 GMT

Þorskafli á Suðurnesjum dróst saman um rúm 2,300 tonn á fyrstu sex mánuðum ársins miðað við sama tímabil í fyrra, fór úr 21,237 tonnum í 18,926 tonn.

Þorskafli í Grindavík var 11,073 tonn frá janúar til maí á þessu ári en var 12,205 tonn á sama tímabili í fyrra.

Ef skoðaður er heildarafli í þorski, ýsu og ufsa á Suðurnesjum kemur í ljós að hann dregst saman um 1,321 tonn fyrsta hálfa árið. Þrátt
fyrir umtalaða kvótaskerðingu er heildaraflinn í þessum tegundum litlu minni milli ára en það skýrist af aukinni sókn í ýsu og ufsa.

24% samdráttur aflaverðmæta

Tue, 20 May 2008 15:45:06 GMT

Aflaverðmæti á Suðurnesjum drógust saman um 24% á milli ára fyrstu tvo mánuði ársins, voru rétt rúmir 3 milljarðar á síðasta ári en 2,3 milljarðar í ár. Þetta er nokkuð nálægt landsmeðaltalinu. Samdrátturin varð mestur á Suðurlandi eða tæp 52%.

Aflaverðmæti þorsks á Suðurnesjum fór úr rúmum 1,6 milljarði niður í tæpan 1,3 milljarð fyrstu tvo mánuði ársins. Í tonnum talið fór þorskaflinn úr tæpum 9,283 tonnum niður í 6,142 tonn.

VF-mynd/elg

Ný Sóley Sigurjóns til Nesfisks

Tue, 13 May 2008 12:52:36 GMT

Nýr togari bættist í fiskiskipaflota Nesfisks hf. um helgina þegar Sóley Sigurjóns GK 200 kom til Sandgerðishafnar í fyrsta skipti. Um er að ræða gamla Sólbak. Skipið er byggt árið 1987 en hefur síðustu mánuði verið í umtalsverðum endurbótum fyrir Nesfisk hjá skipasmíðastöð í Póllandi. Þar var skipið m.a. stytt. Nýi togarinn kemur í stað eldri togara með sama nafni.

Risalúða hjá Árna í Teigi

Tue, 29 Apr 2008 12:14:07 GMT

Áhöfnin á Árna í Teigi GK fékk þessa risalúðu í netið hjá sér laugardaginn 26. apríl. Þeir voru að vonum sælir með fenginn og stilltu sér upp með lúðunni með bros á vör.

Áhöfn Árna í Teigi GK með risa lúðuna, Jón Berg, Jón Ágúst og Vilhelm Arason

Gott hjá krókabátunum

Tue, 08 Apr 2008 09:28:02 GMT

Heildarafli á Suðurnesjum var rúm 25,100 tonn í mars samanborið við 27,800 tonn í sama mánuði síðasta árs. Þar af er loðnuaflinn tæp 10,317 tonn, samkvæmt bráðabrigðatölum frá Fiskistofu. Alls bárust 5,968 tonn af þorski á land í mars samanborið við 6,442 tonn árið áður.

Mjög góð aflabrögð hafa verið hjá Suðurnesjabátum síðustu vikur. Tala sjómenn um að þeir hafi aldrei séð eins mikið af fiski á miðunum og skilja ekki vísindi Hafró um hnignandi þorskstofn. Krókabátar úr Grindavík hafa verið að gera það gott og raða sér efst á aflalista vefsíðunnar www.aflafrettir.com. Ef marsmánuður er skoðaður trónir Þórkatla GK efst á listanum með 157 tonn úr 20 róðrum, Óli á Stað kemur næstur með 146 tonn og Hópnesið er í þriðja sæti listans með 132 tonn.

Af stærri vertíðarbátunum er Erling KE efstur á aflalistanum með rúm 900 tonn úr 41 sjóferð.