Ég neita að trúa þessu

Nýleg skoðanakönnun sem Fréttablaðið gerði um fylgi stjórnmálaflokkana hér í Reykjanesbæ kom kannski ekki sérstaklega á óvart. Samkvæmt þeim heldur D-listi sjálfstæðismanna meirihluta sínum, enda unnið mjög gott starf fyrir bæjarfélagið.

Undir forystu Árna Sigfússonar bæjarstjóra hefur bærinn tekið stakkaskiptum. Hér hefur verið byggt sterka innviði, umhverfið verið fegrað, vel haldið á málefnum barna og fjölskylda og málefni eldri borgara verið sett ofarlega á oddinn. Fyrst og fremst má þakka forystu Árna í atvinnumálum, velvilja hans og áræðni að svo mörg atvinnutækifæri eru í burðarliðnum á næstu grösum.

Það sem kemur hinsvegar verulega á óvart í þessari skoðanakönnun er að Vinstri grænir séu að mælast með mann inni. Eftir allt sem á undan er gengið hélt ég að við hér í Reykjanesbæ værum skynsamari en svo að kjósa þann flokk sem hefur barist gegn allri atvinnuuppbyggingu hér á svæðinu. Ekki nóg með að umhverfisráðherra hefur tafið fyrir byggingu Norðuráls í Helguvík, þá hefur andstaðan einnig snúið að ýmsum verkefnum upp á Ásbrú, t.d. flugþjónustuverkefni og eins uppbyggingu sjúkrahússins á vellinum. Ekki eru íbúar búnir að gleyma framgöngu heilbrigðisráðherra, sem hefur tekið frá okkur starfsemi skurðstofanna á Heilbrigðisstofnun Suðurnesja og virðist svo ekki hafa áhuga á að heimamenn taki við rekstrinum í hennar stað. Þetta eru Vinstri grænir.

Oddviti Vinstri grænna, sem yrði bæjarfulltrúi ef þessi skoðanakönnun kæmi úr kjörkössunum er að mestu á sama máli og félagar hans í ríkisstjórninni. Hann leggist gegn uppbyggingu álvers í Helguvík. Hann er á móti flugþjónustuverkefni á Keflavíkurflugvelli, sem getur skapað 300 störf og er væntanlega sama sinnis og ráðherra sinn um að leggja eigi niður skurðstofur á Heilbrigðisstofnun Suðurnesja. Hann er allavegna andsnúinn fyrirtæki í einkarekstri í heilbrigðisþjónustu, sem ætlar að byggja upp gamla spítalann upp á Ásbrú og skapar um hundruði starfa á næstu árum.

Ég neita að trúa að niðurstaða kosninganna verði með þessu móti.

Ingólfur Bárðarson