Heilsa kvenna

Í tilefni af bleikum október er vert að vekja athygli á heilsu kvenna en á hverju ári í október er árlegt átaksverkefni Krabbameinsfélagsins, Bleika slaufan, tileinkað baráttunni við krabbameini hjá konum. Lýðheilsuvísar frá Embætti landlæknis sýna að þátttaka kvenna í skimun fyrir leghálskrabbameini og brjóstakrabbameini hefur verið minni á Suðurnesjum í samanburði við önnur heilbrigðisumdæmi. Það er ljóst að úr þessu þarf að bæta og eru konur á Suðurnesjum því hvattar til þess að fara reglulega í skimun til þess að láta fylgjast betur með heilsufari sínu. Ljósmæður á Heilbrigðisstofnun Suðurnesja sjá nú um skimun fyrir leghálskrabbameini og hægt er að panta tíma með því að hringja í afgreiðslu HSS og á heilsuvera.is. Skimun fyrir brjóstakrabbameini fer hins vegar fram á höfuðborgarsvæðinu og eru konur hvattar til þess að bóka tíma þegar þær fá boð í slíka skimum. 

Samkvæmt skýrslu um stefnu Evrópudeildar Alþjóðaheilbrigðismálastofnunarinnar um heilsu kvenna þá geta áhættuþættir eins og reykingar, óheilsusamlegt mataræði, hreyfingarleysi og misnotkun áfengis, aukið hættuna á þróun langvinnra sjúkdóma fyrr á ævinni s.s. sykursýki, háþrýstingi og offitu. Meira en 50% kvenna í Evrópu eru í yfirþyngd og hafa ungar konur minnkað hreyfingu og í mörgum löndum í Evrópu eru þær að ná körlum í notkun tóbaks og áfengis. Hjarta- og æðasjúkdómar eru áfram stór hluti af heildar sjúkdómsbyrði kvenna og tíðni andlegrar vanheilsu hefur aukist á öllum svæðum í Evrópu þá sérstaklega meðal ungra kvenna.

Það er mikilvægt fyrir okkur konur að huga að heilsu og vellíðan okkar. Við þurfum að setja heilsuna í forgang og gera breytingar á lífsstíl okkar ef þess er þörf. Breyting til batnaðar á einstökum þáttum eins og að velja heilsusamlegt mataræði, stunda reglulega hreyfingu og passa upp á svefn og streitu eru grunnstoðir góðrar heilsu. Þessir þættir geta dregið úr áhættu á langvinnum sjúkdómum, ásamt því að stuðla að betra jafnvægi bæði andlega og líkamlega. 

Ásdís Ragna Einarsdóttir,

verkefnastjóri lýðheilsumála hjá Reykjanesbæ