Grímsi GK blár eða rauður?

Sjómannahelgin er nýafstaðin og vil ég byrja á því að óska sjómönnum og fjölskyldum þeirra til hamingju með daginn. Ansi mikið breyst á liðnum árum, núna var bara hátíð í Grindavík en frá um 1950 og eitthvað fram yfir aldamótin þá voru hátíðarhöld líka í Sandgerði og Keflavík. En ekkert var í gangi þar, en það var þó sjómannamessa í Sandgerði, Garði og Reykjanesbæ og voru þær messur vel sóttar.

Annars er að færast smá ró yfir bátana á Suðurnesjunum, en þó eru nokkrir dragnótabátar á veiðum. Siggi Bjarna GK og Sigurfari GK hafa verið við veiðar við suðurströndina frá Vík og austur að Gígjukvísl. Þeir hafa landað í Þorlákshöfn. Siggi Bjarna GK kom með fullfermi þangað, 31 tonn, og var steinbítur uppistaðan í þeim afla, 12 tonn og tæp 8 tonn af ýsu. Sigurfari GK hefur landað í Þorlákshöfn um 85 tonnum í 2 róðrum og eins og hjá Sigga Bjarna GK þá er líka steinbítur uppistaðan í aflanum eða um 40 tonn.

Í Sandgerði eru þrír bátar á dragnót, Benni Sæm GK sem hefur landað 28 tonnum í 4 róðrum. Stapafell SH með 22 tonn í 4 og Aðalbjörg RE sem er með 44 tonn í 4. Mjög blandaður afli er hjá öllum þessum þremur bátum en þó mest af ýmsum kolategundum.

Netabátarnir í Keflavík og Njarðvík eru svo til allir hættir veiðum og er Grímsi GK kominn í slipp en sá bátur hét upprunalega Vesturborg GK þegar að báturinn kom fyrst til Íslands en þá átti Valdimar ehf. í Vogum bátinn og fékk hann nafnið Valdimar GK 195 árið 2000. Hann hefur alla sína tíð verið á Suðurnesjunum á línu og verið blár á litinn, þangað til að báturinn var seldur til fyrirtækisins Admiral ehf., en á bak við það fyrirtæki er Sighvaldi Eiríkur Hólmgrímsson, sonur Hólmgríms sem ég hef margoft skrifað um hérna í þessum pistlum mínum. Hólmgrímur hefur gert út marga báta í gegnum tíðina og alla á netum og allir hafa verið rauðir. Þar sem Valdimar GK var alla sína tíð línubátur þurfti að breyta honum töluvert mikið til þess að hægt væri að stunda netaveiðar á honum. Núna er báturinn sem sé kominn í slipp í Njarðvík og verður forvitnilegt að sjá hvort báturinn komi úr slippnum blár eða þá rauður, en það er liturinn sem Hólmgrímur vill helst hafa á sínum bátum og Sigvaldi er sammála honum því að hann segir að báturinn yrði fallegur rauður.

Og já, ég er eiginlega sammála honum, held að Grímsi GK verði fallegur rauður á litinn.