Viltu læra vélgæslu, kínversku eða bæta lestrarhæfni

Mikil fræðsla hefur farið fram hjá Miðstöð símenntunar á Suðurnesjum frá stofnun hennar. Guðjónína Sæmundsdóttir, forstöðumaður MSS segir einkar ánægjulegt að hér á svæðinu séu einstaklingarnir meðvitaðir um mikilvægi þess að viðhalda sér bæði í starfi og kanna nýja áhugaverða hluti. Námskrá MSS kom út s.l. fimmtudag og heyrðu Víkurfréttir í Guðjónínu Sæmundsdóttur um starfið á komandi önn.

Hvað er helst í boði hjá MSS á þessari önn?

Námskeiðin okkar eru margvísleg að vanda. Við erum með margskonar tómstundanám s.s. matreiðslunámskeið, skák, köfun, ullarþæfingu, að sauma víkingaklæðnað, skartgripasmíði, tréútskurð, að gera upp gömul húsgögn, myndlistarnámskeið o.s frv. Við bjóðum upp á starfstengd nám s.s vélgæslu, fagnámskeið fyrir starfsfólk á leikskólum, námskeið í betri skilning á upplýsingum úr bókhaldi, þekkingarstjórnun, kennslufræði fullorðinna og námskeið fyrir starfsfólk í heilbrigðisþjónustu. Við bjóðum upp á ýmis námskeið til að bæta lestrarhæfni. Meðal annars bjóðum við upp á greiningu fyrir þá sem telja sig eiga við lesblindu að stríða og hafa stéttarfélögin komið þar að og niðurgreitt fyrir sína félagsmenn. Í boði er námskeið fyrir einstaklinga sem greinast með lesblindu, einnig námskeið fyrir þá sem þurfa að bæta starfsetningu sína og svo bjóðum við upp á hraðlestrarnámskeið en það hentar t.d. þeim sem eru í námi bæði framhaldsskóla og háskóla. Einnig er í boði nokkur tungumálanámskeið þar á meðal enska, spænska, kínverska og íslenska fyrir útlendinga. Við höfum verið að vinna í verkefni sem snýr að því að fá ófaglærða til að fara í iðnnám. Námið er að hefjast nú í janúar og er enn hægt að bæta við þátttakendum og því vil ég hvetja áhugasama um að hafa samband.

Hvernig hafa viðbrögðin verið?

Viðbrögðin við námskeiðunum hafa verið góð og er um að gera að skrá sig sem fyrst til að vera öruggur um pláss.

Hefur verið góð þátttaka á námskeið MSS undanfarin ár?

Það hefur verið mikil fræðsla sem hefur farið fram hjá okkur sem er einkar ánægjulegt því að það sýnir að hér á svæðinu eru einstaklingarnir meðvitaðir um mikilvægi þess að viðhalda sér bæði í starfi og kanna nýja áhugaverða hluti.