Verkfræðinemar í Vörðunni
Verkfræðinemar á þriðju önn í Háskóla Íslands komu í heimsókn til Sandgerðis sl. föstudag. Heimsóknin var í tengslum við verkefni sem fólst í því að kanna ástand umferðar og skipulags í Sandgerði á tímabilinu 14 til 16 þennan tiltekna föstudag.Nemendur áttu að fylgjast með umferðinni eins og hún kom fram þennan dagspart og meta hvernig umferðarmannavirkin virka auk þess að afla upplýsinga um skipulag samgangna og annarra atriða sem við málið koma. Sérstaklega voru aðalgöturnar og helstu gatnamót í Sandgerðu höfð undir smásjá.
Fengið var álit fólks á förnum vegi um hvað megi betur fara og einnig voru álit fengin hjá kennurum í grunnskólanum og leikskólanum, en álit þeirra getur vegið þungt við vinnslu verkefnisins varðandi öryggi gönguleiða í og úr skóla.
Nemendum var skipt í fimm hópa og í hverjum hópi voru þrír til sex einstaklingar. Hver hópur er ábyrgur fyrir sínum kafla í lokaskýrslu. Einn ritstjóri var tilnefndur sem sér um heildaryfirbragð skýrslunnar og einnig mun hann sjá um að rita formála.
Einstakir hópar fjölluðu um eftirfarandi og mun kaflaskipting skýrslu vera með þessum hætti einnig:
1. Gatnaskipulag almennt, flokkun gatna o.þ.h.
Hér verði gert kort af gatnakerfinu, þar sem fram komi flokkun gatna í stofnbrautir, tengibrautir, safngötum og húsagötum. Greint verði frá einstefnu gatna og tegundum gatnamóta. Allt sýnt á einu korti.
2. Umferðarálag á götum og vegum
Hér verði unnið úr fyrirliggjandi upplýsingum auk talninga, sem fram fara á aðalgötunni í a.m.k. einn klukkutíma.
3. Hraði á einstökum götumUnnið úr fyrirliggjandi gögnum. Mælingar gerðar á ökuhraða með radar. Hraðahindranir kortlagðar.
4. Hættulegir staðir: gatnamót, gangbrautir
Farið yfir slysatölfræði bæjarins. Með skoðun á útsýni við gatnamót og gangbrautir verði bent á hættur. Hugað að gönguleiðum skólabarna.
5. Göngustígar - hjólastígar - reiðleiðir
Stígakerfi bæjarins kortlagt. Ástand (gerð) einstakra stíga metið, kannað hvað aðalskipulag segir um stígakerfi framtíðar.
Nemendur skila lokaskýrslu um verkefnið í lok nóvember n.k. og er Sandgerðisbæ heimilt að nýta sér innihald hennar.
Af vefnum www.245.is
