Vel heppnaður fjölskyldudagur

Fjölskyldudagurinn var haldinn hátíðlega við slökkvistöðina í Keflavík sl. laugardag. Slökkviliðið og Björgunarsveitin Suðurnes voru með allan sinn búnað til sýnis á svæðinu. Þá var kynnt endurlífgun í tjaldi RKÍ.
Dagskráin hófst með því að Benjamín Vilhelmsson, fulltrúi frá Ólafi Gíslasyni & co, afhenti Ellerti Eiríkssyni formanni stjórnar BS nýja slökkviliðs- og björgunarbifreið til afnota. Nýja slökkviliðsbifreiðin er af tegundinni Ford 550 XLT/Rosenbauer 4x4 með 230 hestafla dísel vél. Bifreiðin er með rými fyrir fimm menn, þar af einu sæti með innbyggðu reykköfunartæki fyrir reykkafara, en alls eru þrjú ný reykköfunartæki á bifreiðinni. Bifreiðn er einnig útbúin með fullkomnum vökvadrifnum björgunarbúnaði sem samanstendur af klippum, glennum, tjökkum og ýmsum öðrum búnaði til að ná fastklemmdu fólki úr bílflökum. Þá er öflug háþrýst og lágþrýst slökkviliðsdæla í bifreiðinni. Hlutverk bifreiðarinnar er að anna öllum umferðarslysum á svæðinu og stytta útkallstíma liðsins í jaðarbyggðir, en bifreiðin er léttbyggð og aflmikil með mikla yfirferðareiginleika og mun hraðskreiðari en sú sem fyrir er.
Um 1000 og 1500 manns heimsóttu slökkviliðið á laugardaginn. Gestir gátu skoðað búnað og kynnti sér störf liðsins, m.a. var sýnd reykköfun, notkun á eldvarnarteppi, myndband um brunavarnir, björgun fólks af þaki, leitarhundar Björgunarsveitarinnar Suðurnes leituðu að fórnarlambi, getraun og margt fleira.
„Ég vil þakka öllum sem komu að undirbúningi og framkvæmd þessa dags. Dagurinn var sannkallaður fjölskyldudagur og við munum alveg örugglega endurtaka þetta að ári“, segir
Sigmundur Eyþórsson, slökkviliðsstjóri BS.