Útrás fyrir sköpunargleðina og hvíld frá daglegu amstri

Nemendur Reynis Katrínarsonar, myndlistarmanns, opna sýningu á verkum sínum á Glóðinni sunnudaginn 17. júní kl. 14. Sýningin verður opin út mánuðinn og er bæði á efri og neðri hæð hússins.

Mynd: Einar Guðberg með dóttursyni sínum.Reynir Katrínar hefur boðið uppá myndlistarnámskeið undanfarin tvö ár og verkin á sýningunni eru afrakstur sl. vetrar. Hópurinn sem nú sýnir kallar sig „vertueinsogþúert“ en stór hluti hópsins eru búinn að vera hjá Reyni í 1-2 ár. Verkin eru öll unnin með olíu eða akríl.
„Flestir sem koma til mín hafa fengist eitthvað aðeins við myndlist og vita þegar hvað þeir vilja gera og hafa sinn stíl. Ég veiti því hverjum og einum leiðsögn við hæfi sem gefur möguleika á fjölbreytni“, segir Reynir. Hann hefur varla sleptt orðinu þegar hann er rokinn í burtu því það er nóg að gera við að hengja upp málverk þegar blaðamaður VF lítur í heimsókn á Glóðinni.
Reynir hóar í Einar Guðberg sem er búinn að vera mjög virkur í hópnum sl. fjögur ár. „Ég byrjaði í Baðstofunni árið 1997 og hef verið hjá Reyni síðan 1998“, segir Einar. „Ég fór beint út í olíuna og hef verið nánast eingöngu í henni.“
Aðspurður segist Einar hafa farið á námskeið til að láta gamlan draum rætast en hann hafði alltaf haft gaman af teikningu, en aldrei málað. „Mig langaði að láta á þetta reyna og þegar ég byrjaði þá fann ég hvað ég fékk mikla útrás fyrir sköpunargleðina. Þegar ég mála þá dreifi ég huganum og fæ hvíld frá daglegu amstri. Mér finnst líka gaman að eiga tómstundargaman sem ég get snúið mér að þegar starfsferlinum lýkur“, segir Einar að lokum.
Linda Oddsdóttir er ein þeirra sem sýnir á Glóðinni en það má segja að þar fari mikil hæfileikamanneskja. Hún er hógvær og ætlaði alls ekki að fara á myndlistarnámskeið á sínum tíma. Maðurinn hennar skráði hana á námskeið fyrir tveimur árum síðan og hún viðurkennir að hafa ekki verið hrifin í fyrstu. „Ég hafði aldrei málað áður og ætlaði ekki að þora að mæta í fyrsta tímann. Í dag er ég ánægð að maðurinn minn skuli hafa drifið mig af stað því hópurinn sem ég er í, er ótrúlega jákvæður og hvetjandi og myndlistin hefur gefið mér mjög mikið. Það er alveg á hreinu að ég ætla að halda áfram að mála“, segir Linda brosandi

Mynd: Hluti af hópnum sem sýnir á Glóðinni. Alltaf stutt í brosið..