Utanlandsferð í boði í ritgerðasamkeppni Lions

Lionsklúbburinn Æsa í Njarðvík hefur ákveðið að efna til ritgerðasamkeppni til að velja þátttakanda í alþjóðlegt unglingaskiptiverkefni næsta sumar.

Sigurvegara samkeppninnar gefst tækifæri til að fara erlendis og upplifa menningu annarra landa, en ritgerðarefnið er „Heimabyggðin mín". Þar mega unglingar á aldrinum 17-20 ára fjalla um sína heimahaga á um það bil tveimur til þremur A4 blaðsíðum.

Unglingaskipti Lionshreyfingarinnar hefur verið starfrækt í áraraðir og hefur gefið afar góða raun að sögn Kristjönu Guðlaugsdóttur sem gegnir embætti unglingaskiptastjóra fjölumdæmisins. „Hingað til hafa allir verið mjög ánægðir með skiptin. Unglingarnir eru úti í 2 til 3 vikur og dvelja í unglingabúðum sem haldnar eru á vegum Lions sen og í heimahúsum. Þar fá þau tækifæri til að kynnast menningu, náttúru og daglegu lífi í öðrum löndum."

Á meðal þeirra landa sem ungmenni fra Íslandi gætu farið til í ár eru Norðurlöndin, Þýskaland, Ungverjaland, Tyrkland og fleiri. Lionshreyfingin ber allan kostnað af flugferðum og uppihaldi í búðunum.
Ritgerðunum má skila ásamt greinargóðum upplýsingum um höfund til Geirþrúðar F. Bogadóttur (s: 421 2903), Jóhönnu Þórmarsdóttur (s: 421 3693) eða Sóleyjar Höllu Þórhallsdóttur (s: 421 1506).

Mynd: Hópur krakka frá 11 löndum sem kom hingað til lands sumarið 2001 í unglingaskiptum Lions. Þeir gistu í Garði en sjást hér í Bláa lóninu.