Undirbúningur fyrir Fegurðarsamkeppnina á fullu

Á bakvið stelpurnar stendur einvalalið í hárgreiðslu, förðun, líkamsrækt og framkomu. Allir þessir þættir skipta miklu máli fyrir stelpurnar. Víkurfréttir slógu á þráðinn til þeirra sem sjá um hárgreiðslu og förðun stelpnanna sem taka þátt í fegurðarsamkeppninni.
Kolbrún Ída Harðardóttir hárgreiðslukona á hárgreiðslustofunni Edilon segir að náttúrulegir litir séu í tísku núna. „Við ætlum að hafa greiðslurnar náttúrulegar og látlausar,“ segir Kolbrún og henni líst mjög vel á hópinn. „Þetta eru fallegar stelpur og hópurinn mjög skemmtilegur. Þetta verður spennandi keppni.“
Bryndís Knútsdóttir hárgreiðslukona á hárgreiðslustofunni Kamillu í Garði segir að það sé allt í gangi í hártískunni. „Stelpurnar verða með fléttur, slétt hár og það er bara allt í gangi,“ segir Bryndís og líkt og Kolbrún líst henni mjög vel á hópinn sem tekur þátt í fegurðarsamkeppni Suðurnesja. „Þetta er fallegar og fínar stelpur og hópurinn góður sem tekur þátt.“
Ingveldur H. Sigurðardóttir förðunarfræðingur hjá Lyf og Heilsu í Keflavík sér um að farða keppendurna. Ingveldur segir að vorlitirnir séu mikið notaðir núna. „Það er voða mikið blátt og bleikt sem við notum til að undirstrika fegurð og ferskleika stelpnanna,“ segir Ingveldur en einungis eru notaðar snyrtivörur frá Dior. Ingveldi lýst vel á hópinn. „Þetta eru allt saman glæsilegar stúlkur og ég get með engu móti veðjað á hver muni vinna.“
