Undirbúa snjóstríð

„Það er bara gaman að vera með strákunum í snjónum,“ sögðu stelpurnar í einum kór og voru bara ánægðar með strákana í 4. SH í Njarðvíkurskóla þar sem þau léku sér í snjónum við skólann. Þau voru í fríi vegna þess að leikfimiskennarinn var með veikt barn heima „eða eitthvað svoleiðis,“ eins og krakkarnir sögðu. Þeim finnst gaman í snjónum og vildu að hann kæmi oftar, en þegar hann lætur sjá sig nota þau hverja mínútu. „Núna erum við að undirbúa snjóstríð sem verður í frímínútunum á eftir,“ sögðu strákarnir nokkuð sigurvissir. „Við ætlum að byggja virki hérna ofan á hólnum.“
Krakkarnir voru hressir og þegar þau voru spurð að því hvort þau vissu hvernig snjórinn yrði til svöruðu þau: „Það þarf að vera eitthvað svona fjögurra til fimm stiga frost til að snjórinn komi. Rigningin frýs og kemur niður sem snjór,“ sögðu þau með bros á vör.
„Hey, þú þarna - komum við í Víkurfréttum?“ spurðu þau áður en blaðamaður hvarf af vettvangi og þegar þeim var svarað játandi hlupu þau í dauðans ofboði í átt að Njarðvíkurskóla, öskrandi: „Jibbí, við komum í Víkurfréttum.“

VF-ljósmynd/Jóhannes Kr. Kristjánsson: Hressir krakkar úr 4. SH í Njarðvíkurskóla leika sér í snjónum.
Efst: Steindór
Miðröð: Hinrik, Eyjólfur, Ólafur, Pétur
Neðst: Amelía, Linda, Birta